Liike 15
15
Lè wĩ̀i lɛ ɛ́ wɛ̃̀ à pirɔ lɛ vṹnun àá lé vɛ̃hṹ lɛ vṹnun bòo hũn
Mat 18.12-14
1Ɓɛ̀ lànpó-fériè àá ɓɛ́ bɔ̀konwériè ɓɛ́kùi ɛ́ hàarí wóò ɓen Yiezu viì, ɛ̀ ɓen ɲí piè biehĩ́. 2Ɛ́ ɓɛ́ Farizĩɛɓɛ àá ɓɛ́ làndɛ́ kɛ̀ránliè ɛ́ Yiezu wan ɛ́ nɛ làa: «Àpe nùún lɛ ɛ́ wóò fùansí ɛ̀ ɓɛ̀ bɔ̀konwériè ɛ̀ kansí àá ɔ́, à lò dí àá ɓɛ́.» 3Ɛ́ Yiezu khie wɛ̃̀ lè wĩ̀i lɛ ɛ́ lɛ́ ɓà ǹ ɛ́ nɛ làa: 4«A wieni mì tĩ́ihṹ kɛ́ á dàa pirìe khĩminù (100), kɛ́ wìcóoní ɛ́ vṹnun, á yá fùansí ɓɛ́pe kĩ̀mí àá pírú àá biè kaani (99) sí kɛ́ ǹ hɔ̀ maa hũn à ɛ́ lan vɛ́ cɛ̀ àpe lɛ vṹnun fúu kɛ́ á mɔn ɔ̀? 5Á ɓen van mɔn ɔ̀, á wɛni míte, à mìí ɔ́ ɛ́ yòó bè mí bɛ̀khɛ̀á lɔ̀n, 6à ɛ́ lan ɓɔ, ɛ́ vɛ́ ve ɓá pàáɓɛ́ àá ɓá yíe nìɛ à bie lɛ́ ɓà ǹ nɛ: “Mì ɓen kè páaní wɛní kéte, iè hɔ̀ lɛ ɛ́ ń mɔn niǹ pirɔ lɛ hṹn vṹnun.” 7Ɛ́ nin khɛ́ hɔ́ lɛ́ miɛ ǹ nɛ sí ɓiɛ̀ iè hɔ̀pe ɓà ńmaà, kɛ́ bɔ̀konwé wìcóoní ɛ́ zɛ̀niɛ mí tĩì à fùɛrɛ̀sí mí bɔ̀koohɛ̃ wénlɔ́ ǹ, ɛ̀ lè tĩwiɛ̀ lɛ wóò yòó wé hɔ́ hóohũn piè bòo hũn ɛ́ pɔ le lɛ ɛ́ wóò wé nìcã̀aníriè kĩ̀mí àá pírú àá nìɛ káani (99) bòo hũn, lɛ pe nɛ ɓɛ́ mɛ̀kó mí tĩì zɛ̀nírɔ́n wɛ̀.»
8«Tàá kɛ́ hṹnu dɔ̀ ɛ́ dàa wɔ́-zɛ̀ɓɛ̀ binbiè pírú, kɛ́ dìcóoní ɛ́ vṹnun piè zũnù hũn, á yá ɲíi mí pɛ̃̀ntĩ́ní, à tàa mí zũnù à cɛ̀ lè fúu kɛ́ yí bòo á van mɔn lè? 9Á ɓen mɔn lè, á ve ɓɛ́ ɓàaɓɛ̀ àá ɓá yíe nìɛ à bie lɛ́ ɓà ǹ nɛ: “Mì ɓen wɛní míte àá mi iè hɔ̀ lɛ ɛ́ niǹ vɛ̃hṹ lɛ hṹn vṹnun ɛ́ ń mɔn.” 10Ɛ́ nin khɛ́ hɔ́ lɛ́ miɛ ǹ nɛ sí ɓiɛ̀ iè hɔ̀pe ɓà ńmaà ɛ́ Dɔfĩn mɛlɛkɛɓɛ ɛ́ ɓiɛ̀ wóò wɛní ɓɛ́te à bɔ̀konwé wìcóoní bòo hũn, lɛ kɛ́ á fùɛrɛ̀sí mí bɔ̀koohɛ̃ wénlɔ́ ǹ.»
À nùún dɔ̀ lɛ yɛ̀nù vṹnun kɛ́ á khũ̀a mɔn ɔ̀ bòo
11Ɛ́ Yiezu ɛ́ bĩniɛ zɔn bie ɛ́ nɛ làa: «Nùún dɔ̀ hàarí dàa zɛ̀ɓɛ̀ bìɛ ɲu. 12Á fɔ̀rɔ ɛ́ bie lɛ́ ɓá yàá ǹ nɛ: “Ǹ yàá, sankɛ hɔ yírɛ́ ɛ̀ kɔ̀ lɛ́ niǹ hɔ́n.” Á yàá ɛ́ sankɛa mí yírɛ́ ɛ́ lɛ́ mí zɛ̀ɓɛ̀ bìɛ ɲu sɔ ǹ. 13Ɛ́ hɔ́ yí khíi míi, à fɔ̀rɔ ɛ́ yìɛniɛ mí hɔ́n à cɔ́ van cɛ̃̀mɛ̀nɛ́ dɔ̀ lɛ ni hũn àá mí màa, ɛ́ van yaakɛa hɔ̀ ńwékɛkũǹ hũn. 14Ɛ́ hɔ́ lɛ á lɛ̀ mí màa míkùi vɔ́, ɛ́ hĩn-bɛhɔ́ dɔ̀ ɛ́ lɔ́ lépe cɛ̃̀mɛ̀nɛ́ sɔ hũn, ɛ́ hɔ́ bòo míkùi ɛ́ wo yòó ɔ̀ yèń nin. 15Á hĩ́nà van wɔ́ lé cɛ̃̀mɛ̀nɛ́ sɔ nùún dɔ̀ tɔntɛ́, á nùún sɔ ɛ́ fɔ́ á viɛniɛ mí mún hũn, nɛ a vɛ hɛ̃ mí nɛ̀nbùɛhĩ́. 16Ɛ́ ɓɛ́pe nɛ̀nbùɛhĩ́ díe lɛ ɓɛ́ wóò dí á yɛ̀rɛ́ hṹn wɛ mii wóò dí, kɛ́ nìnbírɔ dɔ̀ den yá hɔ̀ lɛ́ à ǹ wɛ̀. 17Á síɛ mí hũn vɛ̀ ɛ́ bie nɛ: “Ǹ yàá tɔntɛ́riè ɓɛ́kùi ɛ́ wóò dí ɓɛ́ díe tɛ ɛ̀ hɔ̀ yá vé, kɛ́ ǹpe lɛ ɛ́ hɔ hĩ́ní mii ɓé hũ̀nún. 18Nin khũ̀á vɛ ǹ yàá viì ɛ̀ vɛ bie lɛ́ à ǹ nɛ ń wɔ́ bɔ̀koohɔ́ àá Dɔfĩn, ɛ̀ ǹ lò wɔ́ bɔ̀koohɔ́ àá ɔ́, 19ɛ́ ń wo yí bĩniɛ fɔ́ɓán ɛ̀ ǹ wé piè zuú wɛ̀. Nɛ a dàa mi kɛ̀a mí tɔntɛ́ dɔ̀.” 20À hĩ́nà khũ̀a vaá-vɛ ɓá yàá viì. Ɛ́ bòo lɛ á van ɓá yíe ɛ̀ lúwìnínin, lɛ kɛ́ piè viì lò pɛwi van ni, ɛ́ ɓà yàá mɔn ɔ̀, ɛ́ piè miinɛ̀ ɛ́ yòó ɓaa ɔ̀ cɛ̃̀un, á hĩ́nà zɔ van sɛ̃́ piè híɛhɔ́, ɛ́ van siè ɔ̀ mí bàanì hũn. 21Á zuú zɔn bie nɛ: “Ǹ yàá, ń hɛ̀ wɔ́ bɔ̀koohɔ́ àá Dɔfĩn, ɛ̀ ǹ lò wɔ́ bɔ̀koohɔ́ àá kɔ, ɛ́ hɔ́ yí fɔ́ɓán ɛ̀ kɔ̀ wóo bĩní ve mi nɛ kɔ yɛ̀nù wɛ̀.” 22Kɛ́ ɓà yàá ɛ́ den khie bie lɛ́ mí tɔntɛ́riè ǹ nɛ làa: “Mì hĩ́ní fùa fùa ɛ̀ vɛ dàá lé pɔnkɔ̀rɔ́ lɛ sãa pɔ hɔ tĩ̀ɛ lɛ kɛ́ míkùi ɛ̀ ɓen zooní-ɛ, ɛ̀ mì dé lé nínkɛ́zuú dìɛ piè nínkɛ́zuú ǹ, ɛ̀ mì kóo hɔ́ naahĩ́ piè zehĩ́ ǹ. 23Ɛ̀ mì ɓaà ɔ̀ nɛ̀báa lɛ ɲiini wi ɛ̀ ɓen ɓé ɛ̀ mì nɛ ké dí lé sɛ́rí ɛ̀ kè wɛní kéte, 24iè hɔ̀ lɛ ɛ́ niǹ zuú lɛ mí loo ɛ́ iè wiè lɛ tan hṹn húrun kɛ́ á vìé, à hṹn vṹnun kɛ́ ké khũ̀a mɔn ɔ̀.” Ɛ́ ɓɛ́ wo khie ɓɛ́ lé sɛ́rí dínlɔ́ fìi. 25Hɔ́rɔsí àpe nùún zu-kĩ́ihṹ ɛ́ van wi hɔ mún hũn. Ɛ́ bòo lɛ á van khũ̀a lɔ́ hɔ́ maa ɛ́ ɓen, á mii ɓen lúwiní yíe ǹ, á ɲɛ́ hɔ́ yánbéhĩ́ àá hɔ́ yɔrɔ́ tĩ̀ɛ lɛ ɛ́ tɛ̀. 26Á khie vɔn ɔ̀ tɔntɛ́ dɔ̀ ɛ́ dìenin nɛ hɔ iè ńɓùo temu ɛ́ wé. 27Á tɔntɛ́ sɔ ɛ́ zɔn bie lɛ́ à nɛ làa: “Mì fɔ̀rɔ ɛ́ khũ̀a ɓɛrɛ, ɛ́ mì yàá dàa ɓɔ́ á nɛ̀báa lɛ ɲiini wi, iè hɔ̀ lɛ ɛ́ piè zuú ɛ́ khũ̀a ɓɛrɛ àá sɛkɛ-hiè.” 28Á zu-kĩ́ì ɛ́ tĩì síɛ hĩ́nà, à pɛ̃́ nɛ mí yá zɔ zũnù wɛ̀. Ɛ́ ɓà yàá ɛ́ lɔ́ van ɛ́ mii hɛ̃un ɔ̀ ǹ à ɓen zɔ. 29Á zɔn bie lɛ́ ɓá yàá ǹ nɛ làa: “Lɛ iè lɔ́líe bɔ̀kuì kɛ́ nin kɔ̀ tɔnlɔ́ ɛ̀ tɛ́, ɛ́ ń ɲɛùn yí pĩ́ yí mi nɛ ń yá ɲí kɔ́ bòo wɛ̀. Ɛ́ kɔ́ yɛ̀rɛ́ ɲɛùn yí lɛ́ hɛ̀rí wìí-zuú mi ǹ nɛ ǹ fé dàá dí sɛ́rí àá kè pàáɓɛ́ wɛ̀. 30Kɛ́ ápe kɔ̀ zuú lɛ van yáakɛa kɔ̀ yírɛ́ míkùi àá ɓɛ́ hã́a lɛ wóò yìɛní ɓɛ́te ɛ́ den van khũ̀a ɓɛrɛ, ɛ̀ kɔ̀ den khie ɓɔ́ a nɛ̀báa lɛ ɲiini wi.” 31Ɛ́ ɓà yàá zɔn bie lɛ́ à ǹ nɛ làa: “Niǹ zuú, kɔ̀pe ɛ́ wi yán fúu àá mi, ɛ́ niǹ bòo lɛ ń dàa míkùi ɛ́ kɔ́ te. 32Kɛ́ ké fɔ́ɓán ɛ̀ kè wɛní kéte ɛ̀ dí lé sɛ́rí iè hɔ̀ lɛ ápe mì zuú lɛ iè wìe lɛ tan hṹn húrun kɛ́ á vìé, á wìe lɛ hṹn vṹnun, kɛ́ ké khũ̀a mɔn ɔ̀.”»
Currently Selected:
Liike 15: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
