Liike 16
16
Bòo ɓàasɔ dɔ̀ yírɛ́ húirɔ lɛ hɛciri wi bòo
1Ɛ́ Yiezu ɛ́ zɔn ɛ́ bie àá mí kɛ̀ránzɛ̀ɓɛ̀ ɛ́ nɛ làa: «Bòo ɓàasɔ dɔ̀ hàarí dàa nìnbírɔ dɔ̀ lɛ te piè yírɛ́ bòo ɛ́ húi. Ɛ́ ɓɛ́ nìnbirìe ɛ́ ɓɛrɛ bie lɛ́ ápe bòo ɓàasɔ ǹ nɛ piè yírɛ́ húirɔ ɛ́ piè yírɛ́ yáakɛ. 2Ápe bòo ɓàasɔ ɛ́ vɔn ɔ̀ ɛ́ ɓɛrɛ bie lɛ́ nin nɛ làa: “Ń ɲɛ́ ɛ̀ ɓɛ̀ nɛ kɔ́ niǹ yírɛ́ yáakɛ. Ɛ́ kɔ́ ɓen zɛ̀sí hɔ́ bòo lɛ ɛ́ kɔ́ wɔ́ àá niǹ yírɛ́ nɛ n húi iè hɔ̀ lɛ ɛ́ kɔ́ yí kɔ bĩní húi niǹ yírɛ́ wɛ̀.” 3Á yírɛ́ húirɔ sɔ ɛ́ bie mí hũn nɛ: “Kè ɲúnsɔ ɓén tɛ́viɛní mi, ɛ́ ń wóò ɓén wiɛwiɛlɔ́? Ń lò wo yí dàa pànkɛ́ lɛ vɛ̀ bòo, ɛ̀ bòo hɛ̃nkɛrɔ́ lò lùwiè wi mi ǹ.” 4Á bĩniɛ khũ̀á zɔn nɛ: “Ãa, ń dũ bòo lɛ ɛ́ nin wé ɛ̀ ɓɛ̀ nìnbirìe dàá wóo penkɛ mi ǹ ɓɛ́ zĩhĩ́ɛ hũn pɛ̃̀hṹ lɛ kɛ́ ké ɲúnsɔ ɛ́ tɛviɛní mi.” 5Ɛ́ ɓɛ́ nìnbirìe lɛ ɛ́ peɓɛ̀ ɲúnsɔ kehĩ́ ɛ́ wikɛ nin á vɔnkɛ àá nì-cóohɛ̃ cóohɛ̃ nɛ ɓɛ ɓen. Á ɔ̀ hán nùún ɛ̀ dìenin ɛ́ nɛ: “Kè ɲúnsɔ kiè lɛ wi kɔ ǹ iè yɛ?” 6Á nɛ hɔ̀ iè yurɔ́ pɛ̃́n-bɛhɛ̃ khĩminù (100). Á yírɛ́ húirɔ zɔn bie lɛ́ à ǹ nɛ: “Ɛ́ kɔ́ fé kɔ́ kiè vɛ̃hṹ ɛ̀ kɔ̀ síɛ kansí fùa fùa ɛ̀ kɔ̀ wĩ́ bie nɛ hɔ iè pɛ̃́n-bɛhɛ̃ dɛ̀wɛ́ àá pírú (50).” 7Á bĩniɛ khie ɔ̀dɔ̀ dìenin nɛ: “Ɛ̀ kɔ̀pe, kɔ̀ kiè lɛ kɔ́ dú ɛ́ iè yɛ?” Á nɛ hɔ iè bɔ̀díe bùanìɛ khĩminù (100). Á yírɛ́ húirɔ zɔn nɛ “Ɛ́ kɔ́ fé kɔ̀ kiè vɛ̃hṹ ɛ̀ kɔ̀ síɛ wĩ́ bie nɛ hɔ iè bùanìɛ kĩ̀mí (80).” 8Àpe yírɛ́ húirɔ bòo lɛ á wɔ́ ɛ́ pe wo yí sãa wɛ̀. Kɛ́ peɓɛ̀ ɲúnsɔ ɛ́ den pɛ́wi ɓàaniɛ ɔ̀ ǹ iè hɔ̀ lɛ á wɔ́ hɔ́ àá hɛciri. Ɛ́ lépe dímíɲɛ́ lɛ nìɛ ɛ́ den hɛciri wi cɛ̃̀un ɓán tĩ́ihṹ ɓɛ́ bɔ̀werà hũn ɛ́ pɔ ɓɛ ńpiemu nìɛ.» 9Ɛ́ Yiezu zɔn bie sĩiniɛ nɛ làa: «Ɛ́ ǹpe ɛ́ bie lɛ́ miɛ ǹ nɛ hɔpe dímíɲɛ́ lɛ yírɛ́ lɛ yí ɲún siení lán iè pe ɛ́ mí wóo mìí ɛ̀ dàá cɛ̀ mì pàáɓɛ́. Kɛ́ pɛ̃̀hṹ lɛ kɛ́ hɔ́ ɓen va vɔ́, ɛ́ Dɔfĩn ɛ́ pen miɛ ǹ mí viì, pɛ̃̀hṹ lɛ́ yá vé hũn.»
10Ɛ́ Yiezu bĩniɛ zɔn bie ɛ́ nɛ làa: «Kɛ́ álɛ ɛ́ cã̀aniɛ mí ɲún bòo bɔ̀cíi ni hũn, ɛ́ piè ɲún ɛ́ ɓén cã̀aní bòo bɔ̀bɛ̃hɛ̃ hũn; àlɛ ɲún yá cã̀aní bòo bɔ̀cíini hũn ɛ́ lò ɓiɛ̀ ɲún ɛ́ yí dɛ̀ yá cã̀aní bòo bɔ̀bɛ̃hɛ̃ hũn wɛ̀. 11Ɛ́ mí ɓen yí dàń mí ɲúuhɛ̃ ɛ́ yí cã̀aní lépe dímíɲɛ́ lɛ yírɛ́ lɛ yá siení àá ɲún hũn, ɛ́ Dɔfĩn ɛ́ yá dé hɔ́pe yírɛ́ bɔ̀tente mì núnú hũn lò! 12Kɛ́ mí ɓen yí dàń mí ɲúuhɛ̃ ɛ́ yí cã̀aní hɔ́ yírɛ́ lɛ ɛ́ ɓɛ́ dɔ́ mí núnú hũn nɛ̀ mi húi bòo, ɛ́ Dɔfĩn ɛ́ yá lɛ́ hɔ́ yírɛ́ lɛ pe bòo sɛ̃̀ miɛ ǹ lò! 13Tɔ̀ntɛ́ wìcóoní ɛ́ yí dɛ̀ ɲúuhɛ̃siè bìɛ ɲu tɔnlɔ́ ɛ́ yá páaní tɛ́ wɛ̀. Á hán ɔ́ wìcóoní, à wɛniɛ sí kɛ́, tàá à cɛɓán àá ɔ́ wìcóoní, à sí kɛ́ á yìe yá tí wɛ̀. Ɛ́ mí yí dɛ̀ Dɔfĩn àá màa tɔnlɔ́ ɛ́ yá páaní ɛ́ tɛ́ wɛ̀.»
Moyiize làndɛ́ àá Dɔfĩn bɛ́záanú bòo
Mat 11.12-13; 5.31-32; Mar 10.11-12
14Ɛ́ ɓɛ́ Farizĩɛɓɛ ɛ́ ɲɛ́ hɔ́pe sí míkùi ɛ́ ɓɛ́ ɛ́ Yiezu yáakɛ, iè hɔ̀ lɛ ɛ́ ɓɛ́ den wɛ hɔ́ màa. 15Ɛ́ Yiezu zɔn bie lɛ́ ɓà ǹ ɛ́ nɛ làa: «Mí iè nìnbirìe lɛ wóò wé kɛ̀a biè lɛ ɛ́ cã̀aní ɓɛ́ nìnbirìe híɛhɔ́, kɛ́ Dɔfĩn pe dũ bòo lɛ ɛ́ mí lieníkɛ mi tĩɛ̀ hũn. Hɔ̀ bòo lɛ ɛ́ ɓɛ́ nìnbieriè ɛ́ wóo líi ɛ̀ ɓɛ̀ nɛ hɔ iè bɔ̀bɛhɔ́ ɛ́ den iè bɔ̀-cɛ̃̀hṹ Dɔfĩn viì. 16À Moyiize làndɛ́ àá ɓɛ́ Dɔfĩn bɔ̀háaníriè biehĩ́ ɛ́ kɛ̀rɛa ɓɛ̀ nìnbirìe fúu ɛ́ ɓen bɔ̀ à Zãn Batiisi pɛ̃̀hṹ ǹ. Ɛ́ dàá mìí ɔ́ Zãn Batiisi pɛ̃̀hṹ ǹ, ɛ́ lé Dɔfĩn bɛ́záanú Bentĩnu bòo ɛ́ buie ɛ̀ lɛ́ ɓɛ́ nìnbirìe ǹ. Ɛ́ hɔ́rɔ ɛ́ wo wóò pĩ̀iní míte ɛ̀ dàá yí vɛ zɔ yán. 17Kɛ́ hɔ́ den wuawi ɛ̀ hɔ̀ hóohũn àá lé sṹsùnù ɛ̀ khíi; hɔ̀ wuawi pɔ hɔ làndɛ́ bòo bɔ̀cíi dɔ̀ khíirɔ́. 18Nìnbírɔ kɛ́ á ɲɛun ɓá hṹnu à khie yan hɛ̃́-ɓuɛ̀, à iè hɛ̃́fé. Àlɛ ɛ́ khie yan hṹnu lɛ ɛ́ ɓà ɓɛ́rɔ ɛ́ ɲɛun, à kùusɔ iè hɛ̃́fé.»
Bòo ɓàasɔ àá ɔ́ nìkherà Lazaare bòo
19Ɛ́ Yiezu ɛ́ bĩniɛ zɔn bie ɛ́ nɛ làa: «Bòo ɓàasɔ dɔ̀ hàarí wi yán lɛ hàarí wóò zɔ hɔ tĩ̀ɛ lɛ yaamu hie hie fúu. Síntinlɔ́ míkùi hũn, à ɛ́ hɔ̀ dín-tĩɛ̀ ɛ̀ dí, kɛ́ á hɔ̀ bòo lɛ á wɛ ɛ̀ wé. 20Ɛ̀ nìkherà dɔ̀ ɓiɛ̀ hàarí wi yán lɛ yèrè ɛ́ ɓɛ́ nɛ Lazaare. Piè tɛkɛ̀a míkùi ɛ́ hàarí iè ńcɛ́kɛ̀a à hàarí wóò dɛsí-e pe bòo ɓàasɔ zĩínù ɲunù. 21Àpe bòo ɓàasɔ díe wɛ̀rànɓɛ̀ lɛ ɛ́ piè tɔntɛ́riè ɛ́ hàarí wóò tàa ɛ̀ vɛ lé kóosí, á hàarí wɛ ɛ́ wóo dí. Ɛ̀ bĩní páa yán, ɓɛ̀ bɔhĩ́ ɛ́ hàarí wóò ɓen dankɛ piè ńcɛ́kɛ̀a. 22Ápe nìkherà ɛ́ ɓɛrɛ húrun, ɛ́ ɓɛ́ mɛlɛkɛɓɛ ɛ́ ɓɛrɛ fɔ́ á dàa van yòó hɔ́ hóohũn à Abarahaamu sɛnù. Á bòo ɓàasɔ ɛ́ ɓiɛ̀ khie húrun ɛ́ ɓɛ́ wũ̀nɛ. 23Á bòo ɓàasɔ ɛ́ van wi ɓɛ nìhiè lóo hũn, ɛ́ hɛ̀ lɔ̀n be àá bɔ̀bín. Á mii húi vɛ yòoní, á mɔn ɔ̀ Abarahaamu kɛ́ ápe Lazaare ɛ́ kɛsí wi piè sɛnù. 24Á zɔn berɛ ɛ́ nɛ: “Kìe yàá Abarahaamu, mɛ niǹ miinɛ̀. Tɔn ɔ̀ Lazaare nɛ a vɛ dé mí nínkɛ́zuú ɲún hɔ̀ ɲumu hũn, ɛ̀ dàá ɓen síɛ wiɛní niǹ diɛnù, iè hɔ̀ lɛ ɛ́ niǹ lɔ̀n ɛ́ hɛ̀ ɛ́ be cɛ̃̀un hɔ̀pe dṹn lɛ hũn.” 25Ɛ́ Abarahaamu ɛ́ zɔn bie lɛ́ à ǹ nɛ làa: “Niǹ yɛ̀nù, bí nɛ kɔ hũn ɓé hɔ́ lɛ ɛ́ kɔ́ yú hɔ́ bòo míkùi lè sṹsùnù lɔ̀n, kɛ́ á Lazaare pe wɔ́ lɔ̀nbuò bɔ̀kuì á yú. Ɛ́ kɛ̀a sáalɛ, á ɓiɛ̀ wi mí tɛkɛ-wiɛ̀ hũn, kɛ́ kɔ́pe ɛ́ ɓiɛ̀ wi le lɔ̀nbiè hũn. 26Ɛ̀ bĩní páa yán, ńkɔ̀nkṹn dɛ̀bɛhɔ́ dɔ̀ ɛ́ wi ke tĩ́ihṹ, ɛ́ nìɛ lɛ wi hũ̀nún lɛ hṹn wɛ ɛ̀ ɓɛ̀ ɓen mì viì ɛ́ yí dɛ̀ hɔ̀ yá wé, ɛ̀ ɓɛ̀lɛ wi mi viì lɛ hṹn wɛ ɛ̀ ɓɛ̀ ɓen kè viì ɛ́ lò ɓiɛ̀ yí dɛ̀ hɔ̀ yá wé wɛ̀.” 27Á bòo ɓàasɔ ɛ́ zɔn nɛ làa: “Kɛ́ hɔ́ ɓen kiɛ́, ɛ̀ kɔ́pe kìe yàá, wé ɓɔ́nɓɔ́n ɛ̀ kɔ̀ tɔn ɔ̀ Lazaare nɛ a vɛ Kìe yàá zũnù hũn, 28lɛ ɛ́ kìe zɛ̀ɓɛ̀ hùanú ɛ́ wi hũn, ɛ̀ vɛ ɲì peɓɛ̀ zeǹ lɔ̀n, ɛ̀ ɓɛ̀ ɓiɛ̀ dàá bí ɓen lèpe lɔ̀nbiè viì sɔ lɛ hũn wɛ̀.” 29Ɛ́ Abarahaamu ɛ́ zɔn bie lɛ́ à nɛ làa: “À Moyiize làndɛ́ àá ɓɛ́ Dɔfĩn bɔ̀háaníriè ɛ́ ɓɛ́pe mì zɛ̀ɓɛ̀ ɛ́ dũ̀ bòo lò! Ɛ́ ɓɛ́ wóo ɲí peɓɛ̀ bòo!” 30Á bòo ɓàasɔ ɛ́ zɔn nɛ “Ǹɓùé, kìe yàá Abarahaamu, ɓɛ̀ yí tɛ̀ nɛ ɓɛ́ ɲí hɔ́ wɛ̀. Kɛ́ nìnbírɔ dɔ̀ ɛ́ hṹn lɔ́ ɓɛ́ nìnbirìe lɛ húrun viì ɛ́ khũ̀a van peɓɛ̀ viì, ɛ́ ɓɛ́ den ɛ́ zɛ̀ní ɓɛ́ tĩɛ̀ ɛ̀ ɓɛ̀ ɛ́ fùansí ɓɛ́ bɔ̀koohɛ̃ wénlɔ́ ǹ.” 31Ɛ́ Abarahaamu ɛ́ zɔn bie lɛ́ à ǹ nɛ làa: “Ɓɛ̀ ɓen yí ɓɛ́ ɲí-ɛ Moyiize làndɛ́ àá ɓɛ́ Dɔfĩn bɔ̀háaníriè bòo, ɛ̀ hɛ̀rí kɛ́ nìnbírɔ lɛ húrun ɛ́ pɛ́ hṹn van peɓɛ̀ viì, ɛ́ ɓɛ́ pɛ́wi yá tɛ̀ piè bòo wɛ̀.”»
Currently Selected:
Liike 16: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
