Marike 5
5
Khíerɔ dɔ̀ wiɛnírɔ́ Kerazeniiɓɛ lóo hũn
Mat 8.28-34; Lik 8.26-39
1Ɛ́ ɓɛ́ cankɛa hɔ̀ Kalile ɲun-bɛhɔ́ ɛ́ van lɔ́ lé san-cóoní lɛ kɛ́ lɔ̀n, ɛ́ van lɔ́ zɔn ɓɛ̀ Kerazeniiɓɛ cɛ̃̀mɛ̀nɛ́. 2Ɛ́ bòo lɛ ɛ́ Yiezu ɛ́ mii lé lé ɲumu wiè hũn síɛ lòo, ɛ̀ nùún dɔ̀ lɛ ɛ́ ńɲíkĩ́rɔ ɛ́ wi nin ɛ́ zɔn lɔ́ hɔ́ búo hũn ɛ́ ɓen lɔ́ sɛ̃́ piè híɛhɔ́. 3Piè zɔnlén ɛ́ hṹn iè hɔ̀pe búo tĩ́ihṹ, ɛ̀ nìnbírɔ dɔ̀ lɛ hṹn dàa ɛ́ cɛ, hɛ̀rí àá zɔ̀kɔ̀zɔ́kɔ́ɓɛ̀ ɛ́ mínɛ wɛ̀. 4Yìe cɛ̀rìɛɛ ɛ̀ ɓɛ̀ wóo kóo hɛ̃nlɛ̀a piè zehĩ́ ǹ, ɛ̀ ɓɛ̀ cɛ pìe níhĩ́ àá zɔ̀kɔ̀zɔ́kɔ́ɓɛ̀, kɛ́ á den wóo ɓùenkɛ hɔpe hɛ̃nlɛ̀a à fúakɛ hɔpe zɔ̀kɔ̀zɔ́kɔ́ɓɛ̀. Nìnbírɔ dɔ̀ lɛ pankɛ́ yú-ò ǹ, lɛ dàa ɛ́ ɓaà ɛ́ síɛ bìsí ɛ́ mí wɛ̀. 5Sṹnúhṹn àá wiɛhɔ́, à wi hɔ búo tĩ́ihũ àá hɔ́ ɓúkùo lɔ̀n ɛ́ wũamɛkɛ kɛ́ à míté ɛ́ wĩmikɛ àá hɔ́ sɛ̃̀nlɛ̀a. 6Á mɔn Yiezu kɛ́ piè viì ɛ́ van ni, á siɛ lìɛ ɛ́ van lúsí mí nunkɛ́yìe lɔ̀n piè híɛhɔ́, 7à zɔn bérɛ cɛ̃̀un ɛ́ nɛ: «Hɔ̀ ńɓùo ɛ́ kɔ́ ɛ́ cɛ̀ àá mi, Dɔfĩn lɛ wi hɔ bòo míkùi ɲún hũn Zuú Yiezu? Nín kɔ̀ ɓɔ́nɓɔ́ninin Dɔfĩn yèrè lɔ̀n nɛ kɔ bí vɛ́ niǹ ɲɛkɛ̃̀a wɛ̀!» 8À ɛ́ bie kɛ̀amu iè hɔ̀ lɛ ɛ́ Yiezu ɛ́ den bie lɛ́ à ǹ nɛ làa: «Ńɲĩ́kĩ́rɔ, lí-e pe nùún sɔ lɛ hũn!» 9Ɛ́ Yiezu ɛ́ zɔn ɛ́ ɔ̀ dìenin nɛ làa: «Kɔ̀ yèrè wɛrɛ̀?» Á zɔn nɛ: «Niǹ yèrè iè “Zãamaa” iè hɔ̀ lɛ ɛ́ ké buò.» 10Á hɛ̀ ɛ́ Yiezu ɛ̀ ɓɔ́nɓɔ́ninin nɛ a bí ɲɛ ɓɛpe ńɲíkĩ́nìɛ sɔ ɛ̀ líení lé cɛ̃̀mɛ̀nɛ́ sɔ hũn wɛ̀. 11Hɔ́rɔsí ɛ̀ ɓɛ̀ nɛ̀nbùɛhĩ́ dɔ̀ ɛ́ yòó wi le ɓúkìe sɛnù, ɛ́ dí yán. 12Ɛ́ ɓɛ́ ńɲíkĩ́nìɛ sɔ ɛ́ ɓɔ́nɓɔ́niɛ Yiezu ǹ nɛ a lɛ́ nɛ ɓɛ́ lé vɛ ɓɛpe nɛ̀nbùɛhĩ́ sɔ viì, ɛ̀ vɛ zɔ ɓɛ. 13Ɛ́ Yiezu nɛ ɓɛ lan vɛ zɔ. Ɛ́ ɓɛ́ zɔn lɔ́ á nùún sɔ ǹ ɛ́ van zɔn ɓɛ nɛ̀nbùɛhĩ́, ɛ́ ɓɛ́pe ɓɛ́kùi ɛ́ van yòó lɔ́ lé ɓúkiè sɛnù ɛ́ van síɛ zɔn hɔ̀ ɲumu ɛ́ hɔ́ ɲumu zɔn fɔ́. Ɓɛ̀ nɛ̀nbùɛhĩ́ sɔ ɛ́ hàarí ɛ́ dɛ̃ muasié ɲu (2 000). 14Ɛ́ ɓɛ́ nìnbirìe lɛ te ɓɛ hṹn sie ɛ́ zɔ̀ van zɔn bie hɔ̀ lè lóo hũn àá hɔ́ mɛhɛ̃ hũn. Ɛ́ ɓɛ́ nìnbirìe ɛ́ ɓɛrɛ lɔ́ ɛ́ hɔ̀ bòo lɛ ɛ́ wɔ́ ɛ̀ húi. 15Ɛ́ ɓɛ́ ɓɛrɛ ɛ́ ɓen yú Yiezu, àpe nùún lɛ ɛ́ ɓɛ́ ńɲíkĩ́nìɛ bìkuì ɛ́ hṹn wi nin ɛ́ zɔn hɔ̀ tĩ̀ɛ ɛ́ kɛsí sãa sãa ɛ́ bòo dɔ̀ ɛ́ mínɛ nin wɛ̀. Ɛ́ ɓɛ́ yòó zɛrɛ. 16Ɛ́ ɓɛ́lɛ ɛ́ mɔn hɔ̀ bòo lɛ ɛ́ wɔ́ á nùún sɔ ǹ àá ɓɛ́ nɛ̀nbùɛhĩ́ ǹ míkùi ɛ́ bie hɔ̀ ɛ́ lɛ́ ɓɛ́lɛ kɛ́ ǹ. 17Ɛ́ ɓɛ́ khie ɛ́ Yiezu ɛ̀ ɓɔ́nɓɔ́ninin nɛ a lé ɓɛ́ cɛ̃̀mɛ̀nɛ́ hũn. 18Ɛ́ bòo lɛ ɛ́ Yiezu ɛ́ yòó lè ɲumu wiè ɛ̀ zɔ, ápe nùún lɛ ɛ́ ɓɛ́ ńɲíkĩ́nìɛ ɛ́ hṹn wi nin ɛ́ ɔ̀ hɛ̃nnin nɛ a lɛ́ nɛ mí bèɓán àá ɔ́. 19Kɛ́ Yiezu den pɛ̃́ à bie lɛ́ à nɛ làa: «Khũ̀á vɛ mì yíe, mì nìɛ viì, ɛ̀ vɛ bie hɔ bòo lɛ á Ɲunsɔ ɛ́ wɔ́ lɛ́ kɔ̀ ǹ míkùi ɛ̀ lɛ́ ɓà ǹ, àá bòo lɛ á dàá mɔn kɔ̀ miinɛ̀.» 20Á nùún ɛ́ khie cɔ́, ɛ́ van hɔ̀ bòo lɛ ɛ́ Yiezu wɔ́ lɛ́ à ǹ míkùi ɛ̀ buie hɔ pɛ̃̀hɛ̃ lɛ ɛ́ ɓɛ́ wóò nɛ lóoniɛ̀ pírú hũn. Ɛ́ ɓɛ́ nìnbirìe lɛ ɛ́ ɲɛ́ hɔ́ ɓɛ́kùi ɛ́ hɔ́ hɛ̀ yòokɛa lɔ̀n.
Zayiriisi hãá vìerɔ́ àá hṹnu dɔ̀ lɛ ɛ́ cãani vĩ̀nlɔ́ duè ɛ́ ɓaa wiɛnírɔ́
Mat 9.18-26; Lik 8.40-56
21Ɛ́ Yiezu ɛ́ van khũà ɛ́ cánkɛa hɔ̀ ɲumu àá lé ɲumu wiè ɛ́ ɓen lɔ́. Ɛ́ nìnbí-kuì ɛ́ ɓen kíríkɛa ɔ̀ ǹ ɛ́ dɛ̃̀ hɔ̀ ɲumu ɲunu. 22Ɛ́ ɓɛ́ Zuifuɓɛ ńkóoɓánlɔ̀n zũnù hándí dɔ̀, lɛ yèrè ɛ́ ɓɛ́ nɛ Zayiriisi ɛ́ van ɓɛrɛ. Á mɔn Yiezu, á van ɛ́ lúsí piè híɛhɔ́, 23à ɛ́ ɔ̀ ɓɔ́nɓɔ́ninin cɛ̃̀un ɛ́ nɛ làa: «Niǹ hãacícáahɔ́ ɛ́ hí cɔ́; ɛ́ kɔ́ ɓɔ́nɓɔ́n ɛ̀ kɔ̀ ɓen bè kɔ̀ níhĩ́ piè lɔ̀n à fuen, à bí hí wɛ̀.» 24Ɛ́ Yiezu ɛ́ khie bɔ̀ɓán àá ɔ́; ɛ́ ɓɛ́ nìzã̀amáa ɛ́ khie bɔ̀ piè máahṹ ɛ́ ɔ̀ ɲà. 25Kɛ́ hṹnú dɔ̀ ɛ́ den ɓiɛ̀ hàarí wi yán kɛ́ cãani vĩnlɔ́ duiè ɛ́ ɓaa ɔ̀ lɛ iè pehɔ̀ lɔ́líe pírú àá bɔ̀nbɔ̀ ɲu. 26À hàarí ɛ́ lɔ̀n bɔn cɛ̃̀un ɓɛ̀ dɔ̀kɔ̀tɔ́rɔ́ɓɛ̀ cɛ̀rìɛɛ níhĩ́ hũn, ɛ́ bòo lɛ wi piè núnú hũn míkùi ɛ́ vɔ́ piè vúanírɔ́ fìi hũn, kɛ́ piè duiè sɔ ɛ́ yí wɛ wɛ̀; kɛ́ lé den yɛ̀rɛ́ wóokɛa ɛ́ kɛ̃́nɛ kɛ̃́nɛlɔ́. 27Á ɲɛ́ ɛ̀ ɓɛ̀ ɛ́ Yiezu bòo ɛ̀ bie, á ɓɛrɛ ɓɛ̀ nìzã̀amáa hũn àá Yiezu máahṹ ɛ́ ɓɛrɛ han piè pɔnkɔ̀rɔ́ ǹ. 28Iè hɔ̀ lɛ á hṹn bie mí tĩì hũn nɛ: «Kɛ́ ń hṹn yú piè tĩɛ̀ ɛ́ hannin mí dòonún, ɛ́ nín wɛ.» 29Ɛ́ bòo lɛ á zɔn han piè pɔnkɔ̀rɔ́ ǹ, ɛ́ piè cãani vĩnlɔ́ ɛ́ yòó dɛ̃̀, á dũnɛ mí tɛkɛ̀a hũn kɛ́ mí duiè ɛ́ wan. 30Ɛ́ pehɔ̀ lɔ̀n, ɛ́ Yiezu ɛ́ dũnɛ kɛ́ pànkɛ́ dɔ̀ ɛ́ lɔ́ mí ǹ, á bĩniɛ míte ɛ́ khie dìe ɓɛ̀ nìzã̀amáa tĩ́ihṹ ɛ́ nɛ làa: «A wieni ɛ́ te nin hannin?» 31Ɛ́ piè kɛ̀ránzɛ̀ɓɛ̀ ɛ́ zɔn bie lɛ́ à ǹ ɛ́ nɛ làa: «Kɔ́ loo kɛ́ ɓɛ́ nìzã̀amáa ɛ́ kɔ̀ ɲà ɛ̀ kɔ̀ pɛ́ ɛ́ dìe nɛ a iè wieni ɛ́ te kɔ hannin?» 32Kɛ́ Yiezu den ɛ́ húikɛ khíiní, ɛ́ nɛ mii dũń ɔ́pe lɛ ɛ́ te hɔ ɛ́ wɔ́. 33Ápe hũnu sɔ ɛ́ zɛ́rɛ ɛ́ zɛ̀ wɛ̀wɛ̀ iè hɔ̀ lɛ á dũ hɔ bòo lɛ wɔ́ à ǹ, á ɓɛrɛ ɛ́ ɓen lúsí Yiezu zehĩ́ híɛhɔ́ à bie hɔ́ bɔ̀berà míkùi ɛ́ lɛ́ à ǹ. 34Ɛ́ Yiezu ɛ́ zɔn bie lɛ́ à ǹ ɛ́ nɛ làa: «Niǹ hãá kɔ̀ ńdɛsĩ̀nlɔ́ ɛ́ fueniɛ kɔ ǹ; ɛ́ kɔ́ lan àá hũn-wiɛ̀, ɛ̀ nɛ kɔ duiè ɛ̀ wɛ.»
35Ɛ́ Yiezu ɛ́ ɲɛùn yí bie vé wɛ̀, ɛ̀ ɓɛ̀ nìnbirìe dɔ̀ lɛ van lɔ́ á ńkóoɓánlɔ̀n zũnù hándí yíe ɛ́ ɓɛrɛ bie lɛ́ à ǹ ɛ́ nɛ làa: «Kɔ̀ hãá ɛ́ húrun, ɛ́ kɔ́ wo bí tiɛní-ɛ kɛ̀ránlɔ wɛ̀.» 36Ɛ́ Yiezu ɛ́ wɔ́ kɛ̀a wiè ɛ́ yí ɲí hɔ́pe biehĩ́ sɔ wɛ̀; à zɔn bie lɛ́ á ńkóoɓánlɔ̀n zũnù hándí ǹ ɛ́ nɛ làa: «Bí Zãn wɛ̀, kɛ́ kɔ́ dɛsĩ̀ mí dòonún.» 37Ɛ́ Yiezu ɛ́ yí tɛ̀ nɛ nìnbírɔ dɔ̀ ɛ̀ bè mí máahṹ kɛ́ Piɛre àá Zaake àá ɓá zuú Zãn ɛ́ ɓen bòo mí. 38Ɛ́ ɓɛ́ van dɛ̃un ɔ̀ ńkóoɓánlɔ̀n zũnù hándí yíe, ɛ́ Yiezu ɛ́ mii húi ɛ̀ ɓɛ̀ nìnbiriè ɛ́ hoo, ɛ̀ ɓɛ̀ ɛ́ wíríkɛ kɛ́ ɓɛ́ ɛ́ wãamɛkɛ. 39Á yòó zɔn lè zũnù, à ɛ́ ɓɛ̀ dìenin ɛ́ nɛ làa: «Hɔ ńɓuò ɛ́ mí dàa ɛ́ hoo kɛ́ mì ɛ́ wírí kɛ̀amu? Àpe zĩncáahɔ́ ɛ́ yí hí wɛ̀, a wìe lɛ ɛ́ dũmua.» 40Ɛ́ ɓɛ́ yòó ɔ̀ yáakɛ. Á nɛ ɓɛpe ɓɛ́kùi ɛ̀ lé, à fɔ́ á hãa-cíi ɓà yàá àá ɓà nín àá mí kɛ̀ránzɛ̀ɓɛ̀ nìɛ ɓɛ̀ tĩ lɛ hṹn bɔ̀ɓán àá ɔ́, à yòó zɔn lè zũ-bɔ́nú lɛ á zĩncáahɔ́ ɛ́ zɔn wi hũn. 41Á síɛ zɛ̃nkɛa piè núnú ǹ, à bie lɛ́ à ǹ nɛ: «Talita kum» iè bòo á nɛ: «Hãacíi, ń nɛ kɔ síɛ hĩ́ní!» 42Ɛ́ pehɔ̀ lɔ̀n, á hãacíi ɛ́ síɛ hĩ́nà ɛ́ vɛ. Piè lɔ́líe ɛ́ hàarí iè pírú àá bɔ̀nbɔ̀ ɲu. Ɛ́ ɓɛ́ nìnbirìe ɓɛ́kùi ɛ̀ hɛ̀ bɔ̀dũmunù ɛ́ yòó vũnun míkùi. 43Ɛ́ Yiezu ɛ́ bie lɛ́ ɓà ǹ hìeniɛ nɛ ɓɛ bí lɛ́ nɛ nìnbírɔ dɔ̀ ɛ̀ ɲí hɔ̀ wɛ̀; à nɛ ɓɛ lɛ́ hɔ́ bɔ̀díe ɔ̀ ǹ nɛ a dí.
Currently Selected:
Marike 5: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
