Marike 4
4
Lè wĩ̀i lɛ ɛ́ Yiezu ɛ́ wɛ̃̀ à bɔ̀dé dɔ̀ bòo hũn
Mat 13.1-23; Lik 8.1-20
1Ɛ́ Yiezu sĩ̀n khie ɓɛ̀ nìnbirìe ɛ̀ kɛ̀rán hɔ́ Kalile ɲun-bɛhɔ́ ɲunù. Ɛ́ ɓɛ́ nìnbí-dũmu ɛ́ ɓɛrɛ koo ɓánlɔ̀n ɛ́ kírie ɔ̀ ǹ. Á yòó zɔn lè wiè dɔ̀ lɛ wi hɔ ɲumu hũn, ɛ́ zɔn kɛsí kɛ́ ɓɛ́ nìzã̀amáa ɛ́ dɛ̃̀ lè sṹsùnù hɔ̀ ɲumu ɲunù. 2Á ɓɛ̀ kɛ̀rán àá bòo bɔ̀kuì àá hɔ́ wũ̀a. Ɛ́ hɔ́ lɛ á ɓɛ̀ kɛ̀rán, á zɔn bie lɛ́ ɓà ǹ ɛ́ nɛ làa: 3«Mì tɛ́ mí ɲɛkɛ̃̀a! Nìnbírɔ dɔ̀ ɛ́ lɔ́ nɛ mii vɛ dé bòo mí mún hũn. 4Ɛ́ hɔ́ lɛ á mí bòo ɛ̀ dé mí mún hũn, ɛ́ hɔ́ biè dɔ̀ ɛ́ van síɛ lè wṹn ɲunù, ɛ́ ɓɛ́ ńɲíizàani ɛ́ ɓɛrɛ khue hɔ̀ ɛ́ dú. 5Ɛ̀ hɔ̀dɔ̀ ɛ́ van síɛ lè lɛnù viì hũn, lɛ ɛ́ tĩ́ní ɛ́ yí buò hũn wɛ̀; ɛ́ hɔ́ síɛ lɔ́ hĩ́nà fùa fùa iè hɔ̀ lɛ ɛ́ hɔ́ tĩ́ní ɛ́ yí bòo ɛ̀ vɛ síɛ wɛ̀. 6Ɛ́ hɔ́ lɛ ɛ́ lé wurù ɛ́ síɛ hĩ́nà ɛ́ lé, ɛ́ lé ɲɛ́ hɔ́, ɛ́ yòó hɔn iè hɔ̀ lɛ ɛ́ pehɔ̀ nɛhĩ́ ɛ́ yí vɛ síɛ lé sṹsùnù hũn wɛ̀. 7Ɛ̀ hɔ̀dɔ̀ ɛ́ van síɛ hɔ̀ ńɲinlɛ̀a hũn; ɛ́ hɔ́ ńɲinlɛ̀a ɛ́ síɛ hĩ́nà yòó muaniɛ hɔ̀, ɛ́ hɔ́ yí dàń yòó hɛ bie wɛ̀. 8Ɛ̀ hɔ̀dɔ̀ ɛ́ van síɛ hɔ̀ tĩ́ní lɛ sãa hũn; ɛ́ hɔ́ síɛ lɔ́ ɛ́ yòó dɛ̃un ɛ́ hán hɔ̀ biè: lèdɔ̀ ɛ́ wóò hɛ biè ɓénlé àá pírú (30), ɛ̀ lèdɔ̀ ɛ̀ hɛ biè ɓáàtĩ (60), ɛ̀ lèdɔ̀ ɛ̀ hɛ khĩminù (100).» 9Ɛ́ Yiezu ɛ́ zɔn nɛ làa: «Nìnbírɔ lɛ dàa ɲɛkɛ̃̀a ɛ́ dàa wóò ɲí bòo ɛ̀ ɓàasɔ ɛ̀ ɲí hɔ́ sãàní.»
10Ɛ́ bòo lɛ ɛ́ ɓɛ́ van wi ɓɛ́ dòonún, ɛ́ ɓɛ́ nìnbirìe lɛ wóò vɛ kírí-e ǹ fúu àá ɓɛ́pe piè kɛ̀ránzɛ̀ɓɛ̀ pírú àá nìɛ ɓɛ̀ ɲu, ɛ́ ɔ̀ dìenin hɔ̀ wũ̀a sɔ bòo hũn. 11Ɛ́ Yiezu ɛ́ zɔn bie lɛ́ ɓà ǹ nɛ làa: «Mìpe iè pe ɛ́ hɔ́ bɔ̀dũmunù ɛ́ lɛ́ nin nɛ mi dàń dũń Dɔfĩn bɛ́záanú bòo lɛ tànkɔ̀niɛ. Kɛ́ ɓɛ́ nìnbirìe sí kɛ́ ɛ́ pe wóò ɲí hɔ̀ kɛ̀a wũ̀a bòo sí. 12Ɛ́ ɓɛ́ dàa wóò húi sã́a sãa, kɛ́ ɓɛ́ yí loo bòo, ɛ̀ ɓɛ̀ ɲí sã́a sãa, kɛ́ ɓɛ́ yá dũń hɔ́ bòo lɛ ɛ́ ɓɛ́ ɛ́ ɲí ɲún wɛ̀. Kɛ́ dàa bòo mí ɛ́ ɓɛ́ ɛ́ zɛ̀ní ɓɛ́ bɔ̀werà ɛ́ Dɔfĩn ɛ́ dé sɛ́wɛ́rí ɛ́ lɛ́ ɓà ǹ.» 13Ɛ́ Yiezu bĩniɛ zɔn bie lɛ́ ɓà ǹ nɛ làa: «Lèpe wĩ̀i sɔ lɛ ɲún ɛ́ mí ɓen yí dũ, ɛ́ mí wo mii wiɛ ɛ́ dàá dũń hɔ́pe wũ̀a sí kɛ́ ɲún? 14À bɔ̀dé iè Dɔfĩn bienù á ɛ́ dé. 15Ɛ́ ɓɛ́ nìnbirìe dɔ̀ ɛ́ lɔ́ɓán àá hɔ́ wṹn ɲunù lɛ ɛ́ lé bienù ɛ́ van síɛ lɔ̀n: peɓɛ̀ ńɲí lépe biènù sɔ lòo, ɛ̀ Sitũanɛ ɛ̀ ɓen leń lé ɛ̀ lé peɓɛ̀ tĩɛ̀ hũn. 16Ɛ̀ ɓɛ̀dɔ̀ ɛ́ lɔ́ɓán àá hɔ́ biè dɔ̀ lɛ van siɛ lè lɛnù lɔ̀n. Ɓàasiè iè ɓɛ̀lɛ ɛ́ ɓen ɲɛ́ lé Dɔfĩn bienù, ɛ̀ ɓɛ̀ tɛ̀ pelè bòo àá tĩ-wiɛ̀, 17kɛ́ ɓɛ́ yáà fùansí lè ǹ ɛ̀ lè lísí peɓɛ̀ tĩɛ̀ hũn wɛ̀, ɛ̀ ɓɛ̀ yáà cɛ dìń lè ǹ ɛ̀ míi wɛ̀. Kɛ́ lɔ̀nbiè ɛ́ yú ɓɛ́, tàá kɛ́ nìnbirìe ɛ́ bɔ̀ peɓɛ̀ máahṹ ɛ́ ɲínkɛ Dɔfĩn bienù yènsénín, ɛ̀ ɓɛ̀ wóò fuànsí ɓɛ́ ńdɛsĩ̀nlɔ́ ǹ fùa fùa. 18Ɛ̀ ɓɛ̀dɔ̀ ɛ́ lɔ́ɓán àá hɔ́ biè lɛ ɛ́ van siɛ hɔ̀ ńɲinlɛ̀a hũn: ɓɛ̀ ɛ́ ɲɛ́ lé bienù, 19kɛ́ lépe dímíɲɛ́ sɔ lɛ bòo hũn yenkɛà, àá hɔ́ yírɛ́ bòo lɛ wóò khɛ̃̀níkɛ nìnbiriè àá hɔ́ bòo bɔ̀kuì pɔnù ɛ́ wóò muaní lé Dɔfĩn bienù peɓɛ̀ hũn, ɛ̀ lè yá dàń bòo dɔ̀ ɛ̀ wé wɛ̀. 20Ɛ̀ ɓɛ̀dɔ̀ ɛ́ lò ɓiɛ̀ lɔ́ɓán àá hɔ́ biè lɛ ɛ́ van siɛ lè sṹsùnù lɛ sãa hũn: ɓàasiè ɛ́ ɲɛ́ lé Dɔfĩn bienù, ɛ́ ɓɛ́ tɛ̀ pelè bòo ɛ́ han hɔ̀ bie: Hɔ̀pe bòo lɛ́ dɔ́, ɛ́ lédɔ̀ wóò hɛ biè ɓénlé àá pírú (30), ɛ̀ lèdɔ̀ ɛ̀ hɛ biè ɓaàtĩ (60), ɛ̀ lèdɔ̀ ɛ̀ hɛ biè khĩminù (100).»
Pɛ̃̀ntĩ́ní wĩ̀i
Lik 8.16-18
21Ɛ́ Yiezu bĩniɛ zɔn bie lɛ́ ɓà ǹ nɛ làa: «Nìnbírɔ ɛ́ ɲɛùn ɲiɛ pɛ̃̀ntĩ́ní ɛ́ van zɔn dɔ̀ pã́ahṹ tàá dɛmu dìɛ fìi hũn? À yáà yòó bìsí lé mí bènlén? 22Ɛ́ bòo dɔ̀ lɛ tànkɔniɛ lɛ yá ɓén lé yíe ɛ́ mí, ɛ̀ bòo dɔ̀ lɛ ɛ́ híɛnin lɛ yá ɓén lé ńpiemu hũn ɛ́ mínɛ wɛ̀. 23Kɛ́ nìnbírɔ lɛ dàa ɲɛkɛ̃̀a ɛ́ dàa wóò ɲí bòo ɛ̀ ɓàasɔ ɛ̀ ɲí hɔ̀ sãàní.» 24Ɛ́ Yiezu bĩniɛ zɔn khɛ́ lɛ́ ɓà ǹ nɛ làa: «Mì cɛ mi kuò ɛ̀ mi dũń hɔ́ bòo lɛ ɛ́ mí ɛ́ ɲí ɲún. Lè dìɛ lɛ ɛ́ mí wóò dàá màatɛ̃́ hɔ́ bòo ɛ̀ lɛ́ ɓɛ́ nìnbirìe ǹ iè pe ɛ́ Dɔfĩn ɛ́ ɓén dàá màatɛ̃́ ɛ́ lɛ́ miɛ ǹ, ɛ̀ Hɔ̀ ɛ́ yòó sĩiní hɔ́ ɛ́ lɛ́ miɛ ǹ. 25Iè hɔ̀ lɛ álɛ dàá hɔ bòo ɛ́ ɓɛ́ ɓén bĩní lɛ́ nin ɛ́ sĩiní; à lɛ ɛ́ yí dàá bòo dɔ̀, ɛ́ hɛ̀rí hɔ́pe bìcínbóo lɛ á dàa ɛ́ ɓɛ́ pɛ́wi ɓén fé.»
Lè wĩ̀i lɛ ɛ́ wɛ̃̀ hɔ̀ bòo lɛ zù lɔ́ lɛ ɛ́ tí yòó míte ǹ bòo hũn
26Ɛ́ Yiezu bĩniɛ zɔn bie nɛ làa: «Dɔfĩn bɛ́záanú ɛ́ lɔ́ɓán àá nìnbírɔ lɛ van zú mí bòo mí mún hũn. 27Hɔ̀ sṹnúhṹn à dɛ, kɛ́ hɔ́ wiɛhɔ́ à hĩ́ní hɔ́rɔsí kɛ́ hɔ́pe bòo lɛ á zù ɛ́ lé, ɛ̀ hĩ́ní tí kɛ́ á yí dũ bòo lɛ ɛ́ hɔ́ te dàa ɛ́ wé wɛ̀. 28Lè sṹsùnù míte ǹ ɛ́ temu wóò lɛ́ ɛ̀ hɔ̀ bòo lɛ zù ɛ̀ dáà síɛ lé, ɛ̀ hĩ́ní tí, ɛ̀ vɛ̀ tì ɛ̀ khíi kan, ɛ̀ den vɛ dàá hɔ́ biè. 29Ɛ́ bòo lɛ ɛ́ hɔ́ bòo ɛ́ ɓen van bɔn vɔ́, à nìnbírɔ den mìí lé khɛ̃́nkhɔ́nú à vɛ khè hɔ̀ iè hɔ̀ lɛ ɛ́ hɔ́ bòo mìirɔ́ yìi ɛ́ ɓɛrɛ dɛ̃un.»
Lè wĩ̀i lɛ ɛ́ wɛ̃̀ lè mutaade biì bòo hũn
Mat 13.31-34; Lik 13.18-19
30Ɛ́ Yiezu bĩniɛ zɔn bie nɛ làa: «Dɔfĩn bɛ́záanú ɛ́ ké den dɛ̀ ɛ́ màaní àá ńɓùo, tàá lé iè wĩ̀i dúsɔ ɛ́ ke ɛ̀ dàá wĩ̀ lè? 31Lè lɔ́ɓán àá mutaade biì lɛ mìniɛ pɔ hɔ sṹsùnù bɔ̀zìriè míkùi. 32Kɛ́ lé ɓen síɛ zù, ɛ̀ lè ɛ̀ lé, ɛ̀ yòó pɔní hɔ́ kɔnlɔ vɛ̀nù bòo lɛ kɛ́ míkùi, ɛ̀ sɛ̀ hɔ̀ ńnɛ́n-bɛ̃hɛ̃, ɛ̀ ɓɛ̀ ńɲíizàani ɛ̀ ɓen tĩ́ ɓɛ́ ńwiɛ́hɛ̃ hũn.» 33Hɔ̀ iè wũ̀a bɔ̀kuì kɛ̀a lepe sí, ɛ́ Yiezu wóò dàá kɛ̀rán ɓɛ́ nìnbirìe àá lé Dɔfĩn bienù. À wóò khɛ́ hɔ́ ɛ̀ ɓáaníɓán àá bòo lɛ ɛ́ ɓɛ́ dɛ̀ ɛ́ ɲí ɛ́ dũń ɲún. 34À den yáà bie àá ɓɛ́ nìnbirìe kɛ́ á yá kóo hɔ́ wũ̀a yán wɛ̀. Kɛ́ á ɓen van wi mí dòonún àá mí kɛ̀ránzɛ̀ɓɛ̀, à munkɛ́ hɔpe wũ̀a sɔ ɲún ɛ̀ lɛ́ ɓà ǹ.
Bòo lɛ ɛ́ Yiezu dàa waaniɛ pinpi-bɛhɔ́ dɔ̀ ǹ hɔ̀ ɲun-bɛhɔ́ lɔ̀n
Mat 8.18-27; Lik 8.22-25
35Ɛ́ pehɔ̀ zɔǹ sɔ zĩ́ihṹ, ɛ́ Yiezu bie lɛ́ mí kɛ̀ránzɛ̀ɓɛ̀ ǹ nɛ làa: «Mì nɛ ke cánkɛ́ hɔ́ ɲumu ɛ̀ lé vɛ àá lé vṹn san-cóoní yéni lɔ̀n.» 36Ɛ́ ɓɛ́ wo fuɛ̀rɛ̀sí ɓɛ́ nìzã̀amáa ǹ, ɛ̀ ɓɛ̀ kɛ̀ránzɛ̀ɓɛ̀ ɛ́ khie van zɔn lè ɲumu wiè lɛ ɛ́ Yiezu ɛ́ wi hũn ɛ̀ ɓɛ̀ dàa ɔ̀ ɛ́ dàa cɔ́. Ɛ̀ hɔ̀ wuò dɔ̀ ɛ́ hṹn wi peɓɛ̀ sɛnù. 37Ɛ́ lé pinpi-bɛhɔ́ dɔ̀ ɛ́ síɛ hĩ́nà ɛ́ zè; ɛ́ hɔ́ ɲumu ɛ́ sànbɔ̀nikɛ́ ɛ̀ zɔ le wiè hũn, ɛ́ lé zĩníkɛa mii yòó tí. 38Hɔ́rɔsí ɛ̀ Yiezu ɛ́ van lɔ́ dũmua peɓɛ̀ máahṹ lè wiè hũn ɛ́ síeniɛ mí ɲún àá lé ɲún síenílán. Ɛ́ ɓɛ́ khie ɛ́ ɔ̀ tĩ̀ní kɛ́ ɓɛ́ ɛ́ wũamɛkɛ nɛ: «Ɲunsɔ, ké lɛ ɛ́ hí cɔ́, ɛ́ hɔ́ yá kɔ̀ koo hè yée?» 39Ɛ́ Yiezu yìe síɛ fɛ́, á hĩ́nà tĩ́nɛ lè pinpinù ɲún hũn, à bie lɛ́ hɔ́ ɲumu ǹ nɛ làa: «Hĩì, ɛ̀ kɔ̀ wɛ cící.» Ɛ́ lé pinpinù ɛ́ yòó dɛ̃̀; ɛ́ lé viì míkùi ɛ́ yòó wan cící. 40Á khie bie àá mí kɛ̀ránzɛ̀ɓɛ̀ nɛ làa: «Mí wiɛ dàa zɛ́rɛ kɛ̀amu? Mí pɛ́wi ɲɛùn yí dàa ńdɛsĩ̀nlɔ́ yée?» 41Kɛ́ ɓɛ́pe ɛ́ den hɛ̀ zɛ́rɛ àá bɔ̀bín, ɛ́ ɓɛ́ khie bie ɓán hũn ɛ́ nɛ làa: «Àpe nùún lɛ pe iè wíeni, ɛ́ hɛ̀rí lè pinpinù àá hɔ́ ɲumu ɛ́ dàá wóò ɲí piè bòo?»
Currently Selected:
Marike 4: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
