Marike 7
7
Bòo lɛ ɛ́ te nìnbírɔ ɛ́ wóò liení Dɔfĩn híɛhɔ́
Mat 15.1-20; Lik 11.37-41
1Ɛ́ ɓɛ́ Farizĩɛɓɛ àá ɔ̀ Moyiize làndɛ́ kɛ̀ránliè dɔ̀ lɛ van lɔ́ àá Zerizalɛɛmu ɛ́ ɓɛrɛ kírie Yiezu ǹ. 2Ɛ́ ɓɛ́ mɔn piè kɛ̀ránzɛ̀ɓɛ̀ dɔ̀ kɛ́ ɓɛ́ fɛ̃un ɛ́ ɓɛ́ díe ɛ̀ dí kɛ́ ɓɛ́ yí tiɛ ɓɛ́ níhĩ́ vé, kɛ̀a bòo lɛ ɛ́ ɓɛ́ nìkĩ́ɛ làndɛ́ dàa nɛ hɔ wóo wé wɛ̀. 3Ɓɛ̀ Farizĩɛɓɛ àá ɓɛ́pe Zuifuɓɛ ɓɛ́kùi ɛ́ den wóò mɛ̀ndɛ̃ ɓá nìkĩ́ɛ làndɛ́. Ɛ́ ɓɛ́ yáà dí kɛ́ ɓɛ́ yí tiɛ ɓɛ́ níhĩ́ sãa sãa ɛ̀ vé wɛ̀. 4Ɓɛ̀ ɓen van lɔ́ lé yàa hũn ɓɛrɛ, ɛ̀ ɓɛ̀ tiɛ ɓɛ́te vé ɛ̀ dàá dí. Ɓɛ̀pe nìkĩ́ɛ làndɛ́ bòo bɔ̀kuì dɔ̀ ɛ́ bĩniɛ wi yán ɛ́ ɓɛ́pe Farizĩɛɓɛ àá ɓɛ́ làndɛ́ kɛ̀ránliè ɛ́ wóò wé, kɛ̀a hɔ ɲuǹlán tĩ̀ɛ àá hɔ́ láa àá hɔ́ hɛ̃nlɔ́ pã́ahɛ̃ [àá hɔ́ dɛmu tĩ̀ɛ] tiɛrɔ́. 5Ɛ́ ɓɛ́ Farizĩɛɓɛ àá ɓɛ́ làndɛ́ kɛ̀ránliè ɛ́ zɔn ɛ́ Yiezu ɛ̀ dìenin ɛ́ nɛ làa: «Hɔ ńɓuò ɛ́ kɔ́ kɛ̀ránzɛ̀ɓɛ̀ ɛ́ dàá yá ɓɛ̀pe kìe nìkĩ́ɛ làndɛ́ ɛ̀ mɛ̀ndɛ̃, kɛ́ ɓɛ́ wóò dí ɓɛ́ bɔ̀díe àá ɓɛ́ níhĩ́ lɛ ɛ́ yí tiɛ?» 6Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Mí hɛ̀ iè pe níhĩ́dériè! Dɔfĩn bɔ̀háanírɔ Ezayi ɛ́ hàarí bòo tĩ, lè yìi lɛ á dàa bie hɔ̀pe biehĩ́ sɔ lɛ mì bòo hũn. À hàarí ɛ́ nɛ Dɔfĩn ɛ́ nɛ làa: “Ɓɛ̀pe nìɛ sɔ lɛ ɛ́ nìn ɓàanínin àá ɲɛ-bienù mí dòonún, kɛ́ peɓɛ̀ tĩɛ̀ ɛ́ viì ni àá mi. 7Peɓɛ̀ bòo lɛ ɛ́ ɓɛ́ wóò dàá ɓàaní mi ǹ míkùi ɛ́ ɲún mí, ɛ̀ peɓɛ̀ bòo lɛ ɛ́ ɓɛ́ wóò kɛ̀rán àá ɓɛ́ nìnbirìe ɛ́ iè nìnbí-yáamu bòo.” 8Mí wóò fùansí lé Dɔfĩn ɲunù tɛmu ǹ, ɛ̀ mì wé ɓɛ́ nìnbirìe làndɛ́ ɛ̀ mì bè máahṹ.» 9Ɛ́ Yiezu bĩniɛ zɔn bie nɛ làa: «Hɔ̀ ɛ́ bɔn lò, mí wóò fùansí lé Dɔfĩn ɲunù tɛmu ǹ, ɛ̀ mì wé mí kùrú làndɛ́ ɛ̀ mì ɓɛ́ɓɛ́nin. 10À Moyiize ɛ́ bie nɛ mì yàá àá mì nín ɛ́ kɔ́ wóò ɓàanínin; ie kɛ́ nìnbírɔ ɛ́ dánkɛ́niɛ ɓá yàá tàá ɓá nín, à fɔ́ɓán à ɓé. 11Kɛ́ mípe ɛ́ den wóò bie nɛ kɛ́ nìnbírɔ dɔ̀ ɛ́ bie lɛ́ ɓá yàá ǹ tàá ɓá nín nɛ hɔ bòo lɛ ɛ́ mí hṹn mii dàá síiní-ɛ ɛ́ iè “Koreban”, ie bòo á nɛ hɛ̃mù bòo lɛ bòo ɛ́ sɛ̃̀ Dɔfĩn, 12ɛ́ mí iè pe ɛ́ wo ɛ́ wóò lɛ́ ɛ̀ ɓàasɔ ɛ̀ yá bĩní síiní ɓá yàá tàá ɓá nín wɛ̀. 13Ɛ́ hɔ́pe mì wérɛ́ sí iè mìpe ɛ́ yá lè Dɔfĩn bienù ɛ̀ líi, kɛ́ mí làndɛ́ lɛ ɛ́ mí wɔ́ míte ǹ iè pe ɛ́ mí bɔ̀ bòo hièniɛ. Bòo bɔ̀kuì kɛ̀a hɔ́pe sí ɓà ńmàa ɛ́ mí wóò bĩní wé.»
14Ɛ́ Yiezu ɛ́ bĩniɛ zɔn vɔn ɓɛ̀ nìzã̀amáa à bie lɛ́ ɓà ǹ nɛ làa: «Mì pe mìkùi ɛ̀ tɛ́ mí ɲɛkɛ̃̀a ɛ̀ mì ɲí hɔ́ bòo lɛ ɛ́ nin bie lɛ́ miɛ ǹ sãàní: 15Bòo dɔ̀ lɛ wóò vɛ lé àá yíe ɛ́ ɓen zɔ nìnbírɔ hũn ɛ̀ zɔ liení ɓàasɔ ɛ́ mínɛ wɛ̀; kɛ́ hɔ́ iè hɔ̀ lɛ ɛ́ wóò zɔ lé àá nìnbírɔ hũn ɛ́ te ɓàasɔ ɛ́ wóò liení. [ 16Kɛ́ nìnbírɔ ɛ́ dàa ɲɛkɛ̃̀a ɛ́ dàa wóò ɲí bòo ɛ̀ ɓàasɔ ɛ̀ ɲí hɔ̀ sãàní!]» 17Ɛ́ hɔ́ lɛ ɛ́ Yiezu ɛ́ fùɛrɛ̀sí ɓɛ́ nìzã̀amáa à khie cɔ́ van zɔn lè zṹnù, ɛ́ piè kɛ̀ránzɛ̀ɓɛ̀ ɛ́ ɔ̀ dìenin le wĩì sɔ bòo hũn. 18Ɛ́ Yiezu ɛ́ zɔn bie lɛ́ ɓà ǹ nɛ làa: «Mìpe lò ɓiɛ̀ iè biè hɛciri mí yée? Mí yí dũ kɛ́ bòo dɔ̀ lɛ ɛ́ wóò vɛ lé àá yíe ɛ̀ ɓen zɔ nìnbírɔ hũn ɛ̀ zɔ liení ɓàasɔ ɛ́ mínɛ? 19Iè hɔ̀ lɛ ɛ́ hɔ́ yí piè tĩì hũn ɛ́ hɔ́pe bòo sɔ ɛ́ wóò vɛ zɔ, kɛ́ hɔ́ iè piè vùkì hũn; ɛ̀ pehɔ̀ máahṹ, ɛ̀ hɔ̀ khíi vɛ lé àá yíe.» Yiezu iè wìe den nɛ bɔ̀díe míkùi ɛ̀ dɛ̀ ɛ́ dí. 20Ɛ́ Yiezu bĩniɛ zɔn bie ɛ́ nɛ làa: «Hɔ̀ bòo lɛ wóò zɔ lé àá ɔ́ nìnbírɔ hũn, sí iè pe bòo lɛ ɛ́ te ɓàasɔ ɛ́ wóò liení. 21Iè hɔ̀ lɛ ɛ́ hɔ́ iè nìnbírɔ hũn, piè tĩì hũn ɛ́ hɔ́ nùn-koohɛ̃ ɛ́ wi, ɛ̀ hɔ̀ iè hɔ̀ pe temu wóò lɛ́ à dàá wé hɔ́ bɔ̀koohɛ̃, kɛ̀a ie hɔ ńdaaníkɛɓán kũǹ àá hɔ́ kɛ̀míhĩ́ àá hɔ́ nìɓénlɔ́; 22àá hɔ́ hɛ̃́fénlɔ́ àá bɛ́fénlɔ́, àá hɔ́ ńbíɲì àá bòo àá lé mɛkɛ̃nɲiì àá hɔ́ nìkhɛ̃̀níkɛrɔ́ àá hɔ́ ńwékɛkũ̀n àá hɔ́ yìi ńwóo lé nìnbírɔ bòo ǹ àá hɔ́ nìtòokɛà àá lé yencànlè àá hɔ́ nìcã̀ámu. 23Hɔ̀pe sí míkùi ɛ́ wóò zɔ lé àá nìnbírɔ hũn ɛ̀ dàá vɛ lé àá yíe.»
À hũnú dɔ̀ lɛ ɛ́ yí Zuifu ńdɛsĩ̀nlɔ́ bòo
Mat 15.21-28
24Ɛ́ Yiezu ɛ́ khie lɔ́ yán ɛ́ van hɔ Tiire pɛ̃̀hɛ̃ hũn. Á van zɔn lè zũnù dɔ̀; à hṹn wɛ nɛ nìnbírɔ ɛ̀ bí dũń hɔ́, kɛ́ á den yí dàń míte ɛ́ yí tànkɔ̀ní wɛ̀. 25Ɛ́ hṹnu dɔ̀ lɛ hãá ɛ́ ńɲíkĩ́rɔ ɛ́ wí nin ɛ́ ɲɛ́ piè bòo, á van ɓɛrɛ ɛ́ ɓen lúsí piè híɛhɔ́. 26Àpe hṹnu sɔ ɛ́ hàarí iè kɛrɛkiɓɛ hṹnu lɛ hàarí tɔn Fenisi pɛ̃̀hɛ̃ hũn, hɔ̀ Siiri cɛ̃̀mɛ̀nɛ́ hũn. Ápe hṹnu sɔ ɛ́ hɛ̃nnɛ Yiezu ǹ nɛ a ɲɛ a ńɲíkĩ́rɔ lɛ ɛ́ wi mí hãá ǹ ɛ̀ lí-è ǹ. 27Ɛ́ Yiezu ɛ́ zɔn khɛ́ lɛ́ à ǹ nɛ làa: «Fùansí ɓɛ́ zĩncã́ahɛ̃ ǹ nɛ ɓɛ dí tì vé, iè hɔ̀ lɛ ɛ́ hɔ́ yí sãa ɛ̀ ɓɛ̀ fé ɓɛ́ zĩncã́ahɛ̃ díe ɛ́ khíi kóosí lɛ́ ɓɛ́ bɔn-zàani ǹ wɛ̀.» 28Á hṹnu ɛ́ kɔ̃́niɛ ɛ́ nɛ làa: «Ɲunsɔ, hɔ̀pe wo bɔn; kɛ́ ɓɛ́ bɔn-zàani ɛ́ wóò khui hɔ díe wɛ̀rànɓɛ̀ lɛ ɛ́ kùenkɛ síɛ kɛ ɓɛ́ zĩncã́ahɛ̃ ɛ́ dí ɛ̀ ɓiɛ̀ dí.» 29Ɛ́ Yiezu ɛ́ zɔn bie lɛ́ à ǹ nɛ làa: «Lèpe bienù sí bòo hũn ɛ́ kɔ́ hĩní lan, à ńɲíkĩ́rɔ lɛ ɛ́ hṹn wi kɔ hãá ǹ ɛ́ lɔ́-à ǹ.» 30Á hĩ́nà khũ̀a van mí yíe ɛ́ van tɛ̀rɛa mí hãá kɛ́ á dũmua lè dɛmu dìɛ lɔ̀n kɛ́ à ńɲíkĩ́rɔ ɛ́ lɔ́-à ǹ.
Bòo lɛ ɛ́ Yiezu dàa wiɛniɛ beke dɔ̀
31Ɛ́ Yiezu ɛ́ van khũ̀a lɔ́ hɔ́ Tiire pɛ̃̀hɛ̃ hũn, ɛ́ van lɔ́ àá Sidɔn lóo, ɛ́ zɔn cánkɛa hɔ̀ pɛ̃̀hɛ̃ lɛ ɛ́ ɓɛ́ wóò ve nɛ lóoniɛ̀ pírú ɛ́ dàá khũ̀a vaá-ɓen àá hɔ́ Kalile ɲun-bɛhɔ́ viì. 32Ɛ́ ɓɛ́ van dàa beke dɔ̀ lɛ ɛ́ yí dɛ̀ yáà bie sãa sãa, ɛ́ dàa ɓɛrɛ piè viì ɛ̀ ɓɛ̀ ɓɔ́nɓɔ́niɛ ɔ̀ ǹ nɛ a bè mí níhĩ́ piè lɔ̀n à wiɛní-ɛ. 33Ɛ́ Yiezu ɛ́ fɔ́ á beke sɔ ɛ́ dàa khɛ̃̀nɛ van lɔ́ dɛ̃̀ mí dòonún à kɛ́ ɓɛ́ nìzã̀amáa, à yòó kóo mí nínkɛ́zàani piè ɲɛkɛ̃̀a hũn, à wɔ́ mí ńɲɛntíní ɛ́ yòó hán piè diɛnù ǹ, 34à yòó húi àá hóohũn, à vũa hìɛ̀ɛ à zɔn bie nɛ làa: «Efata!» iè bòo á nɛ: «hán kɔ́te!» 35Ɛ́ pehɔ̀ lɔ̀n, ɛ́ piè ɲɛkɛ̃̀a ɛ́ yòó hɛ́rɛ, ɛ̀ piè diɛnù ɛ́ kuie á wo yú ɛ́ bie sãa sãa. 36Ɛ́ Yiezu ɛ́ bie hièniɛ ɛ́ lɛ́ ɓà ǹ nɛ ɓɛ bí lɛ́ nɛ nìnbírɔ dɔ̀ ɛ̀ ɲí hɔ́ wɛ̀; kɛ́ Yiezu ɛ́ ɓen ɛ́ bie hiení lɛ́ ɓà ǹ nɛ ɓɛ bí lɛ́ nɛ nìnbírɔ dɔ̀ ɛ̀ ɲí hɔ́, ɛ̀ ɓɛ̀ den bĩní wookɛ buie hɔ viì míkùi. 37Ɛ́ hɔ́ hɛ̀ yòokɛa ɓɛ̀ nìnbirìe lɔ̀n ɛ́ ɓɛ́ hɛ̀ wɔ́ tan ɛ́ ɓɛ́ ɛ́ bie nɛ làa: «Hɔ̀ bòo lɛ ápe nùún lɛ wóò wé míkùi ɛ́ hɛ̀ sãa àá bɔ̀bín! Hɛ̀rí ɓɛ̀ bekiè á wóò lɛ ɛ̀ ɓɛ̀ ɲí hɔ́ bòo, ɛ̀ ɓɛ̀lɛ ɛ́ diɛhĩ́ lankɛ á wóò lɛ́ ɛ̀ ɓɛ̀ dàń bie.»
Currently Selected:
Marike 7: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
