Marike 8
8
Bòo lɛ ɛ́ Yiezu dàá bĩniɛ díiniɛ ɓɛ̀ nìnbí-dũmu
Mat 15.32-39
1Ɛ́ pehɔ̀ yìi hũn, ɛ́ ɓɛ́ nìzã̀amáa ɛ́ sĩ̀n ɓɛrɛ kóo ɓánlɔ̀n, ɛ́ bòo lɛ ɛ́ ɓɛ ɛ̀ dí ɛ́ mínɛ wɛ̀. Ɛ́ Yiezu ɛ́ vɔn mí kɛ̀ránzɛ̀ɓɛ̀ à bie lɛ́ ɓà ǹ nɛ làa: 2«Ɓɛ̀ nìzã̀amáa lɛ ɛ́ hɛ̀ miinɛ̀ ɛ́ ɓaa mi; lɛ iè wihĩ́ bɔ̀nbɔ̀ tĩ kɛ́ ɓɛ́ wi hũ̀nún àá mi kɛ́ ɓɛ́ ɛ́ yí dàa bòo lɛ ɛ́ dí wɛ̀. 3Kɛ́ ń nɛ ɓɛ lan ɓɔ kɛ́ ɓɛ́ yí yí bòo ɛ̀ dí ɛ́ ɓɛ́ ɛ́ lé muà lè wṹn lɔ̀n iè hɔ̀ lɛ ɛ́ ɓɛ́dɔ̀ ɛ́ lɔ́ viì lɛ ni.» 4Ɛ́ piè kɛ̀ránzɛ̀ɓɛ̀ ɛ́ zɔn bie lɛ́ à ǹ nɛ làa: «Hɔ̀ díe ɛ́ wo mii lé àá yí lèpe viì sɔ lɛ ɛ́ bòo dɔ̀ ɛ́ mí hũn ɛ̀ dàa díiní ɓɛ́pe nìɛ lɛ ɓɛ́kùi?» 5Ɛ́ Yiezu ɛ́ ɓɛ̀ diè nɛ làa: «Hɔ̀ iè búrú yɛ ɛ́ mí dàa?» Ɛ́ ɓɛ́ nɛ hɔ iè hùuɲu. 6Ɛ́ Yiezu nɛ ɓɛ nìnbirìe ɛ̀ síɛ kansí àá sṹsùnù, à khie fɔ́ hɔ́ búrú hùuɲu sɔ, à dɔ́ Dɔfĩn bɛrikɛ, à ɓùenkɛa hɔ̀ ɛ́ khie lɛ́ mí kɛ̀ránzɛ̀ɓɛ̀ ǹ nɛ ɓɛ khíi sankɛ ɛ̀ lɛ́ ɓɛ́ nìzã̀amáa ǹ. Ɛ́ ɓɛ́ khie sankɛa hɔ̀ ɛ́ lɛ́kɛ ɓà ǹ. 7Hɔ́rɔsí ɛ̀ ɓɛ̀ bĩniɛ dàa ciè bìcíini dɔ̀. Ɛ́ Yiezu ɛ́ dɔ́ Dɔfĩn bɛrikɛ ɓɛ̀pe ciè sɔ bòo hũn, à nɛ mí kɛ̀ránzɛ̀ɓɛ̀ ɛ̀ sĩ̀n sankɛ ɓɛ ɛ̀ lɛ́ ɓɛ́ nìzã̀amáa ǹ. 8Ɛ́ ɓɛ́pe ɓɛ́kùi ɛ́ dú tù, ɛ̀ hɔ̀ bɔ̀ɲúuhɛ̃ lɛ kɛ́ ɛ́ ɓɛ́ khie khuie ɛ́ tú sìkíe hùuɲu. 9Ɓɛ̀ nìnbirìe lɛ ɛ́ hàarí dú hɔ́pe díe sɔ ɛ́ ɓɛ́ báa ɛ́ hàarí ɛ́ yú muasíe naa ǹ (4 000); ɛ́ Yiezu nɛ ɓɛ wo lan ɓɔ, 10à yòó zɔn lè ɲumu wiè àá mí kɛ̀ránzɛ̀ɓɛ̀ ɛ̀ ɓɛ̀ cɔ́ van hɔ̀ Dalemanuta pɛ̃̀hɛ̃ hũn.
Farizĩɛɓɛ ɛ́ nɛ Yiezu wé bòo dɔ̀ lɛ ɛ́ zɛ̃́ní kɛ́ á lɔ́ àá Dɔfĩn viì
Mat 16.1-4
11Ɛ́ ɓɛ́ Farizĩɛɓɛ ɛ́ van ɓɛrɛ ɛ́ wũ̀aní àá Yiezu, ɛ̀ ɓɛ̀ ɛ́ cɛ̀ nɛ ɓɛ ɛ̀ hàaní-ɛ húi. Ɛ́ ɓɛ́ nɛ a wé yéréké bòo dɔ̀ lɛ ɛ́ zɛ̃́ní kɛ́ á lɔ́ àá Dɔfĩn viì. 12Ɛ́ Yiezu ɛ́ yòó vũa hìɛɛ à zɔn bie ɛ́ nɛ làa: «Hɔ ńɓúò ɛ́ hɔ́pe zoòni sɔ lɛ nìɛ ɛ́ dàa wɔ́ yéréké bòo ɛ́ ɓɛ́ ɛ́ cɛ̀? Nin bie hɔ lɛ́ miɛ ǹ àá bɔ̀bín nɛ yéréké bòo dɔ̀ lɛ ɛ́ mii wé lɛ́ ɓà ǹ ɛ́ mí wɛ̀.» 13À fùɛrɛ̀sí ɓà ǹ, à khũ̀a yòó zɔn lè ɲumu wiè à cánkɛa lɔ́ van àá hɔ́ ɲumu san-cóoní.
Farizĩɛɓɛ ɲɛfĩni àá Herɔɔde ɲɛfĩni bòo
Mat 16.5-12
14Ɓɛ̀ kɛ̀ránzɛ̀ɓɛ̀ ɛ́ hàarí hũn ɓɔ́ ɛ́ yí dàá búrú, ɛ́ wɔ́ dìcóoní mí dòonún ɛ́ ɓɛ́ dàa ɓɛ́ ɲumu wiè hũn. 15Ɛ́ Yiezu ɛ́ bie lɛ́ ɓà ǹ hièniɛ ɛ́ nɛ làa: «Mì sɛ́sɛ́ míte àá ɓɛ́ Farizĩɛɓɛ ɲɛfĩni, ɛ̀ mì lò sɛ́sɛ́ míte àá ɔ́ Herɔɔde ɲɛfĩni.» 16Ɛ́ ɓɛ́ kɛ̀ránzɛ̀ɓɛ̀ ɛ́ khie bie ɓán hũn ɛ́ nɛ làa: «À ɛ́ khɛ́ kɛ̀amu iè hɔ̀ lɛ ɛ́ ké yí dàá búrú wɛ̀.» 17Ɛ́ Yiezu ɛ́ dũnɛ hɔ̀ bòo lɛ ɛ́ ɓɛ́ ɛ́ bie ɓán hũn á zɔn ɓɛ̀ dìenin ɛ́ nɛ làa: «Mí wiɛ dàa ɛ́ bie ɓán hũn hɔ̀ bòo lɛ ɛ́ mí yí dàá hɔ́ búrú bòo hũn? Mí bìe pɛ́wi ɛ́ ɲɛùn yí yí hɛciri lɛ ɛ́ ɲí hɔ́ bòo ɛ̀ dũń pehɔ̀ ɲún? Mí wiɛ dàa bɔ̀dũmunù ɲunù ɛ́ ɓúrɛ kɛ̀amu? 18Mí dàa hɔ yìe kɛ́ mí yí loo bòo yée? Ɛ̀ mì dàa hɔ ɲɛkɛ̃̀a kɛ́ mí yá bòo ɲí yée? Mí bìe pɛ́wi yá liení yée? 19Pɛ̃̀hṹ lɛ ɛ́ ń dàa ɓùenkɛa hɔ̀ búrú hùanú ɛ́ lɛ́ ɓɛ́ nìnbirìe muasíe hɔ̀nú ǹ (5 000), ɛ́ hɔ́ iè síkíe yɛ lɛ tú àá hɔ́ bɔ̀ɲúuhɛ̃ lɛ kɛ́ ɛ́ mí ɛ́ khuie?» Ɛ́ ɓɛ́ zɔn nɛ hɔ iè pírú àá bɔ̀nbɔ̀ ɲu. 20«Ɛ̀ hɔ̀ lɛ ɛ́ ń dàa ɓùenkɛa hɔ̀ búrú hùuɲu ɛ́ lɛ́ ɓɛ́ nìnbirìe muasíe naa ǹ (4 000), ɛ́ hɔ́ iè sìkíe yɛ lɛ tú àá hɔ́ bɔ̀ɲúuhɛ̃ lɛ kɛ́ ɛ́ mí khuie?» Ɛ́ ɓɛ́ zɔn nɛ hɔ iè hùuɲu. 21Ɛ́ Yiezu zɔn bie lɛ́ ɓà ǹ nɛ làa: «Ɛ́ mí pɛ́wi ɲɛùn yí dũ pehɔ̀ ɲún?»
Mui dɔ̀ wiɛnírɔ́ Bɛtesayida lóo hũn
22Ɛ́ ɓɛ́ van dɛ̃un Bɛtesayida lóo, ɛ́ nìnbirìe dɔ̀ ɛ́ van dàa mui dɔ̀ ɛ́ dàa ɓɛrɛ yú Yiezu, ɛ̀ ɓɛ̀ ɛ́ ɔ̀ ɓɔ́nɓɔ́ninin nɛ a hɛ-à ǹ. 23Ɛ́ Yiezu ɛ́ khie fɔ́ á mui sɔ ɛ́ zɛ̃nkɛa núnú ǹ ɛ́ dàa lɔ́ van lè lóo máahṹ; à wɔ́ mí ńɲɛntíní ɛ́ yòó bɔ̀ piè yìe ǹ, à yòó bɔ̀ mí níhĩ́ piè lɔ̀n à ɛ́ ɔ̀ dìenin nɛ làa: «Kɔ̀ yìe loo bòo?» 24Á mui ɛ́ hɛ́rɛ mí yìe à zɔn bie nɛ làa: «Ń loo ɓɛ nìnbirìe, kɛ́ ɓɛ́ kɛ kɛ̀a vɛ̃̀hɛ̃ lɛ ɛ́ vɛ.» 25Ɛ́ Yiezu ɛ́ bĩniɛ ɛ́ yòó bɔ̀ mí níhĩ́ piè yìe lɔ̀n; á nùún ɛ́ sɛ́sɛ́a à ɛ́ húi mí híɛhɔ́, á wo wan ɛ́ lóo hɔ bòo wìée. 26Ɛ́ Yiezu ɛ́ nɛ a lan ɓɔ́ mí yíe kɛ́ á bí zɔ lé hɔ́ lóo hũn wɛ̀.
Piɛre ɛ́ dũnɛ ɛ́ zɛ̃́niɛ kɛ́ Yiezu iè Kirisa
Mat 16.13-20; Lik 9.18-21
27Ɛ́ Yiezu àá mí kɛ̀ranzɛ̀ɓɛ̀ ɛ́ khie kã́a hɔ̀ looniɛ̀ lɛ lúwi lè viì lɛ ɛ́ ɓɛ́ wóò ve nɛ Filiipu Sezaree. Ɛ́ hɔ́ lɛ ɛ́ ɓɛ́ wi le wṹn lɔ̀n ɛ́ vɛ cɔ́, ɛ́ Yiezu ɛ́ mí kɛ̀ránzɛ̀ɓɛ̀ ɛ̀ dìenin ɛ́ nɛ làa: «Ɓɛ̀ nìnbirìe ɛ́ wóo nɛ ń iè wieni?» 28Ɛ́ ɓɛ́ zɔn kɔ̃́niɛ ɔ̀ nɛ làa: «Ɓɛ̀dɔ̀ ɛ́ wóo nɛ kɔ́ iè Zãn Batiisi, ɛ̀ ɓɛ̀dɔ̀ ɛ́ wóo nɛ kɔ́ iè Dɔfĩn bɔ̀háanírɔ Elii, ɛ̀ ɓɛ̀dɔ̀ ɛ́ bĩniɛ wóo nɛ kɔ́ iè Dɔfĩn bɔ̀háaníriè lɛ ɛ́ khie vɔ́ ádɔ̀.» 29Ɛ́ Yiezu ɛ́ zɔn ɓɛ̀ dìenin nɛ làa: «Ɛ̀ mìpe lò, mìpe mì viì ɛ̀ ǹ iè wieni?» Ɛ́ Piɛre ɛ́ zɔn bie lɛ́ à ǹ nɛ làa: «Kɔ́ iè ɔ̀pe Kirisa, àpe fuenírɔ lɛ ɛ́ Dɔfĩn tɔrɛ.» 30Ɛ́ Yiezu ɛ́ bie hɔ̀ hìeniɛ ɛ́ lɛ́ ɓà ǹ nɛ ɓɛ bí bie hɔ ɛ̀ lɛ́ nìnbírɔ dɔ̀ ǹ wɛ̀.
Yiezu ɛ́ mí húmú àá mí vìerɔ́ bòo ɛ̀ bie
Mat 16.21-28; Lik 9.22-27
31Ɛ́ pehɔ̀ máahṹ, ɛ̀ Yiezu ɛ́ khie mí kɛ̀ránzɛ̀ɓɛ̀ ɛ̀ kɛ̀rán kɛ́ á ɛ́ bie àá ɓɛ́ ɛ́ nɛ làa: «À nìnbírɔ Zuú ɛ́ fɔ́ɓán à lɔ̀n ɛ̀ bè cɛ̃̀un, ɛ̀ ɓɛ̀ Zuifuɓɛ nìkĩ́ɛ àá ɓɛ́ Dɔfĩn khɛ̃́ndàariè hándíe, àá ɔ́ Moyiize làndɛ́ kɛ̀ránliè ɛ̀ pĩ́ piè bòo, ɛ̀ ɓɛ̀ khíi ɓí-e; kɛ́ pehɔ̀ sítĩnlɔ́ bɔ̀nbɔ̀tĩlán zɔǹ à ɛ́ vìé.» 32À ɛ́ hɔ̀pe sí ɛ̀ bie lɛ́ ɓà ǹ wìée. Ɛ́ Piɛre ɛ́ vɔn ɔ̀ dàa khɛ̃̀nɛ khie van lɔ́ dɛ̃̀, à ɛ́ ɔ̀ wũ̀aní. 33Ɛ́ Yiezu ɛ́ bĩniɛ míte ɛ́ khie huie mí kɛ̀ránzɛ̀ɓɛ̀ à khũ̀a ɛ́ fĩ àá Piɛre nɛ làa: «Vĩ́ lé niǹ máahṹ Situanɛ! Iè hɔ̀ lɛ ɛ́ kɔ́ nùnlé ɛ́ yí Dɔfĩn nùnlé wɛ̀ kɛ́ hɔ́ iè ɓɛ̀ nìnbirìe hɔ́n.»
34Ɛ́ pehɔ̀ máahṹ, ɛ̀ Yiezu ɛ́ khie vɔn ɓɛ̀ nìzã̀amáa àá mí kɛ̀ránzɛ̀ɓɛ̀ à ɛ́ bie àá ɓɛ́ ɛ́ nɛ làa: «Nìnbírɔ kɛ́ á nɛ mii bè niǹ máahṹ, ɛ̀ ɓàasɔ ɛ̀ nɛ mí hũn ɓé mí kùrú yɛ̀rɛ́ tĩì bòo ǹ, à mìí mí kùrú ɓáalén dãanù ɛ̀ tìé ɛ̀ dàá bè niǹ máahṹ. 35Nìnbírɔ kɛ́ á wɛ nɛ mii fuení mí mɛkɛ̃nì ǹ á ɓén vĩíní lé, àlɛ ɛ́ tɛ̀ vĩ́iniɛ mí mɛkɛ̃nì ǹpe àá lé Bentĩnu bòo hũn, ɛ́ ɓàasɔ ɛ́ pe temu ɓén fuení mí mɛkɛ̃nì ǹ. 36Kɛ́ nìnbírɔ ɛ́ hṹn yú lé dímíɲɛ́ bòo míkùi kɛ́ á vĩ́iniɛ mí mɛkɛ̃nì, ɛ̀ pehɔ̀ tũ̀nú ɛ́ wi yí hũn? 37Hɔ̀ iè ńɓùo ɛ́ nìnbírɔ ɛ́ dɛ̀ ɛ́ lɛ́ ɛ́ dàá fuení mí mɛkɛ̃nì? 38Kɛ́ nìnbírɔ ɛ́ ńpe àá niǹ biehĩ́ ɛ́ lùwiè ɛ́ ɓaa hɔ̀pe zoòní lɛ nìɛ tĩ́ihṹ, lɛ iè ɓɛ̀ hɛ̃́fériè àá bɛ́fériè, àá ɓɛ́ bɔ̀konwériè, ɛ́ ɓàasɔ lùwiè ɛ́ ɓiɛ̀ ɓén ɓaà ɔ̀ nìnbírɔ Zuú, pɛ̃̀hṹ lɛ kɛ́ á ɓɛrɛ ɓá yàá bɛ́záanú hũn àá ɓɛ́ mɛlɛkɛ-tentiè.»
Currently Selected:
Marike 8: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
