མཛད༌པ། 11
11
པ་ཏྲུས་གི་ ཡ༌རུ༌ཤ༌ལེམ༌ག་ཆོས༌ཚོགས༌ག་ ཞུ་ཝ༌ལ།
1ཡ་ཧུ་དི་ཡ་ག་ སྐུ་ཚབ་བ་དང་ དད་པ་ཨ་ཁཱན་བ་ཀི་ ཡ་ཧུ་དི་པ་མང་གི་ཁཱན་བ་ཀི་བུ་ དཀོན་མཆོག་ག་གསུང་ག་ དད་པ་ཨ་ཝ་ལ་དག་ཉི་ ན་ཐ་ཝ༌ལ། 2དག་པ་ཀབ་ཉི་ པ་ཏྲུས་ ཡ་རུ་ཤ་ལེམ་ག་ ཕེབས་པ་ཀབ་ཉི་ དད་པ་ཨ་ཁཱན་ ཡ་ཧུ་དི་པ་ཚེ་བང་གི་ རོ་ཀ་ཁ་ཏང་མ༌ལ། 3རོག་ཏེ་བ་ཀི་ ཞུ་ཝ་ལ་ ནཱན་ཡ་ཧུ་དི་པ་མང་གི་ཁཱན་བ་ཀ་ ཕའི་ག་ནུ་ཕ་མ་ཚཱད་པ་ རོག་ཏེ་བ་ཀབ་ཉི་ ཏབ་ཐུར་བཞུགས་ཉི་ བཞེས་ཝ་ལ་ཨ༌ཉི།
4ཨོ་ཉི་ཨ་དེན་གེ་ པ་ཏྲུས་གི་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ ཐམས་ཅན་རང་ རོག་ཏེ་བ་ཀ་ གསུངས་མ༌ལ། 5རོ་ཀི་གསུངས་མ་ལ་ ཇང་ཁྲོམ་ཆེན་ཡོབ་པ་ག་ ཆོ་ལེ་གང་ཀ་ ཇི་གི་སྨོན་ལམ་ཏབ་ཅ་ཨ་ཉི་ ཇི་གི་མཇལ་ཁ་ཐུར་ཉོང༌པ། ཉི་ངབ་ཀེ་དོང་ ཐང་ནང་ད་བུ་ཨ་ཝ་ཐུར་ ཟུར་ཕིཤི་གེ་ཨ་ཉི་ཐིག་ཐཱན་ དོང་ཕབ་ཉི་ ཇ་ག་གུབ་ཀ་ ཨོ་ཕ་ཨ་ཝ་ཐོང༌མ། 6ཉི་ཇི་གི་ ཨོ་ཉ་ཐང་ནང་ནང་ཀ་ གོད་པ་ཀབ་ཉི་ བི་ཕིཤི་ཆོ་ཁཱན་ སེམས་ཅན་བ་ ཉི་རུ་གེ་ནང་དང་ ཆུ་སེན་གེ་གོ་ཙུག་ཉི་ ངབ་ཀེ་ཕེན་ཁཱན་ཁ་ ཐམས་ཅན་རང་ ཚང་པ་ཨ་ཝ་ཐོང༌མ། 7ཉི་ཇི་གི་གསུང་སྐད་ཐུར་ ན་ཐ་ཝ་ པ་ཏྲུས་ ག་ཝུན་ཐཱན་ ཨོ་ཐ་བ་ཤེན་ངམ་ཤོ་དག༌ཉི།
8དག་པ་ཀབ་ཉི་ ཇི་གི་ཞུ་ཝ་ གཙོ་བོ་ ཇི་གི་ཨུ་ཐུ་ད་བུ་ ཨ་ལེ་མར༌བ། ཧང་ཡ་དག་ནེ་ལ་ དམ་པ་མ་ཁཱན་དང་ མ་ཙང་མ་ཆོ་ཁཱན་བ་ ཧང་རང་གི་ནེ་བུ་ ཇི་གི་ཧ་ལ་རང་ ཟ་ཝ་མཱན་ཅ་ཨ༌ཉི།
9ཨོམ་ཆང་རང་ ཞིང་ཁམས་གེ་ ཨོ་ཐེན་གསུངས་མ་ག་ ན་ཐ་ཝ་ དཀོན་མཆོག་གི་ ཙང་མ་ཅོད་ཁཱན་བ་ ནཱན་གི་ མ་ཙང་མ་གི་ལ་ཨ་ཉི་ མ་ཡེག་ཅོ་དག༌ཉི། 10ཨོ་ཐེན་ཨ་ཉི་རང་ ཤེབ་སམ་སག་པུ་ཇུང༌མ། ཉི་གེ་ ཐམས་ཅན་རང་ ཞིང་ཁམས་ག་ཏཱན་ ལོག་ཉི་བསྣམས༌པ།
11ཨོ་ཉི་ཆོ་ལ་རང་ ཀའི་ས་རི་ཡ་གེ་ ཀུན་ཏི་ཁཱན་ སོ་ངོ་སམ་ ཇང་ཆོ་ཁཱན་ཕའི་ག་ཤེག༌པ། 12དོགས་པ་མ་སག་པཱན་ རོག་ཏེ་བ་ཀབ་ཉི་དི་ཨ་ཉི་ དམ་པའི་ཐུགས་ཉིད་གི་ ཇ་ག་གསུངས་ཆོ༌ཝ། ཉི་ཐ་ཆོ་ཁཱན་ དད་པ་ཨ་ཁཱན་ ཕེ་ཝག་ཙ་ཁུང་བུ་ ཇང་ཀབ་ཉི་དི༌ཝ། ཉི་ཨ་ཧ་བ་ དོ་ཟོ་རང་ ཀར་ནེ་ལི་ཡཱས་ག་ཕའི་ག་ཤེག༌པ། 13ཞིང་ཁམས་ག་འཐེན་པ་ རོ་ཀ་ཕའི་ག་བྱོན་ཐཱན་ གསུངས་མ་ཀོར་གེ་ རོ་ཀི་ཨ་ཧ་ཡེག་ཆོ༌ཝ། ཡོབ་པ་ག་ཆོ་ཁཱན་ པ་ཏྲུས་དག་ཉི་ར་ཁཱན་ སི་མོན་ ན་ག་ཕའི་ག་ ར་ལེ་ག་ཀུན་ཏི། 14ཉི་ནཱན་དང་ ན་ག་ཕའི་ག་སོ་ངོ་བ་ཀི་ ཧང་ཏེན་ ཐར་པ་ཉོང་པེ་གི་ལ་སྨོ་ ཨོ་ཉ་ཀོར་གེ་ རོ་ཀི་ན་ག་ཡེག་པེ་དག་ཉི་ གསུངས་ཆོ་ཝ་ཨ༌ཉི།
15ཇི་གི་འཐེན་ལེག་པུ་བཤད་པེ་ གོ་ཙུག་པ་ཀབ་ཉི་ དམ་པའི་ཐུགས་ཉིད་ གོ་མ་ ཨ་ཧ་ཐུང་ཀ་བྱོན་མ་ པུརུས་ཀིན་ཨ་ཉི་རང་ རོག་ཏེ་བ་ཀ་ ཐུང་ཀ་བུ་བྱོན༌མ། 16ཉི་གེ་ གཙོ་བོ་གི་ གསུངས་ཁཱན་ཁེ་པ་ ཇི་གི་ཡིད་ཀ་ཨ༌ཝ། རོ་ཀི་ ཨོ་ཐེན་གསུངས་མ་ཆོ་ཝ་ ཡུ་ཧན་ན་གི་ཤོ་ རི་གི་ཨ་ཉི་ ཁྲུས་གསོར་ཕིན༌ཅ། དག་པ་ཀབ་ཉི་ ན་ཧ་བ་ཤོ་ དམ་པའི་ཐུགས་ཉིད་གི་ཨ་ཉི་ ཁྲུས་གསོར་གནང་མེ་དག༌ཉི། 17ཨ་ཤི་གཙོ་བོ་ ཡི་ཤུ་ཁིརིས་ག་ དད་པ་ཨ་ལ་ཀབ་ཉི་ ཨ་ཧ་གནང་ཁཱན་ སེ་རབ་ཁེ་པ་ དཀོན་མཆོག་གི་ ཡ་ཧུ་དི་པ་མང་གི་ཁཱན་བ་ཀ་བུ་ ཨུ་ཉུ་སེ་རབ་རང་གནང་ནེ་ལ་ ཇི་གི་དཀོན་མཆོག་ ཧང་ཏེན་ཁག་པེ་རེ་བེ་ཡ།
18དད་པ་ཨ་ཁཱན་ ཡ་ཧུ་དི་པ་བ་ཀི་ ཨུ་ཐུ་ད་བུ་ ན་ཐ་ལ་ཀབ་ཉི་ རོག་ཏེ་བ་ ཁ་ཏང་མེ་ག་ནོར་བ༌ལ། རོག་ཏེ་བ་ཀི་ དཀོན་མཆོག་ག་ བསྟོད་པ་ཕུལ་ཉི་ ཞུ་ཝ་ལ་ ཨོམ་གི་ནེ་ལ་ དཀོན་མཆོག་གི་ ཡ་ཧུ་དི་པ་མང་གི་ཁཱན་བ་བུ་ སྡིག་པ་གེ་ལོག་ཐཱན་ ཚེ་མ་འགྱུར་བརྟན་པ་ཞུ་ལེ་ག་ གོ་སྐབས་གནང་ལ་ཨ༌ཉི༎
ཨེན་ཏྲི་ཨོ་ཁི་ཡ་ག་ཆོས་ཚོགས།
19ཨིས་ཏི་ཕ་ནཱས་ བཀྲོངས་མེ་གང་ཀ་ ཀ་ལུ་ཏཱད་པེ་ གོ་ཙུག་པ་ཨ་དེན་གེ་ གཙོ་བོ་ག་ དད་པ་ཨ་ཁཱན་ཚེ་བང་ བེརེ་ཉི་དིན་ཅ་ཨ་ཉི་ བཱརའ་ཨི་བི་ག་རང་ གསུང་མ་བཤད་པཱན་ ཡ་ཧུ་དི་པ་བ་ཀ་ཤ་ བཤད་ཉི་རང་ རོག་ཏེ་བ་ ཕོ་ནི་ཀེ་དང་སའི་པརཱས་ ཉི་ཨེན་ཏྲི་ཨོ་ཁི་ཡ་ སག་པུ་རང་ཤེག་པ༌ལ། 20དག་པ་ཀབ་ཉི་ རོག་ཏེ་ཚེ་བང་ཤོ་ སའི་པརཱས་དང་ ཀུ་རེ་ནི་ག་ སོ་ངོ་བ་ཆོ༌ཝ། རོག་ཏེ་བ་ ཨེན་ཏྲི་ཨོ་ཁི་ཡ་ག་ཨུན་ཐཱན་ མི་རིགས་ གིརིག་བ་ཀ་བུ་ གཙོ་བོ་ ཡི་ཤུ་ཁིརིས་ག་ཀོར་གེ་ འཐེན་ལེག་པུ་བཤད་པ༌ལ། 21གཙོ་བོ་ག་ཕྱག་ རོག་ཏེ་བ་ཀ་ཐུང་ཀ་ ཆོ་ཝ་ཨ་དེན་གེ་ སོ་ངོ་མང་པུ་ཐུར་གི་ དད་པ་ཨ་ཉི་ གཙོ་བོ་ག་ཏཱན་ལོག་པ༌ལ།
22ཡ་རུ་ཤ་ལེམ་ག་ ཆོས་ཚོགས་གི་ ཨོ་ཐ་ཀོར་གེ་ ཐམས་ཅན་རང་ ན་ཐ་ཝ༌ལ། ཉི་རོག་ཏེ་བ་ཀི་ བར་ན་བཱས་ ཨེན་ཏྲི་ཨོ་ཁི་ཡ་ག་ ཀུན་ཏི་ཝ༌ལ། 23རོག་ཨེན་ཏྲི་ཨོ་ཁི་ཡ་ག་ཕེབས་ཉི་ གཟིགས་པ་ཀབ་ཉི་ དཀོན་མཆོག་གི་ སོ་ངོ་བ་ཀ་ ཐུགས་རྗེ་གཟིགས་པ་ག་ཐོང་ཉི་ ཤོ་ནང་ཕེ་ཝ༌ལ། ཨོ་ཉི་ཨ་དེན་གེ་ རོ་ཀི་རོག་ཏེ་བ་ཀ་ སེམས་ནང་ཀེ་ཨ་ཉི་རང་ གཙོ་བོ་ག་ དམ་ཚིག་ཙུང་ཉི་ཆོའི་ཨ་ཉི་ གསུངས་མ༌ལ། 24བར་ན་བཱས་ཤོ་ སོ་ངོ་ལེག་པུ་ཐུར་ གི་ཝ་མ་ཚཱད་པ་ དམ་པའི་ཐུགས་ཉིད་དང་ དད་པ་གི་ཕུང་མ་ཆོ་ཝ༌ལ། ཨོམ་ཆང་རང་ སོ་ངོ་མང་པུ་ཐུར་ གཙོ་བོ་ག་ དད་པ་ཨ་ཁཱན་རི་ཝ༌ལ།
25བར་ན་བཱས་ ཀྲར་སཱས་ག་ ཤ་ཝུལ་ལ་མེ་ག་བྱོན་མ༌ལ། 26རོ་ཀི་ཤ་ཝུལ་ཐོང་ཉི་ ཨེན་ཏྲི་ཨོ་ཁི་ཡ་ག་ཕ་ཝ༌ལ། ཉིང་ཐུར་སག་པུ་ རོག་ཉིག་ཙིང་ ཆོས་ཚོགས་ག་རུབ་ཉི་ ཨོ་ཉ་སོ་ངོ་མང་པུ་ཐུར་ག་ ཡེན་གནང་མ༌ལ། སློ་མ་བ་ཀ་ ཁིརིས་ཊི་ཡཱན་#11:26 ཁིརིས་ཊི་ཡཱན་ཤོ་ ཡི་ཤུ་པ་ག་ཡེག་ཅ་གི༌ལ། དག་ཉི་ གོ་དང་པ་ཨེན་ཏྲི་ཨོ་ཁི་ཡ་ག་ ར་ཝ༌ལ།
27ཨུ་ཐུ་གང་ཀ་ ཡ་རུ་ཤ་ལེམ་གེ་ ལུང་བསྟན་པ་ཚེ་བང་ ཨེན་ཏྲི་ཨོ་ཁི་ཡ་ག་ ཕེབས་པ༌ལ། 28རོག་ཏེ་བ་ཀ་པོང་ཀེ་ ཐུར་ཤོ་ ཨ་ག་བཱས་དག་ཁཱན་ གི་ཝ་ཆོ་ཝ༌ལ། རོ་ཀི་ག་བཞེངས་ཐཱན་ དམ་པའི་ཐུགས་ཉིད་གེ་ཨ་ཉི་ གསུངས་མ་ལ་ འཛམ་གླིང་ཐམས་ཅན་ག་ ཟ་ལེ་བེས་པེ་ག་ དུས་ཀ་ལུ་ཐུར་ ཨོ་ཕེ་ཅམ་པ་ཅ་ཨ༌ཉི། (ཨུ་ཉུ་ཤོ་ ཀོལོཝ་དི་ཡཱས་དག་ཁཱན་ དཔོན་ཆི་ལུ་ཨ་ཉི་ བཞུགས་པེ་གང་ཀ་ཇུང་མ༌ལ།) 29ཨེན་ཏྲི་ཨོ་ཁི་ཡ་ག་ དད་པ་ཨ་ཁཱན་ ཐམས་ཅན་གི་ ཡ་ཧུ་དི་ཡ་ག་ཆོ་ཁཱན་ དད་པ་ཨ་ཁཱན་བ་ཀ་དེན་གེ་ ཧབ་ཏུར་རེ་བ་ཐུར་ རུམ་པེ་ག་ཐག་གཅཱད་པ༌ལ། 30རོག་ཏེ་བ་ཀི་ རོག་ཏེ་བ་ཀ་སེ་རབ་ ཡ་རུ་ཤ་ལེམ་ག་ ཆོས་ཚོགས་ག་ སོ་ངོ་ཆི་ལུ་བ་ཀ་ ཕུལ་བེ་དེན་གེ་ བར་ན་བཱས་དང་ ཤ་ཝུལ་ཀབ་ཉི་ ཀུན་ཏི་ཝ༌ལ༎
Currently Selected:
མཛད༌པ། 11: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
