མཛད༌པ། 14
14
པ་ཝལ་དང་བར་ན་བཱས་ ཨའི་ཀོ་ནི་ཡཱམ་ག།
1ཁྲོམ་ཆེན་ཨའི་ཀོ་ནི་ཡཱམ་ག་ པ་ཝལ་དང་བར་ན་བཱས་ ཡ་ཧུ་དི་པ་ ཆོས་འཛོམས་ནང་ཀ་བྱོན་ཐཱན་ གནམ་མེད་ས་མེད་ ལེག་པུ་ཨ་ཉི་ གསུངས་མ་ཨ་དེན་གེ་ ཡ་ཧུ་དི་པ་དང་ གིརིག་མང་པུ་ཐུར་གི་ དད་པ་ཨ་ཝ༌ལ། 2དག་པ་ཀབ་ཉི་ དད་པ་མ་ཨ་ཁཱན་ ཡ་ཧུ་དི་པ་བ་ཀི་ ཡ་ཧུ་དི་པ་མང་གི་ཁཱན་བ་ཀ་ཏྲོག་ཉི་ སློ་མ་ཉིག་ཙིང་ག་ དགྲ་ཨ་ལེ་ག་བི་ཝ༌ལ། 3ཨོ་ཉི་ཨ་དེན་གེ་ པ་ཝལ་དང་ བར་ན་བཱས་གི་ གཙོ་བོ་ག་ལོ་ཏེན་ཉི་ གསུང་དོ་རི་རི་ཨན་ བཤད་ཉི་རང་ ནོང་མང་པུ་ཐུར་ ཨའི་ཀོ་ནི་ཡཱམ་ག་ བཞུགས་པ༌ལ། ཉི་གཙོ་བོ་གི་ རོག་ཉིག་ཙིང་ག་ རྫུ་འཕྲུལ་དང་ རྟགས་མཚན་བ་གེན་མེ་ག་ ཤུགས་སྟོབས་གནང་ཉི་ རོ་ཀ་ཐུགས་རྗེ་ག་ཀོར་གེ་ བཤད་ཁཱན་ གསུང་ཁེ་པ་ དེན་པ་གི་ལ་ཨ་ཉི་ ཁུངས་ཀེ་བ༌ལ། 4དག་པ་ཀབ་ཉི་ ཁྲོམ་ཆེན་ག་ཆོ་ཁཱན་ སོ་ངོ་བ་བོང་ཉི་ ཁ་ཉིག་ཙིང་རི་ཝ༌ལ། ཁ་ཐུར་ཤོ་ ཡ་ཧུ་དི་པ་བ་ཀ་ལོ་ཀེ་དང་ ཉི་ཨོམ་ཐུར་ཤོ་ སྐུ་ཚབ་ཉིག་ཙིང་ག་ ལོ་ཀེ་རི་ཝ༌ལ།
5ཡ་ཧུ་དི་པ་མང་གི་ཁཱན་དང་ ཡ་ཧུ་དི་པ་བ་ ཉི་རོག་ཏེ་བ་ཀ་ འགོ་དཔོན་བ་ཀི་ སྐུ་ཚབ་ཉིག་ཙིང་ག་ མ་ལེག་པ་ཨ་ཉི་ ལུང་གི་དྲོ་མེ་ག་ མིག་པ་ཕི་ཝ༌ལ། 6དག་པ་ཀབ་ཉི་ སྐུ་ཚབ་ཉིག་ཙིང་གི་ ཨོ་ཐ་ཀོར་གེ་མཁྱེན་ཉི་ ལུ་ཀོ་ནི་ཡ་དང་ ལུས་ཏྲ་ ཉི་གེ་དར་བི་དག་ཁཱན་ ཁྲོམ་ཆེན་བ་དང་ ཨོ་ཉ་ཁོར་ཀ་ཆོ་ཁཱན་ ས་ཆ་ག་ཏཱན་ གཱན་བྱོན་མ༌ལ། 7ཉ་ག་བུ་ རོག་ཉིག་ཙིང་གི་ འཐེན་ལེག་པུ་བཤད་ཉི་རང་ བཞུགས་པ༌ལ༎
པ་ཝལ་དང་བར་ན་བཱས་ ལུས་ཏྲ་ག།
8ལུས་ཏྲ་ག་ བི་ག་ཤུག་མ་ཝ་ཨ་དེན་གེ་ ཨ་མ་གི་ ཀེ་དེན་ཐུར་གེ་ག་ཏཱན་ ཧ་ལ་རང་ དང་མེ་མར་ཁཱན་ སོ་ངོ་ཐུར་ ལང་ཉི་ཆོ་ཝ་ཅ་གི་ཝ༌ལ། 9ཉི་རོག་ པ་ཝལ་གི་བཤད་ཁཱན་ གསུང་ཉཱན་ཉི་ ཆོ་ཝ་ཅ་གི་ཝ༌ལ། པ་ཝལ་གི་ རོ་ཀ་ཏཱན་ ཐེ་རེ་རེ་ཨན་ གཟིགས་པ་ཀབ་ཉི་ རོག་དྲག་པེ་རེ་བེ་དེན་གེ་ རོ་ཀ་དད་པ་ཆོ་ཝ་ག་མཁྱེན་ཉི་ 10གསུང་སྐད་ཆི་ལུ་ཨ་ཉི་ གསུངས་མ་ལ་ ག་ཐྲང་ཉི་ཐིང་ཤོ་དག༌ཉི། ཉི་རོ་ཀི་ ག་ལིན་ཐཱན་ ལེང་ཐེང་དང་མེ་ གོ་ཙུག་པ༌ལ།
11པ་ཝལ་གི་ མཛད་ཁཱན་ཁེ་པ་ སོ་ངོ་བ་ཀི་ཐོང་ཉི་ རོག་ཏེ་བ་ཀ་ ལུ་ཀོ་ནི་ཡ་ག་ལོ་གེ་ཨ་ཉི་ ཤ་དར་ཕི་ཉི་ཡེག་པ་ལ་ ལྷ་བ་ སོ་ངོ་ག་སྤྲུལ་ཐཱན་ དོང་ཨ་ཧ་པོང་ཀ་ བྱོན་མ་གི་ཝ་ལ་དག༌ཉི། 12ཉི་གེ་ སོ་ངོ་བ་ཀི་ བར་ན་བཱས་ག་ ལྷ་ཇི་ཨུས་དང་ པ་ཝལ་ག་ ལྷ་ཧར་མེས་ཨ་ཉི་ ར་ལེ་གོ་ཙུག་པ༌ལ། ཧང་ཡ་དག་ནེ་ལ་ གསུང་བཤད་ཁཱན་ཁེ་པ་ པ་ཝལ་གི་ཝ་ཆོ་ཝ༌ལ། 13ལྷ་ཇི་ཨུས་ག་ལྷ་ཁང་ ཁྲོམ་ར་ག་རང་ཅ་གི་ཝ༌ལ། ཉི་ཇི་ཨུས་ག་བླ་མ་དང་ སོ་ངོ་བ་ཀི་ སྐུ་ཚབ་ཉིག་ཙིང་ག་ཏཱན་ མཆོད་པ་ཕུལ་བེ་དེན་གེ་ ཏོ་ཀ་བ་དང་ མོམ་ནང་བ་ཕ་ཉི་ ཁྲོམ་ཆེན་ག་ སྒོ་རེ་ཁ་ར་ག་ཤེག་པ༌ལ།
14སྐུ་ཚབ་པ་ཝལ་དང་ བར་ན་བཱས་གི་ ཨོ་ཉ་ཀོར་གེ་ ན་ཐ་ལ་ཀབ་ཉི་ རོག་ཉིག་ཙིང་གི་ རོག་ཉིག་ཙིང་ག་ ནམ་བཟའ་རེད་པ༌ལ། ཉི་སོ་ངོ་ཛོམ་ཁཱན་བ་ཀ་ པོང་ཀ་ཏཱན་ ཇུག་ཉི་རང་བྱོན་ཐཱན་ གསུང་སྐད་ཆི་ལུ་ཨ་ཉི་ གསུངས་མ་ལ་ 15ཇ་རོ་བ་ ན་ཤི་ཧང་ཨ་ཉི་ ཨུ་ཉུ་ད་བུ་ཨན་ཅ་ཡ། ཨ་ཆིང་བུ་ ནའི་ད་བུ་རང་ སོ་ངོ་ཐུར་ཤ་གི༌ལ། ཉི་ཨའི་ཤོ་ ན་ཧ་འཐེན་ལེག་པུ་བཤད་ཉི་ ཨུ་ཐུ་ད་བུ་ ཁུངས་མ་ཁཱན་ ལའི་བ་ཐུབ་ཐཱན་ཐཱན་ ཞིང་ཁམས་ འཛམ་གླིང་དང་རྒྱམ་མཚོ་ ཉི་ཨོ་ཉ་ནང་ཀ་ཆོ་ཁཱན་བ་ ཐམས་ཅན་རང་ བཀོད་ཁཱན་དང་ ཧ་ལ་རང་མ་གཤགས་ཁཱན་ དཀོན་མཆོག་ག་ དད་པ་ཨའི་ཨ་ཉི་ ཡེག་པེ་དེན་གེ་ ཨོ་ཕ་གི༌ལ། 16དང་པོ་ག་སོ་ངོ་བ་ དཀོན་མཆོག་གི་ མི་རིགས་ཐམས་ཅན་ག་ རང་རང་ས་ ལུགས་སྲོལ་དང་ཏུ་ཉི་ ཨ་ལེ་ག་གནང་མ༌ལ། 17ཨོ་ཉེ་རང་གི་ནེ་བུ་ རོ་ཀི་མཛད་ཁཱན་ཕྱག་ལཱ་ ལེག་པུ་ག་ཐུང་ཀེ་ཨ་ཉི་ ཧ་ལ་རང་གི་ནེ་བུ་ རོ་ཀི་རོག་བཞུགས་པ་ཅ་ཨ་ཉི་ ཁུངས་ཀེ་ཉི་གནང་མ༌ཅ། རོ་ཀི་ན་ཧ་ ངབ་ཀེ་དོང་ ངམ་སུ་གནང༌ཅ། དུས་ཙུན་ག་ཐོག་གནང༌ཅ། ཉི་ལྟོ་གནང༌ཅ། ན་ཧ་སེམས་ ཤོ་ནང་ཕེ་ཝ་ཅོད་ཉི་ གནང་ཅ་ཨ༌ཉི། 18ཨོ་ཐ་བ་ གསུངས་དེན་གེ་བུ་ སྐུ་ཚབ་ཉིག་ཙིང་གི་ ཧང་རང་རུད་པཱན་ སོ་ངོ་བ་ཁག་ཉི་ རོག་ཉིག་ཙིང་ག་ཏཱན་ མཆོད་པ་ཕུལ་བེ་ མ་བི་ཝ༌ལ།
19དག་པ་ཀབ་ཉི་ ཨེན་ཏྲི་ཨོ་ཁི་ཡ་ག་དང་ ཨའི་ཀོ་ནི་ཡཱམ་གེ་ ཡ་ཧུ་དི་པ་ཚེ་བང་ ཉ་ག་ཤེག་པ༌ལ། སོ་ངོ་ཛོམ་ཁཱན་བ་ རོག་ཏེ་བ་ཀ་ ལོ་ཀེ་ཙུག་ཐཱན་ པ་ཝལ་ལུང་གི་དྲོ་མ༌ལ། ཉི་རོག་ གཤགས་པ་ད་བུ་ཐོང་ཉི་ ཁྲོམ་གེ་ཕིས་ཀ་ཏཱན་ ཇག་ཉི་བུ་ཝ༌ལ། 20དག་པ་ཀབ་ཉི་ སློ་མ་བ་ པ་ཝལ་ག་ཀོ་ལོ་ལོ་ ཛོ་མ་ཀབ་ཉི་ རོག་ག་བཞེངས་ཐཱན་ ལོག་ཉི་རང་ཁྲོམ་ཆེན་ནང་ཀ་ བྱོན་མ༌ལ། ཉི་ནམ་ནིང་ད་བུ་ རོག་བར་ན་བཱས་ཀབ་ཉི་ དར་བི་ག་ཏཱན་ བྱོན་མ༌ལ༎
སི་རི་ཡ་ག་ཆོ༌ཁཱན་ ཨེན༌ཏྲི༌ཨོ༌ཁི༌ཡ༌ག༌ཏཱན་ལོག༌པ༌ལ།
21པ་ཝལ་དང་ བར་ན་བཱས་གི་ དར་བི་ག་ འཐེན་ལེག་པུ་བཤད་ཉི་ སློ་མ་མང་པུ་ཐུར་ ཅོད་པ༌ལ། ཨོ་ཉ་གེ་ རོག་ཏེ་བ་ ལོག་ཉི་རང་ལུས་ཏྲ་ ཨའི་ཀོ་ནི་ཡཱམ་དང་ ཨེན་ཏྲི་ཨོ་ཁི་ཡ་ག་ཏཱན་ བྱོན་མ༌ལ། 22སློ་མ་བ་ སྒྲིང་སྒྲིང་ཅོད་ཉི་ ཉི་དད་པ་ཨ་ཉི་རང་ ཆོ་ལེ་ཁེ་ཝ་ཀོར་གེ་ སེམས་གསོ་ཨ་ཉི་ ཨོ་ཐེན་གསུངས་མ་ལ་ དཀོན་མཆོག་ག་རྒྱལ་སྲིད་ག་ ནུ་ཕེ་དེན་གེ་ ཨ་ཧ་བ་ དཀའ་ཝ་མང་པུ་ ཅཱད་པེ་ཁེ་ལེ་དག༌ཉི། 23ཆོས་ཚོགས་དྲང་རང་ སོ་ངོ་ཆི་ལུ་བ་ཀེ་བ༌ལ། ཉི་སྨྱུང་གནས་ཆོ་ཉི་ སྨོན་ལམ་ཏབ་ཐཱན་ རོག་ཏེ་བ་ཀི་ དད་པ་ཨ་ཁཱན་ གཙོ་བོ་ག་ཕྱག་ཀ་སྤྲོད་པ༌ལ། 24ཨོ་ཉ་ཚི་ངེ་ རོག་ཉིག་ཙིང་ པི་སི་དི་ཡ་དག་ས་གེ་བྱོན་ཉི་ པམ་ཕི་ལི་ཡ་དག་ས་ག་ ཕེབས་པ༌ལ། 25པར་ག་ག་ རོག་ཉིག་ཙིང་གི་ འཐེན་ལེག་པུ་བཤད་ཐཱན་ དོང་ཨ་ཏྲ་ལི་ཡ་དག་ས་ག་ཏཱན་ བྱོན་མ༌ལ།
26ཉ་གེ་ རོག་ཉིག་ཙིང་ ལོག་ཉི་རང་ གྲུ་ག་ནང་ཀ་ནུབ་ཉི་ སི་རི་ཡ་ག་ ཨེན་ཏྲི་ཨོ་ཁི་ཡ་ག་ཏཱན་ བྱོན་མ༌ལ། ཨོ་མ་ རོག་ཉིག་ཙིང་གི་ འགྲུབ་ཁཱན་ལའི་ཁེ་པ་ ཨ་ལེ་དེན་གེ་ དཀོན་མཆོག་གི་ ཐུགས་རྗེ་གཟིགས་ཅེན་དག་པ་གི་ ཨེན་ཏྲི་ཨོ་ཁི་ཡ་ག་ དད་པ་ཨ་ཁཱན་བ་ཀི་ རོག་ཉིག་ཙིང་ དཀོན་མཆོག་ག་ ཕྱག་ཀ་ཕུལ་བ་ཆོ་ཝ༌ལ། 27ཨེན་ཏྲི་ཨོ་ཁི་ཡ་ག་ ཕེབས་ཏེན་གེ་ སྐུ་ཚབ་ཉིག་ཙིང་གི་ ཆོས་ཚོགས་ག་ དད་པ་ཨ་ཁཱན་བ་ ཏབ་ཐུར་ཛོ་མེ་རིག་ཐཱན་ དཀོན་མཆོག་གི་ རོག་ཉིག་ཙིང་ག་ཐུང་ཀེ་ཨ་ཉི་ ཕྱག་ལཱ་ཧང་ཏེན་ མཛད་པ་གི་ལ་སྨོ་ ཉི་ཡ་ཧུ་དི་པ་ མང་གི་ཁཱན་བ་ཀ་དེན་གེ་ དད་པ་ག་ཀོ་ ཧང་ཏེན་ཕེག་ཉི་ གནང་མ་གི་ལ་སྨོ་ ཨོ་ཉ་ཀོར་གེ་ ཐམས་ཅན་རང་ཞུ་ཝ༌ལ། 28ཉི་རོག་ཉིག་ཙིང་ ཉ་ག་སློ་མ་བ་ཀབ་ཉི་ ནོང་མང་པུ་ཐུར་ བཞུགས་པ༌ལ༎
Currently Selected:
མཛད༌པ། 14: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
