མཛད༌པ། 17
17
པ་ཝལ་དང་སི༌ལཱས་ ཐེ༌ས༌ལོ༌ནི༌ཀི༌ག།
1པ་ཝལ་དང་སི་ལཱས་ ཨམ་ཕི་པོ་ལིས་དང་ ཨ་པོལ་ལོ་ནི་ཡ་གེ་ཨ་ཉི་བྱོན་ཉི་ ཐེ་ས་ལོ་ནི་ཀི་ག་ ཕེབས་པ༌ལ། ཉི་ཉ་ག་ ཡ་ཧུ་དི་པ་ག་ ཆོས་འཛོམས་ཅ་གི་ཝ༌ལ། 2པ་ཝལ་གི་ རོ་ཀ་ལུགས་སྲོལ་དང་ཏུ་ཉི་ ཆོས་འཛོམས་ནང་ཀ་བྱོན་ཐཱན་ དུས་བཟང་སམ་སག་པུ་ རེ་ཉི་རང་སོ་ངོ་བ་ཀ་ གསུང་རབ་གེ་ དེན་ཐ་ཁྲེ་ཉི་གནང་མ༌ལ། 3རོ་ཀི་ཁིརིས་ཤོ་ དཀའ་ཝ་ཅཱད་པེ་ ཁེ་ཝ་ཀོར་གེ་དང་ གཤགས་པ་གེ་ ལོག་ཉི་སྐུ་བཞེངས་པེ་ ཁེ་ཝ་ཀོར་གེ་ ལུང་བསྟན་ཁཱན་བ་ཀ་ དེན་ཐ་ཁྲེ་ཉི་ ཁུངས་ཀེན་གནང་མ༌ལ། རོ་ཀི་གསུངས་མ་ལ་ ཇི་གི་ན་ཧ་ཡེ་ཁཱན་ ཡི་ཤུ་ཁེ་པ་ ཁིརིས་གི་ལ་ཨ༌ཉི། 4ཨོ་ཉ་ཉཱན་ཁཱན་ ཚེ་བང་གི་ པ་ཝལ་གི་ གསུངས་ཁཱན་ག་ དད་པ་ཨ་ཉི་ པ་ཝལ་དང་སི་ལཱས་ག་ དྲེ་ཀ་ནུ་ཕ་མ་ཚཱད་པ་ དཀོན་མཆོག་ག་ གསོལ་ཝ་ཏབ་ཁཱན་ གིརིག་ག་ སོ་ངོ་མང་པུ་ཐུར་དང་ ཨོ་ཉ་ཁྲོམ་ཆེན་ག་ མེ་ཝག་ཙ་ཆི་ལུ་ མང་པུ་ཐུར་གི་བུ་ དད་པ་ཨ་ཝ༌ལ།
5དག་པ་ཀབ་ཉི་ ཡ་ཧུ་དི་པ་ འགོ་དཔོན་ཚེ་བང་གི་ ཕྲག་དོག་ཨ་ཝ་ཨ་དེན་གེ་ གཞུང་ལམ་ག་ཆོ་ཁཱན་ སོ་ངོ་ངན་པ་བ་ ཏབ་ཐུར་ཛོ་མེ་བིན་ཐཱན་ གནམ་མེད་ས་མེད་ ཀཱན་ཇིག་པེ་བི་ཝ༌ལ། པ་ཝལ་དང་སི་ལཱས་ ཇག་བུ་ཉི་ སོ་ངོ་ཛོམ་ཁཱན་བ་ཀ་གུབ་ཀ་ ཀེ་བེ་དེན་གེ་ ལམ་ཅ་ཨ་ཉི་ ཨོ་ཉ་སོ་ངོ་བ་ཀི་ ཡ་སོན་ག་ཕའི་ག་ ནོད་པ་ཀེ་བ༌ལ། 6རོག་ཏེ་བ་ཀི་ པ་ཝལ་དང་སི་ལཱས་ ཡ་སོན་ག་ཕའི་ག་ མ་ཐོང་མ་ཨ་དེན་གེ་ ཡ་སོན་དང་ བཱརའ་དད་པ་ཨ་ཁཱན་ ཚེ་བང་ཇག་བུ་ཉི་ ཁྲོམ་ཆེན་ག་ ཚོགས་པ་བ་ཀ་ གུབ་ཀ་ཀེ་བ༌ལ། ཉི་རོག་ཏེ་བ་ཀི་ ཨོ་ཐེན་ཞུ་ཝ་ལ་ ཨོ་ག་རང་ ཏབ་མ་ཉམ་པ་ཅོད་ཁཱན་ པ་ཝལ་དང་སི་ལཱས་ ཐ་ག་བུ་ཤེག་པ༌ལ། 7ཨོ་ཐ་ཡ་སོན་གི་ ཨོ་ཉ་སོ་ངོ་ཉིག་ཙིང་ རོ་ཀ་ཕའི་ག་ ཆོ་ལེ་བི་ཝ༌ལ། རོག་ཏེ་བ་ཀི་ དཔོན་ཀའི་སར་གི་གནང་ཁཱན་ཁྲིམས་ག་ ཆ་གནས་ཐ་ལུ་མ༌ལ། ཧང་ཡ་དག་ནེ་ལ་ རོག་ཏེ་བ་ཀི་ དཔོན་ཡི་ཤུ་དག་ཁཱན་ བཱརའ་ཐུར་ཅ་དང་ཨ༌ཉི།
8ཨོ་ཐ་ཀོར་གེ་ ན་ག་ཐཱན་ཅ་ཨ་ཉི་ སོ་ངོ་བ་དང་ཁྲོམ་ཆེན་ག་ ཚོགས་པ་བ་ སྡུག་བསྔལ་ཨ་ལེ་ཨོ་ཕ༌ལ། 9དག་པ་ཀབ་ཉི་ ཡ་སོན་དང་ བཱརའ་དད་པ་ཨ་ཁཱན་བ་ཀི་ བ་ཏབ་ཏེན་གེ་ ཚོགས་པ་བ་ཀི་ རོག་ཏེ་བ་ཐར་བ༌ལ༎
པ་ཝལ་དང་སི༌ལཱས་བེ༌རི་ཡ་ག།
10ཨོ་ཉ་ངེ་རི་རང་ དད་པ་ཨ་ཁཱན་བ་ཀི་ པ་ཝལ་དང་སི་ལཱས་ བེ་རི་ཡ་དག་ས་ག་ཏཱན་ ཀུན་ཏི་ཝ༌ལ། ལེ་ལ་ག་ཕེབས་ཏེན་གེ་ རོག་ཉིག་ཙིང་ ཡ་ཧུ་དི་པ་ག་ ཆོས་འཛོམས་ག་ བྱོན་མ༌ལ། 11བེ་རི་ཡ་ག་སོ་ངོ་བ་ ཐེ་ས་ལོ་ནི་ཀི་ག་ སོ་ངོ་བ་ཀེ་ མང་པུ་བཟང་པོ་ཆོ་ཝ༌ལ། ཧང་ཡ་དག་ནེ་ལ་ རོག་ཏེ་བ་ཀི་ པ་ཝལ་གི་ བཤད་ཁཱན་གསུང་ ན་ཐེན་ལེག་པུ་ཨ་ཉི་ ཉཱན་པ༌ལ། ཉི་པ་ཝལ་དང་སི་ལཱས་གི་ དེན་པ་གསུངས་ལ་སྨོ་ མ་ལ་སྨོ་ གོད་པེ་དེན་གེ་ རོག་ཏེ་བ་ཀི་ ནོང་དྲང་རང་ གསུང་རབ་ བརྟག་དཔྱད་ཕི་ཉི་ གོད་པ༌ལ། 12ཨོ་ཉི་ཨ་དེན་གེ་ ཡ་ཧུ་དི་པ་མང་པུ་ཐུར་གི་ དད་པ་ཨ་ཝ༌ལ། ཉི་གེ་ གིརིག་ག་ ཨ་མ་ཆི་ལུ་ཚེ་བང་དང་ ཕེ་ཝག་ཙ་མང་པུ་ཐུར་གི་བུ་ དད་པ་ཨ་ཝ༌ལ།
13དག་པ་ཀབ་ཉི་ ཐེ་ས་ལོ་ནི་ཀི་ག་ ཡ་ཧུ་དི་པ་ཚེ་བང་གི་ བེ་རི་ཡ་ག་ པ་ཝལ་གི་ དཀོན་མཆོག་ག་ གསུང་བཤད་ལ་ཨ་ཉི་ ན་ཐ་ཝ་ཨ་དེན་གེ་ རོག་ཏེ་བ་ བེ་རི་ཡ་དིན་ཐཱན་ སོ་ངོ་བ་ཏབ་ཐུར་ཀུག་ཉི་ ཏབ་མ་ཉམ་པ་ཅོད་པ༌ལ། 14ཨོ་ཉི་ཨ་དེན་གེ་ དད་པ་ཨ་ཁཱན་བ་ཀི་ ཨོ་ཉ་ཐྲེ་ཀེ་རང་ པ་ཝལ་ མཚོ་ར་ག་ཏཱན་ ཀུན་ཏི་ཝ༌ལ། དག་པ་ཀབ་ཉི་ སི་ལཱས་དང་ཏི་མོ་ཐི་ཤོ་ ཚིང་ཚིང་བེ་རི་ཡ་ག་རང་ ལུས་པ༌ལ། 15པ་ཝལ་ཀབ་ཉི་ དི་ཁཱན་སོ་ངོ་བ་ཀི་ རོག་ཨེ་ཐེནས་སག་པུ་ནུང་ཐཱན་ སི་ལཱས་དང་ཏི་མོ་ཐི་ དོ་ཟོ་དོ་ཟོ་ཨ་ཉི་ པ་ཝལ་བཞུགས་ས་ག་ ཨོ་དོ་ཨ་ཉི་འཐེན་ཕ་ཉི་ བེ་རི་ཡ་ག་ཏཱན་ ལོག་པ༌ལ༎
པ་ཝལ་གི་ ཨེ༌ཐེནས༌ག་ཆོས་བཤད༌པ༌ལ།
16པ་ཝལ་ ཨེ་ཐེནས་ག་ སི་ལཱས་དང་ ཏི་མོ་ཐི་ག་ནོང་ཉི་ བཞུགས་པེ་གང་ཀ་ ཁྲོམ་ཆེན་ཐམས་ཅན་རང་ སྐུ་བ་ཀི་ཆ་པ་ཨ་དེན་གེ་ རོ་ཀ་སེམས་མ་ཆག་པ༌ལ། 17ཨོ་ཉི་ཨ་དེན་གེ་ རོ་ཀི་ཡ་ཧུ་དི་པ་ག་ ཆོས་འཛོམས་ག་བྱོན་ཐཱན་ ཡ་ཧུ་དི་པ་བ་དང་ དཀོན་མཆོག་གེ་ ཡོང་ཁེ་ཁཱན་གིརིག་བ་ཀབ་ཉི་ རྩོད་པ་གནང་མ༌ལ། ཉི་ནོང་དྲང་རང་ ཚོང་ཕི་ས་ག་ཆོ་ཁཱན་ སོ་ངོ་ཐམས་ཅན་ག་ གསུངས་གནང་མ༌ལ།
18ཉི་ཨོམ་ཆང་རང་ ཨི་པིག་ཡུ་རི་དང་ ཨིས་ཏོ་དག་ཁཱན་ སློབ་དཔོན་ཚེ་བང་ཀབ་ཉི་བུ་ རོ་ཀི་རྩོད་པ་གནང་མ༌ལ། རོ་ཀི་ རོག་ཏེ་བ་ཀ་ ཡི་ཤུ་དང་ རོག་གསོན་པོ་ཨ་ཉི་ སྐུ་བཞེངས་པ་ཀོར་གེ་ གསུངས་མ་ཀབ་ཉི་ རོག་ཏེ་བ་ཀི་ ཡེག་པ་ལ་ ཨོ་ཐ་ཡོང་བ་གི་ ཧང་ཡེག་ལ་ཡ་ཨ༌ཉི། ཉི་བཱརའ་བ་ཀི་ ཡེག་པ་ལ་ ཨོ་ཐ་སོ་ངོ་ཤོ་ ཕྱི་པ་ག་ཆོས་བཤད་ཁཱན་ གི་ཝ་ཨོ་ཕེ་ལ་ཨ༌ཉི།
19རོག་ཏེ་བ་ཀི་ པ་ཝལ་བུན་ཐཱན་ སློབ་དཔོན་ མཁས་ཏྲ་བ་ཀ་ ཚོགས་འདུ་ག་གུབ་ཀ་ཀེ་ཐཱན་ ཇི་མ་ལ་ ནཱན་གི་ཡེ་ཁཱན་ ཨོ་ཐ་ཆོས་སིང་མ་ ཧང་གི་ལ་སྨོ་ ཨ་ཧ་ཡེག་ཅོ་དག༌ཉི། 20ནཱན་གི་ཡེ་ཁཱན་ མ་འདྲ་ཝ་ཐུར་ ཨ་ཤི་ན་ཐ་ཝ་ཨ་དེན་གེ་ ཨོ་ཉ་ག་དེན་ཐ་ ཧང་གི་ལ་སྨོ་ ཨ་ཤི་སེ་ལེ་ག་ སེམས་ཨ་ཝ་ཅ་དག༌ཉི། 21(ཨེ་ཐེནས་ག་སོ་ངོ་བ་དང་ ཕིས་ཀེ་ཨུན་ཐཱན་ ཉ་ག་ཆོ་ཁཱན་ སོ་ངོ་ཐམས་ཅན་གི་ ཆཱས་སིང་མ་ག་ཀོར་གེ་ ཆཱས་ཨ་ཉི་རང་ དུས་ཙུན་ཆུམ་ཅ་གི་ཝ༌ལ།)
22ཨོ་ཉི་ཨ་དེན་གེ་ ཚོགས་འདུ་ག་གུབ་ཀ་ བཞེངས་ཁཱན་ པ་ཝལ་གི་ གསུངས་མ་ལ་ ཨེ་ཐེནས་ག་སོ་ངོ་བ་ ཇི་གི་ནའི་ གནམ་མེད་ས་མེད་ ཆོས་སེམས་ཆོ་ཁཱན་ སོ་ངོ་བ་གི་ཝ་ལ་ཨ་ཉི་ སེ་ཝ༌ཅ། 23ཧང་ཡ་དག་ནེ་ལ་ ན་ཧ་ཁྲོམ་ཆེན་ཁོན་ དང་ཅ་ཨ་ཉི་ ཇི་གི་ན་ཧ་མཆོད་གཤམ་ མང་པུ་ཐུར་ཐོང༌མ། ཉི་མཆོད་གཤམ་ཐུར་ག་ ཨོ་ཐེན་འབྲི་བ་ཆོ་ཝ་ གུམ་མ་ཡེ་ཁཱན་ དཀོན་མཆོག་ག་ཏཱན་ཨ༌ཉི། དཀོན་མཆོག་ ཨི་བི་གི་ལ་སྨོ་ གུམ་མ་ཡེ་ནེ་བུ་ ན་ཤི་ རོ་ཀ་གསོལ་ཝ་ཏ་པ༌ལ། ཨོ་ཉི་ཨ་དེན་གེ་ ཇི་གི་ན་ཧ་ རོག་ཨི་བི་གི་ལ་སྨོ་ ཨོ་ཉ་ཀོར་གེ་ཞུ༌ལེ།
24འཛམ་གླིང་དང་ འཛམ་གླིང་ནང་ཀ་ཆོ་ཁཱན་ ཐམས་ཅན་རང་ དཀོན་མཆོག་གི་ བཀོད་པ་གི༌ལ། ཉི་རོག་ཤོ་ ཞིང་ཁམས་དང་ འཛམ་གླིང་ག་ གཙོ་བོ་གི་ཝ་ཨ་དེན་གེ་ སོ་ངོ་བ་ཀ་ ག་དང་གི་ཅོད་ཁཱན་ ལྷ་ཁང་ནང་ཀ་ བཞུགས་པུ་མཱན༌ཅ། 25སོ་ངོ་བ་ཀ་ ག་དང་གི་ རོ་ཀ་ཕྱག་ཞུ་ལེ་མར༌བ། ཧང་ཡ་དག་ནེ་ལ་ རོག་ཤོ་ ཧང་རང་མ་ཚཱས་ཁཱན་ དཀོན་མཆོག་གི༌ལ། ཧང་ཡ་དག་ནེ་ལ་ རོག་རོག་ཏེན་གི་ སོ་ངོ་ཐམས་ཅན་ག་ ཚེ་དང་ཤོང་ ཉི་ཧང་ཧང་རང་གནང་ཅ་གི༌ལ། 26རོ་ཀི་སོ་ངོ་ཐུར་གེ་ཨ་ཉི་ འཛམ་གླིང་ཐམས་ཅན་རང་ ཆ་པ་ཅོད་གནང་མ་གི༌ལ། ཨི་བི་ ཨོ་ག་ ཧབ་ཏུར་སག་པུ་ ཆོ་ལེ་གི་ལ་སྨོ་ རོག་ཏེ་བ་ཀ་ ས་མཚམས་ག་ཀོར་གེ་བུ་ གོ་མ་གེ་རང་ རོ་ཀི་ཙམ་ཉི་གནང་མ༌ཅ།
27རོག་ཨ་ཧ་བ་ཀེ་ ལམ་རིང་མུ་ག་མཱན༌ཅ། ཨོ་ཉེ་རང་གི་ནེ་བུ་ སོ་ངོ་བ་ཀི་ རོ་ཀ་ཏཱན་གོད་ཅེན་ ཉི་ཨོ་ག་རང་གི་ནེ་བུ་ རོག་ལམ་ཉི་ ཐོང་ཆེན་དག་པ་གི་ དཀོན་མཆོག་གི་ ཨོ་ཐེན་མཛད་པ་གི༌ལ། 28ཧང་ཡ་དག་ནེ་ལ་ ནའི་ཏེན་ག་ གཙང་མོ་འབྲི་ཁཱན་བ་ཀི་ ཨའི་རོ་ཀ་རྒྱུད་པ་གི་ལ་ཨ་ཉི་ གསུངས་མ་པུརུས་ཀིན་ཨ་ཉི་ ཨའི་རོ་ཀ་ནང་ཀ་ཆོན༌ཅ། ཨའི་རོག་ཀབ་ཉི་དང༌ཅ། ཉི་ཨའི་རོ་ཀ་ནང་ཀ་ཆོན༌ཅ། 29ཨ་ཧ་བ་ རོ་ཀ་སྲས་སྲས་མོ་ གི་ཝ་ཨ་དེན་གེ་ སོ་ངོ་བ་ཀ་ མི་ཐང་དང་ཏུ་ཉི་ གསེར་དངུལ་དང་ ལུང་གི་ཅོད་ཁཱན་བ་ཤོ་ དཀོན་མཆོག་གི་ལ་ཨ་ཉི་ ཨ་ཤི་མི་ལེ་མང༌ཕ།
30དང་པོ་ག་ སོ་ངོ་བ་ཀི་ དཀོན་མཆོག་ག་ཀོར་གེ་ ཧ་མ་གོན་ཤི། ཨོ་ཉེ་རང་གི་ནེ་བུ་ རོ་ཀི་ཨུ་ཉུ་ག་རྩིས་མ་ཨན་ཤི། དག་པ་ཀབ་ཉི་ ཨོམ་ དཀོན་མཆོག་གི་ འཛམ་གླིང་ག་ཆོ་ཁཱན་ སོ་ངོ་ཐམས་ཅན་ག་ཏཱན་ རོག་ཏེ་བ་ཀ་ སྡིག་པ་གེ་ལོག་ཅོ་དག་ཉི་ བཀའ་གནང་མ༌ཅ། 31ཧང་ཡ་དག་ནེ་ལ་ དཀོན་མཆོག་གི་ཀེ་ཁཱན་ སོ་ངོ་གེ་ཨན་ཙག་ཉི་ འཛམ་གླིང་ག་ སོ་ངོ་བ་ཀ་ཁྲིམས་ཐྲང་ཉི་ གནང་མེ་ག་ནོང་ རོ་ཀི་ཀག་པ༌ཅ། ཉི་ཨོ་ཉ་སོ་ངོ་ཁེ་པ་ ཨི་བི་གི་ལ་སྨོ་ ཁུངས་ཀེ་བེ་དེན་གེ་ དཀོན་མཆོག་གི་ རོག་གཤགས་པ་གེ་ ལོག་ཉི་བཞེངས་གནང་མ་དག༌ཉི།
32རོག་ཏེ་བ་ཀི་ ཡི་ཤུ་གཤགས་པ་གེ་ གསོན་པོ་ཨ་ཉི་སྐུ་བཞེངས་པ་ཀོར་གེ་ ན་ཐ་ལ་ཀབ་ཉི་ ཚེ་བང་གི་ངར་བི་ཝ༌ལ། དག་པ་ཀབ་ཉི་ བཱརའ་ཚེ་བང་གི་ ཡེག་པ་ལ་ ཨོ་ཐ་ཀོར་གེ་ ཨོམ་ཆང་རང་ ཉཱན་པེ་ག་ ཨ་ཧ་སེམས་ཅ་དག༌ཉི། 33ཉི་གེ་ པ་ཝལ་ རོག་ཏེ་བ་ཀ་པོང་ཀེ་ བྱོན་མ༌ལ། 34དག་པ་ཀབ་ཉི་ སོ་ངོ་ཚེ་བང་གི་ པ་ཝལ་ག་དྲེ་ཀ་ནུབ་ཉི་ དད་པ་ཨ་ཝ༌ལ། ཉི་ཨོ་ཉ་དད་པ་ཨ་ཁཱན་བ་ཀ་པོང་ཀེ་ ཚོགས་འདུ་ག་ཚོགས་པ་ དི་ཡ་ནུ་སི་ཡཱས་དག་ཁཱན་ཆོ་ཝ༌ལ། ཉི་ད་མ་རིས་དག་ཁཱན་ མེ་ཝག་ཙ་ཐུར་ ཉི་གེ་ བཱརའ་སོ་ངོ་བ་བུ་ཆོ་ཝ༌ལ༎
Currently Selected:
མཛད༌པ། 17: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
