མཛད༌པ། 19
19
པ་ཝལ་ཨེ་ཕི་སཱས་ག།
1ཨ་པོལ་ལོས་ ཀོ་རིན་ཐི་ག་ཆོ་ལེ་གང་ཀ་ པ་ཝལ་ ཕུ་གེ་ཨན་བྱོན་ཉི་ ཇུ་ཀ་དག་པ་ཀབ་ཉི་ ཨེ་ཕི་སཱས་ག་ ཕེབས་པ་ཀབ་ཉི་ སློ་མ་མང་པུ་ཐུར་ཁྲ་པ༌ལ། 2རོ་ཀི་ རོག་ཏེ་བ་ཀ་ ཇི་མ་ལ་ ན་ཤི་ཡི་ཤུ་ག་ དད་པ་ཨ་ལ་ཀབ་ཉི་ ན་ཤི་དམ་པའི་ཐུགས་ཉིད་ ཉོང་པ་སྨོ་དག༌ཉི།
རོག་ཏེ་བ་ཀི་ ལན་ཞུ་ཝ་ལ་ མ་ལ་ མ་ཉོང་ཅི། དམ་པའི་ཐུགས་ཉིད་ཅ་ཨ་ཉི་ ཨ་ཤི་ན་ག་རང་ མ་ཐ་ཝ་ཆོ་ཝ་དག༌ཉི།
3ཉི་རོ་ཀི་ རོག་ཏེ་བ་ཀ་ ན་ཤི་ཧང་ད་བུ་ ཁྲུས་གསོར་ལ་ཝ་ཡ་ཨ་ཉི་ ཇི་མ་ཀབ་ཉི་ ཡུ་ཧན་ན་ག་ཁྲུས་གསོར་ཨ༌ཉི།
4ཉི་པ་ཝལ་གི་ གསུངས་མ་ལ་ ཡུ་ཧན་ན་ག་ ཁྲུས་གསོར་ཤོ་ སྡིག་པ་གེ་ལོག་ཉི་ དཀོན་མཆོག་ག་ཏཱན་ དད་པ་ཨ་ལེ་ཁེ་ཝ་ཀོར་གེ་གི༌ལ། ཉི་ཡུ་ཧན་ན་ རོག་ཏེན་གི་རང་ རོ་ཀེ་ཚིང་ཚིང་བྱོན་ཁཱན་ག་ དད་པ་ཨའི་ཨ་ཉི་ སོ་ངོ་བ་ཀ་གསུངས་ཆོ༌ཝ། ཉི་ཨུ་ཉུ་ཚིང་ཚིང་བྱོན་ཁཱན་ཤོ་ ཡི་ཤུ་གི་ལ་ཨ༌ཉི།
5ཨུ་ཐུ་ད་བུ་ ན་ཐ་ཝ་ཐུར་ག་རང་ རོག་ཏེ་བ་ཀི་ གཙོ་བོ་ཡི་ཤུ་ག་མཚན་ག་ ཁྲུས་གསོར་ཞུ་ཝ༌ལ། 6པ་ཝལ་གི་ རོ་ཀ་ཕྱག་ རོག་ཏེ་བ་ཀ་ཐུང་ཀ་ ཀེ་བ་ཀབ་ཉི་ རོག་ཏེ་བ་ཀ་ཐུང་ཀ་ དམ་པའི་ཐུགས་ཉིད་ བྱོན་མ༌ལ། ཉི་རོག་ཏེ་བ་ཀི་ ལོ་མ་འདྲ་ཝ་ཕི་ཉི་ ལུང་བསྟན་མེ་ གོ་ཙུག་པ༌ལ། 7རོག་ཏེ་བ་ ཐམས་ཅན་རང་དོབ་ཉི་ སོ་ངོ་སོང་ཉིག་ཙིང་ཕང་ཆོ་ཝ༌ལ།
8ཉི་གེ་ ལ་ཉི་སམ་སག་པུ་ པ་ཝལ་ ཡ་ཧུ་དི་པ་ ཆོས་འཛོམས་ནང་ཀ་བྱོན་ཉི་ སོ་ངོ་བ་ཀ་ དོ་རི་རི་ཨན་གསུངས་མ༌ལ། རོ་ཀི་ རོག་ཏེ་བ་ཀབ་ཉི་ རྩོད་པ་གནང་ཉི་ དཀོན་མཆོག་ག་ རྒྱལ་སྲིད་ག་ཀོར་གེ་ དད་པ་ཨ་ལེ་བི་ལེ་ག་ རྩིས་ཕི་ཝ༌ལ། 9དག་པ་ཀབ་ཉི་ རོག་ཏེ་བ་ཀ་པོང་ཀེ་ ཚེ་བང་ལུང་ཏོང་ཨ་ཉི་ དད་པ་ཨ་ལེ་མ་ན་ཝ༌ལ། ཉི་སོ་ངོ་ཐམས་ཅན་ག་གུབ་ཀ་ རོག་ཏེ་བ་ཀི་ ལམ་ག་དགྲ་ཨ་ཉི་ གནམ་མེད་ས་མེད་ ཁ་ཏང་མ༌ལ། ཨོ་ཉི་ཨ་དེན་གེ་ པ་ཝལ་གི་ རོག་ཏེ་བ་ ཐུབ་ཐཱན་ཐཱན་ སློ་མ་བ་རོག་ཀབ་ཉི་ རིག་བསྣམས་པ༌ལ། སོ་ངོ་ག་མིང་ ཏྲུ་རཱན་ནཱས་དག་ཁཱན་ག་ འཛོམས་ཁང་ག་བྱོན་ཐཱན་ ནོང་དྲང་རང་ པ་ཝལ་གི་ སོ་ངོ་བ་ཀ་གསུང་བཤད་ཉི་ གནང་མ༌ལ། 10ཨོ་ཐེན་ཨ་ཉི་རང་ ཉིང་ཉིག་ཙིང་སག་པུ་ བཤད་པ་ཨ་དེན་གེ་ ཡ་ཧུ་དི་པ་དག་པེ་མ་ཝ་ གིརིག་དག་པེ་མ་ཝ་ ཨེ་ཤི་ཡ་ག་ཆོ་ཁཱན་ སོ་ངོ་ཐམས་ཅན་གི་ གཙོ་བོ་ག་གསུང་ ན་ཐ་ཝ༌ལ།
11པ་ཝལ་ག་ ཕྱག་ཀ་ཐུང་ཀེ་ཨ་ཉི་ དཀོན་མཆོག་གི་ རྫུ་འཕྲུལ་ཆི་ལུ་ཆི་ལུ་ མཛད་ཉི་གནང་མ༌ལ། 12ཨོ་ཉི་ཨ་དེན་གེ་ རུ་མཱལ་གི་ནེ་བུ་ ཁ་མུང་གི་ནེ་བུ་ པ་ཝལ་གི་ ཐོབ་ཁཱན་བུན་ཐཱན་ ནཱད་པ་ཐུང་ཀ་ཐ་ལ་ཀབ་ཉི་ ནཱད་པ་བ་དྲག་པ༌ལ། ཉི་རྣམ་ཤེས་མ་ལེག་པ་གི་ ནོད་པ་ཆོ་ནེ་ལ་ རྣམ་ཤེས་མ་ལེག་པ་ སོ་ངོ་གེ་ཕིས་ཀ་ ཤོན་ཇོང་མ༌ལ།
13ཁྲོམ་ཁྲོམ་ཁོན་དི་ཉི་ རྣམ་ཤེས་མ་ལེག་པ་བ་ ཤོན་གེམ་ཁཱན་ ཡ་ཧུ་དི་པ་ཚེ་བང་ཅ་གི་ཝ༌ལ། ཉི་རོག་ཏེ་བ་ཀི་ གཙོ་བོ་ཡི་ཤུ་ག་ མཚན་གེ་ཨ་ཉི་ རྣམ་ཤེས་མ་ལེག་པ་བ་ ཤོན་གེ་མེ་མིག་པ་ཕི་ཉི་ ཨོ་ཐེན་ཡེག་པ་ལ་ པ་ཝལ་གི་བཤད་ཁཱན་ ཡི་ཤུ་ག་མཚན་ག་ ཇི་གི་ན་ག་ ཕིས་ཀ་ཨོ་དོ་དག་ཉི་ བཀའ་བིན༌ཅ། 14ཡ་ཧུ་དི་པ་ག་ བླ་མ་གོང་མ་ ཨེས་ཀེ་ཝཱས་དག་ཁཱན་ག་ ཟ་ཟུམ་གི་ཨུ་ཉུ་ད་བུ་ ཨན་ཅ་གི་ཝ༌ལ། 15དག་པ་ཀབ་ཉི་ ཤེབ་ཐུར་ རྣམ་ཤེས་མ་ལེག་པ་གི་ རོག་ཏེ་བ་ཀ་ ཡེག་པ་ལ་ ཇི་གི་ཡི་ཤུ་གུམ་ཡེན༌ཅ། ཉི་པ་ཝལ་གུམ་ཡེན༌ཅ། དག་པ་ཀབ་ཉི་ ན་ཧ་བ་ཤོ་ ཨི་བི་གི་ལ་ཡ་དག༌ཉི། 16ཉི་གེ་ རྣམ་ཤེས་མ་ལེག་པ་གི་ ནོད་ཁཱན་སོ་ངོ་གི་ རོག་ཏེ་བ་ཀ་ཐུང་ཀ་ ལིན་ཀུན་ཏི་ཝ༌ལ། རོག་ཤོ་ རོག་ཏེ་བ་ ཐམས་ཅན་གེ་ཤུག་ཅཱན་ ཆོ་ཝ་ཨ་དེན་གེ་ རོག་ཏེ་བ་ཕ་མ༌ལ། ཉི་རོག་ཏེ་བ་ ནཱད་པ་རི་ཉི་ ཙ་ཏི་ལིང་པ་ཤོ་ཉི་ ཕའི་ནང་ཀེ་ གཱན་ཇོང་མ༌ལ།
17ཨེ་ཕི་སཱས་ག་ཆོ་ཁཱན་ ཡ་ཧུ་དི་པ་དང་ གིརིག་ཐམས་ཅན་གི་ ཨོ་ཉ་ཀོར་གེ་ན་ཐ་ཉི་ རོག་ཏེ་བ་ ཐམས་ཅན་རང་ ཡོང་ཁེ་ཝ༌ལ། ཉི་གཙོ་བོ་ཡི་ཤུ་ག་མཚན་ག་ བསྟོད་པ་ཕུལ་བ༌ལ། 18དད་པ་ཨ་ཁཱན་ མང་པུ་ཐུར་གི་ རོག་ཏེ་བ་ཀི་ སྡིག་པ་སག་ཁཱན་ག་ཀོར་གེ་ ཐམས་ཅན་ག་གུབ་ཀ་ ཁ་དོག་པ༌ལ། 19མིག་འཕྲུལ་གེན་ཁཱན་ ཚེ་བང་གི་ རོག་ཏེ་བ་ཀ་ མིག་འཕྲུལ་ག་ དཔེ་ཆ་ཕཱན་ཐཱན་ སོ་ངོ་ཐམས་ཅན་ག་ གུབ་ཀ་རང་ མི་ག་གོག་གེ་མ༌ལ། ཉི་ཨོ་ཉ་དཔེ་ཆ་ག་གོང་ཤོ་ དངུལ་ག་ཏི་རུ་ 50000 ཕང་ག་ རྩིས་གི་ཝ་ཆོ་ཝ༌ལ། 20ཨོ་ཉི་ཨ་དེན་གེ་ གཙོ་བོ་ག་གསུང་གི་ ཆབ་ཉི་རང་བུ་ཝ༌ལ། ཉི་ཨུ་ཉུ་ད་བུ་ཨ་ཉི་ ཤུག་ཅཱན་རི་ཉི་རང་ དི་ཝ༌ལ༎
ཨེ་ཕི་སཱས༌ག་ ཏབ་མ༌ཉམ༌པ་ཤོ་ཝ༌ལ།
21ཨོ་ཐ་བ་ཇུང་དེན་གེ་ པ་ཝལ་ ཡ་རུ་ཤ་ལེམ་ག་ཏཱན་ ལོག་ཉི་མ་བྱོན་མེ་གོ་མ་ མ་ཀེ་དོ་ནི་ཡ་ག་དང་ ཨ་ཁའི་ཡ་ག་བྱོན་མེ་དག་ཉི་ གྲོས་ཐག་ཆོད་པ༌ལ། རོ་ཀི་གསུངས་མ་ལ་ ཨོ་ཉ་ཚིང་ཚིང་ཤོ་ ཇང་རོམ་ག་ཏཱན་ དི་ལེ་ཨ༌ཉི། 22ཉི་རོ་ཀི་ རོ་ཀ་ཕརའ་ཁེ་ ལའི་ཨ་ཁཱན་ཉིག་ཙིང་ ཏི་མོ་ཐི་དང་ཨི་རཱས་ཏཱས་ རོ་ཀེ་གུམ་གུམ་ མ་ཀེ་དོ་ནི་ཡ་གེ་ག་ཏཱན་ ཀུན་ཏི་ཝ༌ལ། དག་པ་ཀབ་ཉི་ རོག་ཤོ་ ཨེ་ཤི་ཡ་ག་ ནོང་སམ་ཕང་ཕིཤི་ཕང་ག་དེན་གེ་ ཚིང་ཚིང་ལུས་པ༌ལ།
23ཕྲིག་ཀིན་ཨུ་ཉུ་གང་ཀ་ ཡི་ཤུ་ག་ལམ་ག་ཀོར་གེ་ ཨེ་ཕི་སཱས་ག་ ཏབ་མ་ཉམ་པ་ཆི་ལུ་ ཤོ་ཝ༌ལ། 24དངུལ་ག་ལའི་ཨ་ཁཱན་ དྲེ་མེ་ཏྲི་ཡཱས་དག་ཁཱན་ སོ་ངོ་གི་ ལྷ་མོ་ཨར་ཏེ་མིས་དག་ཁཱན་ག་ ལྷ་ཁང་བ་ཅོད་ཉི་ ཚོང་ཕིན་ཅ་གི་ཝ༌ལ། ཉི་རོ་ཀ་ཕརའ་ཁེ་ ལའི་ཨ་ཁཱན་ བཟོ་པ་བ་ཀི་ ཏི་རུ་མང་པུ་ཅོད་ཅ་གི་ཝ༌ལ།
25དྲེ་མེ་ཏྲི་ཡཱས་གི་ ཨོ་ཉ་སོ་ངོ་བ་དང་ ཨུ་ཉུ་ལའི་པུརུས་ཀིན་ཨ་ཁཱན་ བཱརའ་སོ་ངོ་བ་བུ་ ཏབ་ཐུར་རཱན་ཐཱན་ ཡེག་པ་ལ་ ཇ་རོ་བ་ ཨོ་ཐ་ཚོང་གེ་ཨ་ཉི་ ཨ་ཤི་ཏི་རུ་ཅོད་ཅ་ཨ་ཉི་ ན་ཤི་སེན༌ཅ། 26དག་པ་ཀབ་ཉི་ ན་ཤི་སེ་ཉི་ ཐོང་མ་གེ་ལག་ཉི་མ་ལ་ ཨོ་ཐ་པ་ཝལ་དག་ཁཱན་ སོ་ངོ་གི་ སོ་ངོ་ག་ ག་དང་གི་ཅོད་ཁཱན་ལྷ་བ་ ལྷ་གི་ལུ་རང་མང་གི་ཨ་ཉི་ཡེག་ཉི་ ཐ་ཨེ་ཕི་སཱས་དང་ ཨེ་ཤི་ཡ་ག་ས་ཆ་ མང་པུ་ཐུར་ག་སོ་ངོ་བ་ རོ་ཀི་ཨོ་ཉ་ཆཱས་ག་སོ་ངོ་བ་ ལོ་དི་ཝ་ཅོད་པ༌ལ། 27ཨ་ཧ་ཚོང་ག་མིང་གཏམ་ ཡཱན་མེ་ག་ཉེན་ཁ་ ཐུར་ཤ་མང་གི་ཝ་ ཨ་ཧ་ལྷ་མོ་ཆི་ལུ་ ཨར་ཏེ་མིས་ག་ ལྷ་ཁང་ཁེ་པ་ ཁུངས་ཧང་རང་མ་ཝ་ རི་ལེ་ག་ཉེན་ཁ་བུ༌ཅ། ཨེ་ཤི་ཡ་དང་ འཛམ་གླིང་ཐམས་ཅན་གི་ གསོལ་ཝ་ཏབ་ཁཱན་ ཨ་ཧ་ལྷ་མོ་ག་མིང་གཏམ་ མ་ཝ་རི་ལེ་ཨ༌ཉི།
28ཨོ་ཐ་ཆཱས་ ན་ཐ་ལ་ཀབ་ཉི་ རོག་ཏེ་བ་ གནམ་མེད་ས་མེད་ རོ་ཙིག་པ་ཨ་དེན་གེ་ ཤ་དར་ཕི་ཉི་ཡེག་པ་ལ་ ཨེ་ཕི་སཱས་ག་ ལྷ་མོ་ཨར་ཏེ་མིས་ ཆི་ལུ་གི་ལ་ཨ༌ཉི། 29སོ་ངོ་བ་ ཐམས་ཅན་རང་ ཧང་རང་ཨ་ལེ་ མ་སེ་ཝ་རི་ཝ༌ལ། ཨོ་ཉི་ཨ་དེན་གེ་ རོག་ཏེ་བ་ཀི་ ག་ཡཱས་དང་ ཨ་རིས་ཏར་ཁཱས་དག་ཁཱན་ སོ་ངོ་ཉིག་ཙིང་ ཙུང་ཐཱན་ ཁྲོམ་ཆེན་ག་སོ་ངོ་བ་ ཛོམ་ས་བཱརང་ཀ་ཏཱན་ བུ་ཝ༌ལ། ཉི་རོག་ཉིག་ཙིང་ཤོ་ པ་ཝལ་ག་ ཕྱག་ཞུ་ཉི་དང་ཁཱན་ མ་ཀེ་དོ་ནི་ཡ་གེ་ གི་ཝ་ཆོ་ཝ༌ལ། 30པ་ཝལ་གི་ རོག་ནང་ཀ་བྱོན་མེ་ག་ ཐུགས་བསམ་གནང་མ༌ལ། དག་པ་ཀབ་ཉི་ སློ་མ་བ་ཀི་ ཁག་པ༌ལ། 31ཉི་ཨོམ་ཆང་རང་ ཨེ་ཤི་ཡ་ག་ འགོ་དཔོན་ཚེ་བང་ པ་ཝལ་ག་ ཇ་རོ་གི་ཝ་ཆོ་ཝ༌ལ། ཉི་རོག་ཏེ་བ་ཀི་ འཐེན་ཀེ་ཉི་ཞུ་ཝ་ལ་ རོག་ཨོ་ཉ་ཁྲོམ་ཆེན་ག་ སོ་ངོ་བ་ ཛོམ་ས་བཱརང་ཀ་ཏཱན་ མ་བྱོན་ཤོ་ཨ༌ཉི།
32ཨོ་ཉ་ག་ཆོ་ཁཱན་ སོ་ངོ་ཐམས་ཅན་གི་ ཤ་དར་ཕི་ཝ༌ལ། ཚེ་བང་གི་ ཤ་དར་ཕི་ཉི་ ཧང་ཐུར་ཡེག་པ༌ལ། ཉི་ཚེ་བང་གི་ཤ་དར་ཕི་ཉི་ ཨོམ་ཆང་ བཱརའ་སོ་སུ་ཐུར་ཡེག་པ༌ལ། རོག་ཏེ་བ་ ཐམས་ཅན་རང་ ཧང་རང་ཨ་ལེ་ མ་སེ་ཝ་རི་ཝ༌ལ། ཉི་མང་པུ་ཐུར་གི་རང་ རོག་ཏེ་བ་ ཨོ་ཉ་ཧང་ཨ་ཉི་ ཏབ་ཐུར་ཛོ་མ་གི་ལ་སྨོ་ ཨུ་ཉུ་རང་ མ་སེ་ཝ་ཆོ་ཝ༌ལ། 33ཡ་ཧུ་དི་པ་ཚེ་བང་གི་ ཨ་ལེག་ཇེན་དར་དག་ཁཱན་ སོ་ངོ་ཐུར་ སོ་ངོ་བ་ཀ་གུབ་ཀ་ཀེན་ཐཱན་ རོ་ཀི་ཧང་ཡེག་པེ་ཁེ་ལེ་སྨོ་ རོ་ཀ་ཡེན་བི་ཝ༌ལ། ཉི་ཨ་ལེག་ཇེན་དར་གི་ སོ་ངོ་བ་ཀ་ ཧང་ཐུར་ཡེག་པེ་དེན་གེ་ རོ་ཀ་ག་དང་ཝག་པ༌ལ། 34དག་པ་ཀབ་ཉི་ སོ་ངོ་བ་ཀི་ ཨ་ལེག་ཇེན་དར་ཤོ་ ཡ་ཧུ་དི་པ་གི་ཝ་ལ་ཨ་ཉི་ སེ་དེན་གེ་ ཨེ་ཕི་སཱས་ག་ ལྷ་མོ་ཨར་ཏེ་མིས་ ཆི་ལུ་གི་ལ་ཨ་ཉི་ ཤ་དར་ཕི་ལུ་ཕི་ས་རང་ གཱན་དགྲ་ཉིག་ཙིང་ཆོ་ཝ༌ལ།
35ཇུ་ཀ་དག་པ་ཀབ་ཉི་ ཁྲོམ་ཆེན་ག་ དྲུང་ཡིག་གི་ སོ་ངོ་བ་ཙང་ཀེན་ཆོ་ལེ་བི་ཝ༌ལ། རོ་ཀི་གསུངས་མ་ལ་ ལྷ་མོ་ཆི་ལུ་ཨར་ཏེ་མིས་ཁེ་པ་ ཨེ་ཕི་སཱས་ག་ ཁྲོམ་ཆེན་ག་ཅ་ཨ་ཉི་ མ་སེ་ཁཱན་ ཨི་བི་ཅ་ཡ། ཉི་རོ་ཀ་སྐུ་ཁེ་པ་ ཞིང་ཁམས་གེ་དོང་ ཞུད་པ་གི༌ལ། 36ཨོ་ཐ་ཆཱས་ཁེ་པ་ ཨི་བི་གི་རང་ དེན་པ་མང་གི་ཨ་ཉི་ ཡེག་པེ་མར༌བ། ཨོ་ཉི་ཨ་དེན་གེ་ ན་ཧ་བ་ ཙང་ཀེན་ཆོ་ལེ་ཁེ༌ལེ། ཉི་ན་ཤི་ ཧང་ཐུར་མ་ཨ་ལེ་གོ་མ་ སེམས་མི། 37ན་ཤི་ ཨོ་ཐ་སོ་ངོ་ཉིག་ཙིང་ ཐ་ཕ་ཝ༌ལ། དག་པ་ཀབ་ཉི་ རོག་ཏེ་བ་ཀི་ ཨ་ཧ་ལྷ་ཁང་གེ་ ཧང་རང་དྲོ་ཝཱན་ ཨ་ཝ་མ༌ལ། ཉི་ཨ་ཧ་ལྷ་མོ་ག་ སྐུར་པ་བུ་ཞུ་ཝ་མ༌ལ།
38དྲེ་མེ་ཏྲི་ཡཱས་དང་ རོ་ཀ་ཕརའ་ཁེ་ ལའི་ཨ་ཁཱན་བ་ཀི་ ཨོ་ཐ་སོ་ངོ་ཉིག་ཙིང་ཀབ་ཉི་ རྩིས་ཞུ་ཕིད་པེ་ཆོ་ནེ་ལ་ ཨ་ཧ་ཐ་ ཁྲིམས་ཁང་བ་དང་ དྲང་དཔོན་བ༌ཅ། རོག་ཏེ་བ་ཀི་ ཐུར་དང་ཐུར་ག་བར་ཀ་ རྩིས་ཞུ་ཕིད་པེ་རེ༌བེ། 39ཉི་ཨོམ་ཆང་རང་ བཱརའ་ཆཱས་ཏེ་ཆོ་ནེ་ལ་ ཨུ་ཉུ་ཆཱས་ཁེ་པ་ ཁྲོམ་ཆེན་ག་ སོ་ངོ་བ་ཀ་འཛོམས་འདུ་ག་ རྩིས་ཞུ་ཕིད་པེ་ཁེ༌ལེ། 40ཨ་ཤི་ཨ་ཉི་ཐི་ནོང་ ཇིཝ་སུ་ཕེ་བི་ཝ་གི་ལ་ཨ་ཉི་ རོམ་ག་གཞུང་ཀི་ ཡེག་པེ་ག་ཉེན་ཁ༌ཅ། ཧང་ཡ་དག་ནེ་ལ་ ཧང་ཏེན་ཇིཝ་སུ་ཕ་ཡ་ཨ་ཉི་ ཇིམ་ནེ་ལ་ ཨ་ཤི་ཧང་རང་ཞུ་ལེ་ག་ བཱརང་མ་ལ་ཨ༌ཉི། 41རོ་ཀི་ཨོ་ཐེན་གསུངས་ཐཱན་ སོ་ངོ་བ་ ཕའི་ག་དི་ཨ་ཉི་ ཀུན་ཏི་ཝ༌ལ༎
Currently Selected:
མཛད༌པ། 19: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
