མཛད༌པ། 27
27
པ་ཝལ་རོམ༌ག་བུ༌ཝ༌ལ།
1ཨའི་གྲུ་ག་ནུབ་ཉི་ ཨི་ཏྲ་ལི་ག་ཏཱན་དི་ལེ་དག་ཉི་ གྲོས་ཐག་ཆོད་ཏེན་གེ་ རོག་ཏེ་བ་ཀི་ པ་ཝལ་དང་བཱརའ་བཙོན་པ་བ་ དཔོན་ཆི་ལུ་ག་ སྐུ་སྲུང་དྲག་ཤོས་ ཡུ་ལི་ཡཱས་དག་ཁཱན་ག་ཏཱན་ རྩིས་སྤྲོད་པ༌ལ། 2ཨ་ཧ་བ་ གྲུ་ག་ནུབ་ཉི་ ཁྲོམ་ཆེན་ ཨེ་དྲ་མི་ཏྲེ་ནོས་གེ་ ཨེ་ཤི་ཡ་ག་ཆོ་ཁཱན་ གྲུ་ཐ་ས་བཱརང་ མ་འདྲ་ཝ་གེ་ཤོ་ཉི་དི་ལེ་ཨ་ཉི་ འཆར་གཞི་ཙ་མ་ཆོ༌ཝ། ས་ཆ་མ་ཀེ་དོ་ནི་ཡ་ག་ ཁྲོམ་ཆེན་ ཐེ་ས་ལོ་ནི་ཀི་གེ་ ཨ་རིས་ཏར་ཁཱས་དག་ཁཱན་ སོ་ངོ་ཐུར་བུ་ ཨ་ཧ་བ་ཀབ་ཉི་ ཏབ་ཐུར་དི༌ཝ།
3ཉི་ནམ་ནིང་ད་བུ་ ཨ་ཧ་བ་ སི་དོན་དག་ས་ག་ཤེག༌པ། ཡུ་ལི་ཡཱས་གི་ པ་ཝལ་ག་ གནམ་མེད་ས་མེད་ ལེག་པུ་ཨ་ཉི་ པ་ཝལ་གི་ཚཱས་ཁཱན་བ་ རོ་ཀ་ཇ་རོ་བ་ཀི་ བིན་ཆེན་དག་པ་གི་ རོ་ཀི་རོག་ རོ་ཀ་ཇ་རོ་བ་ རུ་མེ་ག་ཀུན་ཏི༌ཝ། 4ཉ་གེ་ཨ་ཉི་ ཨ་ཧ་བ་ལོག་ཉི་རང་ གྲུ་ག་ནུབ་ཉི་དི༌ཝ། དག་པ་ཀབ་ཉི་ ཨ་ཧ་ལོ་ཀ་ཏཱན་ རི་དི་ཤུག་ཨ་ཉི་ ཨོ་ཕ་ཨ་དེན་གེ་ རི་དི་གེ་གཱན་ཐར་བེ་དེན་གེ་ ཨ་ཧ་བ་ མཚོ་བར་ཀ་ས་ སའི་པརཱས་ག་ བྱང་ཕྱོགས་ལོ་ཀ་ཏཱན་དི༌ཝ། 5ཨ་ཧ་བ་ མཚོ་གེ་ཨན་དི་ཉི་རང་ ཀི་ལི་ཀི་ཡ་དང་ པམ་ཕི་ལི་ཡ་གོག་ཏེན་གེ་ ས་ཆ་ལུ་ཀི་ཡ་ག་ ཁྲོམ་ཆེན་མའི་ར་དག་ཁཱན་ག་ཤེག༌པ། 6ཉ་ག་ སྐུ་སྲུང་དྲག་ཤོས་གི་ ཨ་ལེག་ཇེན་དྲི་ཡ་གེ་ ཨི་ཏྲ་ལི་ག་དི་ཁཱན་ གྲུ་ཉོང་ཉི་ རོ་ཀི་ཨ་ཧ་བ་ ཨོ་ཉ་གྲུ་ནང་ཀ་ཙུག་ཉི་ ཀུན་ཏི༌ཝ།
7ཨ་ཧ་བ་ གྲུ་ཆབ་ཏེན་ཨན་བུ་ཉི་ ནོང་མང་པུ་ཐུར་དི༌ཝ། ཉི་ཨ་ཧ་ལོ་ཀ་ཏཱན་ རི་དི་ཤུག་ཨ་ཉི་ ཨོ་ཕ་ཨ་དེན་གེ་ ཨ་ཧ་བ་ ཀེ་ནི་དཱས་ར་ག་ཤེག་པེ་ག་ གནམ་མེད་ས་མེད་ ཀ་ལུ་ཏཱད༌པ། ཉི་རི་དི་གི་ཨ་ཉི་ ཨ་ཧ་གྲུ་གུབ་ཀ་ཏཱན་ སིག་པེ་ཏི་ངེ་རང་མར་བཱན་ རི་དི་གེ་གཱན་ཐར་བེ་དེན་གེ་ ཨ་ཧ་གྲུ་ ལྷོ་ཕྱོགས་ལོ་ཀ་ཏཱན་བུ་ཉི་ སལ་མོ་ནེ་དག་ས་ག་ རེ་ཀ་ཆོ་ཁཱན་ མཚོ་ག་བར་ཀ་ ས་ཆ་ཀེརེད་དག་ཁཱན་ག་ ནེ་མ་གེ་ཨ་ཉི་དི༌ཝ། 8ཨ་ཧ་བ་ གནམ་མེད་ས་མེད་ དཀའ་ཝ་ཅཱད་ཉི་ ཧང་རང་རུད་པཱན་ ཁྲོམ་ཆེན་ ལ་སི་ཡ་ག་རེབ་ཏང་ག་ མ་ཅོན་ཁཱན་བཱརང་དག་ས་ག་ཤེག༌པ། 9ཨ་ཧ་དུས་ཙུན་ ཤ་མ་ཆུ་མ་ཆོ༌ཝ། ཉི་སྡིག་པ་བཤགས་པ་ཞུ་ལེ་ག་ དུས་ཆེན་བུ་ཆུམ་ཉི་ མཚོ་ག་རི་དི་ ཤུག་ཨན་ཨོ་ཕེ་ག་ དུས་ཙུན་རེན་པ་ཨ་དེན་གེ་ མཚོ་ག་གྲུ་ཇུག་པེ་ག་ ཀ་ལུ་རི་ཝ་ཆོ༌ཝ། ཨོ་ཉི་ཨ་དེན་གེ་ པ་ཝལ་གི་ རོག་ཏེ་བ་ཀ་ གསུངས་མ་
10སློབ་དཔོན་བ་ ཇི་གི་ཨ་ནེ་ལ་ ཨ་ཧ་བ་དིན་ཅ་ཨ་ཉི་ ཀ་ལུ་ཨོ་ཕེ་ད་བུ་ཐུར༌ལ། ཨོ་ཐ་གྲུ་དང་ གྲུ་ནང་ཀ་ཆོ་ཁཱན་ནོ་ཙང་བ་ གེ་མེ་ག་ཉེན་ཁ་ཐུར་ཤ་ ཆོ་ཝ་མ་ཚཱད་པ་ ཨ་ཧ་ཚེ་ག་དེན་གེ་བུ་ ཉེན་ཁ་ཆི་ལུ་ལ་ཨ༌ཉི། 11དག་པ་ཀབ་ཉི་ སྐུ་སྲུང་དྲག་ཤོས་གི་ པ་ཝལ་གི་ གསུངས་ཁཱན་ག་ ཆ་ཐ་ལེ་མང་གི་ཝ་ གྲུ་ག་འགོ་དཔོན་དང་ གྲུ་ག་ཡོན་ད་གི་ ཡེག་ཁཱན་ཆཱས་ག་ཤ་ ཆ་ཐ་ཝ༌ལ། 12ཉི་ཨོ་ཉ་ མ་ཅོན་ཁཱན་བཱརང་ཁེ་པ་ ཏོན་ག་གྲུ་ཐ་ལེ་ག་བཱརང་ ལེག་པུ་མང་གི་ཝ་ཨ་དེན་གེ་ གྲུ་ནང་ཀ་ཆོ་ཁཱན་ སོ་ངོ་མང་པུ་ཐུར་གི་ ཀེརེད་ག་ བྱང་ཕྱོགས་ལོ་ཀ་ཆོ་ཁཱན་ ཕོ་ནི་ཀེས་དག་ས་ག་ཏཱན་ དི་ལེ་ག་སེམས་མི་ཝ༌ལ། རོག་ཏེ་བ་ཀི་ མི་ཝ་ཆོ་ཝ་ ཨ་ཧ་བ་ ཕོ་ནི་ཀེས་ག་དིན་ཐཱན་ ཏོན་མ་ཆུ་མ་སག་པུ་ ཉ་ག་རང་ཆོ་ལེ་ཨ༌ཉི། ཕོ་ནི་ཀེས་ག་ ལྷོ་ནུབ་དང་བྱང་ནུབ་#27:12 ལྷོ་ནུབ་དག་ཁཱན་ཤོ་ ལྷོ་དང་ནུབ་ག་བར་ཀ་ ཆོ་ཁཱན་ག་ ཡེག་ཅ་གི༌ལ། ཉི་བྱང་ནུབ་དག་ཁཱན་ཤོ་ བྱང་དང་ནུབ་ག་བར་ཀ་ ཆོ་ཁཱན་ག་ ཡེག་ཅ་གི༌ལ།ལོ་ཀེ་ཤ་ རི་དི་ཨོ་ཕེ་ག་ བཱརང་ཆོ་ཝ་ཨ་དེན་གེ་ ཕོ་ནི་ཀེས་ཤོ་ གྲུ་ཐ་ལེ་ག་བཱརང་ ལེག་པུ་གི་ཝ་ཆོ༌ཝ༎
རི་དི་ངམ་སུ་ཆི་ལུ།
13ལྷོ་ཕྱོགས་ལོ་ཀེ་ རི་དི་ཇམ་ཀེན་ཨ་ཉི་ ཨོ་ཕ་ཀབ་ཉི་ གྲུ་ཇུག་ཁཱན་ སོ་ངོ་བ་ཀི་ རོག་ཏེ་བ་ཀ་འཆར་གཞི་ འགྲུབ་ཕེ་རེ་བེ་གི་ཝ་ལ་ཨན་མི་ཉི་ རོག་ཏེ་བ་ཀི་ གྲུ་ག་ཀོ་མར་ཁེ་པ་#27:13 གྲུ་ག་ཀོ་མར་དག་ཁཱན་ཤོ་ གྲུ་ཙུང་ཁཱན་ ཐུར་ཙམ་ག་ཏཱན་ཡེག་ཅ་གི༌ལ། གྲུ་ནོང་མེ་ཏེ་ཁེ་ནེ་ལ་ ལྕགས་ཐག་རིང་མུ་ཐུར་གི་ ཐིག་ཉི་ཐ་ཁཱན་གྲུ་ག་ཀོ་མར་ཁེ་པ་ དོང་རྒྱམ་མཚོ་ནང་ཀ་ཐུབ་གེམ་ཐཱན་ ཀོ་མར་གི་ཨ་ཉི་ དོང་རྒྱམ་མཚོ་ཏིང་གེ་ཐུར་ཉི་ གྲུ་ཙུང་ཉི་ཐཱན༌ཅ། ག་ཏ་ཇག་ཐཱན་ ཀེརེད་ག་ཟུར་ཀེ་ཨ་ཉི་ དི་ལེ་གོ་ཙུག༌པ། 14དག་པ་ཀབ་ཉི་ དོ་ཟོ་རང་ བྱང་ཤར་#27:14 བྱང་ཤར་དག་ཁཱན་ཤོ་ བྱང་དང་ཤར་ག་བར་ཀ་ ཆོ་ཁཱན་ག་ ཡེག་ཅ་གི༌ལ།གེ་ རི་དི་གནམ་མེད་ས་མེད་ ཤུག་ཨ་ཉི་ ཨོ་ཕེ་གོ་ཙུག༌པ། 15ཉི་ཨ་ཧ་གྲུ་ ཨོ་ཉ་རི་དི་ནང་ཀ་ཚུད་ཉི་ ཨ་ཧ་གྲུ་གི་ རི་དི་ག་ཤུག་ཁག་པེ་མར་ཤི། ཨོ་ཉི་ཨ་དེན་གེ་ རོག་ཏེ་བ་ཀི་ གྲུ་རི་དི་གི་ཨ་ཉི་ ཕག་ཉི་བུ་ལེ་བི༌ཝ།
16རི་དི་གེ་གཱན་ཐར་བེ་དེན་གེ་ ཨ་ཧ་གྲུ་ མཚོ་བར་ཀ་ས་ ཀཝ་ད་དག་ཁཱན་ག་ ཕརའ་ཁེ་ཨ་ཉི་ དི་ལེ་གང་ཀ་ ཧང་རང་རུད་པཱན་ ཨོ་ཉ་གྲུ་ཟེ་མུ་ ནང་ཀ་ཕ་ཉི་ཐིག་པེ་རེ༌བ། 17ཉི་གེ་ རོག་ཏེ་བ་ཀི་ གྲུ་ག་ཉ་གེ་ཐ་གེ་ རོང་ཤོམ་གི་ཐིག༌པ། གྲུ་སི་ར་ཏྲིས་ག་ མཚོ་ནེ་མ་ག་ཆོ་ཁཱན་ བེ་ཙ་ག་ཐུང་དུ་ཨ་ཉི་ མི་ཝ་ཨ་དེན་གེ་ རོག་ཏེ་བ་ཀི་ གྲུ་ཇུག་པེ་ནོར་ཉི་ རི་དི་ག་ཤུག་ཀི་ཨ་ཉི་ གྲུ་བེརེག་ཉི་བུ༌ཝ།
18ཉི་ནམ་ནིང་དག་པ་ཀབ་ཉི་ རི་དི་གནམ་མེད་ས་མེད་ ཤུག་ཨན་ཨོ་ཕ་ཨ་དེན་གེ་ གྲུ་ཡང་པུ་ཅོད་པེ་དེན་གེ་ རོག་ཏེ་བ་ཀི་ གྲུ་ག་རོང་ཤོན་གེ༌མ། 19ནོང་ཉིག་ཙིང་དག་པ་ཀབ་ཉི་ རོག་ཏེ་བ་ཀི་ རང་ཏེན་ག་ ག་དང་གི་རང་ གྲུ་ག་ཅ་ལ་བ་ གྲུ་གེ་ཕིས་ཀ་ ཤོན་གེམ་ཀུན་ཏི༌ཝ། 20རི་དི་ཡོང་ཁེ་སི་སི་ཨན་ཨུ་ཉི་ ནོང་མང་པུ་ཐུར་དི༌ཝ། ཉི་ངམ་དང་སྐར་མ་སྨིན་དྲུག་བ་ ཐོང་མེ་མར་བ་ རི་ཝ་ཨ་དེན་གེ་ ཨ་ཧ་རེ་ཆ་མ་ཝ་རི་ཉི་ ཨའི་ཤི་ལེ་རང་ ཨོ་ཕེ་ལ་དག་ཉི་མི༌ཝ།
21སོ་ངོ་ཐུར་གི་བུ་ ལྟོ་མ་ཟ་ལཱན་ ནོང་མང་པུ་ཐུར་ དི་ཝ་ཆོ༌ཝ། ཉི་རོག་ཏེ་བ་ཀ་གུབ་ཀ་ བཞེངས་ཐཱན་ པ་ཝལ་གི་ གསུངས་མ་ ཇི་གི་ཡེག་ཁཱན་ ན་ཤི་ཉཱན་པེ་ཁེ་ལེ་ཆོ༌ཝ། ཨ་ཧ་བ་ ཀེརེད་ག་རང་ ཆོ་ཝ་གི་ནེ་ལ་ ན་ཧ་བ་ ཨོབ་ཏུར་རང་ ནང་མ་དོག་པེ་ཆོ་ཝ་ ཉི་ཅ་ལ་བ་བུ་ མེ་པ་མ་དི་ལེ་ཆོ༌ཝ། 22དག་པ་ཀབ་ཉི་ ཇི་གི་ན་ཧ་བ་ སེམས་མ་ཤི་ཨ་ཉི་ཡེག༌ཅ། ཧང་ཡ་དག་ནེ་ལ་ ན་ཧ་པོང་ཀེ་ སོ་ངོ་ཐུར་བུ་མ་ཤི༌ལ། དག་པ་ཀབ་ཉི་ གྲུ་གི་ནེ་ལ་ རྒྱམ་མཚོ་ག་ཐི༌མེ། 23ཇང་དཀོན་མཆོག་ག་གི༌ལ། ཉི་ཇི་གི་ རོ་ཀ་གསོལ་ཝ་ཏབ༌ཅ། ཨི་ཉིང་བི་ནང་ག་ དཀོན་མཆོག་ག་ ཞིང་ཁམས་ག་འཐེན་པ་ ཇང་ཆོ་ས་བྱོན་ཐཱན་ གསུངས་ཆོ་ཝ་ 24ཡོང་མ་ཁེ་ པ་ཝལ་ ནཱན་ཤོ་ ཀའི་སར་ག་གུབ་ཀ་ ཐིང་མེ་ཁེ༌ལེ། ཉི་དཀོན་མཆོག་གི་ ནཱན་དང་ ནཱན་ཀབ་ཉི་ཏབ་ཐུར་ཆོ་ཁཱན་ སོ་ངོ་ཐམས་ཅན་རང་ སྐྱབས་གཟིགས་ཉི་ གནང་མ་ཅ་ཨ༌ཉི། 25ཨོ་ཉི་ཨ་དེན་གེ་ སློབ་དཔོན་བ་ ཡོང་མ་ཁེ། དཀོན་མཆོག་གི་ རོ་ཀ་ཞིང་ཁམས་ག་འཐེན་པ་ག་ ཐུང་ཀེ་ཨ་ཉི་ གསུངས་མ་ད་བུ་རང་ ཇུང་མེ་གི་ལ་ཨ་ཉི་ ཇི་གི་དད་པ་ཨན༌ཅ། 26དག་པ་ཀབ་ཉི་ མཚོ་བར་ཀ་ས་ཀབ་ཉི་ ཨ་ཧ་གྲུ་ཐུང༌མེ༎
གྲུ་ཟེག་པེ་ཅམ་པ༌ལ།
27རི་དི་ག་བར་ཀ་ཚུད་ཉི་ ངམ་བི་ནང་སོང་ཕིཤི་ དི་ཝ་ཆོ༌ཝ། ཉི་ཨོ་ཉ་བི་ནང་ག་ ཨ་ཧ་གྲུ་ ཨེ་དྲི་ཡཱས་ག་མཚོ་གེ་ཉི་ རི་དི་གི་ཕག་ཉི་ བུ་ལེ་གང་ཆོ༌ཝ། ཉི་གྲུ་ཇུག་ཁཱན་སོ་ངོ་བ་ཀི་ མཚོ་ནེ་མ་ ཤེག་པ་ད་བུ་ཐོང་མ་ཆོ༌ཝ། 28ཨོ་ཉི་ཨ་དེན་གེ་ རོག་ཏེ་བ་ཀི་ རི་ག་ཏིང་ཟེར་ཉི་གོད་ཁཱན་ རྒྱམ་མཚོ་ནང་ཀ་ཐུབ་ཉི་ གོད་པ་ཀབ་ཉི་ རི་ག་ཏིང་ རོང་ནང་ཁེ་ཐུར་ཆོ༌ཝ། ཨོམ་ད་སུར་ག་ཚི་ངེ་ རོག་ཏེ་བ་ཀི་ ཨོམ་ཆང་ ཟེར་ཉི་གོད་པ་ཀབ་ཉི་ རི་ག་ཏིང་ རོང་ནང་སོང་ལྔ་ཆོ༌ཝ། 29གྲུ་བཱརག་ཀ་ཐུང་དུ་ཨ་ཉི་ ཡོང་ཁེ་ཝ་ཨ་དེན་གེ་ རོག་ཏེ་བ་ཀི་ གྲུ་ག་ཀོ་མར་ཕིཤི་ གྲུ་ཚི་ཁེ་ཞུན་ཐ་ཝ་ཆོ༌ཝ། ཉི་ཨུ་ཉུ་ཕིཤི་རང་ རི་ནང་ཀ་ཏཱན་ཕ༌པ། ཉི་རོག་ཏེ་བ་ཀི་ མིང་ཏེག་ཅེན་དག་ཉི་ སྨོན་ལམ་ཏ༌པ།
30གྲུ་ཇུག་ཁཱན་ཚེ་བང་གི་ གྲུ་ཟེ་མུ་ག་ནུབ་ཐཱན་ གཱན་ཇོང་མེ་རྩིས་ ཕི་ཉི་ གྲུ་ག་གུབ་ཀེ་ ཨོམ་ཆང་རང་ གྲུ་ག་ཀོ་མར་རི་ནང་ཀ་ཏཱན་ ཕ་པེ་མིག་པ་ཕི་ཝ་ཅོད་ཆོ༌ཝ། 31དག་པ་ཀབ་ཉི་ པ་ཝལ་གི་ དྲག་ཤོས་དང་ དམག་མི་བ་ཀ་གསུངས་མ་ ཨོ་ཉ་གྲུ་ཇུག་ཁཱན་བ་ གྲུ་ནང་ཀ་མ་ཆོ་ནེ་ལ་ ནའི་ཐུར་གི་རང་ ནའི་ཏེན་ག་ཚེ་ག་ སྐྱབས་ཨ་ལེ་མར་བ་ཨ༌ཉི། 32ཉི་དམག་མི་བ་ཀི་ གྲུ་ཟེ་མུ་བ་ ཇཱན་ཐ་ཁཱན་ རོང་ཤོམ་ཅཱད་གེམ་ཉི་ གྲུ་ཟེ་མུ་ཐམས་ཅན་རང་ མཚོ་ནང་ཀ་ཏཱན་ཞུད་ཁེ༌ཝ།
33མིང་ཏེག་པེ་ཅམ་པ་ཀབ་ཉི་ པ་ཝལ་གི་ སོ་ངོ་བ་ཀ་ ལྟོ་ཟའི་ཨ་ཉི་གསུངས༌མ། རོ་ཀི་ ཨོ་ཐེན་གསུངས་ཆོ་ཝ་ ངམ་སོང་ཕིཤི་སག་པུ་ ན་ཧ་བ་ གནམ་མེད་ས་མེད་ སྡུག་བསྔལ་ཨ་ཉི་ ཧང་རང་མ་ཟཱན་ཤི། 34ཉི་ཨོམ་ ཇི་གི་ ན་ཧ་ལྟོ་ཟའི་ཨ་ཉི་ཡེག༌ཅ། ཉི་ན་ཤི་ ཁེ་ཀོ་ཉོང༌པེ། ཇི་གི་ ན་ཧ་ཡེག་ཅ་ ཤི་ལེ་ཏ་ཉ་རང་ཐའི་ ནའི་ཨི་བི་ག་རང་ ཤ་རང་ག་ཚམ་ཐུར་རང་ མ་ཞུད་པ་ཨ༌ཉི། 35པ་ཝལ་གི་ ཨོ་ཐེན་གསུངས་ཐཱན་ རོ་ཀི་ཀེབ་ཏང་ད་སུར་ཤོ་ཉི་ ཐམས་ཅན་ག་གུབ་ཀ་ དཀོན་མཆོག་ག་ བཀའ་དྲིན་བསམ༌མ། ཉི་རོ་ཀི་ ཀེབ་ཏང་བོང་ཐཱན་བཞེས༌ཝ། 36ཉི་ཤ་ རོག་ཏེ་བ་ ཐམས་ཅན་རང་ སེམས་བོང་ཀིན་ཨ་ཉི་ ཐམས་ཅན་གི་རང་ ལྟོ་ཟ༌ཝ། 37ཨོ་ཉ་གྲུ་ནང་ཀ་ སོ་ངོ་ 276 ཆོ༌ཝ། 38ཉི་ཐམས་ཅན་གི་ ཁ་ཝ་ཨ་ཉི་རང་ཟཱན་ཐཱན་ གྲུ་ཡང་པུ་ཅོད་པེ་དེན་གེ་ བོང་ག་རོང་ མཚོ་ནང་ཀ་གེམ་ཀུན་ཏི༌ཝ།
39ཉི་མིང་ཏེག་པ་ཀབ་ཉི་ རོག་ཏེ་བ་ཀི་ས་ཐོང༌མ། དག་པ་ཀབ་ཉི་ ཨོ་ཉ་ས་ཁེ་པ་ ཧང་ས་གི་ལ་སྨོ་ མ་སེ་ཝ་ཆོ༌ཝ། ཨོ་ཉེ་རང་གི་ནེ་བུ་ མཚོ་ནེ་མ་ག་བེ་ཙ་ ཐོང་མ་ཨ་དེན་གེ་ རེན་ཐཱན་ཨ་ནེ་ལ་ ཨོ་ཉ་བེ་ཙ་ཐུང་ཀ་ གྲུ་ནོང་མེ་དག་ཉི་ མི་ཝ་ཆོ༌ཝ། 40ཉི་རོག་ཏེ་བ་ཀི་ གྲུ་ག་ཀོ་མར་ཅཱད་ཐཱན་ མཚོ་ནང་ཀ་ཐི་མེ་བི༌ཝ། ཉི་ཨོམ་ཆང་རང་ རོག་ཏེ་བ་ཀི་ གྲུ་ག་མཇུག་ཏོག་ཐིག་ཁཱན་ རོང་ཤོམ་བ་བུ་ཕེག༌པ། ཉི་གེ་ གུབ་ཀ་ཆོ་ཁཱན་ ཐང་ནང་ཆི་ལུ་ཁེ་པ་ ག་དུང་ཐཱན་ མཚོ་ནེ་མ་ག་ཏཱན་བུ༌ཝ། 41དག་པ་ཀབ་ཉི་ གྲུ་མཚོ་ནེ་མ་ག་ཆོ་ཁཱན་ བེ་ཙ་ག་ཐུང༌མ། ཉི་གྲུ་ག་ཤ་རང་ ཨོ་ཉ་བེ་ཙ་ནང་ཀ་ ཟེག་པ་ཨ་དེན་གེ་ གྲུ་ཇུག་པེ་མར་བ་རི༌ཝ། དག་པ་ཀབ་ཉི་ མཚོ་གནམ་མེད་ས་མེད་ བ་ལག་ཉི་ གྲུ་ག་ཐུང་མ་ཨ་དེན་གེ་ གྲུ་ཇུ་ཀེ་ཨ་ཉི་ ཕོད་པེ་གོ་ཙུག༌པ།
42བཙོན་པ་བ་ཀི་ཅེ་ཕི་ཉི་ གཱན་ཇོང་དུ་དག་པ་གི་ དམག་མི་བ་ཀི་ བཙོན་པ་བ་ཤེ་ལེ་ཅམ༌པ། 43དག་པ་ཀབ་ཉི་ སྐུ་སྲུང་དྲག་ཤོས་གི་ པ་ཝལ་ག་ སྐྱབས་ཨ་ལེ་མིག་པ་ཕི་ཉི་ དམག་མི་བ་ཀ་ བཙོན་པ་བ་ཤེ་ལེ་མ་བིན་ཤི། ལག་ཏང་ རོ་ཀི་ཨོ་ཐེན་གསུངས་ཉི་ ཨི་བི་གི་ ཅེ་ཕི་ལེ་སེན་ཅ་གི་ལ་སྨོ་ གོ་མ་རང་ ཨོ་ཉ་སོ་ངོ་བ་ རི་ནང་ཀ་ལིན་ཐཱན་ ཅེ་ཕི་ཉི་ས་ག་ཏཱན་ དི་ཨ་ཉི་བཀའ་གནང༌མ། 44ཉི་བཱརའ་ཅེ་ཕི་ལེ་ མ་སེ་ཁཱན་བ་ པང་ལེམ་ཐུང་ཀ་ཏེར་ཉི་ ཨུ་ཉུ་མ་ནེ་ལ་ གྲུ་ཕོད་ཉི་དིན་ཅ་ཨ་ཉི་ ཤོ་ཁཱན་གྲུ་ག་ཕེ་ཅི་ཐུང་ཀ་ ཏེར་ཉི་དི་ཨ་ཉི་ རོ་ཀི་བཀའ་གནང༌མ། ཨོ་ཐེན་ཨ་ཉི་ སོ་ངོ་ཐམས་ཅན་རང་ ལེག་པུ་ཨ་ཉི་རང་ མཚོ་ནེ་མ་ཤེག་པེ་རེ༌བ༎
Currently Selected:
མཛད༌པ། 27: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
