ཡུ་ཧན་ན། 16

1ཇི་གི་ ན་ཧ་ཨོ་ཐ་བ་ ཡེག་པེ་དེན་ཐ་ཤོ་ ན་ཧ་བ་ རོ་ཁེ་མ་དིན་ཆེན་དག་པ་གི་གི༌ལ། 2ན་ཧ་བ་ ཆོས་འཛོམས་གེ་ཤོ་ཉི་གེ༌མེ། ཉི་ན་ཧ་བ་ཤེ་ལ་ཀབ་ཉི་ རོག་ཏེ་བ་ཀི་ དཀོན་མཆོག་ག་ཕྱག་ཞུན་ཅ་གི་ལ་དག་ཉི་ མི་ལེ་ག་ དུས་ཐུར་ཤར༌བེ། 3རོག་ཏེ་བ་ཀི་ ཇང་དང་ ཨ་པ་གུམ་མ་ཡེ་ཝ་ཨ་དེན་གེ་ ཨུ་ཉུ་ད་བུ་ལའི་ཨ༌ལེ། 4ཇི་གི་ཨོ་ཐ་ཆཱས་ཡེག་ཁཱན་ཤོ་ ཨུ་ཉུ་ད་བུ་དུས་ཤར་བ་ཀབ་ཉི་ ཇི་གི་ཡེག་ཁཱན་ཁེ་པ་ ན་ཤི་ཡིད་ཀ་ཨན་ཆེན་དག་པ་གི་གི༌ལ། ཇང་ན་ཧ་བ་ཀབ་ཉི་ ཆོ་ཝ་ཨ་དེན་གེ་ ཨོ་ཐ་ཆཱས་ཁེ་པ་ གོ་མ་གེ་རང་ ཇི་གི་ ན་ཧ་མ་ཡེག་ཅི༎

དམ་པའི་ཐུགས་ཉིད་ག་ཕྱག་ལཱ།

5ཉི་ཨོམ་ ཇང་ལོག་ཉི་རང་ ཇང་ཀུན་ཏི་ཁཱན་ག་ སྐུན་མདུན་ག་ཏཱན་དིན༌ཅ། དག་པ་ཀབ་ཉི་ ནའི་ཐུར་གི་རང་ ཇང་ཨོ་ག་དིན་ཅ་ཡ་དག་ཉི་ ཇི་མུ་མ༌ལ། 6ཇི་གི་ཨོ་ཐ་ཆཱས་ཡེག་པ་ཨ་དེན་གེ་ ན་ཧ་བ་ཁོ་དང་ཆཱད༌ལ། 7དག་པ་ཀབ་ཉི་ ཇི་གི་ ན་ཧ་དེན་པ་ཡེག་ཅ་ ཇང་དི་ཁཱན་ཤོ་ ན་ཧ་ལེག་པུ་ཇུང་མེ་དེན་གེ་གི༌ལ། ཧང་ཡ་དག་ནེ་ལ་ ཇང་མ་དི་ནེ་ལ་ ནོ་ཝང་ཨ་ཁཱན་མང་ཕ། ཉི་ཇང་དི་ནེ་ཤ་ རོག་ན་ཧ་བ་ཀ་བཱརང་ཀ་ཨོ་ཕེ། ཧང་ཡ་དག་ནེ་ལ་ ཇི་གི་རོག་ ན་ཧ་བ་ཆོ་ས་ག་ཏཱན་ ཀུན་ཏི༌ལེ། 8རོག་ཨོ་ཕ་ཀབ་ཉི་ རོ་ཀི་འཛམ་གླིང་ག་སོ་ངོ་བ་ཀི་ སྡིག་པ་སག་ཁཱན་ཁེ་པ་གེན༌མེ། ཉི་དེན་པ་ཧང་གི་ལ་སྨོ་ ཨོ་ཉ་ཀོར་གེ་དང་ དཀོན་མཆོག་ག་ ཁྲིམས་ག་ཀོར་གེ་བུ་གེན༌མེ། 9ཇ་ག་ཏཱན་ དད་པ་མ་ཨ་ཝ་ཨ་དེན་གེ་ འཛམ་གླིང་ག་སོ་ངོ་བ་ སྡིག་པ་སག་པ༌ཅ། 10ཉི་དེན་པ་ག་ཀོར་གེ་ རོག་ཏེ་བ་ངཱད་པ༌ཅ། ཧང་ཡ་དག་ནེ་ལ་ ཇང་ཨ་པ་བཞུགས་ས་ག་ཏཱན་དིན༌ཅ། ཉི་ན་ཤི་ ཇང་ལོག་ཉི་ཧ་ལ་རང་ ཐོང་མེ་མར༌བ། 11རོག་ཏེ་བ་ཀི་ ཁྲིམས་ཉོང༌པེ། ཧང་ཡ་དག་ནེ་ལ་ ཨོ་ཐ་འཛམ་གླིང་ག་ རྒྱལ་སྲས་གི་ གི་ཚེ་གེ་ཤ་ ཁྲིམས་ཉོང་པ༌ཅ།

12ཇི་གི་ ན་ཧ་ཆཱས་མང་པུ་ཐུར་ཡེག་པེ༌ཅ། དག་པ་ཀབ་ཉི་ ཨོ་མ་ ན་ཤི་ཐེས་པེ་མར༌བ། 13དག་པ་ཀབ་ཉི་ ཐུགས་ཉིད་དེན་པ་ ཨོ་ཕ་ཀབ་ཉི་ རོ་ཀི་ན་ཧ་བ་དེན་པ་ ཐམས་ཅན་ག་རིག༌པེ། རོ་ཀི་རོག་ཏེན་ག་ སེམས་དང་ཏུ་ཉི་མང་གི་ཝ་ རོ་ཀི་ན་ཐ་ཁཱན་བ་ཀ་ཀོར་གེ་ཡེག༌པེ། ཉི་མ་འོངས་པ་ག་ ཧང་ཇུང་མེ་གི་ལ་སྨོ་ ཨོ་ཉ་ཀོར་གེ་བུ་ རོ་ཀི་ན་ཧ་ཏཱན་ཡེག༌པེ། 14ཉི་རོ་ཀི་ ཇང་གེ་ཉོང་ཁཱན་ཁེ་པ་བུ་ཉི་ ན་ཧ་བི༌ལེ། ཉི་ཨུ་ཉུ་ད་བུ་ཨ་ལ་ཀབ་ཉི་ རོ་ཀི་ཇ་ག་གཟི་བརྗིད་གེན༌མེ། 15ཨ་པ་ག་ཆོ་ཁཱན་ ཐམས་ཅན་རང་ ཇ་ག་གི༌ལ། ཨོ་ཉི་ཨ་དེན་གེ་ ཇི་གི་ཡེག་པ་ཆོ་ཝ་ ཇི་གི་བི་ཁཱན་ཁེ་པ་ ཐུགས་ཉིད་གི་བུན་ཐཱན་ རོ་ཀི་ན་ཧ་གེན༌མེ༎

ཤོ་ནང་ཕེ་ཝ་རི༌ལེ།

16ཨོམ་ད་སུར་གེ་ ན་ཤི་ཇང་མ་ཐོང༌མ། ཉི་ཨོ་ཉ་ད་སུར་ག་ཚི་ངེ་ ན་ཤི་ཇང་ཐོང་མེ་དག༌ཉི།

17རོ་ཀ་སློ་མ་ཚེ་བང་གི་ ཐུར་གི་ཐུར་ག་ཇིམ་ཉི་ ཡེག་པ་ལ་ ཨོམ་ད་སུར་གེ་ ན་ཤི་ཇང་མ་ཐོང༌མ། ཉི་ཨོ་ཉ་ད་སུར་ག་ཚི་ངེ་ ན་ཤི་ཇང་ཐོང༌མེ། ཧང་ཡ་དག་ནེ་ལ་ ཇང་ཨ་པ་ག་སྐུན་མདུན་ག་ཏཱན་ དིན་ཅ་དག་ཉི་ གསུངས་ཁཱན་ཤོ་ ཧང་གསུངས་མ་ ཙ་རྩིས་གི་ས་དག༌ཉི། 18ཨོམ་ད་སུར་ག་ ཚི་ངེ་དག་ཁཱན་ཤོ་ ཧང་གསུངས་མ་ཙ་རྩིས་གི་ས། ཨ་ཤི་ཧ་གོ་ལུ་མ་ལ་དག་ཉི་ རོག་ཏེ་བ་ཀི་ ཇིམ་ཉི་རང་ཐ་ཝ༌ལ།

19རོག་ཏེ་བ་ཀི་ རོ་ཀ་ཏཱན་ ཨོ་ཉ་དྲི་ཝ་ཇི་མེ་ལ་མ་ལ་དག་ཉི་ ཡི་ཤུ་གི་མཁྱེན་ཉི་ གསུངས་མ་ལ་ ཨོམ་ད་སུར་གེ་ ན་ཤི་ཇང་མ་ཐོང༌མ། ཉི་ཨོ་ཉ་ད་སུར་ག་ཚི་ངེ་ ན་ཤི་ཇང་ཐོང་མེ་དག་ཉི་ ཇི་གི་ ན་ཧ་ཡེག་པེ་དེན་ཐ་ཤོ་ ཧང་གི་ས་དག་ཉི་ ཇིམ་ཅ་སྨོ། 20ཇི་གི་ ན་ཧ་དེན་པ་ཡེག་ཅ་ འཛམ་གླིང་ག་སོ་ངོ་བ་ ངལ་རངས་པ་ཀབ་ཉི་ ན་ཧ་བ་གེབ་ཉི་མརང༌མེ། དག་པ་ཀབ་ཉི་ ན་ཧ་བ་ ཤོ་ནང་མ་ཕེ་ཝ་གེ་ ཤོ་ནང་ཕེ་ཝ་རི༌ལེ། 21ཝག་ཙ་སིང་ཁཱན་མེ་ཝག་ཙ་ ན་ཚ་ཨོ་ཕ་ཀབ་ཉི་ རོ་ཀ་དུས་ཙུན་རེན་པ་ཨ་དེན་གེ་ ངམ་ཉི་ཤོག༌ཅ། དག་པ་ཀབ་ཉི་ ཝག་ཙ་སིང་དེན་གེ་ལ་ འཛམ་གླིང་ག་ཝག་ཙ་ སིང་མ་ཨ་དེན་གེ་ཤོ་ནང་ཕེ་ཉི་ ངམ་ཉི་ཤོག་ཁཱན་བ་ ཐམས་ཅན་རང་ ཡིད་ཀ་མིན༌ཅ། 22ཉི་ན་ཧ་བ་ཀ་ཐུང་ཀ་བུ་ ཨུ་ཉུ་ད་བུ་རང་ཇུང༌མེ། ཨོ་མ་ཤོ་ ན་ཧ་བ་ ཤོ་ནང་མ་ཕེ་ཝ་ཨ་ལེ་ག་ དུས་ཙུན་གི༌ལ། དག་པ་ཀབ་ཉི་ ཇི་གི་ ན་ཧ་བ་ལོག་ཉི་རང་ རུ་མ་ཀབ་ཉི་ ན་ཧ་བ་ གནམ་མེད་ས་མེད་ ཤོ་ནང་ཕེ༌ལེ། ཉི་ན་ཧ་ཨོ་ཉ་ཤོ་ནང་ཁེ་པ་ ཨི་བི་གི་རང་ རུ་ཉི་བུ་ལེ་མར༌བ། 23ཨོ་ཉ་ནོང་ཀ་ ན་ཤི་ཇ་ག་ཧང་རང་མ་ཇི༌མ། ཇི་གི་ ན་ཧ་དེན་པ་ཡེག་ཅ་ ན་ཤི་ཇ་ག་མིང་ག་ ཇ་ག་ཨ་པ་གེ་ཧང་ཞུ་ཝ་ཐུར་ རོ་ཀི་ན་ཧ་གནང༌མེ། 24ཨོ་མ་སག་པུ་ ན་ཤི་ཇ་ག་མིང་ག་ ཧང་རང་མ་ཕུན་མ༌ཅ། ཕུན་ཤོ་ ཉི་ན་ཤི་ཉོང༌པེ། ཉི་ན་ཧ་བ་ གནམ་མེད་ས་མེད་ ཤོ་ནང་ཕེ་ཝ་རི༌ལེ།

25ཇི་གི་ ན་ཧ་བ་ཀབ་ཉི་ དཔེ་གཏམ་ག་ཐུང་ཀེ་ཨ་ཉི་ ཆཱས་ཨ་ཝ༌ཅ། དག་པ་ཀབ་ཉི་ དཔེ་གཏམ་ག་ཐུང་ཀེ་ཨ་ཉི་མང་གི་ཝ་ ཇི་གི་ ན་ཧ་ཡ་ལུ་ཨན་ ཧ་གོ་ལེ་རེ་བ་ཨ་ཉི་ ཨ་པ་ག་ཀོར་གེ་ཡེག་པེ་ག་ དུས་ཐུར་ཤར༌བེ། 26ཉི་ཨོ་ཉ་ནོང་ཀ་ ན་ཤི་ཇ་ག་མིང་ག་ཞུ༌ལེ། ན་ཧ་ཚབ་ཀ་ ཇི་གི་ཨ་པ་གེ་ཞུ་ལེ་དག་ཉི་ ཇི་གི་ ན་ཧ་ཡེག་ཅ་མང་གི། 27ཧང་ཡ་དག་ནེ་ལ་ ཨ་པ་རོག་ཏེན་གི་ ན་ཧ་བ་ཕང༌ཅ། ཧང་ཡ་དག་ནེ་ལ་ ན་ཤི་ཇང་ཕང་པ་ཅ་ ཉི་ཇང་ཤོ་ དཀོན་མཆོག་གེ་ ཨོ་ཕ་གི་ལ་དག་ཉི་ ན་ཤི་དད་པ་ཨ་ཝ༌ཅ། 28ཇང་ཨ་པ་ག་སྐུན་མདུན་གེ་ཨུ་ཉི་ འཛམ་གླིང་ནང་ཀ་ནུ་ཕ། ཉི་ཨོམ་ ཇང་འཛམ་གླིང་ ཐུབ་ཐཱན་ཐཱན་ལོག་ཉི་རང་ ཨ་པ་བཞུགས་ས་ག་ཏཱན་ དིན་ཅ་དག་ཉི་ གསུངས་མ༌ལ།

29ཉི་ཡི་ཤུ་ག་ སློ་མ་བ་ཀི་ཞུ་ཝ་ལ་ ཨོམ་ ནཱན་གི་ དཔེ་གཏམ་ག་ཐུང་ཀེ་ཨ་ཉི་མང་གི་ཝ་ ཡ་ལུ་ཨན་ཧ་གོ་ལེ་རེ་བ་ཨ་ཉི་ གསུངས༌ལ། 30ཨོམ་གི་ནེ་ལ་ ཨ་ཤི་སེ་ཝ་ ནཱན་གི་མ་མཁྱེན་མ་ ཧང་རང་མ༌ལ། ཉི་ཐུར་གི་རང་ ནཱན་ག་ དྲི་ཝ་ཇི་མེ་མ་ཁེ་ལེ༌ལ། ཨོ་ཉི་ཨ་དེན་གེ་ ནཱན་ཤོ་ དཀོན་མཆོག་གེ་ བྱོན་མ་གི་ལ་དག་ཉི་ ཨ་ཤི་དད་པ་ཨན་ཅ་དག༌ཉི།

31ཇུ་ཀ་དག་པ་ཀབ་ཉི་ ན་ཤི་དད་པ་ཨ་ཝ་དག་ཉི་ ཡི་ཤུ་གི་ རོག་ཏེ་བ་ཀ་གསུངས་མ༌ལ། 32དག་པ་ཀབ་ཉི་ ན་ཧ་བ་ ཐམས་ཅན་རང་ཏོར་ཉི་ རང་རང་ས་ཕའི་ག་ཏཱན་ དི་ལེ་ག་དུས་ཐུར་ཤར༌བེ། ཉི་ཨོ་ཉ་དུས་ཤར་ཉི་ཆུ་མ༌ཅ། ན་ཤི་ཇང་ཐུར་ཏེན་ཐུབ་ཐ༌ལེ། དག་པ་ཀབ་ཉི་ ཇང་ཤོ་ ཐུར་ཏེན་མཱན༌ཅ། ཧང་ཡ་དག་ནེ་ལ་ ཇ་ག་ཨ་པ་ ཇང་ཀབ་ཉི་བཞུགས་པ༌ཅ། 33ཇི་གི་ ན་ཧ་ཨོ་ཐ་བ་ ཡེག་པེ་དེན་ཐ་ཤོ་ ན་ཧ་བ་ ཇང་ཀབ་ཉི་ཆོ་ཝ་ཨ་དེན་གེ་ ན་ཤི་སྐྱིད་པུ་ཉོང་ཅེན་དག་པ་གི་གི༌ལ། འཛམ་གླིང་གི་ ན་ཧ་བ་ ནང་དོག་པེ་ག༌ལེ། དག་པ་ཀབ་ཉི་ ཡོང་མ་ཁེ་ལཱན་ དོ་རི་རི་ཨ་ཉི་ཆོའི། ཧང་ཡ་དག་ནེ་ལ་ ཇི་གི་འཛམ་གླིང་ག་ཐུང་ཀ་ རྒྱལ་ཁ་ཉོང་ཉི་ཆུ་མ༌ཅ༎

Currently Selected:

ཡུ་ཧན་ན། 16: TNTB

Highlight

Copy