ཡུ་ཧན་ན། 6

སོ་ངོ་ 5000 ག་ ལྟོ་གནང་མ༌ལ།

1ཨོ་ཐ་ཚི་ངེ་ ཡི་ཤུ་ ག་ལིལ་ག་མཚོ་གོག་ཉི་ བྱོན་མ༌ལ། (ཨོ་ཐ་མཚོ་ཤོ་ ཏི་བེ་རི་ཡཱས་ག་མཚོ་དག་ཉི་བུ་ ཆིན་ཅ་གི་ཝ༌ལ།) 2རོ་ཀི་སོ་ངོ་མར་ཁཱན་བ་དྲག་ཉི་ རྫུ་འཕྲུལ་གེན་ཁཱན་ཁེ་པ་ ཐོང་མ་ཨ་དེན་གེ་ རོག་ཨོ་ག་ཏཱན་བྱོན་མ་ཐུར་ སོ་ངོ་མང་པུ་ཨ་ཉི་ ཛོམ་ཅ་གི་ཝ༌ལ། 3ཉི་ཡི་ཤུ་ ག་ཕུ་ཐུང་ཀ་བྱོན་ཐཱན་ རོ་ཀ་སློ་མ་བ་ཀབ་ཉི་ ས་ག་བཞུགས་པ༌ལ། 4ཉི་ཡ་ཧུ་དི་པ་ག་ གོག་ཉི་དི་ཝ་ག་དུས་ཆེན་ཁེ་པ་ ར་ག་ཏེམ་པ་ཅ་གི་ཝ༌ལ།

5ཡི་ཤུ་གི་གཟིགས་པ་ཀབ་ཉི་ སོ་ངོ་མང་པུ་ཛོ་མ་ཐོང་ཉི་ ཕི་ལིབ་ག་ཏཱན་གསུངས་མ་ལ་ ཨོ་ཐ་སོ་ངོ་བ་ ཟ་ལེ་ག་དེན་གེ་ ཨ་ཤི་ཀེབ་ཏང་ ཨོ་གེ་ངོ་ལེ་ཡ་དག༌ཉི། 6མ་པ་ ཧང་ཨ་ལེ་ཁེ་ལེ་གི་ལ་སྨོ་ རོ་ཀི་གོ་མ་གེ་རང་ མཁྱེན་མ་ཆོ་ཝ༌ལ། དག་པ་ཀབ་ཉི་ རོ་ཀི་ཕི་ལིབ་གེ་ རྒྱུགས་ལ་ལེ་དེན་གེ་ ཨོ་ཐ་ཆཱས་ཇི་མ་གི་ཝ༌ལ།

7ཕི་ལིབ་གི་ལན་ཞུ་ཝ་ལ་ ལ་ཉི་ཡེན་ག་ཏོ་ལོབ་གི་ ཀེབ་ཏང་ངོ་ནེ་བུ་ ཨོ་ཐ་སོ་ངོ་བ་ ཁམ་རེ་ཁམ་རེ་ ཟ་ལེ་རང་མ་ལང་པ་དག༌ཉི།

8རོ་ཀ་བཱརའ་སློ་མ་ སི་མོན་པ་ཏྲུས་ག་བོ་ཉིང་ ཨན་དྲི་ཡཱས་གི་ཞུ་ཝ༌ལ། 9ཨོ་ཐ་ཀོ་ཏ་ག་ག་དང་ག་ ཕེ་མུང་ག་ཀེབ་ཏང་ལྔ་དང་ ང་ཟེ་མུ་ཨ་ཝ་ཉིག་ཙིང༌ལ། དག་པ་ཀབ་ཉི་ ཨོ་ཐེ་གི་ སོ་ངོ་ཨོམ་ཏུར་ ཧང་ཏེན་ ཆ་པེ་རེ་བེ་ཡ་དག༌ཉི།

10སོ་ངོ་བ་ ས་ག་ལང་མེ་བི་དག་ཉི་ ཡི་ཤུ་གི་གསུངས་མ༌ལ། ཨོ་ཉ་ས་ཆ་ག་ རི་བང་མང་པུ་ཆོ་ཝ་ཨ་དེན་གེ་ སོ་ངོ་བ་ རི་བང་ཐུང་ཐུང་ ལང་མ༌ལ། ཉི་དོམ་གེ་ ཕེ་ཝག་ཙ་ 5000 ཕང་ཅ་གི་ཝ༌ལ། 11ཉི་ཡི་ཤུ་གི་ ཀེབ་ཏང་བསྣམས་ཉི་ དཀོན་མཆོག་ག་ བཀའ་དྲིན་བསམ་ཐཱན་ ལང་ཁཱན་སོ་ངོ་བ་ཀ་ བོང་ཉི་གནང་མ༌ལ། ཉི་ང་ག་དེན་གེ་བུ་ ཨུ་ཉུ་པུརུས་ཀིན་ཨ་ཉི་རང་གནང་མ༌ལ། ཉི་སོ་ངོ་བ་ཀི་ ཧབ་ཏུར་ཟ་ལེ་རེ་བ་ཐུར་ ཟ་ཝ༌ལ།

12སོ་ངོ་བ་ ཐམས་ཅན་རང་ཁ་དེན་གེ་ ཡི་ཤུ་གི་ རོ་ཀ་སློ་མ་བ་ཀ་གསུངས་མ་ལ་ ལཱན་ཇུ་ལུས་ཁཱན་ཀེབ་ཏང་བ་ ལོག་ཉི་དུས༌ཅོ། ཨ་ཤི་མོ་ནང་ཨ་ལེ་མང་ཕ་དག༌ཉི། 13ཉི་སོ་ངོ་བ་ཀི་ཟ་ཁཱན་ ཕེ་མུང་ག་ཀེབ་ཏང་ལྔ་གེ་ ལཱན་ཇུ་ལུས་ཁཱན་བ་ རོག་ཏེ་བ་ཀི་ དུས་པ་ཀབ་ཉི་ ཤོ་མ་སོང་ཉིག་ཙིང་ཕུང་མ་ ཤོ་ཝ༌ལ།

14ཨོ་ཐ་རྫུ་འཕྲུལ་ཁེ་པ་ཐོང་ཉི་ སོ་ངོ་བ་ཀི་ཡེག་པ་ལ་ རོག་གི་ནེ་ལ་ ཏེན་ཏེན་རང་ འཛམ་གླིང་ག་བྱོན་མེ་ཁེ་ཁཱན་ ལུང་བསྟན་པ་གི་ཝ་ལ་དག༌ཉི། 15རོག་ཤོ་ རོག་ཏེ་བ་ཀ་ དཔོན་ཅོད་པེ་དེན་གེ་ བང་ཙོང་ཉི་ བུ་ལེ་གི་ཝ་ལ་དག་ཉི་ ཡི་ཤུ་གི་མཁྱེན་ཉི་ རོག་ཉ་གེ་ཤོན་ཐཱན་ རོག་ཐུར་ཏེན་ཨ་ཉི་ ཕུ་ཐུང་ཀ་ཏཱན་བྱོན་མ༌ལ༎

ཡི་ཤུ་གི་རི་ཐུང་ཐུང་ དང་ཉི་བྱོན་མ༌ལ།

16མིང་མེར་དེན་གེ་ ཡི་ཤུ་ག་སློ་མ་བ་ དོང་མཚོ་ག་ཏཱན་དིན་ཐཱན་ 17གྲུ་ནང་ཀ་ནུབ་ཉི་ ལོག་ཉི་རང་ ཀ་ཕར་ན་ཧུམ་ག་ཏཱན་ དི་ཝ༌ལ། ཉི་མིང་མེར་བ་ཆོ་ཝ༌ལ། ཡི་ཤུ་རོག་ཏེ་བ་ཆོ་ས་ག་ མ་ཕེབས་པ་ཅ་གི་ཝ༌ལ། 18རི་དི་ཤུག་ཅཱན་ཨན་ ཨོ་ཕ་ཨ་དེན་གེ་ མཚོ་རི་ལག་པེ་གོ་ཙུག་པ༌ལ། 19རོག་ཏེ་བ་གྲུ་ཇུག་ཉི་ མི་ད་ཚེ་ 30 ཕང་ག་ ཤེག་པ་ཀབ་ཉི་ ཡི་ཤུ་རི་ཐུང་ཐུང་བྱོན་ཉི་ རོག་ཏེ་བ་ཀ་ལོ་ཀ་ཏཱན་ བྱོན་མ་ཨ་ཝ་ཐོང་མ༌ལ། ཉི་རོག་ཏེ་བ་ གནམ་མེད་ས་མེད་ ཡོང་ཁེ་ཝ༌ལ། 20དག་པ་ཀབ་ཉི་ རོ་ཀི་ རོག་ཏེ་བ་ཀ་གསུངས་མ་ལ་ ཇང་གི་ལ་ཇང་ ཡོང་མ་ཁེ་དག༌ཉི། 21ཨོ་ཉི་ཨ་དེན་གེ་ རོག་ཏེ་བ་ཀི་ རོག་གྲུ་ནང་ཀ་བྱོན་མེ་བི་ལེ་ག་ སེམས་ཨ༌ལ། ཉི་ཨོ་ཉ་ཐྲེ་ཀེ་རང་ རོག་ཏེ་བ་ དི་ལེ་ཁེ་ས་ག་ མཚོ་ནབ་ཀ་ཤེག་པ་གི་ཝ༌ལ༎

ཡི་ཤུ་ཤོ་ ཚེ་ག་ཀེབ་ཏང་གི༌ལ།

22ནམ་ནིང་ད་བུ་ མཚོ་ལོག་ཐུར་ལོ་ཀ་ཆོ་ཁཱན་ སོ་ངོ་བ་ཀི་སེ་ཝ་ལ་ གྲུ་ཐུར་ཤ་ཆོ༌ཝ། ཉི་ཨོ་ཉ་གྲུ་ནང་ཀ་ རོ་ཀ་སློ་མ་བ་ཀབ་ཉི་ ཡི་ཤུ་མ་བྱོན་ཤི། རོག་ཏེ་བ་ཏེན་ དི་ཝ་གི་ལ་དག༌ཉི། 23ཉི་ཏི་བེ་རི་ཡཱས་གེ་ཨུ་ཁཱན་ བཱརའ་གྲུ་བ་ མཚོ་ནེ་མ་ག་ཤེག་པ༌ལ། ཉི་ཨོ་ཉ་ར་ག་ ཡི་ཤུ་གི་ དཀོན་མཆོག་ག་ བཀའ་དྲིན་བསམ་ཉི་ཆུམ་དེན་གེ་ སོ་ངོ་བ་ཀི་ ཀེབ་ཏང་ཟ་ཝ་ཆོ་ཝ༌ལ། 24ཡི་ཤུ་དང་ རོ་ཀ་སློ་མ་བ་མ་ཝ་ག་ སོ་ངོ་བ་ཀི་སེ་ཉི་ ཨོ་ཉ་གྲུ་བ་ཀ་ནང་ཀ་ནུབ་ཐཱན་ རོག་ལ་མེ་དེན་གེ་ ཀ་ཕར་ན་ཧུམ་ག་ཏཱན་ དི་ཝ༌ལ།

25རོག་ཏེ་བ་ མཚོ་ནེ་མ་ག་ཤེག་པ་ཀབ་ཉི་ རོག་ཏེ་བ་ཀི་ ཡི་ཤུ་མཇལ་ཉི་ཞུ་ཝ་ལ་ སློབ་དཔོན་ ནཱན་ཐ་ག་ ཧ་ལ་བྱོན་མ་ཡ་དག༌ཉི།

26ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ན་ཤི་རྫུ་འཕྲུལ་ག་རྟགས་མཚན་བ་ ཐོང་མ་ཨ་དེན་གེ་མང་གི་ཝ་ ན་ཤི་ཀེབ་ཏང་ཟ་ལེ་ཉོང་ཉི་ ན་ཧ་ཕོ་ལང་ཁ་ཝ་ཨ་དེན་གེ་ ན་ཤི་ཇང་ལམ་ཅ་གི༌ལ། 27མེ་པ་དི་ཁཱན་ལྟོ་ག་དེན་གེ་ ནང་མ་དོག༌ཅོ། དག་པ་ཀབ་ཉི་ ཚེ་མ་འགྱུར་བརྟན་པ་སག་པུ་ ལུས་ཁཱན་ལྟོ་ག་དེན་གེ་ ནང་དོག༌ཅོ། ཉི་ཨོ་ཉ་ལྟོ་ཤོ་ སོ་ངོ་ག་ཟ་གི་ ན་ཧ་ཏཱན་བི༌ལེ། ཧང་ཡ་དག་ནེ་ལ་ ཡབ་དཀོན་མཆོག་གི་ རོ་ཀ་ཐུང་ཀ་ ཨུ་ཉུ་ད་བུ་ བི་ལེ་ཆོག་པེ་ག་ ཐེལ་ཙི་ཕི་ཉི་གནང་མ་ཅ་དག༌ཉི།

28དཀོན་མཆོག་གི་ ཨ་ཧ་དེན་གེ་ ཐུགས་བཞེས་ཝ་དང་ཏུ་ཉི་ ཨ་ལེ་དེན་གེ་ ཨ་ཤི་ཧང་ཨ་ལེ་ཁེ་ལེ་ཡ་དག་ཉི་ རོག་ཏེ་བ་ཀི་ རོ་ཀ་ཞུ་ཝ༌ལ།

29ཡི་ཤུ་གི་ལན་གནང་ཉི་ གསུངས་མ་ལ་ ན་ཧ་དེན་གེ་ དཀོན་མཆོག་ག་ ཐུགས་བཞེད་ཤོ་ རོ་ཀི་ཀུན་ཏི་ཁཱན་ག་ ན་ཤི་དད་པ་ཨན་ཆེན་ཨ་ཉི་ཅ་དག༌ཉི།

30ཉི་རོག་ཏེ་བ་ཀི་ཞུ་ཝ་ལ་ ནཱན་གི་གེན་ཁཱན་རྫུ་འཕྲུལ་ག་ རྟགས་མཚན་ཁེ་པ་ ཨ་ཤི་ཐོང་ཉི་ ན་ག་ཏཱན་དད་པ་ཨ་ལེ་དེན་གེ་ ནཱན་གི་ རྫུ་འཕྲུལ་ག་རྟགས་མཚན་ ཧང་གེན་མེ་ཡ། ནཱན་གི་ ཧང་མཛད་པེ་ཡ། 31དང་པོ་ག་ ཨ་ཧ་ཕ་མ་བ་ཀི་ ས་ཏོང་པ་ནང་ཀ་ མ་ན་#6:31 དང་པོ་ ཨིས་རེལ་ག་སོ་ངོ་བ་ ས་ཏོང་པ་གེ་ཨ་ཉི་ དི་ལེ་གང་ཀ་ རོག་ཏེ་བ་ཟ་ལེ་དེན་གེ་ དཀོན་མཆོག་གི་ ཞིང་ཁམས་གེ་དོང་ གནང་ཁཱན་ག་ མ་ན་དག་ཉི་ ཡེག་ཅ་གི་ཝ༌ལ། མ་ན་ཤོ་ གོད་པ་ཀབ་ཉི་ བ་ལིང་ཨ་ཝ་ཆོ་ཝ༌ལ། དག་པ་ཀབ་ཉི་ ངམ་ག་དྲེ་ཁེ་ལ་ཀབ་ཉི་ ཞུན་དི་ཝ༌ལ། ཟ་ཝ་ཆོ༌ཝ། རོ་ཀི་ རོག་ཏེ་བ་ཀ་ ཞིང་ཁམས་གེ་དོང་ ཀེབ་ཏང་གནང་མ་#6:31 ཤོན་དི་ཝ་ག་དཔེ་ཆ་ 16:4; ན་ཧེ་མི་ཡ་ག་དཔེ་ཆ 9:15; མགུར་མ་ག་དཔེ་ཆ་ 78:24, 25 དག་ཉི་ གསུང་རབ་གེ་ཤོན་ཅ་དག༌ཉི།

32ཡི་ཤུ་གི་གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ཞིང་ཁམས་གེ་དོང་ ཀེབ་ཏང་གནང་ཁཱན་ཁེ་པ་ མོ་ས་མང་གི། དག་པ་ཀབ་ཉི་ ཞིང་ཁམས་གེ་དོང་ ཀེབ་ཏང་ངོ་མ་གནང་ཁཱན་ཤོ་ ཇ་ག་ཨ་པ་གི༌ལ། 33ཧང་ཡ་དག་ནེ་ལ་ དཀོན་མཆོག་ག་ཀེབ་ཏང་ཤོ་ ཞིང་ཁམས་གེ་དོང་ཨུན་ཐཱན་ འཛམ་གླིང་ག་ ཚེ་བི་ཁཱན་ཁེ་པ་གི༌ལ།

34སློབ་དཔོན་ ཏ་བུ་རང་ ཨོ་ཐ་ཀེབ་ཏང་ ཨ་ཧ་གནང་ཤོ་དག་ཉི་ རོག་ཏེ་བ་ཀི་ ཡི་ཤུ་ག་ཞུ་ཝ༌ལ།

35ཉི་ཡི་ཤུ་གི་གསུངས་མ་ལ་ ཇང་ཤོ་ ཚེ་ག་ཀེབ་ཏང་གི༌ལ། ཇང་ཆོ་ས་ག་ཨུ་ཁཱན་བ་ ཧ་ལ་རང་ བི་ནང་མ་ཁུ༌ལ། ཉི་ཇ་ག་ཏཱན་ དད་པ་ཨ་ཁཱན་བ་ ཧ་ལ་རང་ རི་ནང་མ་སོ་ཕ། 36དག་པ་ཀབ་ཉི་ ཇི་གི་ ན་ཧ་ཡེག་པ་པུརུས་ཀིན་ཨ་ཉི་ ན་ཤི་ ཇང་ཐོང་ཐཱན་རང་གི་ནེ་བུ་ ན་ཤི་ ཇ་ག་དད་པ་ཨ་ལུ་མ༌ལ། 37ཨ་པ་གི་གནང་ཁཱན་བ་ ཐམས་ཅན་རང་ ཇང་ཆོ་ས་ག་ཏཱན་ཨོ་ཕེ། ཉི་ཇང་ཆོ་ས་ག་ཏཱན་ཨུ་ཁཱན་བ་ ཇི་གི་ཧ་ལ་རང་མ་ཁོན༌མ། 38ཧང་ཡ་དག་ནེ་ལ་ ཇང་ཞིང་ཁམས་གེ་དོང་ཨུ་ཁཱན་ཤོ་ ཇང་ཏེན་ག་སེམས་དང་ཏུ་ཉི་ ཨ་ལེ་དེན་གེ་མང་གི་ཝ་ ཇང་ཀུན་ཏི་ཁཱན་ག་ ཐུགས་བཞེད་དང་ཏུ་ཉི་ ཨ་ལེ་དེན་གེ་ ཨོ་ཕ་གི༌ལ། 39རོ་ཀི་ ཇ་ག་གནང་ཁཱན་བ་ ཐུར་རང་མ་གེ་མཱན་ ནོང་ཇུ་ཀ་དག་པ་ཀབ་ཉི་ ཚེ་མ་འགྱུར་བརྟན་པ་ག་དེན་གེ་ ཇི་གི་རོག་ཏེ་བ་ ལོག་ཉི་ཝུན་ཆེན་དག་ཉི་ ཇང་ཀུན་ཏི་ཁཱན་ག་ ཐུགས་བཞེད༌ཅ། 40ཨ་པ་ག་ཐུགས་བཞེད་ཤོ་ ཟ་ག་ཏཱན་གོད་ཐཱན་ དད་པ་ཨ་ཁཱན་ ཐམས་ཅན་གི་ ཚེ་མ་འགྱུར་བརྟན་པ་ ཉོང་ཅེན་དག་ཉི༌ཅ། ཉི་ནོང་ཇུ་ཀ་ དག་པ་ཀབ་ཉི་ ཇི་གི་ རོག་ཏེ་བ་ ཤི་ཝ་གེ་ལོག་ཉི་ཝུ་ལེ་དག༌ཉི།

41ཡི་ཤུ་གི་ ཇང་ཤོ་ ཞིང་ཁམས་གེ་དོང་ཨུ་ཁཱན་ ཀེབ་ཏང་གི་ལ་དག་ཉི་ གསུངས་མ་ཨ་དེན་གེ་ ཡ་ཧུ་དི་པ་བ་ཀི་ བེརེག་ཏོང་ཇིག་པེ་ གོ་ཙུག་པ༌ལ། 42ཨོ་ཐ་སོ་ངོ་ཤོ་ ཨ་ཤི་གུམ་ཡེ་ཁཱན་ ཡོ་སེཕ་དང་ མ་རི་ཡམ་ག་ཟ་མང་གི་སྨོ། ཉི་ཨོམ་ རོ་ཀི་ཨ་ཧ་ཏཱན་ རོག་ཤོ་ ཞིང་ཁམས་གེ་དོང་ ཨོ་ཕ་གི་ལ་ཨ་ཉི་ ཧང་ཏེན་ཡེག་པེ་རེ་བེ་ཡ།

43ན་ཧ་བ་ནང་དོ་ བེརེག་ཏོང་ཇིག་པེ་ག་ནོར་ཤོ་དག་ཉི་ ཡི་ཤུ་གི་གསུངས་མ༌ལ། 44ཧང་ཡ་དག་ནེ་ལ་ ཇང་ཀུན་ཏི་ཁཱན་ ཨ་པ་གི་ སོ་ངོ་བ་ ཇང་ཆོ་ས་ག་ཏཱན་ མ་ཕ་ཝ་སག་པུ་ རོག་ཏེ་བ་ཀི་ ཇ་ག་བཱརང་ཀ་ ཨོ་ཕེ་མར༌བ། ཉི་ནོང་ཇུ་ཀ་ནོང་ཀ་ ཇི་གི་རོག་ཏེ་བ་ ཤི་ཝ་གེ་ལོག་ཉི་ཝུ༌ལེ། 45རོག་ཏེ་བ་ཐམས་ཅན་ག་ དཀོན་མཆོག་གི་ ཡེན་གནང་མེ་དག་ཉི་ ལུང་བསྟན་པ་བ་ཀི་ འབྲི་བ༌ཅ། ཉི་ཨ་པ་གེ་ཉཱད་ཉི་ རོ་ཀེ་ལབ་ཁཱན་བ་ཀི་ ཇང་ཆོ་ས་ག་ཏཱན་ཨོ་ཕེ་དག༌ཉི། 46དཀོན་མཆོག་གེ་ ཨུ་ཁཱན་ཐུར་གི་ཤ་ ཨ་པ་མཇལ་བ༌ཅ། དག་པ་ཀབ་ཉི་ བཱརའ་ཨི་བི་གི་རང་ ཨ་པ་མཇལ་བ་མཱན༌ཅ། 47ཇི་གི་ ན་ཧ་དེན་པ་ཡེག་ཅ་ ཨི་བི་གི་དད་པ་ཨ་ཝ་ཐུར་ ཨོ་ཉ་སོ་ངོ་གི་ ཚེ་མ་འགྱུར་བརྟན་པ་ཉོང༌པེ། 48ཇང་ཤོ་ ཚེ་ག་ཀེབ་ཏང་གི༌ལ། 49ན་ཧ་ཕ་མ་བ་ཀི་ ས་ཏོང་པ་ནང་ཀ་ མ་ན་ཟ༌ཝ། དག་པ་ཀབ་ཉི་ རོག་ཏེ་བ་ཤི༌ཝ། 50དག་པ་ཀབ་ཉི་ ཞིང་ཁམས་གེ་ དོང་ཨུ་ཁཱན་ཀེབ་ཏང་ ཨི་བི་གི་ཟ་ཝ་ཐུར་ ཨོ་ཉ་སོ་ངོ་ཁེ་པ་ མ་ཤི༌ལ། 51ཇང་ཤོ་ ཞིང་ཁམས་གེ་དོང་ཨུ་ཁཱན་ གསོན་པོ་ཀེབ་ཏང་གི༌ལ། ཉི་ཨི་བི་གི་ ཨོ་ཐ་ཀེབ་ཏང་ཟ་ཝ་ཐུར་ ཨོ་ཉ་སོ་ངོ་ཁེ་པ་ དུས་ཏ་བུ་ག་དེན་གེ་ཆོ༌ལེ། ཉི་ཨོ་ཐ་ཀེབ་ཏང་ཤོ་ འཛམ་གླིང་ག་སོ་ངོ་བ་ཀི་ ཚེ་ཉོང་ཅེན་དག་པ་གི་ ཇི་གི་བི་ཁཱན་ ཇ་ག་ཤ་གི་ལ་དག༌ཉི།

52ཨོ་ཐ་སོ་ངོ་གི་ རོག་ཏེན་ག་ཤ་ང་མེ་དེན་གེ་ ཧང་ཏེན་བི་ལེ་རེ་བེ་ཡ་དག་ཉི་ ཡ་ཧུ་དི་པ་བ་ ཤག་རུ་མེ་གོ་ཙུག་པ༌ལ།

53ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ན་ཤི་སོ་ངོ་ག་ཟ་ག་ ཤ་མ་ང་མ་སག་པུ་ ཉི་རོ་ཀ་ཞི་མ་ཇ་མ་སག་པུ་ ན་ཤི་ཚེ་ཉོང་པེ་མར༌བ། 54ཨི་བི་གི་ ཇ་ག་ཤ་ང་མ་ཐུར་ ཉི་ཇ་ག་ཞི་ཇ་མ་ཐུར་ ཨོ་ཉ་སོ་ངོ་ག་ ཚེ་མ་འགྱུར་བརྟན་པ༌ཅ། ཉི་ནོང་ཇུ་ཀ་དག་པ་ཀབ་ཉི་ ཇི་གི་རོག་ཏེ་བ་ ཤི་ཝ་གེ་ལོག་ཉི་ཝུ༌ལེ། 55ཧང་ཡ་དག་ནེ་ལ་ ཇ་ག་ཤ་ཤོ་ ལྟོ་ངོ་མ་གི༌ལ། ཉི་ཇ་ག་ཞི་ཤོ་ ཇ་མེ་ཁེ་ཁཱན་ངོ་མ་གི༌ལ། 56ཨི་བི་གི་ ཇ་ག་ཤ་ཟ་ཉི་ ཇ་ག་ཞི་ཇ་མ་ཐུར་ རོག་ཇ་ག་ནང་ཀ་ཆོ༌ལེ། ཉི་ཇང་བུ་ རོག་ཀ་ནང་ཀ་ཆོ༌ལེ། 57གསོན་པོ་ཨ་ཉི་བཞུགས་ཁཱན་ ཨ་པ་གི་ ཇང་ཀུན་ཏི་ཝ་ཨ་དེན་གེ་ ཇང་བུ་ གསོན་པོ་ཨ་ཉི་ཆོན་ཅ་གི༌ལ། ཨུ་ཉུ་པུརུས་ཀིན་ཨ་ཉི་ ཨི་བི་གི་ ཇང་ཟ་ཝ་ཐུར་ ཇ་ག་ཐུང་ཀེ་ཨ་ཉི་ རོག་བུ་གསོན་པོ་ཨ་ཉི་ཆོ༌ལེ། 58ཨོ་ཐ་ཀེབ་ཏང་ཤོ་ ཞིང་ཁམས་གེ་དོང་ ཨོ་ཕ་གི༌ལ། ན་ཧ་ཕ་མ་བ་ཀི་ མ་ན་ཏ་ཟ་ཝ་ དག་པ་ཀབ་ཉི་ རོག་ཏེ་བ་ཤི༌ཝ། ཉི་ཨི་བི་གི་ ཨོ་ཐ་ཀེབ་ཏང་ཟ་ཝ་ཐུར་ ཨོ་ཉ་སོ་ངོ་གི་ནེ་ལ་ དུས་ཏ་བུ་རང་ གསོན་པོ་ཨ་ཉི་ཆོ་ལེ་དག༌ཉི། 59རོ་ཀི་ཀ་ཕར་ན་ཧུམ་ག་ ཆོས་འཛོམས་ནང་ཀ་ཡེ་ལ་ཀབ་ཉི་ ཨོ་ཐ་གསུང་ གསུངས་མ་གི༌ལ༎

སློ་མ་མང་པུ་ཐུར་གི་ ཡི་ཤུ་ཐུབ་ཐ་ཝ༌ལ།

60ཨོ་ཐ་གསུང་ཉཱན་ཏེན་གེ་ རོ་ཀ་སློ་མ་མང་པུ་ཐུར་གི་ ཡེག་པ་ལ་ ཨུ་ཐུ་གི་ནེ་ལ་ ཧ་གོ་ལེ་ག་ཀ་ལུ༌ལ། ཨོ་ཐ་ཡེ་ཁཱན་ཁེ་པ་ ཨི་བི་གི་ ཞུ་ལེ་རེ་བེ་ཡ་དག༌ཉི།

61རོ་ཀ་སློ་མ་བ་ཀི་ བེརེག་ཏོང་ཇིག་པ་ག་ ཡི་ཤུ་གི་མཁྱེན་ཉི་ གསུངས་མ་ལ་ ཇི་གི་ཡེ་ཁཱན་གི་ ན་ཧ་དད་པ་ ཐུབ་ཐ་ལེ་རིག་ལ་སྨོ། 62དག་པ་ཀབ་ཉི་ སོ་ངོ་ག་ཟ་ རོག་གོ་མ་ ཨོ་ག་ཆོ་ཝ་གི་ལ་སྨོ་ ཨོ་ཉ་ག་ཏཱན་ ལོག་ཉི་དི་ཝ་ག་ ན་ཤི་ཐོང་ནེ་ལ་ ཧང་ཏེན་ཨ་ལེ་ཡ། 63ཚེ་བི་ཁཱན་ཤོ་ ཐུགས་ཉིད་གི༌ལ། ཉི་སོ་ངོ་གི་ ཙ་དྲེག་ཁཱན་ཤོ་ ཁུངས་ཧང་རང་མཱན༌ཅ། ཇི་གི་ ན་ཧ་ཡེ་ཁཱན་བ་ ཐུགས་ཉིད་གི༌ལ། ཉི་ཨོ་ཉ་བ་ཤོ་ ཚེ་གི༌ལ། 64ཨོ་ཉེ་རང་གི་ནེ་བུ་ ན་ཧ་པོང་ཀེ་ཚེ་བང་གི་ དད་པ་ཨ་ལུ་མ་ལ་དག་ཉི་ གསུངས་མ༌ལ། ཧང་ཡ་དག་ནེ་ལ་ ཨི་བི་ཨི་བི་གི་ རོ་ཀ་ཏཱན་དད་པ་མ་ཨན་ཅ་གི་ལ་སྨོ་ ཉི་ཨི་བི་གི་ རོ་ཀ་མགུ་སྐོར་ཕི་ལེ་གི་ལ་སྨོ་ ཡི་ཤུ་གི་ གོ་མ་གེ་རང་ མཁྱེན་མ་ཆོ་ཝ༌ལ། 65ཨོ་ཉི་ཨ་དེན་གེ་ ཇི་གི་ ན་ཧ་ཡེག་པ་ཆོ་ཝ་ ཨ་པ་གི་མ་གནང་མ་སག་པུ་ ཨི་བི་གི་རང་ ཇ་ག་བཱརང་ཀ་ ཨོ་ཕེ་མར་བ་དག་ཉི་ ཡི་ཤུ་གི་གསུངས་མ༌ལ།

66ཨོ་ཐ་གེ་གོ་ཙུག་ཉི་ རོ་ཀ་སློ་མ་མང་པུ་ཐུར་གི་ ཚིང་གིར་ཐཱན་ རོག་ཐུབ་ཐ་ཉི་ དི་ཝ༌ལ།

67ཡི་ཤུ་གི་ རོག་ཏེ་སོང་ཉིག་ཙིང་ག་ གསུངས་མ་ལ་ ན་ཤི་བུ་ ཇང་ཐུབ་ཐ་ཉི་དི་ལེ་སྨོ་དག༌ཉི།

68སི་མོན་པ་ཏྲུས་གི་ཞུ་ཝ་ལ་ གཙོ་བོ་ ཨའི་ཨི་བི་ག་བཱརང་ཀ་ཏཱན་ དི་ལེ་ཡ། ཚེ་མ་འགྱུར་བརྟན་པ་ག་གསུང་ག་བ་ ནཱན་ཀབ་ཉི༌ཅ། 69ཉི་ཨ་ཤི་སེ་ཉི་ དད་པ་ཨན༌ཅ། ནཱན་ཤོ་ དཀོན་མཆོག་ག་ དམ་པའི་སོ་ངོ་གི་ལ་དག༌ཉི།

70ཉི་ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇི་གི་ ནའི་སོང་ཉིག་ཙིང་མ་སིན་ཤི་སྨོ། ཨོ་ཉེ་རང་གི་ནེ་བུ་ ན་ཧ་པོང་ཀེ་ཐུར་ཤོ་ བདུད་ཨོ་ཕེ། 71ཇུ་ཀེ་ རོ་ཀ་མགུ་སྐོར་ཕི་ཁཱན་ སི་མོན་ཨིས་ཀ་རི་ཡོད་ག་ཟ་ ཡ་ཧུ་ད་ག་ཀོར་གེ་ གསུངས་མ་གི་ཝ༌ལ། ཉི་ཡ་ཧུ་ད་ཤོ་ རོག་ཏེ་སོང་ཉིག་ཙིང་གེ་ ཐུར་གི་ཝ་ཆོ་ཝ༌ལ༎

Currently Selected:

ཡུ་ཧན་ན། 6: TNTB

Highlight

Copy