ལུ་ཀ། 10
10
ཡི་ཤུ་གི་ རོག་ཏེ་ 72 ཕིས་ཀ་ཀུན་ཏི་ཝ༌ལ།
1ཨོ་ཐ་ཚི་ངེ་ གཙོ་བོ་གི་ བཱརའ་སློ་མ་ 72 ཀེན་ཐཱན་ རོག་བྱོན་མེ་གི་ལ་དག་ཁཱན་ ཁྲོམ་དང་ བཱརའ་ས་ཆ་ཁོན་ རོག་ཉིག་ཙིང་རེ་ ཉིག་ཙིང་རེ་ཨ་ཉི་ རོ་ཀེ་གུམ་གུམ་ ཀུན་ཏི་ཝ༌ལ། 2རོ་ཀི་ རོག་ཏེ་བ་ཀ་ གསུངས་མ་ལ་ ཐོག་རང་ཏ་ གནམ་མེད་ས་མེད་ ཚོ་ཝ༌ལ། དག་པ་ཀབ་ཉི་ ལའི་པ་ཉུང་པུ་ཤ༌ལ། ཨོ་ཉི་ཨ་དེན་གེ་ ཐོག་ག་གཙོ་བོ་ག་ ཐོག་དུང་མེ་དེན་གེ་ ལའི་པ་མང་པུ་གནང་ཤོ་ཨ་ཉི་ ཞུའི་དག༌ཉི། 3དི་ ཇི་གི་ ནའི་རོམ་བ་ཀ་པོང་ཀ་ ཤི་ཤ་ཀ་ཏོང་ ད་བུ་ཐུར་ཨ་ཉི་ ཀུན་ཏིན༌ཅ། 4ཏི་རུ་ པ་ཀོ་དང་ དོ་ཕ་ཙ་ ཉི་བི་དར་ཨོ་ཉ་བ་ མ་མེན༌ཤོ། ཉི་ལབ་ཀ་བུ་ ཨི་བི་ག་རང་ ཚང་མ་ཇིམ༌ཤོ།
5ཉི་ནའི་ ཕའི་ནང་ཀ་ནུ་ཕ་ཐུར་ ཨོ་ཐ་ཕའི་ག་ སྐྱིད་པུ་ཨུན་ཆེན་དག་ཉི་ ཡེག༌ཅོ། 6ཉི་སྐྱིད་པུ་ཞུ་ལེ་ རུང་པ་ག་སོ་ངོ་ ཨོ་ཉ་ཆོ་ནེ་ལ་ ན་ཧ་སྐྱིད་པུ་ རོ་ཀ་ཐུང་ཀ་ཆག༌པེ། ཉི་ཨུ་ཉུ་མ་ནེ་ལ་ སྐྱིད་པུ་ན་ཧ་ཏཱན་ལོག༌པེ། 7ཕའི་ཐུར་གེ་ཐུར་ག་ མ་དི་ལཱན་ ཕའི་ཐུར་ག་རང་ རོག་ཏེ་བ་ཀི་ ག་ཁཱན་ཁེ་པ་ ཟཱན་ཇམ་ཉི་ཆོའི། ཧང་ཡ་དག་ནེ་ལ་ ལའི་པ་གི་ ཉི་ལ་རིན་ཆོག༌པེ།
8ཉི་ནའི་ ཁྲོམ་ག་ནུ་ཕ་ཀབ་ཉི་ རོག་ཏེ་བ་ཀི་ ནའི་ཨོ་དོ་དག་ཉི་ར་ཉི་ ན་ཧ་གུབ་ཀ་ ཧང་ཀེ་བ་ཐུར་ཟའི། 9ནཱད་པ་བ་དྲག་ཐཱན་ རོག་ཏེ་བ་ཀ་ཡེག་ཅོ་ དཀོན་མཆོག་ག་རྒྱལ་སྲིད་ ན་ཧ་ར་ག་ ཏེམ་པ་ཅ་དག༌ཉི། 10དག་པ་ཀབ་ཉི་ ནའི་ཁྲོམ་ག་ནུ་ཕ་ཀབ་ཉི་ རོག་ཏེ་བ་ཀི་ མ་ཐོག་ནེ་ལ་ ཁྲོམ་ག་གཞུང་ལམ་ག་ དིན་ཐཱན་ 11ཨ་ཧ་བི་ཕརའ་ཁ་ཆེབ་ཁཱན་ ན་ཧ་ཁྲོམ་ག་ ས་ཕུར་ཙི་ཆང་ ཨ་ཤི་ཁཱན་གེམ༌ཅ། ཉི་དཀོན་མཆོག་ག་རྒྱལ་སྲིད་ ར་ག་ཕེབས་པ་ཨ་ཉི་ ཧ་གོའི་དག་ཉི་ ཡེག་ཅོ་ན། 12ཇི་གི་ ན་ཧ་ཡེག་པེ་ ཁྲིམས་ཅཱད་པེ་ནོང་ཀ་ ཨོ་ཉ་ཁྲོམ་གེ་ ས་དོམ་གི་ ཤ་མ་ཡང་པུ་ཉོང༌པེ༎
དད་པ་མ་ཨ་ཁཱན་ སོ་ངོ་བ་ཆོ་ཁཱན་ཁྲོམ༌བ།
13ཨའི་ ནཱན་ཁོ་ར་ཇིན་ག་ སོ་ངོ་བ་ ཨའི་ ནཱན་བེད་སེ་ད་ག་ སོ་ངོ་བ་ ན་ཧ་ལེ་ལ་ཇུང་ཁཱན་ ཤུགས་སྟོབས་ཆོ་ཝ་ག་ལའི་བ་ ཏྲུ་རོས་དང་སི་དོན་#10:13 གསུང་རབ་མཱན་མ་ག་གང་ཀ་ ཏྲུ་རོས་དང་སི་དོན་དག་ཁཱན་ཁྲོམ་ཤོ་ ལའི་ངན་པ་ཨ་ཁཱན་སོ་ངོ་བ་ཀི་ཕུང་མ་ཨ་དེན་གེ་ ཨིས་རེལ་ག་ལུང་བསྟན་པ་བ་ཀི་ ཨོ་ཐ་ཁྲོམ་ཉིག་ཙིང་ག་དགྲ་ཨ་ཉི་ ལུང་བསྟན་མ་ཆོ་ཝ༌ལ།ག་ ཇུང་མ་ཆོ་ནེ་ལ་ ཉ་ག་སོ་ངོ་བ་ཀི་ གི་ཚེ་གེ་ཤ་ སྡིག་པ་གེ་ལོག་པ་དག་ཉི་ གེན་མེ་དེན་གེ་ བོ་ར་ཕ་ཙ་ཡེན་ཐཱན་ ས་ཕུར་ཙི་ཐུང་ཀ་ ལང་མ་ཨོ་ཕེ། 14ཨོ་ཉེ་རང་གི་ནེ་བུ་ ཁྲིམས་ཅཱད་པེ་ནོང་ཀ་ ནཱན་གེ་ ཤ་མ་ཡང་པུ་ ཏྲུ་རོས་དང་ སི་དོན་གི་ཉོང༌པེ། 15དབའི་ ནཱན་ཀ་ཕར་ན་ཧུམ་ ནཱན་ཐོ་ལ་ ཞིང་ཁམས་ག་ ཤེག་པེ་དག་ཉི་སྨོ། མང་གི་ ནཱན་ཤོ་ དོང་དམྱལ་བ་ག་ ཇོང་མེ་ཁེ་ལེ་དག་ཉི་ གསུངས་མ༌ལ།
16ཉི་ཡི་ཤུ་གི་ རོ་ཀ་སློ་མ་བ་ཀ་ གསུངས་མ་ལ་ ན་ཤི་ཡེག་པ་ཉཱན་ཁཱན་གི་ ཇང་གེ་ ཉཱན་ཅ་གི༌ལ། ཉི་ནའི་ མ་ཐོག་ཁཱན་གི་ ཇང་ མ་ཐོག་ཅ་གི༌ལ། ཉི་ཇང་ མ་ཐོག་ཁཱན་གི་ ཇང་ཀུན་ཏི་ཁཱན་ མ་ཐོག་ཅ་གི་ལ་དག༌ཉི༎
རོག་ཏེ་ 72 ལོག་པ༌ལ།
17ཉི་རོག་ཏེ་ 72 ཤོ་ནང་ཕེ་ཝ་ལོག་ཐཱན་ གཙོ་བོ་ ན་ག་མཚན་ག་ དོན་བ་ཆང་ ཨ་ཧ་ཕརའ་ཁེ་ཚུད་པ་དག་ཉི་ ཞུ་ཝ༌ལ།
18ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཇི་གི་ བདུད་ཏང་ལེ་ཕ་པུརུས་ཀིན་ཨ་ཉི་ ཞིང་ཁམས་གེ་དོང་ ཕུད་ཉི་ཁེ་ཝ་ག་ ཐོང་མ་དག༌ཉི། 19ཉཱན་ཅོ་ ཇི་གི་ ནའི་རུ་གེ་ནང་དང་ སྡིག་པ་ར་ཟ་བ་ཀ་ཐུང་ཐུང་ དང་མེ་ག་ དབང་ཚད་དང་ ཉི་ན་ཧ་ དགྲ་བྱང་ཕིཤི་བ་ཀ་ཐུང་ཀེ་ དབང་ཚད་བི་ཝ༌ཅ། ན་ཧ་བ་ ཧང་གི་རང་ ཅོན་མེ་མར༌བ། 20ཨོ་ཉེ་རང་གི་ནེ་བུ་ རྣམ་ཤེས་བ་ ན་ཧ་ཕརའ་ཁེ་ཚུད་པ་དག་ཉི་ ཤོ་ནང་ཕེ་ལེ་མང་གི་ཝ་ ན་ཧ་མིང་ ཞིང་ཁམས་ག་ འབྲི་བ་ཨ་དེན་གེ་ ཤོ་ནང་ཕེ་ཉི་ ངལ་རངས་ཅོ་དག་ཉི་ གསུངས་མ༌ལ།
21ཉི་ཨོ་ཉ་དུས་ཙུན་ག་རང་ ཡི་ཤུ་ དམ་པའི་ཐུགས་ཉིད་གི་ཨ་ཉི་ ཐུགས་བཞེས་ཉི་ ཞིང་ཁམས་དང་ འཛམ་གླིང་ག་གཙོ་བོ་ ནཱན་གི་ ཨོ་ཐ་བ་ མཁས་པ་དང་ ཆོས་ཡོན་ཏན་ཆོ་ཁཱན་བ་ཀེ་ གུམ་ཐཱན་ ཝག་ཙ་ད་ཟ་བ་ཀ་ གནང་མ་ཨ་དེན་གེ་ ཇི་གི་ ན་ག་བཀའ་དྲིན་བསམ༌ཅ། ཨ་པ་ གི་ལ་ཨ་པ་ ཨུ་ཐུ་ད་བུ་རང་ ན་ག་ཐུགས་བཞེད་ཅ་དག་ཉི་ ཞུ་ཝ༌ལ།
22ཡི་ཤུ་གི་ རོ་ཀ་སློ་མ་བ་ཀ་ གསུངས་མ་ལ་ ཇ་ག་ཨ་པ་གི་ ཐམས་ཅན་རང་ ཇ་ག་གནང་མ༌ཅ། ཉི་ཨ་པ་ཐུར་གི་ མ་ཏོག་པ་ བཱརའ་ཨི་བི་གི་རང་ ཟ་ཨི་བི་གི་ལ་སྨོ་ མ་སེ༌ལ། ཉི་ཨ་པ་ ཨི་བི་གི་ལ་སྨོ་ ཟ་དང་ཟ་གི་གེན་མེ་ག་ སི་ཁཱན་བ་ཀི་ཤ་ མ་ཏོག་པ་ བཱརའ་ཨི་བི་གི་རང་ མ་སེ་ལ་དག༌ཉི།
23ཉི་རོག་ཏེ་བ་ཏེན་ བཞུགས་པེ་གང་ཀ་ རོ་ཀ་སློ་མ་བ་ཀ་ལོ་ཀ་ཏཱན་ གིར་ཐཱན་ ན་ཤི་ཐོང་ཁཱན་ཁེ་པ་ ཐོང་མེ་རེ་བ་ཨ་དེན་གེ་ ནའི་བྱིན་རླབས་ཅན་གི༌ལ། 24ཧང་ཡ་དག་ནེ་ལ་ ཇི་གི་ ན་ཧ་ཡེག་པེ་ ན་ཤི་ཐོང་ཁཱན་ཁེ་པ་ ལུང་བསྟན་པ་དང་ དཔོན་མང་པུ་ཐུར་གི་ གོད་པེ་ལ་མ་ཆོ༌ཝ། གོད་པེ་ག་མ་ཉོང་ཅི། ཉི་ན་ཤི་ཉཱན་ཁཱན་བ་ ཉཱན་པེ་ལ་མ་ཆོ༌ཝ། ཉཱན་པེ་ག་མ་ཉོང་ཅི་དག་ཉི་ གསུངས་མ༌ལ༎
ས་མ་རི་པ་ལེག་པུ་ག་ དཔེ་གཏམ།
25ཉི་བཀའ་ཁྲིམས་ག་ སློབ་དཔོན་ཐུར་གི་ རོ་ཀེ་རྒྱུགས་ལ་ལེ་དེན་གེ་ ག་ཐིང་ཐཱན་ སློབ་དཔོན་ ཚེ་མ་འགྱུར་བརྟན་པ་ ཉོང་པེ་དེན་གེ་ ཇི་གི་ ཧང་ཨ་ལེ་ཁེ་ལེ་ཡ་དག་ཉི་ ཞུ་ཝ༌ལ།
26ཡི་ཤུ་གི་ རོ་ཀ་གསུངས་མ་ལ་ བཀའ་ཁྲིམས་གེ་ ཧང་ཏེན་ཤོ་ན་ཡ། ནཱན་གི་ ཧང་ཏེན་ལྷག་ཅ་ཡ་དག༌ཉི།
27ཉི་རོ་ཀི་ལན་ཞུ་ཝ་ལ་ ནཱན་གི་ ན་ག་གཙོ་བོ་དཀོན་མཆོག་ ན་ག་ཐིང་ལོམ་དང་སྲོག་ ཉི་ཤུག་དང་སེམས་ ཐམས་ཅན་གི་ཨ་ཉི་ ཕང་པེ་ཁེ༌ལེ།#10:27 ཁྲིམས་ལུགས་ག་དཔེ་ཆ་ 6:5 ཉི་ནཱན་ནཱན་ཏེན་ ཕང་པ་པུརུས་ཀིན་ཨ་ཉི་ ན་ག་ནོག་མིན་བ་བུ་ ཕང་པེ་ཁེ་ལེ་#10:27 ལེ་ཝི་ག་དཔེ་ཆ་ 19:18 དག༌ཉི།
28རོ་ཀི་ རོ་ཀ་གསུངས་མ་ལ་ ནཱན་གི་ ལན་ཕྲིག་ཀིན་ག༌ཝ། ཉི་ནཱན་གི་ ཨོ་ཐ་བ་དང་ཏུ་ཉི་ཨའི། ཉི་ནཱན་གི་ ཚེ་མ་འགྱུར་བརྟན་པ་ཉོང་པེ་དག༌ཉི།
29དག་པ་ཀབ་ཉི་ རོ་ཀི་རོག་ཏེན་ དེན་མ་ཅོད་པེ་གོད་ཉི་ ཇ་ག་ནོག་མིན་ཤོ་ ཨི་བི་གི་ལ་ཡ་དག་ཉི་ ཞུ་ཝ༌ལ།
30ཡི་ཤུ་གི་ལན་གནང་ཉི་ གསུངས་མ་ལ་ ཡ་ཧུ་དི་པ་ཐུར་ ཡ་རུ་ཤ་ལེམ་གེ་དོང་ ཡ་རི་ཧོ་ག་ཏཱན་ དི་ལེ་གང་ཀ་ ཅོམ་ཁཱན་བ་ཀ་ ག་དང་ག་ཚུད་ཉི་ རོག་ཀོང་ཉི་ རོ་ཀ་ཁ་མུང་བ་ ཕེག་ཉི་བུན་ཐཱན་ ཤི་ལེ་མར་བ་ ཝུ་ལེ་མར་བ་ཅོད་ཐཱན་ ཇོང་ཐ་ཝ༌ལ།
31ཉི་བླ་མ་ཐུར་ ཨོ་ཉ་ལམ་གེ་ དི་ལ་ཀབ་ཉི་ རོག་ཐང་མ་ཐོང་ཉི་ ལམ་ལོག་ཐུར་གེ་ཀོར་ཉི་ དི་ཝ༌ལ། 32ཉི་ཨོམ་ཆང་ མི་རིགས་ལེ་ཝི་གེ་སོ་ངོ་ཐུར་ ཨོ་ཉ་ལམ་གེ་ དི་ལ་ཀབ་ཉི་ རོག་ཐང་མ་ཐོང་ཉི་ ལམ་ལོག་ཐུར་གེ་ ཀོར་ཉི་དི་ཝ༌ལ།
33ཉི་ཡ་ཧུ་དི་པ་ག་ དགྲ་བྱང་ཕིཤི་ ས་མ་རི་པ་ཐུར་ ཨོ་ཉ་ལམ་གེ་ དི་ལ་ཀབ་ཉི་ རོག་ཁྲ་པ༌ལ། རོ་ཀི་ རོག་ཐོང་མ་ཀབ་ཉི་ སྙིང་རྗེ་ཨ་ལེ་ཨོ་ཕ༌ལ། 34ཉི་རོག་ ནཱད་པ་ར་ག་དི་ཉི་ མ་ཁ་བ་ཀ་སི་དང་ ཞུ་སོག་ཐཱན་ བག་ཏང་གི་ཆོམ་ཉི་ ཉི་རོ་ཀ་བོང་བ་ཐུང་ཀ་ཀེ་ཉི་ མགྱོན་ཁྱིམ་ཟེ་མུ་ཐུར་ག་ བུན་ཐཱན་ རོ་ཀ་རུམ་པ༌ལ། 35ཉི་ནམ་ནིང་ད་བུ་ མགྱོན་ཁྱིམ་ཡོན་ད་ག་ ད་ཡང་ཉིག་ཙིང་བིན་ཐཱན་ བཱརའ་ཟད་འགྲོ་ཐེབ་ཏེ་ ཁེ་ཝ་ད་བུ་ཨ་ནེ་ལ་ ཇང་ལོག་པ་ཀབ་ཉི་བི་ལེ་ ནཱད་པ་ལེག་པཱན་ གོད་ཅོ་ན་དག་ཉི་ཡེག་ཐཱན་ དི་ཝ༌ལ།
36དྲོ་ཝཱན་པ་བ་ཀི་ཅོམ་ཁཱན་ སོ་ངོ་ག་ རོག་ཏེ་སམ་གེ་ ཨི་བི་གི་ ནོག་མིན་ད་བུ་ ཨ་ཝ་ལ་ཨ་ཉི་ ནཱན་གི་མི་ན་ཡ་དག་ཉི་ ཇི་མ་ཀབ་ཉི་ 37བཀའ་ཁྲིམས་ག་ སློབ་དཔོན་གི་ཞུ་ཝ་ལ་ རོ་ཀ་ཏཱན་སྙིང་རྗེ་ཨ་ཁཱན་གི་ རོ་ཀ་ནོག་མིན་ད་བུ་ ཨ་ཝ་ལ་དག༌ཉི།
ཡི་ཤུ་གི་ རོ་ཀ་ ནཱན་དིན་ཐཱན་ ན་ག་དགྲ་བྱང་ཕིཤི་བ་ཀ་བུ་ ཨུ་ཉུ་པུརུས་ཀིན་ཨ་ཉི་ ཕང་ཅོ་དག་ཉི་ གསུངས་མ༌ལ༎
མར་ཐ་དང་ མ་རི་ཡམ་ག་ཕའི་ག།
38ཉི་ཨོམ་ ཡི་ཤུ་དང་ རོ་ཀ་སློ་མ་བ་ ཡ་རུ་ཤ་ལེམ་ག་ཏཱན་ དི་ཝ་ག་ལམ་ཁོན་ ཅ་གི་ཝ༌ལ། ཉི་མེ་ཝག་ཙ་ མར་ཐ་དག་ཁཱན་ག་ དུང་ག་ཕེབས་ཉི་ མར་ཐ་གི་ གཙོ་བོ་ རོ་ཀ་ཕའི་ག་ཞུ་ཝ༌ལ། 39ཉི་རོ་ཀ་ན་ཉིང་ མ་རི་ཡམ་དག་ཁཱན་ཐུར་ ཅ་གི་ཝ༌ལ། ཉི་རོག་ གཙོ་བོ་ག་ ཞབས་ར་ག་ལང་ཉི་ རོ་ཀི་ཡེན་གནང་ཁཱན་ གསུང་ཉཱན་ཉི་ ཆོ་ཝ༌ལ། 40དག་པ་ཀབ་ཉི་ མར་ཐ་ཤོ་ ཕུལ་བེ་དྲང་མེ་ག་ མང་པུ་ཐུར་ཅམ་པེ་ ཁེ་ཝ་ཨ་དེན་གེ་ ཚ་གྱང་ཨ་ཝ༌ལ། ཉི་རོག་ ཡི་ཤུ་ག་ སྐུན་མདུན་ག་ཤེག་ཉི་ གཙོ་བོ་ ཇ་ག་ན་ཉིང་གི་ དྲང་མེ་ག་དེན་གེ་ ཇང་ཐུར་ཏེན་ ཐུབ་ཐ་ཝ་ག་ ནཱན་གི་ གཟིགས་པུ་མ་ལ་སྨོ། ཇ་ག་ལའི་རུམ་ཅོ་ཨ་ཉི་ རོ་ཀ་གསུངས་ཤོ་དག་ཉི་ ཞུ་ཝ༌ལ།
41དག་པ་ཀབ་ཉི་ གཙོ་བོ་གི་ རོ་ཀ་ལན་གནང་ཉི་ མར་ཐ་ མར་ཐ་ ནཱན་གི་སྡུག་བསྔལ་ཨ་ཉི་ མང་པུ་ཐུར་ག་ ཚ་གྱང་བང༌ལ། 42དག་པ་ཀབ་ཉི་ ཐུར་གི་དྲིག་པེ་ ཉི་ཁག་ཆི་ལུ་ཁེ་པ་ མ་རི་ཡམ་གི་ སི་ཝ༌ཅ། ཨུ་ཉུ་ རོ་ཀེ་རུ་ལེ་མར་བ་དག་ཉི་ གསུངས་མ༌ལ༎
Currently Selected:
ལུ་ཀ། 10: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
