ལུ་ཀ། 12
12
འུ་དྲ་པ་གེ་རིག་པ་སྒྲིམ་ཅོ་དག་ཉི་ ཡི་ཤུ་གི་གསུངས་མ༌ལ།
1ཉི་སོ་ངོ་བ་ སྟོང་ཕྲག་གེ་ཅཱད་ཉི་ ཏབ་ཐུར་ཛོམ་ཉི་ ཐུར་གི་ཐུར་ག་ ཟོབ་ཉི་རང་ བུན་ཅ་གི་ཝ༌ལ། ཉི་གོ་མ་རང་ ཡི་ཤུ་གི་ རོ་ཀ་སློ་མ་བ་ཀ་ གསུངས་མ་ལ་ ཕ་རི་སི་པ་བ་ཀ་བི་ཏོ་གེ་ རིག་པ་སྒྲིམ༌ཅོ། ཇི་གི་ཡེག་པེ་དེན་ཐ་ཤོ་ རོག་ཏེ་བ་ཀ་ འུ་དྲ་གི༌ལ། 2མ་ཐོང་མ་ཨ་ཉི་ གུམ་ཉི་ཐ་ལེ་རེ་ཁཱན་ ཧང་རང་མཱན༌ཅ། ཉི་མ་སེ་ཝ་ཨ་ཉི་ བུག་ཉི་ཐ་ལེ་རེ་ཁཱན་བུ་ ཧང་རང་མཱན༌ཅ། 3ན་ཤི་ མེར་བུ་ནང་ཀ་ ཡེག་ཁཱན་ཁེ་པ་ འོད་ཟེར་ནང་ཀ་ ན་ཐ༌ལེ། ཉི་ན་ཤི་ ཕའི་ནང་ཀ་ སོ་ངོ་ག་ན་ག་ཏཱན་ ས་བ་སུ་བུ་ཨ་ཉི་ ཡེག་ཁཱན་ཁེ་པ་ ཕའི་ཐུང་ཁོན་དིན་ཐཱན་ཀཱད༌པེ།
ཨི་བི་གེ་ ཡོང་ཁེ་ལེ་ ཁེ་ལེ་ཡ།
4ཇི་གི་ ན་ཧ་ཡེག་པེ་ ཇ་ག་ཇ་རོ་བ་ ལུས་པུ་ཤེ་ཁཱན་གེ་ ཡོང་མ་ཁེ། ཉི་ཤེ་ཉི་ཆུམ་དེན་གེ་ལ་ ད་ཤི་ཧང་རང་ ཨ་ལེ་མར༌བ། 5དག་པ་ཀབ་ཉི་ ནའི་ ཨི་བི་གེ་ ཡོང་ཁེ་ལེ་གི་ལ་སྨོ་ ཇི་གི་ ན་ཧ་ཡེག་པེ་ ཤེ་ཉི་ཆུམ་དེན་གེ་ དམྱལ་བ་ག་ཀུན་ཏི་ལེ་ག་ དབང་ཚད་ཆོ་ཁཱན་ དཀོན་མཆོག་གེ་ཡོང་ཁེ། གི་ལ་ ཇི་གི་ ན་ཧ་ཡེག་པེ་ རོ་ཀེ་ཡོང་ཁེ།
6ཆུ་ཁ་ལྔ་ག་ ཤི་ཀི་ཉིག་ཙིང་ཨ་ཉི་ མ་ཙོང་ཤི་སྨོ། ཉི་ཆུ་ཁ་ལྔ་གེ་ ཐུར་བུ་ དཀོན་མཆོག་གི་ ཡིད་ཀ་མི་ཝ་མཱན༌ཅ། 7ན་ཧ་ཤ་རང་ག་ ཚམ་ཆང་དྲང་ཨ་ཉི་ ཆུ་མ༌ཅ། ཨོ་ཉི་ཨ་དེན་གེ་ ཡོང་མ་ཁེ། ནའི་ཏ་ ཆུ་ཁ་མང་པུ་ཐུར་གེ་ལག་པ་ ཁག་ཆི་ལུ་གི༌ལ༎
སོ་ངོ་བ་ཀ་གུབ་ཀ་ ཡི་ཤུ་ཀོར་གེ་ཁ་དོག༌ཅོ།
8ཉི་ཇི་གི་ ན་ཧ་ཡེག་པེ་ སོ་ངོ་བ་ཀ་གུབ་ཀ་ ཇང་ ན་ཧ་གཙོ་བོ་གི་ལ་དག་ཉི་ ཡེག་ནེ་ལ་ སོ་ངོ་ག་ཟ་གི་བུ་ དཀོན་མཆོག་ག་ ཞིང་ཁམས་ག་འཐེན་པ་བ་ཀ་གུབ་ཀ་ རོག་ ཇ་ག་གི་ལ་དག་ཉི་ ཡེག༌པེ། 9དག་པ་ཀབ་ཉི་ སོ་ངོ་བ་ཀ་གུབ་ཀ་ ཇང་ རོ་ཀ་གཙོ་བོ་མང་གི་དག་ཉི་ ཡེག་ནེ་ལ་ ཇི་གི་བུ་ དཀོན་མཆོག་ག་ ཞིང་ཁམས་ག་འཐེན་པ་བ་ཀ་གུབ་ཀ་ རོག་ ཇ་ག་མང་གི་དག་ཉི་ ཡེག༌པེ། 10ཉི་སོ་ངོ་ག་ཟ་ག་ མ་ལེག་པ་ཡེག་ཁཱན་ ཐམས་ཅན་རང་ བཀའ་དྲིན་བསྐྱང༌མེ། དག་པ་ཀབ་ཉི་ དམ་པའི་ཐུགས་ཉིད་ག་ སྐུར་པ་ཞུ་ཁཱན་གི་ནེ་ལ་ བཀའ་དྲིན་མ་བསྐྱང༌མ།
11ཉི་ནའི་ རོག་ཏེ་བ་ཀི་ ཡ་ཧུ་དི་པ་ ཆོས་འཛོམས་དང་ ཁཱད་ཀེ་དབང་ཁཱན་ ཉི་དབང་ཚད་ཙུང་ཁཱན་བ་ཀ་གུབ་ཀ་ ཀེ་བ་ཀབ་ཉི་ ཧང་ཡེག་པེ་གི་ས་ ཉི་ལན་ ཧང་བི་ལེ་གི་ས་དག་ཉི་ སྡུག་བསྔལ་མ་ཨའི། 12ཧང་ཡ་དག་ནེ་ལ་ ཨུ་ཉུ་གང་ཀ་ ན་ཤི་ ཧང་ཡེག་པེ་ཁེ་ལེ་གི་ལ་སྨོ་ དམ་པའི་ཐུགས་ཉིད་གི་ ཡེ་ཉི་གནང་མེ་དག་ཉི་ གསུངས་མ༌ལ༎
བེ་དིང་ཡོང་བ་ག་དཔེ་གཏམ།
13སོ་ངོ་བ་ཀ་པོང་ཀེ་ ཐུར་གི་ཞུ་ཝ་ལ་ སློབ་དཔོན་ ཇ་ག་ཐོབ་ཐང་ཅ་ལ་བ་ ཇང་ཀབ་ཉི་བོང་ཤོ་ཨ་ཉི་ ཇ་ག་ཨ་ཏ་ག་ གསུངས་ཤོ་དག༌ཉི།
14དག་པ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ཇ་རོ་ ཇང་ ན་ག་ཅ་ལ་བོང་ཁཱན་ དྲང་དཔོན་ ཨི་བི་གི་ཅོད་པ་ཡ་དག༌ཉི། 15ཉི་རོ་ཀི་ རོག་ཏེ་བ་ཀ་ གསུངས་མ་ལ་ རིག་པ་སྒྲིམ་ཅོ་ ཧང་ག་རང་གི་ནེ་བུ་ འདོད་པུ་ཆི་ལུ་ཨ་ལེ་མང་ཕ། ཧང་ཡ་དག་ནེ་ལ་ རྒྱུ་ནོར་ལོངས་སྤྱོད་ཤོ་ སོ་ངོ་ག་ ཚེ་ངོ་མ་མང་གི་དག༌ཉི།
16རོ་ཀི་ རོག་ཏེ་བ་ཀ་ དཔེ་གཏམ་ག་ཐུང་ཀེ་ཨ་ཉི་ གསུངས་མ་ལ་ བེ་དིང་སོ་ངོ་ཐུར་ག་ ས་གེ་ཐོག་ གནམ་མེད་ས་མེད་ ཚོ་ཝ༌ལ། 17ཉི་རོག་ རོག་ཏེན་གི་ མི་ཝ་ལ་ ཇི་གི་ ཧང་ཤ་ཨ་ལེ་ཡ། ཉི་ཇ་ག་ བུ་དང་ཐ་ལེ་བཱརང་རང་ མ་ལ་དག༌ཉི། 18རོ་ཀི་ཡེག་པ་ལ་ ཇི་གི་ཨོ་ཐེན་ཨ་ལེ་ ཇ་ག་བུ་དང་ཕའི་ཤིག་ཐཱན་ སེང་པེ་ཁེ་ལེ༌ལ། ཉི་ཨོ་ཉ་ག་ ཇི་གི་ ཇ་ག་བུ་དང་དང་ ཅ་ལ་བ་སག་ཉི་ཐ༌ལེ། 19ཉི་ཇི་གི་ ཇང་ ཇང་ཏེན་ག་ཡེག་པེ་ སྲོག་ ནཱན་གི་ཉིང་མང་པུ་ཐུར་ ལང་པེ་ག་རྒྱུ་སག་ཉི་ ཐ་ཝ༌ལ། ཨོ་ཉི་ཨ་དེན་གེ་ ནཱན་སྐྱིད་པུ་ཨ་ཉི་ ཟཱན་ཇམ་ཉི་ སྤྲོ་བ་ཤོ་ཉི་ཆོའི་ན་དག༌ཉི།
20དག་པ་ཀབ་ཉི་ དཀོན་མཆོག་གི་ རོ་ཀ་གསུངས་མ་ལ་ ཡོང་བ་ ཐི་ནོང་བི་ནང་ག་ ནཱན་ཤི༌ལེ། ཉི་ནཱན་གི་སག་ཁཱན་རྒྱུ་བ་ ཨི་བི་ག་དེན་གེ་ ཐ་ལེ་ཡ་དག༌ཉི།
21ཉི་རང་ཏེན་ག་དེན་གེ་ རྒྱུ་སག་ཉི་ དག་པ་ཀབ་ཉི་ དཀོན་མཆོག་ག་སྤྱན་ག་ བེ་དིང་མང་གི་ཁཱན་ སོ་ངོ་ག་ཐུང་ཀ་ཤོ་ ཨུ་ཉུ་ད་བུ་རང་ ཇུང་མེ་དག་ཉི་ ཡི་ཤུ་གི་གསུངས་མ༌ལ༎
ཚ་གྱང་མ་ཨའི།
22ཉི་རོ་ཀི་ རོ་ཀ་སློ་མ་བ་ཀ་ གསུངས་མ་ལ་ ཨོ་ཉི་ཨ་དེན་གེ་ ཇི་གི་ ན་ཧ་ཡེག་ཅ་ ཟ་ལེ་དེན་གེ་དང་ ལུས་པུ་དེན་གེ་ ཧང་ཡེ་ལེ་གི་ས་དག་ཉི་ ན་ཧ་ཚེ་ག་ ཚ་གྱང་མ་ལང༌ཅོ། 23ཧང་ཡ་དག་ནེ་ལ་ ཚེ་ཤོ་ ཟཱན་ཇམ་གེ་ལག་པ་ ཁག་ཆི་ལུ་མང་གི་སྨོ། ཉི་ལུས་པུ་ཤོ་ ཁ་མུང་ས་རི་གེ་ལག་པ་ ཁག་ཆི་ལུ་གི༌ལ། 24ཁ་བ་ཀ་གོད་ཅོ་ལེ་ རོག་ཏེ་བ་ ཐོག་ཡ་ཕུ་མཱན་ཅ་ ཉི་དུང་མུ་བུ་མཱན༌ཅ། ཉི་བུ་དང་ཕའི་ག་གོ་ཉི་ རུང་ནང་ཀ་བུ་ སག་པུ་མཱན༌ཅ། ཨོ་ཉེ་རང་གི་ནེ་བུ་ དཀོན་མཆོག་གི་ རོག་ཏེ་བ་སིང༌ལ། ཉི་ནའི་ཏ་ ཁ་གེ་ ཧབ་ཏུར་ ཁག་ཆི་ལུ་ཡ། 25ཉི་ཚ་གྱང་ལང་པ་ཀབ་ཉི་ ནའི་ ཨི་བི་གི་ ཚེ་ད་སུར་རིང་མུ་ ཅོད་པེ་རེ་བེ་ཡ། 26ཉི་ཨུ་ཉུ་ད་བུ་ ལའི་ཟེ་མུ་ཐུར་བུ་ ཨ་ལེ་མར་ནེ་ལ་ བཱརའ་ཀོར་གེ་ ནའི་ ཧང་ཨ་ཉི་ ཚ་གྱང་ཨན་ཅ་ཡ།
27མོམ་ནང་ ཧང་ཏེན་ལིག་ལ་སྨོ་ གོད་ཅོ༌ལེ། རོག་ཏེ་བ་ ལའི་ཨ་ལུ་མ་ལ་ ཁ་མུང་ས་རི་བུ་ ན་མུ་མ༌ལ། ཇི་གི་ ན་ཧ་ཡེག་པེ་ ཨོ་ཉེ་རང་གི་ནེ་བུ་ སོ་ལོ་མོན་ ཨོམ་ཏུར་ བེ་དིང་ཆོན་ཐཱན་རང་གི་ནེ་བུ་ རོ་ཀ་ཁ་མུང་བ་ ཨོ་ཉ་མོམ་ནང་བ་ཀ་པོང་ཀེ་ ཐུར་ད་བུ་ཆང་ ཅེམ་པུ་མཱན་ཆི། 28ས་གེ་ ཐི་ནོང་ད་བུ་ལིག་ཉི་ ནམ་ནིང་མི་ག་གོག་ཁཱན་ ངོན་ག་ཆང་ དཀོན་མཆོག་གི་ ཁ་མུང་ཡེ་ཉི་གནང་ནེ་ལ་ རོ་ཀི་ ན་ཧ་ཏ་ ཁ་མུང་ས་རི་ ཧབ་ཏུར་མང་པུ་གནང་མེ་ཡ། དབའི་ དད་པ་ཟེ་མུ་ཆོ་ཁཱན་ སོ་ངོ༌བ།
29ཉི་ཧང་ཟ་ལེ་ཡ་ ཧང་ཇ་མེ་ཡ་དག་ཉི་ ན་ཧ་སེམས་ཀ་མི་ཉི་ ཚ་གྱང་མ་ལང༌ཅོ། 30ཧང་ཡ་དག་ནེ་ལ་ དཀོན་མཆོག་ག་ དད་པ་མ་ཨ་ཁཱན་ འཛམ་གླིང་སོ་ངོ་བ་ ཐམས་ཅན་གི་ ཨོ་ཐ་བ་ལམ༌ཅ། ཉི་ནའི་བུ་ ཨོ་ཐ་བ་ཚཱས་པེ་དག་ཉི་ ན་ཧ་ཨ་པ་གི་མཁྱེན༌ཅ། 31ཉི་ཏ་ རོ་ཀ་རྒྱལ་སྲིད་ལམ་ཤོ་ ཉི་ཨོ་ཐ་བ་བུ་ ན་ཧ་རི༌ལེ༎
རྒྱུ་ནོར་ལོངས་སྤྱོད་ ཞིང་ཁམས་ག་སག༌ཅོ།
32ཡོང་མ་ཁེ་ ཆུ་ད་ཟ། ཧང་ཡ་དག་ནེ་ལ་ རྒྱལ་སྲིད་ ན་ཧ་གནང་མེ་ག་ ན་ཧ་ཨ་པ་ག་ ཐུགས་བཞེད་གི༌ལ།
33ན་ཧ་རྒྱུ་ནོར་ལོངས་སྤྱོད་བ་ ཙོང་ཐཱན་ སྦྱིན་པ་ཕི་ཉི་ ནའི་ཏེན་ག་དེན་གེ་ ཧ་ལ་རང་ མཱན་མ་མ་རི་ཁཱན་ པ་ཀོ་ཅོད་ཐཱན་ ཧ་ལ་རང་མ་ཡེ་ཁཱན་ རྒྱུ་ཞིང་ཁམས་ག་སག༌ཅོ། ཧང་ཡ་དག་ནེ་ལ་ ཞིང་ཁམས་ག་ དྲོ་ཝཱན་པ་ཤེག་པེ་མར་བ་ ཉི་བུ་གི་བུ་མ་ཅོན༌མ། 34ཧང་ཡ་དག་ནེ་ལ་ ན་ཧ་རྒྱུ་ ཨོ་ག་ཆོ་ཝ་ཐུར་ ན་ཧ་སེམས་ ཨོ་ཉ་ག་རང་ཨོ་ཕེ༎
རིག་པ་སྒྲིམ་ཉི་གོད༌ཅོ།
35ཉི་ནའི་ ཧ་ལ་རང་གི་ནེ་བུ་ ཁ་མུང་ཡེ་ཉི་ ན་ཧ་ ལ་ཝང་ཐོག་ཉི་ཆོའི། 36ཉི་སྦྱིན་བདག་ གཉེན་ཕི་ས་ག་ མཛར་ཅུམ་གེ་ ལོག་པ་ཀབ་ཉི་ སྦྱིན་བདག་གི་ ཀོ་ཚ་ཕ་ཐུར་ག་རང་ ཀོ་ཕེག་པེ་དེན་གེ་ གྲ་སྒྲིག་ཨ་ཉི་ཆོ་ཁཱན་ གཡོག་པ་ད་བུ་ཨ་ཉི་ཆོའི། 37སྦྱིན་བདག་ལོག་པེ་གང་ཀ་ མ་ཡི་ཕཱན་ཆོ་ཝ་ཁྲབ་ཁཱན་ གཡོག་པ་བ་ ཧབ་ཏུར་ཤོ་ནང་ཕེ་ལེ་ཡ། ཇི་གི་ ན་ཧ་ཐྲང་ཉི་ཡེག་པེ་ སྦྱིན་བདག་ རོག་ཏེན་གི་ ས་རི་ཡོག་ཐཱན་ རོག་ཏེ་བ་ ལང་མེ་བི་ཉི་ ཉི་རོ་ཀི་རང་ རོག་ཏེ་བ་ཀ་ དྲང༌མེ། 38རོག་ཡང་ན་ལ་ བི་ནང་དོ་ག་ཏེ་ ཤེག་ཏུ། ཉི་ཕྲིག་ཀིན་ཅམ་ཉི་ཆོ་ཁཱན་ གཡོག་པ་བ་ ཧབ་ཏུར་ཤོ་ནང་ཕེ་ལེ་ཡ།
39དག་པ་ཀབ་ཉི་ ཨུ་ཐུ་ཧ་གོའི་ ཕའི་ཡོན་ད་གི་ དྲོ་ཝཱན་པ་ ཆུ་ཚོད་ཨོབ་ཏུར་ག་ ཨོ་ཕེ་གི་ལ་དག་ཉི་ སེ་ཝ་ཆོ་ནེ་ལ་ རོ་ཀ་ཕའི་ཕོག་ཉི་ ནང་ཀ་ཨོ་ཕེ་མ་བི་ལེ་དེན་གེ་ རོག་མ་ཡི་ཕཱན་ ཕའི་ཁུང་ཉི་ཆོ་ལེ་ཆོ༌ཝ། 40ནའི་བུ་ གྲ་སྒྲིག་ཨ་ཉི་ ཆོ་ལེ་ཁེ༌ལེ། ཧང་ཡ་དག་ནེ་ལ་ ན་ཤི་ མ་མི་ལ་ཀབ་ཉི་ སོ་ངོ་ག་ཟ་ ཨོ་ཕེ་ན་དག་ཉི་ གསུངས་མ༌ལ༎
དམ་ཚིག་ཙུང་ཁཱན་དང་ མ་ཙུང་ཁཱན་གཡོག༌པ།
41པ་ཏྲུས་གི་ གཙོ་བོ་ ནཱན་གི་ ཨོ་ཐ་དཔེ་གཏམ་ཤོ་ ཨ་ཧ་དེན་གེ་ གསུངས་ཅ་སྨོ་ ཐམས་ཅན་ག་དེན་གེ་ གསུངས་ཅ་ཡ་དག་ཉི་ ཞུ་ཝ༌ལ།
42གཙོ་བོ་གི་ གསུངས་མ་ལ་ བཱརའ་གཡོག་པ་བ་ཀ་ ཐོབ་ཐང་ལྟོ་ཁེ་པ་ དུས་ཙུན་ཕྲིག་ཀིན་ རེན་པ་ཀབ་ཉི་ བི་ན་དག་ཉི་ སྦྱིན་བདག་གི་ རོ་ཀ་ཕའི་ཙུང་མེ་བི་ཁཱན་ དམ་ཚིག་ཙུང་ཉི་ ལའི་ཨ་ཁཱན་ མཁས་པ་གཉེར་པ་ ཨི་བི་གི་ལ་ཡ། 43སྦྱིན་བདག་ ལོག་པ་ཀབ་ཉི་ ཨོ་ཐ་བ་ ཕྲིག་ཀིན་ཨ་ཉི་ ཆོ་ཝ་ཁྲབ་ཁཱན་ ཨོ་ཉ་གཡོག་པ་ཁེ་པ་ ཧབ་ཏུར་ཤོ་ནང་ཕེ་ལེ་ཡ། 44ཇི་གི་ ན་ཧ་ཐྲང་ཉི་ཡེག་པེ་ སྦྱིན་བདག་གི་ རོག་ རོ་ཀ་རྒྱུ་ཐམས་ཅན་ བདག་འཛིན་ཨ་ཁཱན་ ཅོད༌པེ། 45དག་པ་ཀབ་ཉི་ ཨོ་ཉ་གཡོག་པ་གི་ སྦྱིན་བདག་ ཨོ་ཕེ་ག་ ད་སུར་ཕིད་པེ་དག་ཉི་མི་ཉི་ རོ་ཀ་ཕརའ་ཁེ་ཆོ་ཁཱན་ གཡོག་པ་གཡོག་མིན་དག་པེ་མ་ཝ་ ཀོང་མེ་གོ་ཙུག་ཉི་ ཟ་ཉི་ཇམ་ཉི་ ཞུ་སུང་ཁུ་ཉི་ཆོ་ནེ་ལ་ 46རོ་ཀི་ ཇ་ག་སྦྱིན་བདག་ མ་ཤེག་པ་དག་ཉི་ མི་ཝ་ནོང་ཀ་རང་ རོ་ཀ་སྦྱིན་བདག་ཤེག༌པེ། ཉི་རོ་ཀི་མ་སེ་ཁཱན་ ཆུ་ཚོད་ག་ཤེག་ཉི་ ཁྲིམས་ཀེན་ཐཱན་ དམ་ཚིག་མ་ཙུང་ཁཱན་ གཡོག་པ་བ་ཀབ་ཉི་ཐ༌ལེ།
47ཉི་སྦྱིན་བདག་ག་ ཐུགས་བཞེད་སེན་ཐཱན་རང་ ཕྲིག་ཀིན་ཨ་ཉི་ མ་ཅམ་ཁཱན་ ཨུ་ཉུ་དང་ཏུ་ཉི་མ་ཨ་ཁཱན་ ཨོ་ཉ་གཡོག་པ་གི་ ཏེ་ཐ་ཤུག་ཨ་ཉི་ཉོང༌པེ། 48དག་པ་ཀབ་ཉི་ མ་སེ་ལཱན་ ཏེ་ཐ་ཉོང་པེ་ག་ལའི་ཨ་ཁཱན་ གཡོག་པ་བ་ཀི་ ཏེ་ཐ་ཉུང་པུ་ཉོང༌པེ། མང་པུ་བི་ཁཱན་གེ་ ཐམས་ཅན་གེ་ རྩིས་བུ་མང་པུ་ལ༌ལེ། ཉི་མང་པུ་སྤྲོད་ཁཱན་བ་ཀེ་ ལག་ཏང་ མང་པུ་ལ༌ལེ༎
སྐྱིད་པུ་ཕ་ལེ་མང་གི་ཝ་ བོང་མེ་ག་ ཨོ་ཕ་གི༌ལ།
49ཇང་ འཛམ་གླིང་མི་ཕི་ལེ་དེན་གེ་ ཨོ་ཕ་གི༌ལ། ཉི་མི་ གི་ཚེ་གེ་ཤ་ དིར་པ་གི་ནེ་ལ་ དྲིག་པེ་ཆོ༌ཝ། 50ཇི་གི་ལ་ལེ་ཁེ་ཝ་ག་ ཇ་ག་ཁྲུས་གསོར་ཐུར༌ཅ། ཉི་ཨུ་ཉུ་མ་ཇུང་མ་སག་པུ་ ཇང་ཧབ་ཏུར་ དབུགས་འགམ་པེ་ཡ། 51ཧང་ན་ཤི་ ཇང་འཛམ་གླིང་ག་ སྐྱིད་པུ་ཕ་ལེ་དེན་གེ་ ཨོ་ཕ་ད་བུ་ཐོང་ལ་སྨོ། མང་གི་ ཇི་གི་ ན་ཧ་ཡེག་པེ་ ཇང་ཤོ་ བོང་མེ་དེན་གེ་ ཨོ་ཕ་གི༌ལ། 52ཧང་ཡ་དག་ནེ་ལ་ ཨོ་ཐ་གེ་ག་ཏཱན་ ཕའི་ནང་ཐུར་ག་ བོང་ཐཱན་ ལྔ་རི༌ལེ། སམ་གི་ ཉིག་ཙིང་ག་ དགྲ་ཨ༌ལེ། ཉི་ཉིག་ཙིང་གི་ སམ་ག་དགྲ་ཨ༌ལེ།
53རོག་ཏེ་བ་བོང་མེ་ ཨ་པ་གི་ཟ་ག་ ཟ་གི་ཨ་པ་ག་ དགྲ་ཨ༌ལེ། ཨ་མ་གི་ཟ་མིན་ག་ ཉི་ཟ་མིན་གི་ཨ་མ་ག་ དགྲ་ཨ༌ལེ། ཉི་ཨ་ཉི་གི་ཆི་མིན་ག་ ཆི་མིན་གི་ཨ་ཉི་ག་ དགྲ་ཨ་ལེ་#12:53 མི་ཀ་ག་དཔེ་ཆ་ 7:6 དག༌ཉི་
གསུངས་མ༌ལ༎
དུས་ཙུན་ཀོར་གེ་གསུངས་མ༌ལ།
54ཉི་རོ་ཀི་ སོ་ངོ་བ་ཀ་ གསུངས་མ་ལ་ ཐ་རྒྱལ་ཁབ་ག་ ནུབ་ཕྱོགས་ལོ་ཀ་ མུག་པ་སུ་ཕ་ ཐོང་མ་ཀབ་ཉི་ ན་ཤི་ཡེག་ཅ་ ངམ་སུ་ ཁེ་ལེ་གི་ཝ་ལ་དག༌ཉི། ཉི་ངམ་སུ་ ཁེ་ལུ་བུ་ཁེན༌ཅ། 55ཉི་ལྷོ་གེ་ རི་དི་ཨོ་ཕ་ཀབ་ཉི་ ན་ཤི་ཡེག་ཅ་ དྲེ་ཏག་པེ་གི་ལ་དག་ཉི་ ཉི་ཨུ་ཉུ་བུ་ཇུང༌ཅ། 56ནའི་འུ་དྲ་པ་བ་ ན་ཤི་འཛམ་གླིང་དང་ ངབ་ཀ་གོད་ཉི་ ཧང་ཇུང་མེ་གི་ལ་སྨོ་ ཡེག་པེ་རེ༌ལ། དག་པ་ཀབ་ཉི་ ཨོ་མ་ཇུང་ཁཱན་ག་གོད་ཉི་ དེན་ཐ་ཁྲེ་བེ་ ཧང་ཨ་ཉི་མར་ཅ་ཡ༎
དགྲ་བྱང་ཕིཤི་ཀབ་ཉི་དྲིག༌ཅོ།
57ལེག་པུ་ཧང་གི་ལ་སྨོ་ ནའི་ནའི་ཏེན་གི་ ཧང་ཨ་ཉི་ ཐག་གཅཱད་པུ་མཱན་ཅ་ཡ། 58ན་ཧ་རྩིས་ཞུ་པ་གི་ དྲང་དཔོན་ག་གུབ་ཀ་ རྩིས་ཞུ་ཕིད་པེ་ག་ བུ་ལ་ཀབ་ཉི་ ལམ་བར་ཀ་རང་ ནང་དྲིག་པེ་ གོད་པ་དྲག༌པེ། ཨུ་ཉུ་མ་ནེ་ལ་ རོ་ཀི་ ནཱན་ཁྲིམས་ཁང་ག་ཀེ་ཉི་ དྲང་དཔོན་གི་ཨ་ཉི་ ཁྲིམས་སྲུང་ག་སྤྲོད་ཉི་ ནཱན་བཙོན་ག་ཙུག༌པེ། 59ཇི་གི་ ན་ཧ་ཡེག་པེ་ ཏི་རུ་ ཐམས་ཅན་རང་ ཚང་པ་ཨ་ཉི་ མ་ཏ་པ་སག་པུ་ བཙོན་གེ་ཤོ་ལེ་ རང་དབང་མང་ཕ་ན་དག་ཉི་ གསུངས་མ༌ལ༎
Currently Selected:
ལུ་ཀ། 12: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
