ལུ་ཀ། 23

ཡི་ཤུ་ པི་ལ་ཏཱས་ག་སྐུན་མདུན་ག་ཀེ་བ༌ལ།

1ཉི་རོག་ཏེ་ ཚོགས་པ་བ་ ཐམས་ཅན་རང་ ཐིང་ཉི་ ཉི་རོག་ རོ་མི་ག་དཔོན་སློབ་པི་ལ་ཏཱས་ག་སྐུན་མདུན་ག་ ཀེ་བ༌ལ། 2ཉི་རོག་ཏེ་བ་ཀི་ རོ་ཀ་མ་ལེག་པ་ཡེག་པེ་ གོ་ཙུག་ཉི་ ཨོ་ཐེན་ཡེག་པ་ལ་ ཨོ་ཐ་སོ་ངོ་གི་ ཨ་ཧ་སོ་ངོ་བ་ཀ་ མང་གི་ཝ་ག་ཡེན་བི་ཉི་ དཔོན་ཀའི་སར་ག་ ཁྲལ་མ་ཏབ་ཅོ་ཨ་ཉི་ཡེག༌ལ། ཉི་རོག་ རོག་ཏེན་རང་ དཔོན་ཁིརིས་གི་ལ་ཨ་ཉི་ ཡེག་པ་ག་ ཨ་ཤི་ཐོང་མ་དག༌ཉི།

3ཉི་པི་ལ་ཏཱས་གི་ རོ་ཀ་ ནཱན་ཡ་ཧུ་དི་པ་ག་ དཔོན་གི་ལ་སྨོ་དག་ཉི་ ཇི་མ་ཀབ་ཉི་ ནཱན་ནཱན་ཏེན་གི་རང་ ཡེག་ལ་དག་ཉི་ ཡི་ཤུ་གི་ལན་གནང་མ༌ལ།

4ཉི་པི་ལ་ཏཱས་གི་ བླ་མ་ཆི་ལུ་བ་དང་ སོ་ངོ་བ་ཀ་གསུངས་མ་ལ་ ཇི་གི་ ཨོ་ཐ་སོ་ངོ་གི་ངཱད་པ་ག་ ཐོང་མུ་མ་ལ་དག༌ཉི།

5དག་པ་ཀབ་ཉི་ རོག་ཏེ་བ་ཀི་ ཡེག་པུ་ཡེག་ས་རང་ ཐ་ཝ༌ལ། རོ་ཀི་ག་ལིལ་གེ་ གོ་ཙུག་ཉི་ ཡ་ཧུ་དི་ཡ་ ཐམས་ཅན་རང་ཆ༌པ། ཉི་ཐ་སག་པུ་ ཤེག་པ༌ཅ། རོ་ཀི་སོ་ངོ་བ་ ཏྲོག་ཉི་ཆུ་མ་དག༌ཉི༎

ཡི་ཤུ་ ཧེ་རོད་ག་སྐུན་མདུན་ག་ ཀེ་བ༌ལ།

6ཉི་པི་ལ་ཏཱས་གི་ ཨུ་ཉུ་ད་བུ་ ན་ཐ་ལ་ཀབ་ཉི་ ཨོ་ཐ་སོ་ངོ་ ག་ལིལ་པ་གི་ལ་སྨོ་དག་ཉི་ ཇི་མ༌ལ། 7ཉི་རོ་ཀི་ ཡི་ཤུ་ ཧེ་རོད་ག་ཆ་འོག་ཕརའ་ཁེ་ གི་ཝ་ལ་ཨ་ཉི་ མཁྱེན་དེན་གེ་ ཡི་ཤུ་ ཧེ་རོད་ག་སྐུན་མདུན་ག་ཏཱན་ ཀུན་ཏི་ཝ༌ལ། ཨུ་ཉུ་གང་ཀ་ ཧེ་རོད་རོག་ཏེན་བུ་ ཡ་རུ་ཤ་ལེམ་ག་རང་ ཅ་གི་ཝ༌ལ།

8ཉི་ཧེ་རོད་གི་ ཡི་ཤུ་མཇལ་བ་ཀབ་ཉི་ རོག་གནམ་མེད་ས་མེད་ ཐུགས་བཞེས་ཝ༌ལ། ཧང་ཡ་དག་ནེ་ལ་ རོ་ཀི་ ཡི་ཤུ་ག་ཀོར་གེ་ གོ་མ་གེ་རང་ ན་ཐ་ཝ་ཨ་དེན་གེ་ ཡི་ཤུ་གི་མཛད་ཁཱན་རྫུ་འཕྲུལ་ གོད་པེ་ག་རེ་ཆ་ ཆི་ལུ་ཅ་གི་ཝ༌ལ། 9ཨོ་ཉི་ཨ་དེན་གེ་ རོ་ཀི་ ཡི་ཤུ་ག་ དྲི་ཝ་ཤ་མ་ཨ་ཝ༌ལ། དག་པ་ཀབ་ཉི་ ཡི་ཤུ་གི་ རོ་ཀ་ལན་ཐུར་རང་ མ་གནང་མ༌ལ། 10ཉི་ཨོ་ཉ་ཐིང་ཁཱན་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ཀི་ ཆཱས་ཀག་ཏར་ཨ་ཉི་ མ་ལེག་པ་ཡེག་ཉི་ རོ་ཀ་ཅོན་ཏག་པ༌ལ། 11ཉི་ཧེ་རོད་དང་ཏབ་ཐུར་ག་ རོ་ཀ་དམག་མི་བ་ཀི་ ཡི་ཤུ་གནམ་མེད་ས་མེད་ མ་ལེག་པ་ཨ་ཉི་ མ་གུ་ཝ་ཨན་ཐཱན་ མེམ་ཅོར་ཉི་ ཉི་ནམ་བཟའ་ ཇ་ཆིག་ཆིག་ཨ་ཝ་ བཞེས་ལེ་བིན་ཐཱན་ ལོག་ཉི་རང་ པི་ལ་ཏཱས་ག་བཱརང་ཀ་ཏཱན་ ཀུན་ཏི་ཝ༌ལ། 12ཉི་ཧེ་རོད་དང་ པི་ལ་ཏཱས་ ཨོ་ཉ་ནོང་ཀ་རང་ ཇ་རོ་རི་ཝ༌ལ། ཉི་ཨོ་ཉ་གེ་གོ་མ་ རོག་ཉིག་ཙིང་ དགྲ་བྱང་ཕིཤི་གི་ཝ་ཆོ་ཝ༌ལ༎

ཡི་ཤུ་སོ་ངོ་མང་ཀ་གུབ་ཀ།

13པི་ལ་ཏཱས་གི་ བླ་མ་ཆི་ལུ་བ་དང་ དབང་ཁཱན་བ་ ཉི་སོ་ངོ་བ་ ཏབ་ཐུར་རཱན་ཐཱན་ 14གསུངས་མ་ལ་ ན་ཤི་ཨོ་ཐ་སོ་ངོ་གི་ སོ་ངོ་བ་ཀ་ ངོ་ལོག་པེ་རིག་ལ་ཨ་ཉི་ ཇ་ག་བཱརང་ཀ་ ཕ་ཝ་གི༌ལ། ཉི་ཇི་གི་ ན་ཧ་གུབ་ཀ་རང་ ཞིབ་དཔྱད་ཕི་ཉི་ གོད་པ་ཀབ་ཉི་ ན་ཤི་ རོ་ཀ་ཀོར་གེ་ ཡེག་ཁཱན་ཆཱས་ཐུར་བུ་ ཨོ་ཐ་སོ་ངོ་གི་ ཨ་ཝ་ག་ ཇི་གི་ཐོང་མུ་མ༌ལ། 15ཉི་ཧེ་རོད་གི་བུ་ རོ་ཀ་ཅོན་ ཐོང་མེ་མར་བ་ཨ་དེན་གེ་ རོ་ཀི་ རོག་ལོག་ཉི་ ཨ་ཧ་བཱརང་ཀ་ཏཱན་ ཀུན་ཏི་ཝ་གི༌ལ། གོད་ཅོ་ རོ་ཀི་ཤེ་ལེ་ཁེ་ཝ་ག་ལའི་ ཧང་རང་ཨ་ཝ་མ༌ལ། 16ཨོ་ཉི་ཨ་དེན་གེ་ ཇི་གི་ རོག་ལ་ཕེ་བིན་ཐཱན་ ཐར་ཉི་ཀུན་ཏི་ལེ་དག༌ཉི།

17-18དག་པ་ཀབ་ཉི་ རོག་ཏེ་བ་ ཐམས་ཅན་གི་ ཏབ་ཐུར་ཤ་དར་ཕི་ཉི་ ཡེག་པ་ལ་ ཨོ་ཐ་སོ་ངོ་ཤེ་ཉི་ ཨ་ཧ་དེན་གེ་ བ་རབ་བ་ ཐར་ཤོ་དག༌ཉི། 19ཉི་ཨོ་ཐ་སོ་ངོ་ཤོ་ གོ་མ་ ཡ་རུ་ཤ་ལེམ་ག་ ཁྲོམ་ཆེན་ག་ ངོ་ལོག་ཨ་ལ་ཀབ་ཉི་ སོ་ངོ་ཤེ་ཝ་ཨ་དེན་གེ་ བཙོན་ག་ཁེ་ཝ་ཆོ་ཝ༌ལ། 20པི་ལ་ཏཱས་གི་ ཡི་ཤུ་ཐར་བེ་ག་ སེམས་ཨ་ཉི་ རོག་ཏེ་བ་ཀ་ ཨོམ་ཆང་ཤེབ་ཐུར་ ཇིམ་ཉི་གོད་པ༌ལ། 21དག་པ་ཀབ་ཉི་ རོག་ཏེ་བ་ཀི་ ཤ་དར་ཕི་ཉི་ ཁྲིམས་ཤིང་ག་ཇཱན་ཤོ་ དཱན་ ཁྲིམས་ཤིང་ག་ཇཱན་ཤོ་དག་ཉི་ ཡེག་པ༌ལ།

22ཧང་ཨ་ཉི་ཡ་ རོ་ཀི་ལའི་ངན་པ་ ཧང་ཨ་ཝ་ལ་ཡ། ཇི་གི་ རོག་ཤི་ལེ་ཁེ་ཝ་དང་ ཏུན་མ་ག་ཐིག་ ཧང་རང་ཤོར་བ་ ཐོང་མུ་མ༌ལ། ཨོ་ཉི་ཨ་དེན་གེ་ ཇི་གི་ རོག་ལ་ཕེ་བིན་ཐཱན་ ཐར་ཀུན་ཏི་ལེ་དག་ཉི་ རོ་ཀི་ རོག་ཏེ་བ་ཀ་ ཤེབ་སམ་སག་པུ་གསུངས་ཉི་ གོད་པ༌ལ།

23དག་པ་ཀབ་ཉི་ རོག་ཏེ་བ་ཀི་ ཤ་དར་ཤུག་ཨན་ ཕི་ལུ་ཕི་ས་རང་ཐ་ཉི་ དཱན་ ཁྲིམས་ཤིང་གེ་ ཇཱན་མེ་ཁེ་ལེ་དག་ཉི་ ཡེག་པ༌ལ། ཉི་རོག་ཏེ་བ་ཀ་ ཤ་དར་རང་ བང་ཟག་པ༌ལ། 24ཉི་པི་ལ་ཏཱས་གི་ རོག་ཏེ་བ་ཀི་ ཕུན་མ་དང་ཏུ་ཉི་ ཡི་ཤུ་བཀྲོངས་མེ་ག་ ཀུན་ཏི་ལེ་དག་ཉི་ གྲོས་ཐག་ཆོད་པ༌ལ། 25ཉི་རོག་ཏེ་བ་ཀི་ ཕུན་མ་དང་ཏུ་ཉི་ ངོ་ལོག་ཉི་ ཉི་གེ་ སོ་ངོ་ཤེ་ཝ་ཨ་དེན་གེ་ བཙོན་ག་ཁེ་ཁཱན་ སོ་ངོ་ཁེ་པ་ བཙོན་གེ་ཐར་ཐཱན་ ཡི་ཤུ་ཤོ་ རོག་ཏེ་བ་ཀ་ སེམས་དང་ཏུ་ཉི་ ཨ་ལེ་དེན་གེ་ རྩིས་སྤྲོད་པ༌ལ༎

ཁྲིམས་ཤིང་ག་ཇཱན་མ༌ལ།

26ཉི་རོག་ཏེ་བ་ཀི་ རོག་བཀྲོངས་མེ་ག་ བུན་ཅ་ཨ་ཉི་ ཀུ་རེ་ནི་དག་ས་གེ་ སི་མོན་དག་ཁཱན་ཁེ་པ་ དུང་གེ་ཨོ་ཕ་ཁྲབ་ཉི་ རོག་ཏེ་བ་ཀི་ རོག་ཙུང་ཐཱན་ ཁྲིམས་ཤིང་ རོ་ཀ་ཐུང་ཀ་ བང་ཙོང་ཉི་རང་ཀེ་ཉི་ ཡི་ཤུ་ག་ཚིང་ཚིང་ དི་ལེ་བི་ཝ༌ལ། 27ཉི་ཨོ་ཉ་ག་ སོ་ངོ་མང་པུ་ཐུར་ རོ་ཀ་ཚིང་ཁོན་ཉི་ ཨུ་ཁཱན་བ་ཀ་པོང་ཀེ་ རོ་ཀ་གོད་ཉི་ མརང་ཉི་གེབ་ཉི་ཨ་ཁཱན་ མེ་ཝག་ཙ་ཚེ་བང་བུ་ ཅ་གི་ཝ༌ལ། 28དག་པ་ཀབ་ཉི་ ཡི་ཤུ་གི་ རོག་ཏེ་བ་ཀ་ ལོ་ཀ་ཏཱན་གིར་ཐཱན་ གསུངས་མ་ལ་ ཡ་རུ་ཤ་ལེམ་ག་ ཟ་མིན་བ་ ཇ་ག་དེན་གེ་ གེ་ཕེ་མང་གི་ཝ་ ནའི་ནའི་ཏེན་དང་ ན་ཧ་ཝག་ཙ་བ་ཀ་དེན་གེ་ གེབ༌ཅོ། 29ཉཱན་ཅོ་ སོ་ངོ་བ་ཀི་ ཨོ་ཐེན་ཡེག་པེ་ག་ དུས་ཐུར་ཤར༌བེ། ཝག་ཙ་མ་ཁཱན་དང་ ངེ་ཀ་ཝག་ཙ་ ཧ་ལ་རང་མ་ཆག་ཁཱན་ ཉི་ནུ་ཧ་ལ་རང་ མ་ཞུམ་ཁཱན་བ་ བྱིན་རླབས་ཆི་ལུ་ ཉོང་པ་ལ་དག༌ཉི། 30ཉི་རོག་ཏེ་བ་ཀི་ ཕུ་བ་ཀ་ཡེག་པེ་ ཆེད་ཉི་ཨ་ཧ་ཐུང་ཀ་ ཁེ་དག༌ཉི། ཉི་ཟོར་བ་ཀ་ཡེག་པེ་ ཨའི་བུག་ཅོ་#23:30 ཧོ་ཤེ་ག་དཔེ་ཆ་ 10:8 དག༌ཉི། 31ཉི་རོག་ཏེ་བ་ཀི་ ཨུ་ཐུ་ད་བུ་ ཤིང་ཡེང་ལུ་ཨ་ཉི་ ཆོ་ལེ་གང་ཀ་ཨ་ནེ་ལ་ སང་མེ་གང་ཀ་ཏ་ ཧང་ཇུང་མེ་ཡ་དག༌ཉི།

32ཉི་ཨོམ་ཐུར་ ཁྲིམས་པ་ཉིག་ཙིང་བུ་ རོག་ཀབ་ཉི་ཤེ་ལེ་དེན་གེ་ བུན་ཅ་གི་ཝ༌ལ། 33ཉི་རོག་ཏེ་བ་ ཐོད་པ་དག་ས་ག་ ཤེག་པ་ཀབ་ཉི་ ཨོ་ཉ་ག་ རོག་ཏེ་བ་ཀི་ ཡི་ཤུ་ཁྲིམས་ཤིང་ག་ ཇཱན་མ༌ལ། ཉི་ཁྲིམས་པ་ཉིག་ཙིང་བུ་ རོ་ཀ་ལ་ཉོང་མི་ཉོང་གེ་ཨ་ཉི་ ཇཱན་མ༌ལ།

34ཉི་ཡི་ཤུ་གི་ཞུ་ཝ་ལ་ ཨ་པ་ རོག་ཏེ་བ་ བཀའ་དྲིན་བསྐྱང༌ཤོ། ཧང་ཡ་དག་ནེ་ལ་ རོག་ཏེ་བ་ཀི་ ཧང་ཨན་ཅ་སྨོ་ རོག་ཏེ་བ་ཀི་ སེ་ལུ་མ་ལ་དག༌ཉི། ཉི་རོ་ཀ་ནམ་བཟའ་ བོང་མེ་དེན་གེ་ རོག་ཏེ་བ་ཀི་ ཤོ་ཕི་ཝ༌ལ།

35ཉི་ཨོ་ཉ་ར་ག་ཐིང་ཁཱན་ སོ་ངོ་བ་ཀི་ གོད་ཉི་ཆོ་ཝ་ཅ་གི་ཝ༌ལ། དག་པ་ཀབ་ཉི་ དབང་ཁཱན་འགོ་དཔོན་བ་ཀི་ རོ་ཀ་མེམ་ཅོར་ཉི་ ཨོ་ཐེན་ཡེག་པ་ལ་ རོ་ཀི་བཱརའ་ག་ སྐྱབས་གཟིགས༌པ། ཉི་དཀོན་མཆོག་གི་སི་ཁཱན་ ཁིརིས་གི་ནེ་ལ་ དཱན་དཱན་ཏེན་ སྲོག་རྒྱབ་ཨན་ཆེན་དག༌ཉི། 36ཉི་དམག་མི་བ་ཀི་བུ་ མེམ་ཅོར་ཉི་ ག་ཨུ་ཉི་ རོ་ཀ་ཞུ་ཅུར་པུ་མོབ་ཐཱན་ ཡེག་པ་ལ་ 37ནཱན་ཡ་ཧུ་དི་པ་ག་ དཔོན་གི་ནེ་ལ་ ནཱན་ནཱན་ཏེན་གི་ སྲོག་རྒྱབ་ཨའི་དག༌ཉི། 38ཉི་རོ་ཀ་ཐུང་ཀ་ ཨུ་ཐུ་ཤོ་ ཡ་ཧུ་དི་པ་ག་ དཔོན་གི་ལ་ཨ་ཉི་འབྲི་ཉི་ ཐ་ཝ་ཅ་གི་ཝ༌ལ།

39ཉི་ཁྲིམས་ཤིང་གེ་ཇཱན་ཁཱན་ ཁྲིམས་པ་ཐུར་གི་ རོ་ཀ་ཞུ་ཝ་ལ་ ནཱན་ཁིརིས་མང་གི་སྨོ། ནཱན་ནཱན་ཏེན་ སྲོག་རྒྱབ་ཨན་ཐཱན་ ཨ་ཆིང་ག་བུ་ རྒྱབ་ཨའི་དག༌ཉི།

40དག་པ་ཀབ་ཉི་ ཨོམ་ཐུར་གི་ རོ་ཀ་བཱརག་ཉི་ ཨོ་ཐེན་ཡེག་པ་ལ་ ནཱན་བུ་ ཁྲིམས་པུརུས་ཀིན་རང་ ཉོང་པ་ཀབ་ཉི་ དཀོན་མཆོག་གེ་ ཡོང་ཁེ་ལུ་མ་ལ་སྨོ། 41ཨའི་རང་ཏ་ ཁྲིམས་ཉོང་པེ་ག་དེན༌མེ། ཧང་ཡ་དག་ནེ་ལ་ ཨ་ཆིང་ཉིག་ཙིང་གི་ ལའི་མ་ལེག་པ་ཨ་ཝ་ག་དང་ཏུ་ཉི་ ཉོང་ཅ་གི༌ལ། དག་པ་ཀབ་ཉི་ ཨོ་ཐ་སོ་ངོ་གི་ ཧང་རང་ ངཱད་པ་མཱན་ཅ་དག༌ཉི། 42ཉི་རོ་ཀི་ཞུ་ཝ་ལ་ ཡི་ཤུ་ ནཱན་ ན་ག་རྒྱལ་སྲིད་ག་ དཔོན་ཨ་ཉི་བྱོན་མ་ཀབ་ཉི་ ཇང་ཡིད་ཀ་ཨ་ཉི་གནང་ཤོ་ན་དག༌ཉི། 43ཉི་ཡི་ཤུ་གི་ རོ་ཀ་གསུངས་མ་ལ་ ཇི་གི་ ན་ག་ཐྲང་ཉི་ཡེག་པེ་ ཐི་ནོང་རང་ ནཱན་ཇང་ཀབ་ཉི་ མཐོ་རིས་ག་ ཨོ་ཕེ་ན་དག༌ཉི༎

གཙོ་བོ་ཡི་ཤུ་གཤགས་པ༌ལ།

44ཉི་ཨོམ་ ཆུ་ཚོད་སོང་ཉིག་ཙིང་ དི་ཝ་ཅ་གི་ཝ༌ལ། ཉི་ཨོ་ཉ་ས་ཆ་ ཐམས་ཅན་རང་ མེར་བུ་རི་ཉི་ ཆུ་ཚོད་སམ་སག་པུ་ཆོ་ཝ༌ལ། 45ཧང་ཡ་དག་ནེ་ལ་ ངམ་གེ་འོད་ཟེར་ མ་ཤོ་ཝ༌ལ། ཉི་མཆོད་ཁང་ག་ ཡོ་ལུ་ཁ་ཤ་ ཐེད་པུ་ཁེ་པ་རེད་ཉི་ ཉིག་ཙིང་རི་ཝ༌ལ། 46ཉི་ཡི་ཤུ་གི་ གསུང་སྐད་ཤུག་ཨ་ཉི་ ཞུ་ཝ་ལ་ ཨ་པ་ ཇ་ག་རྣམ་ཤེས་ ན་ག་ཕྱག་ཀ་སྤྲོད་པ་ན་དག༌ཉི། ཨུ་ཐུ་ད་བུ་གསུངས་ཐཱན་ རོ་ཀ་ཤོང་ཕུད་པ༌ལ།

47ཨོམ་ དམག་མི་ག་ འགོ་དཔོན་གི་ ཧང་ད་བུ་ཇུང་མ་གི་ལ་སྨོ་ མཇལ་ཉི་ དཀོན་མཆོག་ག་ བསྟོད་པ་ཕུལ་ཉི་ ཡེག་པ་ལ་ ཨོ་ཐ་སོ་ངོ་གི་ནེ་ལ་ ཏེན་ཏེན་རང་ སོ་ངོ་དྲང་པུ་གི་ཝ་ཆོན་དག༌ཉི། 48ཉི་ཨོ་ཉ་གོད་པེ་ག་དི་ཉི་ ཛོམ་ཁཱན་སོ་ངོ་བ་ ཐམས་ཅན་གི་ ཧང་ད་བུ་ཇུང་མ་གི་ལ་སྨོ་ མཇལ་ཉི་ རོག་ཏེ་བ་ཀ་ སེམས་ཕམ་ཉི་ ཕའི་ག་ཏཱན་ལོག་ཉི་ དི་ཝ༌ལ། 49ཉི་ཇང་ཀིན་ག་ ཐིང་ཉི་ཆོ་ཁཱན་ ཡི་ཤུ་ག་སོ་ངོ་བ་དང་ ག་ལིལ་གེ་ རོ་ཀ་ཕྱག་ཞུ་ཉི་ཨུ་ཁཱན་ མེ་ཝག་ཙ་བ་ཀི་ ཨོ་ཐ་བ་ མཇལ་བ༌ལ༎

ཡི་ཤུ་དུར་ག་ཙུག་པ༌ལ།

50ཡ་ཧུ་དི་པ་ག་ཁྲོམ་ ཨ་རི་མ་ཐི་ཡ་དག་ས་གེ་ ཡོ་སེཕ་དག་ཁཱན་ སོ་ངོ་ཐུར་ཅ་གི་ཝ༌ལ། ཉི་རོག་ཤོ་ སོ་ངོ་ལེག་པུ་དང་ དྲང་པུ་ཐུར་ཆོ་ཁཱན་ བཀའ་ཁྲིམས་ག་ ཚོགས་པ་ཐུར་གི་ཝ་ཆོ་ཝ༌ལ། 51ཉི་རོ་ཀི་ ད་ཧ་ ཡི་ཤུ་ཙུང་མེ་ག་ འཆར་གཞི་དང་ རོག་བཀྲོངས་མེ་ག་དྲེ་ཀ་ ནུ་ཕེ་མ་ན་ཝ༌ལ། ཉི་དཀོན་མཆོག་ག་རྒྱལ་སྲིད་ ཧ་ལ་བྱོན་ལ་སྨོ་ གོད་ཉི་ཆོ་ཁཱན་ སོ་ངོ་ཐུར་གི་ཝ་ཆོ་ཝ༌ལ། 52ཨོ་ཐ་སོ་ངོ་གི་ པི་ལ་ཏཱས་ག་ སྐུན་མདུན་ག་ དིན་ཐཱན་ ཡི་ཤུ་ག་སྐུ་ཕུང་གནང་ཤོ་དག་ཉི་ ཞུ་ཝ༌ལ། 53ཉི་རོ་ཀི་ སྐུ་ཕུང་དོང་ཕབ་ཐཱན་ ཁ་ཤ་ཇམ་པུ་ཨ་ཝ་གི་ཆོམ་ཉི་ ཉི་ཨི་བི་རང་མ་ཐ་ཁཱན་ གོ་མ་གེ་རང་ གང་ཆི་ཉི་ཐ་ཁཱན་ ལུང་ག་དུར་ནང་ཀ་ ཐང་ཉི་ཐ་ཝ༌ལ། 54ཉི་ཨོ་ཉ་ནོང་ཤོ་ ཅམ་པེ་ག་ནོང་ གི་ཝ་ཆོ་ཝ༌ལ། ཉི་དུས་བཟང་ གོ་ཙུག་ཅ་གི་ཝ༌ལ།

55ཉི་ག་ལིལ་གེ་ ཡི་ཤུ་ག་ཕྱག་ཞུ་ཉི་ཨུ་ཁཱན་ མེ་ཝག་ཙ་བ་ཀི་ ཨོ་ཉ་དུར་དང་ ཡི་ཤུ་ག་སྐུ་ཕུང་ ཧང་ཏེན་ཐང་ཉི་ ཐ་ཝ་གི་ལ་སྨོ་ ཐོང་མ༌ལ། 56ཉི་རོག་ཏེ་བ་ ཨོ་ཉ་གེ་ལོག་ཐཱན་ དྲི་བཟང་དང་ སི་ཨོ་ཉ་བ་ ཡི་ཤུ་ག་སྐུ་ཕུང་ག་ སོག་པེ་དེན་གེ་ ཅམ་པ༌ལ། ཉི་དུས་བཟང་ག་ནོང་ཀ་ བཀའ་ཁྲིམས་དང་ཏུ་ཉི་ རོག་ཏེ་བ་ ཤོང་ལ་ཉི་ཆོ་ཝ༌ལ༎

Currently Selected:

ལུ་ཀ། 23: TNTB

Highlight

Copy