ལུ་ཀ། 5

ཡི་ཤུ་གི་ སློ་མ་གོ་དང་པ་ར་ཝ༌ལ།

1ཉི་ནོང་ཐུར་ ག་ནེ་ས་རེད་དག་ས་ག་ མཚོ་ནབ་ཀ་ ཡི་ཤུ་ ཐིང་ཉི་བཞུགས་པེ་གང་ཀ་ སོ་ངོ་གནམ་མེད་ས་མེད་ ཛོམ་ཉི་ དཀོན་མཆོག་ག་ གསུང་ཉཱན་པེ་དེན་གེ་ རོ་ཀ་ར་ག་ཏཱན་ པེད་ཉི་རང་ཕ་ཝ༌ལ། 2ཉི་རོ་ཀི་ མཚོ་ནབ་ཀ་ གྲུ་ཏོང་པུ་ཉིག་ཙིང་ཐ་ཝ་ག་ གཟིགས་པ༌ལ། ཉི་ང་རོ་པ་ཤོ་ གྲུ་གེ་ཕིས་ཀ་ཤོན་དི་ཉི་ རོག་ཏེ་བ་ཀ་ ཅོང་ཟིག་ཅ་གི་ཝ༌ལ། 3ཉི་སི་མོན་དག་ཁཱན་ག་ གྲུ་ནང་ཀ་བྱོན་ཐཱན་ རོ་ཀི་གྲུ་ཡོན་ད་ག་ གསུངས་མ་ལ་ གྲུ་ད་སུར་ས་གེ་ལེང་ རི་ནང་ཀ་ཏཱན་ ཇང་ཅོ་དག༌ཉི། ཉི་གྲུ་ནང་ཀ་བཞུགས་ཐཱན་ སོ་ངོ་བ་ཀ་ ཡེ་ཉི་གནང་མ༌ལ།

4ཉི་རོ་ཀི་ ཡེ་ཉི་ཆུམ་དེན་གེ་ སི་མོན་ག་གསུངས་མ་ལ་ ཉི་ཨོམ་ གྲུ་རི་ཏིང་པུ་ཆོ་ས་ག་ བེརེག་ཐཱན་ ང་ཙུང་མེ་ག་དེན་གེ་ ན་ཧ་ང་ཅོང་བ་ ཚབ་ཅོ་དག༌ཉི།

5ཉི་སི་མོན་གི་ཞུ་ཝ་ལ་ སྦྱིན་བདག་ ཨའི་བི་ནང་ཐུར་ཙ་དྲེག་ཐཱན་ ཧང་རང་མ་ཉོང་ཅི། ཉི་ནཱན་གི་ གསུངས་མ་ཨ་དེན་གེ་ ཇི་གི་ ཨོམ་ཆང་ཚབ་ཉི་ གོད་པེ་དག༌ཉི། 6ཉི་ཨོ་ཐ་ཤེབ་ཀ་ རོག་ཏེ་བ་ཀ་ ཅོང་བ་ཕུང་ཉི་ རེ་པེ་གོ་ཙུག་པ༌ལ། 7ཉི་རོག་ཏེ་བ་ཀི་ ག་དང་དཱད་ཨ་ཉི་ རུམ་པེ་ག་ཨོ་དོ་དག་ཉི་ བཱརའ་གྲུ་ག་ཆོ་ཁཱན་ ཇ་རོ་བ་ར་ཝ༌ལ། ཉི་རོག་ཏེ་བ་ཤེག་ཉི་ གྲུ་ཉིག་ཙིང་རང་ ང་གི་ཕུང་ཉི་ གྲུ་རི་ནང་ཀ་ཟེག་པེ་ གོ་ཙུག་པ༌ལ།

8ཉི་སི་མོན་པ་ཏྲུས་གི་ ཨོ་ཐ་བ་ཐོང་ཉི་ ཡི་ཤུ་ག་ཕྱག་འཚལ་ཐཱན་ གཙོ་བོ་ ཇང་སྡིག་ཅན་གི༌ལ། ཇང་ཐུབ་ཐ་ཉི་ བྱོན་ཤོ་དག་ཉི་ ཞུ་ཝ༌ལ། 9ཉི་རོག་ཏེ་བ་ཀི་ ང་མང་པུ་ཙུང་མ་ཨ་དེན་གེ་ རོག་དང་ རོག་ཀབ་ཉི་ཆོ་ཁཱན་ ཐམས་ཅན་རང་ ཡིད་ཆི་ཝ༌ལ། 10ཉི་སི་མོན་ག་ཇ་རོ་ ཇབ་དི་ཡ་ག་ཟ་ ཡ་ཀུབ་དང་ ཡུ་ཧན་ན་བུ་ གནམ་མེད་ས་མེད་ ཡིད་ཆི་ཝ༌ལ།

ཉི་ཡི་ཤུ་གི་ སི་མོན་ག་གསུངས་མ་ལ་ ཡོང་མ་ཁེ་ ཐི་ནོང་གེ་ག་ཏཱན་ ནཱན་གི་ ང་མང་གི་ཝ་ སོ་ངོ་ཙུང་མེ་ན་དག༌ཉི། 11ཉི་རོག་ཏེ་བ་ཀ་གྲུ་ མཚོ་ནབ་ཀ་ ཤོ་ཝ་ཐུར་ག་རང་ རོག་ཏེ་བ་ཀི་ ཐམས་ཅན་ཐུབ་ཐཱན་ཐཱན་ ཡི་ཤུ་ག་ཕྱག་ཞུ་ཉི་ དི་ཝ༌ལ༎

ཡི་ཤུ་གི་ ཀླུ་ནད་ཟུན་ཁཱན་ སོ་ངོ་ཐུར་ དྲག་ཉི་གནང་མ༌ལ།

12ཉི་རོག་ ཁྲོམ་ཐུར་ག་ བཞུགས་པེ་གང་ཀ་ ཀླུ་ནད་ཟུན་ཉི་ཆུ་མ་ཨ་ཝ་ སོ་ངོ་ཐུར་ཤེག་ཉི་ རོ་ཀི་ ཡི་ཤུ་མཇལ་བ་ཐུར་ག་རང་ རོ་ཀ་སྐུན་མདུན་ག་ ཕྱག་འཚལ་ཉི་ རོ་ཀ་པ་ཏོང་ ས་ག་ཏེས་ཐཱན་ ཞུ་ཝ་ལ་ གཙོ་བོ་ ན་ག་ཐུགས་ཆོ་ནེ་ལ་ ཇང་དྲག་ཉི་གནང་ཤོ་དག༌ཉི།

13ཉི་རོ་ཀི་ རོ་ཀ་ཕྱག་རིང་ཐཱན་ ནཱད་པ་ཐུང་ཀ་ཀེ་ཉི་ གསུངས་མ་ལ་ ཇ་ག་སེམས་ཅ་ དྲག་ཅོ་དག༌ཉི། ཉི་ཨོ་ཉ་ཐྲེ་ཀེ་རང་ རོ་ཀ་ཀླུ་ན་ཚ་དྲག་པ༌ལ། 14ཉི་ཡི་ཤུ་གི་ རོ་ཀ་བཀའ་གནང་མ་ལ་ བཱརའ་ཨི་བི་ག་རང་ མ་ཡེག་པཱན་ ཐྲང་ཀིན་རང་དིན་ཐཱན་ ནཱན་ཏེན་གི་ བླ་མ་ག་གེན༌ཤོ། ཉི་ནཱན་དྲག་པ་གི་ལ་དག་ཉི་ སོ་ངོ་བ་ཀ་གུབ་ཀ་ ཁུངས་ཀེ་བེ་དེན་གེ་ མོ་ས་ག་ བཀའ་ཁྲིམས་དང་ཏུ་ཉི་ ཧིང་སང་ཀིན་རི་ཝ་ག་ སྙན་དར་ཕུལ་ཤོ་དག༌ཉི།

15དག་པ་ཀབ་ཉི་ རོ་ཀ་ཀོར་གེ་ མང་པུ་མང་པུ་ ཚང་ཟིང་ཉི་ ཨོ་ག་ཨོ་ག་རང་ ཆ་པ་ཨ་དེན་གེ་ སོ་ངོ་མང་པུ་ཐུར་ གསུང་ཉཱན་པེ་དེན་གེ་དང་ ན་ཚ་དྲག་པེ་དེན་གེ་ རོ་ཀ་ཀོ་ལོ་ལོ་ ཛོ་མ༌ལ། 16དག་པ་ཀབ་ཉི་ བར་བར་ཀེ་རང་ རོག་ས་ཟུར་ཀ་ སྨོན་ལམ་ཏ་པེ་ག་ བྱོན་ཅ་གི་ཝ༌ལ༎

ཡི་ཤུ་གི་ དང་མེ་མར་ཁཱན་སོ་ངོ་ དྲག་ཉི་གནང་མ༌ལ།

17ཉི་ནོང་ཐུར་ ཡི་ཤུ་གི་ཡེན་གནང་ཉི་ བཞུགས་པེ་གང་ཀ་ ག་ལིལ་དང་ ཡ་ཧུ་དི་ཡ་ ཉི་ཡ་རུ་ཤ་ལེམ་ག་ཁྲོམ་ ཐམས་ཅན་གེ་ཨུ་ཁཱན་ ཕ་རི་སི་པ་བ་དང་ བཀའ་ཁྲིམས་ག་ སློབ་དཔོན་བ་ རོ་ཀ་ར་ག་ལང་ཉི་ ཅ་གི་ཝ༌ལ། ཉི་གཙོ་བོ་ག་ དྲག་པེ་ག་དབང་ རོ་ཀ་ཐུང་ཀ་ཅ་གི་ཝ༌ལ།

18ཨོ་ཉི་ཆོ་ལ་རང་ ཟ་ན་ཚ་ཁེ་ཁཱན་ སོ་ངོ་ཐུར་ སོ་ངོ་བ་ཀི་ ཅ་ཀེ་ཉི་ ཕཱན་ཅ་གི་ཝ༌ལ། ཉི་རོག་ཏེ་བ་ཀི་ ནང་ཀ་ཡི་ཤུ་ག་སྐུན་མདུན་ག་ ནཱད་པ་བུ་ལེ་ མིག་པ་ཕི་ཝ༌ལ། 19དག་པ་ཀབ་ཉི་ སོ་ངོ་མང་པུ་ ཛོ་མ་ཨ་དེན་གེ་ ནང་ཀ་དི་ལེ་ག་ལམ་ མ་ཉོང་པ་ཨ་དེན་གེ་ཏེན་ ཐོ་ལ་ཕའི་ཐུང་ཀ་དི་ཉི་ བུག་ནང་ཆོག་ཐཱན་ ནཱད་པ་ རོ་ཀ་ཏཱན་ཀབ་ཉི་རང་ དོང་སོ་ངོ་བ་ཀ་པོང་ཀ་ ཡི་ཤུ་ག་སྐུན་མདུན་ག་ཏཱན་ རིང་མ༌ལ། 20ཉི་རོ་ཀི་ རོག་ཏེ་བ་ཀ་ དད་པ་གཟིགས་ཉི་ གསུངས་མ་ལ་ ཇ་རོ་ ན་ག་སྡིག་པ་བ་ བཀའ་དྲིན་བསྐྱང་མ་དག༌ཉི།

21ཉི་བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ཀི་ དྲི་ཝ་ཨ་ལེ་གོ་ཙུག་ཉི་ རོག་ཏེ་བ་ཀི་ མི་ཝ་ལ་ སྐུར་པ་ཞུ་ཁཱན་ ཨོ་ཐ་སོ་ངོ་ ཨི་བི་གི་ལ་ཡ། དཀོན་མཆོག་ཐུར་གི་ཤ་ སྡིག་པ་བཀའ་དྲིན་བསྐྱང་མེ་རེ་བེ་ མ་ཏོག་པ་ བཱརའ་ཨི་བི་གི་རང་ མར་བ་དག༌ཉི།

22རོག་ཏེ་བ་ཀི་ ཨུ་ཉུ་ད་བུ་མི་ཝ་ག་ ཡི་ཤུ་གི་མཁྱེན་ཉི་ གསུངས་མ་ལ་ ན་ཧ་སེམས་ཀ་ ཨུ་ཉུ་ད་བུ་ ཧང་ཨ་ཉི་མིན་ཅ་ཡ། 23ཧང་ ན་ག་སྡིག་པ་ བཀའ་དྲིན་བསྐྱང་མ་ཨ་ཉི་ ཡེག་པེ་ག་ཡ་ལུ་སྨོ་ ཐིང་ཐཱན་དང་ཤོ་ཨ་ཉི་ ཡེག་པེ་ག་ཡ་ལུ་ཡ། 24དག་པ་ཀབ་ཉི་ སོ་ངོ་ག་ཟ་གི་ ཐ་འཛམ་གླིང་ག་ སྡིག་པ་བ་ བཀའ་དྲིན་བསྐྱང་མེ་ག་ དབང་ཚད་ལ་དག་ཉི་ ན་ཤི་སེ་ལེ་དེན་གེ་ ཇི་གི་ཨོ་ཐ་ དང་མེ་མར་ཁཱན་སོ་ངོ་ དྲག་ཉི་བི་ལེ་དག་ཉི་ གསུངས་ཐཱན་ རོ་ཀི་ཨོ་ཉ་ནཱད་པ་ག་ གསུངས་མ་ལ་ ཇི་གི་ ན་ག་ཡེག་ཅ་ ག་ཐིང་ཐཱན་ ནཱན་ཏེན་ག་ཏཱན་བང་བུ་ཉི་ ཕའི་ག་ཇོང་ཤོ་དག༌ཉི།

25ཉི་ཨོ་ཉ་ཐྲེ་ཀེ་རང་ དང་མེ་མར་ཁཱན་གི་ རོག་ཏེ་བ་ཀ་གུབ་ཀ་ ག་ཐིང་ཐཱན་ རོག་ཐང་ཁཱན་ཏཱན་དུང་ཉི་ དཀོན་མཆོག་ག་ བསྟོད་པ་ཕུལ་ཉི་རང་ ཕའི་ག་ཇོང་ཐ་ཝ༌ལ། 26ཉི་རོག་ཏེ་བ་ ཐམས་ཅན་རང་ ཡིད་ཆི་ཝ་མ་ཚཱད་པ་ ཡོང་བུ་ཁེ་ཝ༌ལ། དཀོན་མཆོག་ག་ བསྟོད་པ་ཕུལ་ཉི་ ཞུ་ཝ་ལ་ ཨ་ཤི་ཐི་ནོང་ ཡིད་ཆི་སི་སི་ཨ་ཝ་ཐུར་ མཇལ་བ་དག༌ཉི༎

ཡི་ཤུ་གི་ ལེ་ཝི་ར་ཝ༌ལ།

27ཨོ་ཐ་ཚི་ངེ་ རོག་ཕིས་ཀ་བྱོན་མ་ཀབ་ཉི་ ཁྲལ་པ་ལེ་ཝི་དག་ཁཱན་ཁེ་པ་ ཁྲལ་དུས་ཁཱན་ ཡིག་ཚང་ནང་ཀ་ལང་ཉི་ ཆོ་ཝ་གཟིགས་ཉི་ རོ་ཀི་ལེ་ཝི་ག་ གསུངས་མ་ལ་ ཇ་ག་ཚིང་ཚིང་ཨོ་དོ་དག༌ཉི། 28ཉི་རོ་ཀི་ ཧང་རང་ཐུབ་ཐཱན་ཐཱན་ ཡི་ཤུ་ག་ཕྱག་ཞུ་ཉི་ དི་ཝ༌ལ།

29ཉི་ལེ་ཝི་གི་ ཡི་ཤུ་ག་དེན་གེ་ རོ་ཀ་ཕའི་ག་ མཛར་ཅུམ་ཆི་ལུ་ཐུར་ ཐ་ཝ༌ལ། ཉི་ཤི་མིན་བ་ཀ་པོང་ཀེ་ རོ་ཀ་ཁྲལ་པ་ ཇ་རོ་བ་དང་ བཱརའ་མང་པུ་ཐུར་ རོག་ཏེ་བ་ཀབ་ཉི་ ལང་མ་ཅ་གི་ཝ༌ལ། 30ཉི་ཕ་རི་སི་པ་བ་དང་ རོག་ཏེ་བ་ཀ་ བཀའ་ཁྲིམས་ག་ སློབ་དཔོན་བ་ཀི་ ཁ་ཏང་ཉི་ རོ་ཀ་སློ་མ་བ་ཀ་ ཡེག་པ་ལ་ ན་ཧ་བ་ ཧང་ཨ་ཉི་ ཁྲལ་ཐེབ་དུས་ཁཱན་དང་ བཱརའ་སྡིག་ཅན་བ་ཀབ་ཉི་ དེབ་ཀ་ལང་ཉི་ ཟཱན་ཇམ་ཅ་ཡ་དག༌ཉི།

31ཡི་ཤུ་གི་ རོག་ཏེ་བ་ཀ་ ལན་གནང་མ་ལ་ སྨན་པ་ཤོ་ ན་ཚ་མ་ཁཱན་བ་ཀ་དེན་གེ་མང་གི་ ན་ཚ་ཆོ་ཁཱན་བ་ཀ་དེན་གེ་ཤ་གི༌ལ། 32ཇང་བུ་ རང་ཏེན་གི་ དྲང་པུ་ཙི་ཁཱན་བ་ ར་ལེ་དེན་གེ་ ཨོ་ཕ་མང་གི་ཝ་ སྡིག་ཅན་བ་ སྡིག་པ་གེ་ལོག་ཅོ་ཨ་ཉི་ ཡེག་པེ་དེན་གེ་ ཨོ་ཕ་གི་ལ་དག༌ཉི༎

སྨྱུང་གནས་ཀོར་གེ་ དྲི་ཝ་ཨ་ཝ༌ལ།

33ཉི་རོག་ཏེ་བ་ཀི་ ཡི་ཤུ་ག་ཞུ་ཝ་ལ་ ཡུ་ཧན་ན་ག་སློ་མ་བ་ ཆམ་ཆམ་རང་ སྨྱུང་གནས་ཆོ་ཉི་ སྨོན་ལམ་ཏབ༌ཅ། ཉི་ཕ་རི་སི་པ་ག་ སློ་མ་བ་ཀི་བུ་ཨན༌ཅ། དག་པ་ཀབ་ཉི་ ན་ག་སློ་མ་བ་ཤོ་ ཧང་ཨ་ཉི་ ཟཱན་ཇམ་ཅ་ཡ་དག༌ཉི།

34ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཧང་ ན་ཤི་གཉེན་ཏག་པེ་ག་ཟ་ རོག་ཏེ་བ་ཀབ་ཉི་རང་ ཆོན་ཐཱན་རང་ གཉེན་ཕི་ས་བཱརང་ཀ་ཨུ་ཁཱན་ ཤི་མིན་བ་ སྨྱུང་གནས་ཨ་ཉི་ ཆོ་ལེ་བི་ལེ་སྨོ། 35དག་པ་ཀབ་ཉི་ གཉེན་ཏག་པེ་ག་ཟ་ རོག་ཏེ་བ་ཀ་པོང་ཀེ་ དུང་ཉི་བུ་ལེ་ག་ དུས་ཐུར་ཤར༌བེ། ཉི་ཤ་ རོག་ཏེ་བ་ཀི་ སྨྱུང་གནས་ཨ་ཉི་ཆོ་ལེ་དག༌ཉི།

36ཉི་རོ་ཀི་ རོག་ཏེ་བ་ཀ་ དཔེ་གཏམ་བུ་ གསུངས་མ་ལ་ ཨི་བི་གི་རང་ ཁ་ཤ་སིང་མ་རེད་ཐཱན་ ཁ་མུང་མཱན་མ་རེད་ཁཱན་ཐུང་ཀ་ བག་ཏང་ཆེ་ཕུ་མཱན༌ཅ། ཉི་ཆེ་ཕ་ད་བུ་ཨ་ནེ་ལ་ ཁ་ཤ་སིང་མ་ མེ་པ་དི་ཝ་མ་ཚཱད་པ་ ཁ་མུང་མཱན་མ་ཐུང་ཀ་ ཁ་ཤ་སིང་མ་གི་ བག་ཏང་ཆེ་ཕ་ཀབ་ཉི་ ཏི་ངེ་རང་མ་ཅེམ༌པ།

37ཉི་ཨི་བི་གི་རང་ ཨུར་ཀ་མཱན་མ་ནང་ཀ་ ཞུ་སིང་མ་ གོ་ལུ་མཱན༌ཅ། ཉི་གོ་ཝ་ད་བུ་ཨ་ནེ་ལ་ ཞུ་སིང་མ་གི་ ཨུར་ཀ་མཱན་མ་ ཇེས་གེམ་ཉི་ ཞུ་མོ་ནང་ཨ་ལེ་ ཉི་ཨུར་ཀ་བུ་མ་ན་ཝ་རི༌ལེ། 38ཉི་ཞུ་སིང་མ་ཤོ་ ཨུར་ཀ་སིང་མ་ནང་ཀ་རང་ གོ་ལེ་ཁེ༌ལེ། 39ཉི་ཞུ་མཱན་མ་ཇམ་ཁཱན་ ཐུར་གི་རང་ ཞུ་སིང་མ་ ཇ་མེ་མ་ལ༌མ། ཧང་ཡ་དག་ནེ་ལ་ རོ་ཀི་ཞུ་མཱན་མ་རང་ ལེག་པུ་ལ་ཨ་ཉི་ ཡེག་པེ་དག་ཉི་ གསུངས་མ༌ལ༎

Currently Selected:

ལུ་ཀ། 5: TNTB

Highlight

Copy