མ་ཏི། 23
23
ཀ་ལུ་ཟུམ།
1ཡི་ཤུ་གི་ སོ་ངོ་མང་པུ་ཨ་ཉི་ ཛོམ་ཁཱན་དང་ སློ་མ་བ་ཀ་གསུངས་མ་ལ་ 2བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ཤོ་ མོ་ས་གི་འབྲི་ཁཱན་ བཀའ་ཁྲིམས་ག་ དེན་ཐ་ཁྲེ་ཁཱན་བ་གི༌ལ། 3ཨོ་ཉི་ཨ་དེན་གེ་ རོག་ཏེ་བ་ཀི་ཡེག་ཁཱན་ ཐམས་ཅན་རང་ ན་ཤི་ཆ་གནས་ཐ་ལེ་ཁེ༌ལེ། དག་པ་ཀབ་ཉི་ རོག་ཏེ་བ་ཀི་ ཨ་ཁཱན་ཁེ་པ་ ན་ཤི་མ་ཨའི། ཧང་ཡ་དག་ནེ་ལ་ རོག་ཏེ་བ་ཀི་ ཡེ་ཝ་དང་ཏུ་ཉི་ རོག་ཏེ་བ་ཀི་ ཨ་ལུ་མཱན༌ཅ། 4རོག་ཏེ་བ་ཀི་ རོང་ཆི་ལུ་ཅོད་ཉི་ཐིག་ཐཱན་ སོ་ངོ་བ་ཀ་ཚིང་ཁང་ག་ཀེན༌ཅ། དག་པ་ཀབ་ཉི་ ཨོ་ཉ་རོང་བང་ཁཱན་བ་ཀ་ རུམ་པེ་དེན་གེ་ རོག་ཏེ་བ་ཀི་ རོག་ཏེ་བ་ཀ་ ག་དང་བུརུ་མ་ཐུར་གི་རང་ ཏོས་པུ་མཱན༌ཅ།
5རོག་ཏེ་བ་ཀི་ཨ་ཁཱན་ ཐམས་ཅན་རང་ སོ་ངོ་བ་ཀི་ ཐོང་ཆེན་དག་པ་གི་ ཨན་ཅ་གི༌ལ། རོག་ཏེ་བ་ཀི་ གསུང་རབ་ག་ཚིག་དེབ་བ་བུ་ ཆི་ལུ་ཨ་ཉི་འབྲི་ཐཱན་ རོག་ཏེ་བ་ཀ་པ་ཏོང་དང་ ག་དང་གེ་ཇཱན༌ཅ། ཉི་རོག་ཏེ་བ་ ཆཱོས་པ་གི་ལ་དག་ཉི་ གེན་མེ་དེན་གེ་ རོག་ཏེ་བ་ཀི་ རོག་ཏེ་བ་ཀ་ཁ་མུང་གེ་ པེརེ་མ་རིང་མུ་རིང་མུ་ཨ་ཝ་བ་ཇཱན༌ལ། 6མཛར་ཅུམ་ཟ་ལེ་གང་ཀ་ རོག་ཏེ་བ་ཀི་ ཆི་ལུ་བ་ཀ་རྐང་ཁྲི་ག་ལང་མེ་ག་ ཤོ་ནང་ཕེན༌ཅ། ཉི་ཡ་ཧུ་དི་པ་ ཆོས་འཛོམས་ག་ཨ་ནེ་ལ་ རོག་ཏེ་བ་ཀི་ རྐང་ཁྲི་ལེག་པུ་ག་ཤ་ ལང་མེ་གོད༌ཅ། 7ཚོང་ཕི་ས་ཁོན་ཨ་ནེ་ལ་ སོ་ངོ་བ་ཀི་ རོག་ཏེ་བ་ཀ་ ཕྱག་འཚལ་ཉི་ ཉི་སོ་ངོ་བ་ཀི་ རོག་ཏེ་བ་ཀ་ སློབ་དཔོན་དག་ཉི་ ར་ལ་ཀབ་ཉི་ རོག་ཏེ་བ་ ཤོ་ནང་ཕེན༌ཅ།
8དག་པ་ཀབ་ཉི་ བཱརའ་གི་ ན་ཧ་སློབ་དཔོན་དག་ཉི་ ར་ལེ་མ་བི། ཧང་ཡ་དག་ནེ་ལ་ ན་ཧ་སློབ་དཔོན་ཐུར་ཤ༌ཅ། ཉི་ན་ཧ་བ་ ཐམས་ཅན་རང་ ཡུང་ཟི་བ་གི༌ལ། 9ཉི་འཛམ་གླིང་ག་ཆོ་ཁཱན་ སོ་ངོ་ཐུར་རང་ ན་ཧ་ཨ་པ་ཨ་ཉི་མ་རའི། ཧང་ཡ་དག་ནེ་ལ་ ན་ཧ་ཡབ་ཐུར་ཤ༌ཅ། ཉི་ཨུ་ཉུ་ཤོ་ ཞིང་ཁམས་ག་བཞུགས་ཁཱན་ དཀོན་མཆོག་གི༌ལ། 10ཉི་བཱརའ་གི་ ན་ཧ་སྦྱིན་བདག་དག་ཉི་ ར་ལེ་མ་བི། ཧང་ཡ་དག་ནེ་ལ་ ན་ཧ་སྦྱིན་བདག་ཐུར་ཤ༌ཅ། ཨུ་ཉུ་ཤོ་ ཁིརིས་གི༌ལ། 11ན་ཧ་པོང་ཀེ་ ཆི་ལུ་ཆོ་ཁཱན་ཁེ་པ་ ཐམས་ཅན་ག་ གཡོག་པ་ཨ་ལེ་ཁེ༌ལེ། 12དག་པ་ཀབ་ཉི་ རང་ཏེན་གི་ ཆི་ལུ་ཅོད་ཁཱན་བ་ ཟེ་མུ་རི༌ལེ། ཉི་རང་ཏེན་གི་ ཟེ་མུ་ཨ་ཉི་ཆོ་ལེ་གོད་ཁཱན་བ་ ཆི་ལུ་རི༌ལེ།
13-14བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ ཧབ་ཏུར་ཀ་ལུ་ཨོ་ཕེ་ཡ། ནའི་འུ་དྲ་པ་བ་ ཧང་ཡ་དག་ནེ་ལ་ ན་ཤི་ཞིང་ཁམས་ག་ རྒྱལ་སྲིད་ག་ཀོ་དེ་མེ་ཁེན་ཐཱན་ སོ་ངོ་བ་ནུ་ཕེ་བི་ལུ་མ༌ལ། ནའི་ནའི་ཏེན་བུ་ མ་ནུ་ཕ་ཐུང་ཀ་ ནུ་ཕེ་གོད་ཁཱན་ བཱརའ་སོ་ངོ་བ་བུ་ ན་ཤི་ནུ་ཕེ་བི་ལུ་མ༌ལ།
15བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ ཧབ་ཏུར་ཀ་ལུ་ཨོ་ཕེ་ཡ། ནའི་འུ་དྲ་པ་བ་ ཧང་ཡ་དག་ནེ་ལ་ ན་ཤི་སོ་ངོ་ཐུར་ཨ་ཝ་ཐུར་ དད་པ་ཨ་ཁཱན་ཅོད་པེ་དེན་གེ་ ས་དང་རྒྱམ་མཚོ་གོག་ཉི་དི་ན། ཉི་དད་པ་ཨ་ཁཱན་ཅོད་ཏེན་གེ་ ན་ཤི་རོག་བུ་ ནའི་ད་བུ་རང་ དམྱལ་བ་ག་ ཤེབ་ཉིག་ཙིང་ དི་ལེ་རུང་ཁཱན་ཅོད༌ལ།
16ནའི་ལམ་རིག་ཁཱན་མིང་ཀ་ན་བ་ ཧབ་ཏུར་ཀ་ལུ་ཨོ་ཕེ་ཡ། མཆོད་ཁང་ག་མིང་ཨ་ཉི་ ཁས་བླངས་ཨ་ནེ་ལ་ ཏ་ཀ་མཱན༌ཅ། དག་པ་ཀབ་ཉི་ མཆོད་ཁང་ག་ཆོ་ཁཱན་ གསེར་ག་མིང་ཨ་ཉི་ ཁས་བླངས་ཨ་ནེ་ལ་ ཨོ་ཉ་སོ་ངོ་གི་ ཁས་བླངས་ཨ་ཁཱན་ཁེ་པ་ ཨ་ལེ་རང་ཁེ་ལེ་དག་ཉི་ ན་ཤི་བཱརའ་ག་ཡེ་ན། 17ན་ཧ་བ་ཤོ་ མིང་ཀ་ན་ཡོང་བ་གི་ཝ༌ལ། གསེར་ཆི་ལུ་སྨོ། གསེར་དམ་པ་ཅོད་ཁཱན་ མཆོད་ཁང་ཆི་ལུ་ཡ། 18ཉི་ཨོམ་ཆང་རང་ ན་ཤི་ཡེག་ལ་ མཆོད་གཤམ་ག་མིང་ཨ་ཉི་ ཁས་བླངས་ཨ་ནེ་ལ་ ཏ་ཀ་མཱན༌ཅ། དག་པ་ཀབ་ཉི་ མཆོད་གཤམ་ཐུང་ཀ་ཆོ་ཁཱན་ མཆོད་པ་ག་མིང་ག་ ཁས་བླངས་ཨ་ནེ་ལ་ ཨོ་ཉ་སོ་ངོ་གི་ ཁས་བླངས་ཨ་ཁཱན་ཁེ་པ་ ཨ་ལེ་རང་ཁེ་ལེ་དག༌ཉི། 19ན་ཧ་བ་ཤོ་ མིང་ཀ་ན་གི་ཝ༌ལ། མཆོད་པ་ཆི་ལུ་སྨོ། མཆོད་པ་དམ་པ་ཅོད་ཁཱན་ མཆོད་གཤམ་ཆི་ལུ་ཡ། 20ཨོ་ཉི་ཨ་དེན་གེ་ ཨི་བི་གི་ མཆོད་གཤམ་ག་མིང་ཨ་ཉི་ ཁས་བླངས་ཨ་ཝ་ཐུར་ ཨོ་ཉ་སོ་ངོ་གི་ མཆོད་གཤམ་དང་ མཆོད་གཤམ་ཐུང་ཀ་ཆོ་ཁཱན་ མཆོད་པ་ ཐམས་ཅན་ག་མིང་ཨ་ཉི་ ཁས་བླངས་ཨན་ཅ་གི༌ལ། 21ཉི་ཨི་བི་གི་ མཆོད་ཁང་ག་མིང་ཨ་ཉི་ ཁས་བླངས་ཨ་ཝ་ཐུར་ ཨོ་ཉ་སོ་ངོ་གི་ མཆོད་ཁང་དང་ མཆོད་ཁང་ནང་ཀ་བཞུགས་ཁཱན་ག་མཚན་ཨ་ཉི་ ཁས་བླངས་ཨན་ཅ་གི༌ལ། 22ཉི་ཨི་བི་གི་ ཞིང་ཁམས་ག་མིང་ཨ་ཉི་ ཁས་བླངས་ཨ་ཝ་ཐུར་ ཨོ་ཉ་སོ་ངོ་གི་ དཀོན་མཆོག་ག་གསེར་ཁྲི་དང་ ཨོ་ཉ་གསེར་ཁྲི་ཐུང་ཀ་ བཞུགས་ཁཱན་ག་མཚན་ག་ ཁས་བླངས་ཨན་ཅ་གི༌ལ།
23བཀའ་ཁྲིམས་ག་ སློབ་དཔོན་བ་དང་ཕ་རི་སི་པ་ ཧབ་ཏུར་ཀ་ལུ་ཨོ་ཕེ་ཡ། ནའི་འུ་དྲ་པ་བ་ ཧང་ཡ་དག་ནེ་ལ་ ད་སུར་ཉོང་ནེ་བུ་ བརྒྱ་གེ་སེ་ཕུལ༌ལ། དག་པ་ཀབ་ཉི་ ཁྲིམས་ཐྲང་པུ་མ༌ལ། སྙིང་རྗེ་ཨ་ལུ་མ༌ལ། ཉི་དད་པ་ཨ་ལུ་མ༌ལ། ཨོ་ཐ་བ་ཤོ་ བརྒྱ་གེ་སེ་གེ་ལག་ཉི་ བཀའ་ཁྲིམས་ཁག་ཆི་ལུ་གི༌ལ། 24ནའི་ལམ་རིག་ཁཱན་ མིང་ཀ་ན་བ་ ན་ཤི་ཡོང་བུ་ཐུར་བུ་ཙག་ཉི་ ཇ་མེ་གོད༌ལ། དག་པ་ཀབ་ཉི་ ན་ཤི་ང་མོ་ངོའི༌ལ།
25བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ ཧབ་ཏུར་ཀ་ལུ་ཨོ་ཕེ་ཡ། ནའི་འུ་དྲ་པ་བ་ ཧང་ཡ་དག་ནེ་ལ་ ན་ཤི་དེར་མ་དང་གུར་བུ་ ཕིས་ཀེ་ཏ་ཟིག༌ལ། དག་པ་ཀབ་ཉི་ ན་ཧ་བ་ ཙོག་པ་ཨ་ཝ་ག་ བག་ཆགས་དང་ སེར་སྣ་གི་ཕུང་མ༌ལ། 26ནའི་ཕ་རི་སི་པ་བ་ཤོ་ མིང་ཀ་ན་གི་ཝ༌ལ། གོ་མ་རང་ ན་ཧ་གུར་བུ་ནང་ཀ་ ཟིག་པེ་གོད་ཅོ། ཉི་ཤ་ ཕིས་ཀེ་བུ་ ཧིང་སང་སང་རི༌ལེ།
27བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ ཧབ་ཏུར་ཀ་ལུ་ཨོ་ཕེ་ཡ། ནའི་འུ་དྲ་པ་བ་ ཧང་ཡ་དག་ནེ་ལ་ ན་ཧ་བ་ཤོ་ ཚོན་སོག་ཉི་ཐ་ཁཱན་ དུར་ག་བ་ད་བུ༌ལ། ཕིས་ཀེ་གོད་པ་ཀབ་ཉི་ ཅེམ་པུ་ཆོན་ཐཱན་རང་གི་ནེ་བུ་ ནང་ཀ་ཤོ་ སོ་ངོ་ཤི་ཁཱན་བ་ཀ་ཁང་དང་ མ་ཙང་མ་ཆོ་ཁཱན་བ་ཀི་ ཕུང་མ༌ཅ། 28དུར་པུརུས་ཀིན་ཨ་ཉི་ ན་ཧ་བ་བུ་ ཕིས་ཀེ་གོད་པ་ཀབ་ཉི་ སོ་ངོ་དྲང་པུ་ད་བུ་ཐོང༌ལ། དག་པ་ཀབ་ཉི་ ན་ཧ་ནང་ཤོ་ འུ་དྲ་དང་སྡིག་པ་བ་ཀི་ཕུང་མ༌ལ།
29བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ ཧབ་ཏུར་ཀ་ལུ་ཨོ་ཕེ་ཡ། ནའི་འུ་དྲ་པ་བ་ ཧང་ཡ་དག་ནེ་ལ་ ལུང་བསྟན་པ་བ་ཀ་དུར་ ན་ཤི་ཅོད༌ལ། ཉི་སོ་ངོ་དྲང་པུ་བ་ཀ་དུར་ ན་ཤི་ཅེམ་པུ་ཅོད༌ལ། 30ཨའི་ཨ་ཧ་ཕ་མ་བ་ཀ་གང་ཀ་ ཆོན་ཐཱན་རང་གི་ནེ་བུ་ ཨ་ཤི་ཧ་ལ་རང་ རོག་ཏེ་བ་ཀབ་ཉི་དོབ་ཐཱན་ ལུང་བསྟན་པ་ མ་བཀྲོངས་མ་ཨོ་ཕེ་དག་ཉི་ ན་ཤི་ཡེག༌ལ།
31ཨོ་ཐེན་ཨ་ཉི་ ནའི་ནའི་ཏེན་གི་རང་ ན་ཧ་དགྲ་ཨ་ཉི་ ན་ཧ་བ་ཤོ་ ལུང་བསྟན་པ་བ་ཤེ་ཁཱན་ སོ་ངོ་བ་ཀ་རྒྱུད་པ་གི་ལ་དག་ཉི་ འཛོམས་དཔང་ཨ་ན། 32ཉི་ལ་ ཟེར་ཉི་ཐ་ཁཱན་ཁེ་པ་ ན་ཧ་ཕ་མ་བ་ཀ་སྡིག་པ་གི་ མ་ཕུང་ཁཱན་ཁེ་པ་ ན་ཤི་ཕུང་མེ་གོད་ཅོ། 33ན་ཧ་བ་ཤོ་ རུ་གེ་ནང་དང་ རུ་གེ་ནང་ག་ ད་ཟ་བ་གི་ཝ༌ལ། ན་ཧ་བ་ཀི་ དམྱལ་བ་ག་ཁྲིམས་གེ་ ཧང་ཏེན་ཨ་ཉི་ གཱན་ཐར་བེ་ཡ།
34ཨོ་ཉི་ཨ་དེན་གེ་ ཇི་གི་ ན་ཧ་བཱརང་ཀ་ ལུང་བསྟན་པ་བ་དང་ སོ་ངོ་མཁས་ཏྲ་བ་ ཉི་བཀའ་ཁྲིམས་ག་ སློབ་དཔོན་བ་ཀུན་ཏི༌ལེ། ཚེ་བང་ ན་ཤི་ཤེ༌ལེ། ཉི་ཚེ་བང་ ན་ཤི་ཁྲིམས་ཤིང་ག་ཇཱན༌མེ། ཉི་ཚེ་བང་ ན་ཤི་ན་ཧ་ཆོས་འཛོམས་ཁོན་ལབ་ཐཱན་ ཁྲོམ་ཆེན་ཐུར་གེ་ ཁྲོམ་ཆེན་ཐུར་ག་ཏཱན་ཁོན༌མེ། 35ཨོ་ཉི་ཨ་དེན་གེ་ འཛམ་གླིང་ནང་ཀ་ སོ་ངོ་དྲང་པུ་ ཐམས་ཅན་རང་ ཤེ་ཝ་ག་རྩིས་ ན་ཧ་བ་ཀེ་ལ༌ལེ། ཆཱོས་པ་ཧ་བིལ་ ཤེ་ཝ་གེ་གོ་ཙུག་ཉི་ མཆོད་ཁང་དང་ མཆོད་གཤམ་བར་ཀ་ཤེ་ཁཱན་ བེ་རི་ཀི་ཡ་ག་ཟ་ ཇ་ཀ་རི་ཡ་ཤེ་ཝ་ག་རྩིས་ ཐམས་ཅན་རང་ ན་ཧེ་ལ༌ལེ། 36ཇི་གི་ ན་ཧ་ཐྲང་ཉི་ཡེག་ཅ་ ཨོ་ཐ་ཁྲིམས་ ཐམས་ཅན་རང་ ཨོ་ཐ་མི་རབས་གི་ཉོང༌པེ། 37ཨའི་ ཡ་རུ་ཤ་ལེམ། ཨའི་ ཡ་རུ་ཤ་ལེམ། ནཱན་གི་ལུང་བསྟན་པ་བ་ཤེ་ན། ཉི་ན་ག་བཱརང་ཀ་ཀུན་ཏི་ཁཱན་ དཀོན་མཆོག་ག་འཐེན་པ་བ་ ན་ཤི་ལུ་ཤི་དྲོམ༌ལ། གོ་ག་ད་མ་གི་ རོ་ཀ་ད་ཟ་བ་ རོ་ཀ་ཡེ་ལམ་ཕརའ་ཁ་ ཀོམ་པ་པུརུས་ཀིན་ཨ་ཉི་ ཤེབ་མང་པུ་ཐུར་ ཇི་གི་ ན་ག་ཝག་ཙ་བ་ དུས་པེ་མིག་པ་ཕི་ཝ། དག་པ་ཀབ་ཉི་ ནཱན་གི་མ་ནཱན་ཤི། 38ཨོམ་ལ་ གོད་ཅོ་ ན་ག་ཕའི་ དཀོན་མཆོག་གི་ ཐུབ་ཐ་ཝ་ཨ་དེན་གེ་ ཏོང་པ་ཤོ་ཝ༌ལ། 39ཉི་ཨོམ་གི་ནེ་ལ་ གཙོ་བོ་ག་མཚན་ག་ བྱོན་ཁཱན་ཁེ་པ་ བྱིན་རླབས་ཅན་གི་ཝ་ལ་དག་ཉི་#23:39 མགུར་མ་ག་དཔེ་ཆ་ 118:26 ནཱན་གི་མ་ཡེག་པ་སག་པུ་ ནཱན་གི་ ཇང་ལོག་ཉི་མ་ཐོང་མ༎
Currently Selected:
མ་ཏི། 23: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
