མ་ཏི། 27

ཡི་ཤུ་ པི་ལ་ཏཱས་ག་སྐུན་མདུན་ག་ ཀེ་བ༌ལ།

1ཝུན་བེད་པེ་དག་པ་ཀབ་ཉི་ བླ་མ་ཆི་ལུ་བ་དང་ སོ་ངོ་ཆི་ལུ་བ་ཀི་ ཡི་ཤུ་བཀྲོངས་མེ་ག་ཀོར་གེ་ ཏུན་ཆ་དྲིག་པ༌ལ། 2ཉི་རོག་ཏེ་བ་ཀི་ ཡི་ཤུ་ཐིག་ཐཱན་རིག་བུ་ཉི་ རོ་མི་ག་དཔོན་སློབ་ པི་ལ་ཏཱས་ག་ སྐུན་མདུན་ག་ཏཱན་ ཀེ་བ༌ལ༎

ཡ་ཧུ་ད་ངང་ཞི་ཉི་ཤི་ཝ༌ལ།

3མགུ་སྐོར་ཕི་ཁཱན་ ཡ་ཧུ་ད་གི་ ཡི་ཤུ་བཀྲོངས་མེ་གི་ཝ་ལ་དག་ཉི་ དྲཱན་ཉི་ རོག་གནམ་མེད་ས་མེད་ སེམས་ཕ་མེ་ཨོ་ཕ༌ལ། ཉི་རོ་ཀི་ དངུལ་ག་ཏི་རུ་ 30 ཁེ་པ་ ལོག་ཉི་བླ་མ་ཆི་ལུ་བ་དང་ སོ་ངོ་ཆི་ལུ་བ་ཀ་བཱརང་ཀ་བུན་ཐཱན་ 4ཡེག་པ་ལ་ ཇི་གི་སོ་ངོ་དྲང་པུ་ག་ ཚེ་ག་མགུ་སྐོར་ཕི་ཉི་ སྡིག་པ་ཨ་ཝ་ལ་དག༌ཉི།

དག་པ་ཀབ་ཉི་ རོག་ཏེ་བ་ཀི་ཡེག་པ་ལ་ ཨ་ཧ་ཡེག་ཉི་ ཁུངས་ཧང་རང་མཱན༌ཅ། ཨུ་ཉུ་ཤོ་ ནཱན་ནཱན་ཏེན་གི་ གོད་པེ་ཁེ་ལེ་དག༌ཉི།

5ཉི་ཡ་ཧུ་ད་གི་ དངུལ་ག་ཏི་རུ་ཁེ་པ་ མཆོད་ཁང་ནང་ཀ་ གེམ་ཀུན་ཏི་ཝ༌ལ། ཉི་ཉ་གེ་དིན་ཐཱན་ ངང་ཞི་ཉི་ཤི་ཝ༌ལ།

6དག་པ་ཀབ་ཉི་ བླ་མ་ཆི་ལུ་བ་ཀི་ ཏི་རུ་དུང་ཐཱན་ཡེག་པ་ལ་ ཨོ་ཐ་ཏི་རུ་ཤོ་ ཞི་ག་ཏི་རུ་གི་ཝ་ཨ་དེན་གེ་ ཨ་ཤི་མཆོད་ཁང་ག་ སྙན་དར་ཀབ་ཏབ་ཐུར་ཡ་ཉི་ ཐ་ལེ་མ་ན་ལ་དག༌ཉི། 7ཨོ་ཉི་ཨ་དེན་གེ་ ཨོ་ཉ་ཏི་རུ་གི་ ཕིས་ཀ་སོ་ངོ་ཤི་ཁཱན་བ་ཀ་ དི་ཁྲོ་ཅོད་པེ་དེན་གེ་ ས་ཐུར་ངོ་ལེ་དག་ཉི་ ཏུན་ཆ་དྲིག་ཉི་ རོག་ཏེ་བ་ཀི་ ས་ཁོ་པ་ཐུར་གེ་ རོ་ཀ་ས་ངོ་ཝ༌ལ། 8ཨོ་ཉི་ཨ་དེན་གེ་ ཨོ་མ་སག་པུ་རང་ ཨོ་ཉ་ས་ག་མིང་ ཞི་ག་ས་དག་ཉི་ ཆིན་ཅ་གི་ཝ༌ལ། 9ཨོ་ཐེན་ཨ་ཉི་ ལུང་བསྟན་པ་ ཡར་མི་ཡ་གི་ ལུང་བསྟན་ཁཱན་ཁེ་པ་ དེན་ཐ་འགྲུབ་ཕ་གི་ཝ༌ལ།

རོག་ཏེ་བ་ཀི་ དངུལ་ག་ཏི་རུ་ 30 བུ་ཝ། ཉི་ཨུ་ཉུ་ཤོ་ ཨིས་རེལ་ག་སོ་ངོ་བ་ཀི་ རོ་ཀ་ངེ་ལོང་བི་ལེ་དག་ཉི་ ཏུན་ཆ་དྲིག་ཁཱན་ ཏི་རུ་གི༌ལ། 10ཉི་གཙོ་བོ་གི་ ཇ་ག་བཀའ་གནང་མ་དང་ཏུ་ཉི་ ཨོ་ཉ་ཏི་རུ་གི་ ས་ཁོ་པ་གེ་ ས་ངོ་ཝ་གི་ལ་#27:10 ཇ་ཀ་རི་ཡ་ག་དཔེ་ཆ་ 11:12,13; ཡར་མི་ཡ་ག་དཔེ་ཆ་ 19:1–13; 32:6–9 དག༌ཉི༎

པི་ལ་ཏཱས་གི་དྲི་ཝ་ཇི་མ༌ལ།

11ཉི་ཨོམ་ ཡི་ཤུ་ པི་ལ་ཏཱས་ག་ སྐུན་མདུན་ག་ཐིང་ཉི་ བཞུགས་པ་ཅ་གི་ཝ༌ལ། ཉི་པི་ལ་ཏཱས་གི་ རོ་ཀ་ཇི་མ་ལ་ ནཱན་ཡ་ཧུ་དི་པ་ག་ དཔོན་གི་ལ་སྨོ་དག༌ཉི།

ནཱན་གི་རང་ཡེག་ལ་དག་ཉི་ ཡི་ཤུ་གི་གསུངས་མ༌ལ།

12དག་པ་ཀབ་ཉི་ བླ་མ་ཆི་ལུ་བ་དང་ སོ་ངོ་ཆི་ལུ་བ་ཀི་ རོ་ཀ་ཧབ་ཏུར་ མ་ལེག་པ་ཞུ་ནེ་བུ་ རོ་ཀི་ རོག་ཏེ་བ་ཀ་ ལན་མ་གནང་མ༌ལ། 13ཉི་པི་ལ་ཏཱས་གི་ རོ་ཀ་གསུངས་མ་ལ་ རོག་ཏེ་བ་ཀི་ ན་ག་དགྲ་ཨ་ཉི་ ཧབ་ཏུར་མ་ལེག་པ་ ཡེག་ལ་ཡ། རོག་ཏེ་བ་ཀི་ ཡེག་ཁཱན་ཁེ་པ་ ནཱན་གི་ ན་ཐ་ལུ་མ་ལ་སྨོ་དག༌ཉི། 14དག་པ་ཀབ་ཉི་ ཡི་ཤུ་གི་ རོ་ཀ་ལན་མ་གནང་མ༌ལ། ཨུ་ཉུ་མ་ཚཱད་པ་ རོ་ཀ་ཏཱན་ ཧབ་ཏུར་མ་ལེག་པ་ཞུ་ནེ་བུ་ རོ་ཀི་ཆཱས་ཁམ་ཐུར་རང་ མ་གསུངས་མ་ག་གོད་ཉི་ པི་ལ་ཏཱས་ གནམ་མེད་ས་མེད་ ཡིད་ཆི་ཝ༌ལ།

15ཉི་ཨོམ་ སོ་ངོ་བ་ཀ་སེམས་དང་ཏུ་ཉི་ ཉིང་དྲང་རང་ གོག་ཉི་དི་ཝ་ག་དུས་ཆེན་ག་གང་ཀ་ པི་ལ་ཏཱས་གི་ བཙོན་པ་ཐུར་རེ་རེ་ བཙོན་གེ་ཐར་ཅ་གི་ཝ༌ལ། 16ཨུ་ཉུ་གང་ཀ་ གནམ་མེད་ས་མེད་ མིང་གཏམ་ཡཱན་མུ་ཆོ་ཁཱན་ བ་རབ་བ་དག་ཁཱན་ཐུར་ བཙོན་ག་ཅ་གི་ཝ༌ལ། 17སོ་ངོ་བ་ཛོམ་དེན་གེ་ པི་ལ་ཏཱས་གི་ རོག་ཏེ་བ་ཀ་ ཇི་མ་ལ་ ཇི་གི་ ན་ཧ་དེན་གེ་ ཨི་བི་ཐར་ཤོ་ཡ། བ་རབ་བ་ཐར་ཤོ་སྨོ་ ཁིརིས་དག་ཉི་ར་ཁཱན་ ཡི་ཤུ་ཐར་ཤོ་ཡ་དག༌ཉི། 18ཧང་ཡ་དག་ནེ་ལ་ ཡ་ཧུ་དི་པ་འགོ་དཔོན་བ་ཀི་ ཕྲག་དོག་ཨ་ཉི་ ཡི་ཤུ་ རོ་ཀ་ཕྱག་ཀ་ སྤྲོད་པ་གི་ལ་དག་ཉི་ པི་ལ་ཏཱས་གི་ མཁྱེན་མ་ཆོ་ཝ༌ལ།

19པི་ལ་ཏཱས་ དྲང་དཔོན་ག་ ཁྲི་ཐུང་ཀ་བཞུགས་ཅ་ཨ་ཉི་ རོ་ཀ་མེ་ཝག་ཙ་གི་ ཨོ་ཐ་འཐེན་ཀེ་བ༌ལ། ཨོ་ཉ་སོ་ངོ་དྲང་པུ་ཀབ་ཉི་ ཧང་རང་ཨ་ལེ་མ་ཁེ༌ལ། ཧང་ཡ་དག་ནེ་ལ་ རོ་ཀ་ཡོར་ཀེ་ ཨི་ཉིང་བི་ནང་ག་ མོང་ཤི་ནང་ཀ་ ཇང་གནམ་མེད་ས་མེད་ ནང་དོག་པ་དག༌ཉི།

20དག་པ་ཀབ་ཉི་ བླ་མ་ཆི་ལུ་བ་དང་ སོ་ངོ་ཆི་ལུ་བ་ཀི་ སོ་ངོ་བ་ཀ་ཏྲོག་ཉི་ བ་རབ་བ་ཁེ་པ་ བཙོན་གེ་ཐར་ཐཱན་ ཡི་ཤུ་ཤོ་ བཀྲོངས་མེ་ག་ཙུག་ཅོ་དག་ཉི་ པི་ལ་ཏཱས་ག་ ཞུ་ལེ་བི་ཝ༌ལ། 21ཉི་པི་ལ་ཏཱས་གི་ ཨོམ་ཆང་རང་ རོག་ཉིག་ཙིང་གེ་ ཇི་གི་ ན་ཧ་དེན་གེ་ ཨི་བི་ཐར་བེ་ཡ་དག་ཉི་ ཇི་མ་ཀབ་ཉི་ སོ་ངོ་བ་ཀི་ རོ་ཀ་ཞུ་ཝ་ལ་ བ་རབ་བ་ཐར་ཤོ་དག༌ཉི།

22ཉི་པི་ལ་ཏཱས་གི་ སོ་ངོ་བ་ཀ་ཇི་མ་ལ་ ཁིརིས་དག་ཉི་ར་ཁཱན་ཡི་ཤུ་ག་ ཇི་གི་ཧང་ཨ་ལེ་ཁེ་ལེ་ཡ་དག༌ཉི།

རོག་ཏེ་བ་ ཐམས་ཅན་གི་ ཞུ་ཝ་ལ་ དཱན་ ཁྲིམས་ཤིང་གེ་ཇཱན་ཤོ་དག༌ཉི།

23ཉི་རོ་ཀི་ རོག་ཏེ་བ་ཀ་ཇི་མ་ལ་ རོ་ཀི་ཁྲིམས་གེ་གེ་བ་ག་ལའི་ ཧང་ཨ་ཝ་ལ་ཡ་དག༌ཉི།

དག་པ་ཀབ་ཉི་ རོག་ཏེ་བ་ཀི་ ལག་ཏང་ཤ་དར་ཕི་ཉི་ རོག་ཁྲིམས་ཤིང་ག་ཇཱན་ཤོ་ཨ་ཉི་ ཞུ་ཝ༌ལ།

24ཉི་པི་ལ་ཏཱས་གི་ གཟིགས་པ་ཀབ་ཉི་ ཧང་རང་ཨ་ལེ་མར་བེ་ད་བུ་ ཐོང་མ༌ལ། ལག་ཏང་ སོ་ངོ་བ་མང་པུ་ ཟིང་ཅ་གི་ཝ༌ལ། ཨོ་ཉི་ཨ་དེན་གེ་ རོ་ཀི་ རོ་ཀ་ཕྱག་ རི་གི་ཟིག་ཐཱན་ སོ་ངོ་བ་ཀ་གསུངས་མ་ལ་ ཨོ་ཐ་སོ་ངོ་ག་ཞི་ ཇ་ག་ཤ་རང་ག་མང་ཕ་ན། ཉི་ཨོ་ཐ་སྡིག་པ་ཤོ་ ན་ཤི་བང་མེ་ཁེ་ལེ་ན་དག༌ཉི།

25ཉི་སོ་ངོ་ཐམས་ཅན་གི་ ཨོ་ཐ་སོ་ངོ་ཤེ་ཝ་ག་ཞི་ཁེ་པ་ ཨའི་དང་ ཨ་ཧ་ཝག་ཙ་བ་ཀ་ ཤ་རང་ག་ཨུན་ཆེན་དག་ཉི་ ཞུ་ཝ༌ལ།

26ཨོ་ཉི་ཨ་དེན་གེ་ པི་ལ་ཏཱས་གི་ རོག་ཏེ་བ་ཀ་དེན་གེ་ བ་རབ་བ་བཙོན་གེ་ ཐར་བ༌ལ། ཉི་ཡི་ཤུ་ཤོ་ ལ་ཕེ་བིན་ཐཱན་ ཁྲིམས་ཤིང་ཐུང་ཀ་ཇཱན་ཉི་ བཀྲོངས་མེ་དེན་གེ་ རྩིས་སྤྲོད་པ༌ལ༎

དམག་མི་བ་ཀི་ ཡི་ཤུ་ག་མེམ་ཅོར་བ༌ལ།

27ཉི་དཔོན་སློབ་ག་ དམག་མི་བ་ཀི་ ཡི་ཤུ་དཔོན་སློབ་ག་ གཟིམ་ཅུང་ག་བུན་ཐཱན་ དམག་མི་ག་སྡེ་ཁག་ ཐམས་ཅན་རང་རཱན་ཐཱན་ རོ་ཀ་ཀོ་ལོ་ལོ་ཆོ་ལེ་བི་ཝ༌ལ། 28རོག་ཏེ་བ་ཀི་ རོ་ཀ་ནམ་བཟའ་ཕེག་ཐཱན་ ནམ་བཟའ་ ཁ་རྒྱ་སྨུག་ཨ་ཝ་ཆོ་ཁཱན་ཁེ་པ་ ཡེན་བི་ཝ༌ལ། 29ཉི་རོག་ཏེ་བ་ཀི་ ཟུ་ག་རྒྱལ་ཞྭ་ཅོད་ཐཱན་ རོ་ཀ་མུག་ཉི་བི་ཝ༌ལ། ཉི་གེ་ རོག་ཏེ་བ་ཀི་ རོ་ཀ་ལ་ཉོང་ལོ་ཀ་ཕྱག་ཀ་ ཕྱག་འཁར་ཙུང་མེ་བི་ཝ༌ལ། ཉི་རོག་ཏེ་བ་ཀི་ རོ་ཀ་མེམ་ཅོར་ཉི་ ཕྱག་འཚལ་ཐཱན་ ཞུ་ཝ་ལ་ ཡ་ཧུ་དི་པ་ག་དཔོན་ སྐུ་ཚེ་རིང་ཤོ་དག༌ཉི། 30ཉི་རོག་ཏེ་བ་ཀི་ རོ་ཀ་ཐོབ་ཏང་ཚེན་ཐཱན་ རོ་ཀ་ཕྱག་ཀ་ཆོ་ཁཱན་ ཕྱག་འཁར་བུ་ཉི་ ཨོ་ཉ་ཕྱག་འཁར་གི་ རོ་ཀ་དབུ་ག་ཀོང་མ༌ལ། 31ཉི་རོག་ཏེ་བ་ཀི་ རོ་ཀ་མེམ་ཅོར་ཉི་ཆུམ་དེན་གེ་ ཨོ་ཉ་ནམ་བཟའ་ རྒྱ་སྨུག་ཁེ་པ་ཕེག་ཐཱན་ ལོག་ཉི་རང་ རོ་ཀ་ནམ་བཟའ་ཁེ་པ་ ཡེན་བི་ཝ༌ལ། ཉི་རོག་ཏེ་བ་ཀི་ རོག་ཁྲིམས་ཤིང་ཐུང་ཀ་ཇཱན་ཉི་ བཀྲོངས་མེ་དེན་གེ་ རིག་བུ་ཝ༌ལ༎

ཡི་ཤུ་ཁྲིམས་ཤིང་ག་ཇཱན་ཉི་ བཀྲོངས་མ༌ལ།

32རོག་ཏེ་བ་ དིན་ཅ་ཨ་ཉི་ ཀུ་རེ་ནི་དག་ས་གེ་ སི་མོན་དག་ཁཱན་ སོ་ངོ་ཐུར་རུ་མ༌ལ། ཉི་རོག་ཏེ་བ་ཀི་ རོ་ཀ་བང་ཙོང་ཉི་རང་ ཡི་ཤུ་ག་ཁྲིམས་ཤིང་ བང་མེ་བི་ཝ༌ལ། 33ཉི་རོག་ཏེ་བ་ གལ་ག་ཐ་དག་ས་ ས་ཆ་ག་ཤེག་ཏེན་གེ་ (གལ་ག་ཐ་ག་ དེན་ཐ་ཤོ་ ཐོད་པ་ག་བཱརང་།) 34ཞུ་ནང་ཀ་ཁ་ལུ་ཆོ་ཁཱན་ ཟེ་ཐུར་ཡཱན་ཐཱན་ རོག་ཏེ་བ་ཀི་ ཡི་ཤུ་ག་དྲང་མ༌ལ། དག་པ་ཀབ་ཉི་ རོ་ཀི་ད་སུར་བཞེས་ཉི་གོད་ཐཱན་ བཞེས་ལེ་མ་ན་ཝ༌ལ།

35རོག་ཁྲིམས་ཤིང་ཐུང་ཀ་ ཇཱན་དེན་གེ་ དམག་མི་བ་ཀི་ རོ་ཀ་ནམ་བཟའ་ བོང་མེ་དེན་གེ་ ཤོ་ཕི་ཝ༌ལ། 36ཉི་རོག་ཏེ་བ་ ས་ག་ལང་ཐཱན་ རོག་ཁུང་ཉི་རང་ཆོ་ཝ༌ལ། 37ཉི་རོ་ཀ་དབུ་ ཐུང་ཀ་ རོ་ཀ་ཁྲིམས་ཀེ་བེ་ག་དེན་ཐ་ ཧང་གི་ལ་སྨོ་ ཨོ་ཉ་ཀོར་གེ་འབྲི་ཐཱན་ ཆེབ་ཉི་ཐ་ཝ༌ལ། ཨོ་ཐ་ཡི་ཤུ་ཤོ་ ཡ་ཧུ་དི་པ་ག་དཔོན་གི་ལ་དག་ཉི་ འབྲི་བ་ཆོ་ཝ༌ལ། 38དྲོ་ཝཱན་པ་ཉིག་ཙིང་བུ་ རོག་ཀབ་ཉི་ རོ་ཀ་ལ་ཉོང་མི་ཉོང་གེ་ ཁྲིམས་ཤིང་ག་ ཇཱན་མ་ཆོ་ཝ༌ལ།

39ཉི་ཨོ་ཉ་ལབ་ཀེ་དང་ཁཱན་སོ་ངོ་བ་ཀི་ ཤ་རང་ཝག་ཉི་ གནམ་མེད་ས་མེད་ མ་ལེག་པ་ཡེག་པ༌ལ། 40ནཱན་གི་ མཆོད་ཁང་དེད་གེམ་ཐཱན་ ནོང་སམ་ག་ ལོག་ཉི་ཅོད་པེ་དག་ཉི་ ཡེག་ཆོ་ཝ། ནཱན་དཀོན་མཆོག་ག་ སྲས་གི་ནེ་ལ་ ནཱན་གི་ ནཱན་ཏེན་ག་ སྲོག་རྒྱབ་ཨ་ཉི་ ཁྲིམས་ཤིང་གེ་དོང་ཞུའི་དག་ཉི་ ཞུ་ཝ༌ལ།

41ཨུ་ཉུ་པུརུས་ཀིན་ཨ་ཉི་རང་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ ཉི་སོ་ངོ་ཆི་ལུ་བ་ཀི་ རོ་ཀ་མེམ་ཅོར་ཉི་ ཞུ་ཝ་ལ་ 42རོ་ཀི་བཱརའ་ག་སྲོག་རྒྱབ་ཨ་ཝ། དག་པ་ཀབ་ཉི་ རོ་ཀི་ རོག་ཏེན་ག་སྲོག་རྒྱབ་ ཨ་ལེ་རེ་བུ་མ༌ལ། རོག་ཨིས་རེལ་ག་ དཔོན་མང་གི་སྨོ། རོག་ཁྲིམས་ཤིང་གེ་དོང་ཞུ་ཉི་ ཨོ་ཕེ་རེ་ནེ་ལ་ ཨ་ཤི་ རོ་ཀ་དད་པ་ཨ༌ལེ། 43རོ་ཀི་དཀོན་མཆོག་ག་ དད་པ་ཨན༌ཅ། ཉི་རོག་ཤོ་ དཀོན་མཆོག་ག་ སྲས་གི་ལ་དག་ཉི་ ཡེག༌ལ། གིན་ཐཱན་ཨ་ནེ་ལ་ དཀོན་མཆོག་གི་ རོ་ཀ་སྐྱབས་ཨ་ན་སྨོ་ ཨ་ཤི་གོད་ཀེ་དག་ཉི་ ཡེག་པ༌ལ། 44ཉི་རོག་ཀབ་ཉི་ཏབ་ཐུར་ ཁྲིམས་ཤིང་ཐུང་ཀ་ཇཱན་ཁཱན་ དྲོ་ཝཱན་པ་ཉིག་ཙིང་གི་བུ་ རོ་ཀ་སྐུར་པ་ཞུ་ཝ༌ལ༎

ཡི་ཤུ་གཤགས་པ༌ལ།

45ཉི་ངམ་བར་ཀ་ ཆུ་ཚོད་སོང་ཉིག་ཙིང་གེ་ ཆུ་ཚོད་སམ་སག་པུ་ ཨོ་ཉ་ས་ཆ་ ཐམས་ཅན་རང་ མེར་བུ་རི་ཝ༌ལ། 46ཉི་ཆུ་ཚོད་སམ་དི་ལ་ཀབ་ཉི་ ཡི་ཤུ་གི་ གསུང་སྐད་ཆི་ལུ་ཨ་ཉི་ ཞུ་ཝ་ལ་ ཨི་ལོའི་ ཨི་ལོའི་ ལ་མ་ས་བཱག་ཐ་ནི་དག༌ཉི། ཨོ་ཐེན་ཞུ་ལེ་དེན་ཐ་ཤོ་ ཇ་ག་དཀོན་མཆོག་ ཇ་ག་དཀོན་མཆོག་ ནཱན་གི་ ཇང་ཧང་ཨ་ཉི་ ཐུབ་ཐ་ཝ་ཡ་#27:46 མགུར་མ་ག་དཔེ་ཆ་ 22:1 དག་ཉི་ ཞུ་ཝ་གི་ཝ༌ལ།

47ཉི་ཨོ་ཉ་ར་ག་ཆོ་ཁཱན་ ཚེ་བང་གི་ ན་ཐ་ཉི་ཡེག་པ་ལ་ རོ་ཀི་ལུང་བསྟན་པ་ ཨེ་ལི་ཡ་ར་ན་དག༌ཉི། 48རོག་ཏེ་བ་ཀ་པོང་ཀེ་ ཐུར་གི་དི་ཝ་ཐྲེ་ཀེ་རང་ ཞུ་ཅུར་པུ་ནང་ཀ་ བག་ཏང་ཐུར་ཤུམ་ཐཱན་ བཞེས་ལེ་ག་དེན་གེ་ ཡི་ཤུ་ག་ཕུལ་བ༌ལ། 49དག་པ་ཀབ་ཉི་ བཱརའ་བ་ཀི་ ཡེག་པ་ལ་ ནོང་ཤོ་ ཨེ་ལི་ཡ་ཨུན་ཐཱན་ རོ་ཀ་སྐྱབས་ཨ་ན་སྨོ་ ཨ་ཤི་གོད་ཀེ་དག༌ཉི།

50ཡི་ཤུ་གི་ ཨོམ་ཆང་ཤེབ་ཐུར་ གསུང་སྐད་ཆི་ལུ་ཨ་ཉི་གསུངས་ཐཱན་ རོག་བཤགས་པ༌ལ། 51ཨུ་ཉུ་གང་ཀ་ མཆོད་ཁང་ནང་ཀ་ཆོ་ཁཱན་ ཡོ་ལུ་ཁ་ཤ་ཁེ་པ་ ཐོ་ལ་ཐུང་ཀེ་དོང་ ར་ག་སག་པུ་རེད་ཇོང་ཉི་ ཉིག་ཙིང་རི་ཝ༌ལ། འཛམ་གླིང་དྲེང་མ༌ལ། ཉི་ལུང་ཆི་ལུ་བ་ཁང་ཉི་ ལེང་ཐེང་སིག་པ༌ལ། 52ཉི་དུར་ག་བ་བུ་ཕེག་ཉི་ དཀོན་མཆོག་ག་ དད་པ་ཀེ་ཉི་ཤི་ཁཱན་བ་ མང་པུ་ཐུར་ ལོག་ཉི་ཝུ་ཝ༌ལ། 53རོག་ཏེ་བ་ དུར་གེ་ཕིས་ཀ་ཤོན་ཐཱན་ ཡི་ཤུ་གསོན་པོ་ཨ་ཉི་ སྐུ་བཞེངས་ཏེན་གེ་ དམ་པའི་ཁྲོམ་ཆེན་ག་བྱོན་ཐཱན་ སོ་ངོ་མང་པུ་ཐུར་ག་ མཇལ་ཁ་གནང་མ༌ལ།

54ཡི་ཤུ་ཁུང་ཁཱན་ རོ་མི་ག་དམག་དཔོན་དང་ རོ་ཀ་དམག་མི་བ་ཀི་ ན་ཀ་དང་ ཨོ་ཉ་ས་ཆ་ག་ཇུང་ཁཱན་ བཱརའ་ཐམས་ཅན་རང་ཐོང་ཉི་ རོག་ཏེ་བ་ གནམ་མེད་ས་མེད་ ཡོང་ཁེ་ཝ༌ལ། ཉི་རོག་ཏེ་བ་ཀི་ཞུ་ཝ་ལ་ རོག་གི་ནེ་ལ་ ཏེན་ཏེན་རང་ དཀོན་མཆོག་ག་ སྲས་གི་ཝ་ཆོན་དག༌ཉི།

55ཉི་མེ་ཝག་ཙ་ མང་པུ་ཐུར་གི་ ཇང་ཀིན་གེ་གོད་ཉི་ ཆོ་ཝ་ཅ་གི་ཝ༌ལ། ཉི་རོག་ཏེ་བ་ཤོ་ ག་ལིལ་གེ་ ཡི་ཤུ་ག་ཞབས་ཏོག་ཞུ་ཉི་ ཨུ་ཁཱན་བ་གི་ཝ་ཆོ་ཝ༌ལ། 56རོག་ཏེ་བ་ཀ་པོང་ཀེ་ མ་རི་ཡམ་མག་ད་ལི་ནི་དང་ ཡ་ཀུབ་དང་ཡོ་སེཕ་ག་ཨ་མ་ མ་རི་ཡམ་ ཉི་གེ་ ཇབ་དི་ཡ་ག་ ཟ་ཉིག་ཙིང་ག་ ཨ་མ་བུ་ཅ་གི་ཝ༌ལ༎

ཡི་ཤུ་དུར་ནང་ཀ་ཙུག་པ༌ལ།

57ཨ་རི་མ་ཐི་ཡ་དག་ས་གེ་ ཡོ་སེཕ་དག་ཁཱན་ སོ་ངོ་བེ་དིང་ཐུར་ ཡི་ཤུ་ག་ སློ་མ་གི་ཝ་ཆོ་ཝ༌ལ། ཉི་མིང་མེར་སེ་ཨ་ལ་ཀབ་ཉི་ 58རོག་པི་ལ་ཏཱས་ག་ སྐུན་མདུན་ག་བཅག་ཐཱན་ ཡི་ཤུ་ག་སྐུ་ཕུང་གནང་ཤོ་དག་ཉི་ ཞུ་ཝ༌ལ། ཉི་པི་ལ་ཏཱས་གི་ ཡི་ཤུ་ག་སྐུ་ཕུང་ རོ་ཀ་ཏཱན་བི་དག་ཉི་ བཀའ་གནང་མ༌ལ། 59ཡོ་སེཕ་གི་ ཡི་ཤུ་ག་སྐུ་ཕུང་བུན་ཐཱན་ ཁ་ཤ་བ་ལིང་མིན་ ཧིང་སང་སང་ཨ་ཝ་གི་ ལོ་མ༌ལ། 60ཉི་རོ་ཀི་ ཡི་ཤུ་ག་སྐུ་ཕུང་ཁེ་པ་བུན་ཐཱན་ རོག་ཏེན་གི་ཅོད་ཁཱན་ ལུང་ག་དུར་སིང་མ་ནང་ཀ་ ཐ་ཝ༌ལ། ཉི་དུར་ག་ཀོ་ དམ་པེ་དེན་གེ་ ལུང་ཆི་ལུ་ཐུར་ རི་ཉི་བུན་ཐཱན་ཐ་ཝ༌ལ། ཉི་ཤ་ རོག་ཨོ་ཉ་གེ་ དི་ཝ༌ལ། 61མ་རི་ཡམ་མག་ད་ལི་ནི་དང་ ཨོམ་ཐུར་མ་རི་ཡམ་བུ་ དུར་ག་ལོག་ཐུར་ལོ་ཀ་ལང་ཉི་ ཆོ་ཝ་ཅ་གི་ཝ༌ལ༎

ཡི་ཤུ་ག་དུར་ཁུང་མ༌ལ།

62ནམ་ནིང་ད་བུ་ ཅམ་པེ་ག་ནོང་ཆུམ་དེན་གེ་ བླ་མ་ཆི་ལུ་བ་དང་ ཕ་རི་སི་པ་བ་ པི་ལ་ཏཱས་ག་ སྐུན་མདུན་ག་ཛོ་མ༌ལ། 63རོག་ཏེ་བ་ཀི་ཞུ་ཝ་ལ་ དྲག་ཤོས་ ཨོ་ཉ་མགུ་སྐོར་པ་གི་ རོག་མ་ཤི་ལེ་གོ་མ་ རོ་ཀི་ ཨ་ཧ་ཡེག་ཆོ་ཝ་ ནོང་སམ་ག་ཚི་ངེ་ ལོག་ཉི་ཝུ་ལེ་དག༌ཉི། 64ཨོ་ཉི་ཨ་དེན་གེ་ ནོང་སམ་སག་པུ་ དུར་ཁུང་ཁཱན་ཙུག་ཉི་གནང༌ཤོ། ཨུ་ཉུ་མ་ནེ་ལ་ རོ་ཀ་སློ་མ་བ་ཨུ་ཉི་ རོ་ཀ་ཕུང་པུ་ དྲོ་ཝཱན་ཨ་ཉི་བུན་ཐཱན་ཡེག་པེ་ རོག་ཤི་ཝ་གེ་ ལོག་ཉི་ཝུ་ཝ་དག༌ཉི། ཉི་ཨོ་ཐ་མགུ་སྐོར་མཇུག་དུས་ཁེ་པ་ རོ་ཀི་གོ་དང་པ་ མགུ་སྐོར་ཕི་ཁཱན་གེ་བུ་ མ་ལེག་པ་ཨོ་ཕེ་དག༌ཉི།

65པི་ལ་ཏཱས་གི་ རོག་ཏེ་བ་ཀ་གསུངས་མ་ལ་ ཇི་གི་ ན་ཧ་བ་ཀ་ སྲུང་རྒྱབ་པ་བི༌ལེ། དིན་ཐཱན་ དུར་ཁེ་པ་ ཧབ་ཏུར་ལེག་པཱན་ ཁུང་མེ་རེ་བ་ཐུར་ ཁུང་ཤོ་དག༌ཉི། 66ཨོ་ཉི་ཨ་དེན་གེ་ རོག་ཏེ་བ་ དིན་ཐཱན་ དུར་ག་ཐེལ་ཙི་ཕི་ཉི་ ཨི་བི་གི་རང་ ཆོག་པེ་མ་ཝ་ཅོད་པ༌ལ། ཉི་དུར་ཁུང་ཁཱན་ སྲུང་རྒྱབ་པ་བུ་ཙུག་པ༌ལ༎

Currently Selected:

མ་ཏི། 27: TNTB

Highlight

Copy