མ་ཏི། 9
9
ཟ་ན་ཚ་ཁེ་ཁཱན་སོ་ངོ་ དྲག་ཉི་གནང་མ༌ལ།
1ཡི་ཤུ་ལོག་ཉི་རང་ གྲུ་ནང་ཀ་བྱོན་ཐཱན་ མཚོ་གེ་ཉི་ རོ་ཀ་ཁྲོམ་ག་ཏཱན་ བྱོན་མ༌ལ། 2སོ་ངོ་ཚེ་བང་གི་ ཟ་ན་ཚ་ཁེ་ཉི་མར་ཁཱན་ སོ་ངོ་ཐུར་ རོ་ཀ་ཏཱན་ཀབ་ཉི་རང་ བང་ཉི་ཕཱན་ཐཱན་ རོ་ཀ་སྐུན་མདུན་ག་ཀེ་བ༌ལ། ཡི་ཤུ་གི་ རོག་ཏེ་བ་ཀ་ དད་པ་ག་གཟིགས་ཉི་ མར་ཁཱན་སོ་ངོ་ག་གསུངས་མ་ལ་ ཇ་ག་ཟ་ ཤོ་ནང་ཕེ། ན་ག་སྡིག་པ་བ་ བཀའ་དྲིན་བསྐྱང་མ་དག༌ཉི།
3བཀའ་ཁྲིམས་ག་ སློབ་དཔོན་ཚེ་བང་གི་ རོག་ཏེ་བ་ནང་དོ་ ཆཱས་ཨ་ཉི་ ཨོ་ཐ་སོ་ངོ་གི་ སྐུར་པ་ཞུ་ན་དག་ཉི་ ཡེག་པ༌ལ།
4དག་པ་ཀབ་ཉི་ ཡི་ཤུ་གི་ རོག་ཏེ་བ་ཀི་ མི་ཁཱན་མཁྱེན་ཉི་ གསུངས་མ་ལ་ ན་ཤི་ ཧང་ཨ་ཉི་ སེམས་ངན་པ་མིན་ཅ་ཡ། 5ཧང་ཡེག་པེ་ག་ཡ་ལུ་ཡ། ན་ག་སྡིག་པ་བ་ བཀའ་དྲིན་བསྐྱང་མ་དག་ཉི་ ཡེག་པེ་ག་ཡ་ལུ་སྨོ། ག་ཝུན་ཐཱན་ དང་ཤོ་དག་ཉི་ ཡེག་པེ་ག་ཡ་ལུ་ཡ། 6དག་པ་ཀབ་ཉི་ སོ་ངོ་ག་ཟ་གི་ འཛམ་གླིང་ག་ སྡིག་པ་བཀའ་དྲིན་བསྐྱང་མེ་ག་ དབང་ཚད་ཅ་དག་ཉི་ ཇི་གི་ ན་ཧ་ཁུངས་ཀེ་ཉི་བི་ལེ་ཨ་ཉི་ གསུངས་ཐཱན་ རོ་ཀི་ཟ་ན་ཚ་ཁེ་ཁཱན་ག་ གསུངས་མ་ལ་ ག་ཝུན་ཐཱན་ ན་ག་ཏཱན་བང་བུ་ཉི་ ཕའི་ག་དི་དག༌ཉི།
7ཉི་རོག་ ག་ཐིང་ཐཱན་ ཕའི་ག་དི་ཝ༌ལ། 8ཧང་ཇུང་མ་གི་ལ་སྨོ་ ཨུ་ཉུ་ཁེ་པ་སོ་ངོ་མང་པུ་ཨ་ཉི་ ཛོམ་ཁཱན་བ་ཀི་ ཐོང་མ་ཀབ་ཉི་ རོག་ཏེ་བ་ ཡོང་ཁེ་ཝ༌ལ། སོ་ངོ་ག་ ཨུ་ཐུ་ད་བུ་དབང་ཚད་ གནང་མ་ཨ་དེན་གེ་ རོག་ཏེ་བ་ཀི་ དཀོན་མཆོག་ག་ བསྟོད་པ་ཕུལ་བ༌ལ༎
ཡི་ཤུ་གི་ མ་ཏི་སི་ཝ༌ལ།
9ཡི་ཤུ་ ཨོ་ཉ་ལམ་གེ་ བྱོན་ཅ་ཨ་ཉི་ ཁྲལ་དུས་ཁཱན་ སོ་ངོ་ཐུར་ག་མིང་ མ་ཏི་དག་ཁཱན་ཁེ་པ་ རོ་ཀ་ཡིག་ཚང་ནང་ཀ་ ལང་ཉི་ཆོ་ཝ་ག་གཟིགས་ཉི་ གསུངས་མ་ལ་ ཇ་ག་ཚིང་ཚིང་ཨོ་དོ་དག༌ཉི། ཉི་མ་ཏི་གི་ ཐིང་མ་ཐྲེ་ཀེ་རང་ རོ་ཀ་ཕྱག་ཞུ་ཉི་ དི་ཝ༌ལ།
10མ་ཏི་ག་ཕའི་ག་ ཡི་ཤུ་ཚོགས་བཞེས་ལེ་གང་ཀ་ ཁྲལ་དུས་ཁཱན་དང་ སྡིག་ཅན་མང་པུ་ཐུར་ རོག་དང་ རོ་ཀ་སློ་མ་བ་ཀབ་ཉི་ ཏབ་ཐུར་ལང་ཐཱན་ ལྟོ་ཟ་ལ་ཀབ་ཉི་ 11ཕ་རི་སི་པ་བ་ཀི་ཐོང་ཉི་ ཡི་ཤུ་ག་སློ་མ་བ་ཀ་ ཇི་མ་ལ་ ན་ཧ་སློབ་དཔོན་ཤོ་ ཧང་ཨ་ཉི་ཁྲལ་དུས་ཁཱན་དང་ སྡིག་ཅན་བ་ཀབ་ཉི་ ཏབ་ཐུར་བཞུགས་ཐཱན་ ཚོགས་བཞེན་ཅ་ཡ་དག༌ཉི།
12ཡི་ཤུ་གི་ ཨོ་ཐ་ཆཱས་སྙན་གསེང་ཉི་ གསུངས་མ་ལ་ མ་མར་ཁཱན་སོ་ངོ་བ་ཀི་ དྲུང་འཚོ་མ་ཚཱས་པ། དག་པ་ཀབ་ཉི་ དྲུང་འཚོ་ཤོ་ མར་ཁཱན་བ་ཀ་དེན་གེ་གི༌ལ། 13ན་ཧ་བ་ དིན་ཐཱན་ ན་ཤི་མཆོད་པ་ཕུལ་ཁཱན་མང་གི་ཝ་ ན་ཤི་སྙིང་རྗེ་ཨ་ཁཱན་ ཇི་གི་ཤོ་ནང་ཕེན་ཅ་དག་ཉི་ ཤོ་ཁཱན་ཁེ་པ་ ཧང་གི་ཝ་ལ་སྨོ་གོད་ཅོ། ཧང་ཡ་དག་ནེ་ལ་ ཇང་ཤོ་ དྲང་པུ་ཅ་དག་ཉི་ མི་ཁཱན་བ་མང་གི་ཝ་ སྡིག་ཅན་བ་ར་ལེ་ ཨོ་ཕ་གི་ལ་དག༌ཉི༎
སྨྱུང་གནས་ག་ཀོར་གེ་ ཇི་མ༌ལ།
14ཉི་ཡུ་ཧན་ན་ག་སློ་མ་བ་ ཡི་ཤུ་ག་སྐུན་མདུན་ག་བཅག་ཐཱན་ ཞུ་ཝ་ལ་ ཆམ་ཆམ་རང་ ཨའི་དང་ཕ་རི་སི་པ་བ་ སྨྱུང་གནས་ཨ་ཉི་ཆོན༌ཅ། དག་པ་ཀབ་ཉི་ ན་ག་སློ་མ་བ་ཤོ་ ཧང་ཨ་ཉི་ སྨྱུང་གནས་མ་ཆོན་ཅ་ཡ་དག༌ཉི།
15ཡི་ཤུ་གི་ལན་གནང་ཉི་ གསུངས་མ་ལ་ གཉེན་ཕི་ཁཱན་ཟ་ཁེ་པ་ ཆོ་ལེ་ནང་ཀེ་རང་ གཉེན་ཕི་ས་ག་ཨུ་ཁཱན་ ཤི་མིན་བ་ གེ་ཕེ་སྨོ། ནོང་ཐུར་ གཉེན་ཕི་ཁཱན་ཟ་ རོག་ཏེ་བ་ཀ་པོང་ཀེ་ དུང་ཉི་བུ་ལེ་ག་ དུས་ཙུན་ཐུར་ཤེག༌པེ། ཉི་ཨོ་ཉ་ནོང་ཀེ་ག་ཏཱན་ཤ་ རོག་ཏེ་བ་ཀི་ སྨྱུང་གནས་ཆོ༌ལེ།
16ཁ་མུང་མཱན་མ་ག་ བག་ཏང་ཆེ་པ་ཀབ་ཉི་ ཨི་བི་གི་ ཁ་ཤ་སིང་མ་གི་ བག་ཏང་ཆེ་ཕེ་ཡ། ཧང་ཡ་དག་ནེ་ལ་ ཁ་ཤ་སིང་མ་གུན་མ་ཀབ་ཉི་ ཏེང་ཉི་ ཁ་མུང་མཱན་མ་ལག་ཏང་ རེད་ཉི་ གང་ཆི་ལུ་ཤོ་ཝ་ཅོད༌པེ།
17ཨུ་ཉུ་པུརུས་ཀིན་ཨ་ཉི་ ཨུར་ཀ་མཱན་མ་ནང་ཀ་ ཞུ་སིང་མ་གོ་ལུ་མཱན༌ཅ། གོ་ཝ་ད་བུ་ཨ་ནེ་ལ་ ཨུར་ཀ་ཇེས་ཉི་དི་ལ་ཀབ་ཉི་ ཞུ་མེ་པ་དི་ལེ་ ཉི་ཨུར་ཀ་བུ་མ་ན་ཝ་རི༌ལེ། དག་པ་ཀབ་ཉི་ ཞུ་དང་ཨུར་ཀ་ཉིག་ཙིང་རང་ མེ་པ་མ་དི་ལེ་ག་དེན་གེ་ ཞུ་སིང་མ་ཤོ་ ཨུར་ཀ་སིང་མ་ནང་ཀ་རང་གོན་ཅ་དག༌ཉི༎
ཤི་ཁཱན་ཟ་མིན་དང་ མར་ཁཱན་མེ་ཝག་ཙ།
18ཡི་ཤུ་གི་ ཨོ་ཐ་ཆཱས་གསུངས་མེ་གང་ཀ་ ཆོས་འཛོམས་ག་ འགོ་དཔོན་ཐུར་ཨུན་ཐཱན་ ཏོང་ཟིང་ས་ག་ཏེས་ཉི་ ཡི་ཤུ་ག་ ཕྱག་ཕུལ་བ༌ལ། ཇ་ག་ཟ་མིན་ཤི་ཉི་ ཝུར་ནང་ཐུར་ཤ་དིན༌ཅ། ཉི་རོག་ཤི་ཝ་གེ་ ལོག་ཉི་ཝུ་ལེ་དེན་གེ་ ནཱན་བྱོན་ཐཱན་ ན་ག་ཕྱག་ རོ་ཀ་ཐུང་ཀ་ ཀེ་ཉི་གནང་ཤོ་དག་ཉི་ ཞུ་ཝ༌ལ།
19ཉི་ཡི་ཤུ་བཞེངས་ཐཱན་ རོ་ཀ་སློ་མ་བ་རིག་བུ་ཉི་ ཨོ་ཉ་འགོ་དཔོན་ག་ ཕའི་ག་ཏཱན་བྱོན་མ༌ལ། 20ཞི་ཤོ་ལུ་ཤོ་ས་རང་ ཉིང་སོང་ཉིག་ཙིང་དི་ཁཱན་ མེ་ཝག་ཙ་ཐུར་གི་ ཡི་ཤུ་ག་ཚིང་ལོ་ཀེ་ཨུན་ཐཱན་ རོ་ཀ་ནམ་བཟའ་ནབ་ཅི་ག་ཐོ་ཕ༌ལ། 21ཧང་ཡ་དག་ནེ་ལ་ ཡི་ཤུ་ག་ནམ་བཟའ་ ཐོ་ཕེ་ཉོང་ནེ་ལ་ རོག་དྲག་པེ་གི་ལ་དག་ཉི་ རོ་ཀི་མི་ཉི་ དད་པ་ཨ་ཝ༌ལ།
22ཡི་ཤུ་གི་གིར་ཐཱན་ ཨོ་ཉ་མེ་ཝག་ཙ་ག་ གསུངས་མ་ལ་ ཟ་མིན་ ཤོ་ནང་ཕེ། ཧང་ཡ་དག་ནེ་ལ་ ན་ག་དད་པ་གི་ ནཱན་དྲག་པ་ན་དག༌ཉི། ཨོ་ཉ་ཐྲེ་ཀེ་རང་ རོག་དྲག་པ༌ལ།
23ཡི་ཤུ་ འགོ་དཔོན་ག་ཕའི་ག་ ཕེབས་པ་ཀབ་ཉི་ ནམ་བུརུང་ཐེད་ཁཱན་བ་དང་ སོ་ངོ་མང་པུ་ཐུར་ ཛོ་མ་ཆོ་ཝ༌ལ། 24ཉི་ཡི་ཤུ་གི་གསུངས་མ་ལ་ ན་ཧ་བ་དི། ཨོ་ཐ་ཟ་མིན་ཤི་ཝ་མང་གི་ དག་པ་ཀབ་ཉི་ རོག་ཡི་ཕ་ཤ་གི་ལ་དག༌ཉི། ཡི་ཤུ་གི་གསུངས་ཁཱན་ ན་ཐ་ཉི་ སོ་ངོ་བ་ཀི་ ངར་བི་ཝ༌ལ། 25སོ་ངོ་བ་ ཕིས་ཀ་ཤོན་ཆུམ་དེན་གེ་ ཡི་ཤུ་ནང་ཀ་བྱོན་ཐཱན་ ཟ་མིན་ག་ ག་དང་གེ་ཙུང་མ་ཀབ་ཉི་ ཟ་མིན་ཤི་ཝ་གེ་ཝུན་ཐཱན་ ག་ཐིང་མ༌ལ། 26ཉི་ཨོ་ཉ་ཀོར་གེ་ ཚང་ཟིང་ཉི་ ཆ་འོག་ཐམས་ཅན་ག་ ཆ་པ༌ལ༎
མིང་ཀ་ན་དང་ ནོ་ཝང་ཆོག་པེ་མ་སེ་ཁཱན་ དྲག་ཉི་གནང་མ༌ལ།
27ཡི་ཤུ་ ཨོ་ཉ་གེ་བྱོན་ཅ་ཨ་ཉི་ མིང་ཀ་ན་ཉིག་ཙིང་གི་ རོ་ཀ་ཚིང་ཚིང་དིན་ཐཱན་ ཀཱན་ཤུག་ཨ་ཉི་ཞུ་ཝ་ལ་ ད་ཝུད་ག་རྒྱུད་པ་ ཨ་ཧ་ཐུང་ཀ་ སྙིང་རྗེ་ཨ་ཉི་གནང་ཤོ་དག༌ཉི།
28ཉི་རོག་ཕའི་ནང་ཀ་བྱོན་དེན་གེ་ ཨོ་ཉ་མིང་ཀ་ན་ཉིག་ཙིང་ ནང་ཀ་ཤེག་པ༌ལ། ཉི་ཡི་ཤུ་གི་གསུངས་མ་ལ་ ཇི་གི་ ན་ཆིང་དྲག་པེ་རེ་བེ་ཨ་ཉི་ ན་ཆིང་གི་ དད་པ་ཨན་ཅ་སྨོ་དག༌ཉི།
གཙོ་བོ་ ཨ་ཆིང་གི་ དད་པ་ཨན་ཅ་ལ་དག་ཉི་ ཞུ་ཝ༌ལ།
29ཡི་ཤུ་གི་ རོག་ཉིག་ཙིང་ག་ མིང་ག་ཐོབ་ཐཱན་ ན་ཆིང་གི་ དད་པ་ཨ་ཝ་དང་ཏུ་ཉི་ ཇུང་ཤོ་དག་ཉི་ གསུངས་མ༌ལ། 30ཉི་རོག་ཉིག་ཙིང་གི་ ཐོང་མེ་རེ་བ་རི་ཝ༌ལ། དག་པ་ཀབ་ཉི་ ཡི་ཤུ་གི་ བཀའ་ན་སྒྲིང་སྒྲིང་ཨ་ཉི་གནང་ཐཱན་ གསུངས་མ་ལ་ ཨོ་ཐ་ཀོར་གེ་ བཱརའ་ཨི་བི་ག་རང་ མ་ཡེག་ཅོ་ན་དག༌ཉི། 31དག་པ་ཀབ་ཉི་ རོག་ཉིག་ཙིང་གི་དིན་ཐཱན་ ཡི་ཤུ་གི་ མཛད་ཁཱན་ག་ཀོར་གེ་ཡེག་ཉི་ ཆ་འོག་ཐམས་ཅན་རང་ ཆ་པ༌ལ།
32ཨོ་ཉ་སོ་ངོ་ཉིག་ཙིང་ དིན་ཅ་ཨ་ཉི་ དོན་གི་ནོད་པ་ཨ་དེན་གེ་ ནོ་ཝང་ཆོག་པེ་མ་སེ་ཁཱན་སོ་ངོ་ཐུར་ སོ་ངོ་ཚེ་བང་གི་ ཡི་ཤུ་ག་སྐུན་མདུན་ག་ ཕ་ཝ༌ལ། 33སོ་ངོ་ག་ནང་ཀེ་ དོན་ཁོན་དེན་གེ་ ཨོ་ཉ་སོ་ངོ་གི་ ཆཱས་ཨ་ལེ་གོ་ཙུག་པ༌ལ། ཉི་སོ་ངོ་མང་པུ་ཨ་ཉི་ ཛོམ་ཁཱན་བ་ གནམ་མེད་ས་མེད་ ཡིད་ཆི་ཉི་ཡེག་པ་ལ་ ཨོ་མ་སག་པུ་ ཨིས་རེལ་ག་ ཨུ་ཐུ་ད་བུ་ ཧ་ལ་རང་མཇལ་བ་མཱན་ཅ་དག༌ཉི།
34དག་པ་ཀབ་ཉི་ ཕ་རི་སི་པ་བ་ཀི་ ཡེག་པ་ལ་ ཡི་ཤུ་གི་ དོན་བ་ཀ་རྒྱལ་སྲས་ག་ དབང་ཚད་གི་ཨ་ཉི་ དོན་བ་ཁོན་ལ་དག༌ཉི༎
ལའི་པ་མང་པུ་ཚཱས༌པེ།
35ཡི་ཤུ་ ཁྲོམ་དང་དུང་ ཐམས་ཅན་ག་བྱོན་ཐཱན་ ཆོས་འཛོམས་ཁོན་ ཡེ་ཉི་གནང་མ༌ལ། ཉི་རྒྱལ་སྲིད་ག་ཀོར་གེ་ འཐེན་ལེག་པུ་ བཤད་ཉི་གནང་མ༌ལ། ཉི་མར་ཁཱན་བ་དང་ ན་ཚ་མ་འདྲ་ཝ་ཁེ་ཁཱན་བ་ ཐམས་ཅན་རང་ དྲག་ཉི་གནང་མ༌ལ། 36རོ་ཀི་ སོ་ངོ་མང་པུ་ཨ་ཉི་ ཛོམ་ཁཱན་ག་གཟིགས་ཅ་ཨ་ཉི་ གནམ་མེད་ས་མེད་ ཕང་པེ་ཨོ་ཕ༌ལ། ཧང་ཡ་དག་ནེ་ལ་ རོག་ཏེ་བ་ ཤི་ཤ་དི་པ་མ་ཁཱན་ ཤི་ཤ་བ་ད་བུ་ཨ་ཉི་ སྡུག་བསྔལ་ཁེ་ཉི་ ཧང་རང་ཨ་ལེ་མར་བཱན་ ཆོ་ཝ་ཅ་གི་ཝ༌ལ། 37ཉི་རོ་ཀི་ རོ་ཀ་སློ་མ་བ་ཀ་གསུངས་མ་ལ་ ཐོག་གནམ་མེད་ས་མེད་ཚོ་ཝ༌ལ། དག་པ་ཀབ་ཉི་ ལའི་པ་ཉུང་པུ་ཤ༌ལ། 38ཨོ་ཉི་ཨ་དེན་གེ་ ཐོག་ག་གཙོ་བོ་ག་ཏཱན་ རོ་ཀ་ཨུང་ག་ནང་ཀ་ལའི་ཨ་ཁཱན་ ལའི་པ་མང་པུ་ཀུན་ཏི་ཨ་ཉི་ སྨོན་ལམ་ཏབ་ཅོ་དག༌ཉི༎
Currently Selected:
མ་ཏི། 9: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
