མར་ཀུས། 3

ག་དང་སང་ཁཱན་སོ་ངོ་ དྲག་ཉི་གནང་མ༌ལ།

1ཚི་ངེ་ རོག་ཨོམ་ཆང་རང་ ཡ་ཧུ་དི་པ་ག་ ཆོས་འཛོམས་ནང་ཀ་ བྱོན་མ༌ལ། ཨོ་ཉ་ཆོས་འཛོམས་ནང་ཀ་ ག་དང་སང་མ་ཨ་ཝ་ཆོ་ཁཱན་ སོ་ངོ་ཐུར་ཅ་གི་ཝ༌ལ། 2ཉི་ཡ་ཧུ་དི་པ་ག་ དུས་བཟང་ག་ནོང་ གི་ཝ་ཨ་དེན་གེ་ རོ་ཀི་ ཨོ་ཉ་སོ་ངོ་ཁེ་པ་ དྲག་ཉི་གནང་མ་ ད་བུ་ཨ་ནེ་ལ་ ཧེ་ཏ་ལ་མེ་དེན་གེ་ རོག་ཏེ་བ་གོད་ཉི་ ཆོ་ཝ་ཅ་གི་ཝ༌ལ།

3ཉི་ཡི་ཤུ་གི་ ཨོ་ཉ་ག་དང་སང་ཁཱན་སོ་ངོ་ག་ ཐ་ཨུན་ཐཱན་ ཐམས་ཅན་ག་གུབ་ཀ་ ཐིང་ཤོ་དག་ཉི་ གསུངས་མ༌ལ། 4ཉི་རོ་ཀི་ རོག་ཏེ་བ་ཀ་ ཇི་མ་ལ་ དུས་བཟང་ག་ནོང་ཀ་ ལའི་ལེག་པུ་ ཨ་རིན་ཆོག་པེ་སྨོ་ མ་ལེག་པ་ཨ་རིན་ཆོག་པེ་ཡ། སྲོག་རྒྱབ་ཨ་ལེ་ཁེ་ལེ་སྨོ་ སྲོག་ཅཱད་པེ་ཁེ་ལེ་ཡ་དག༌ཉི། དག་པ་ཀབ་ཉི་ རོག་ཏེ་བ་ ཐམས་ཅན་རང་ ཙང་ཀེན་ཨ་ཉི་ ཆོ་ཝ༌ལ།

5རོག་ཏེ་བ་ཀ་ སེམས་ལུང་ཏོང་ཆོ་ཝ་ཨ་དེན་གེ་ རོ་ཀ་ཐུགས་དོགས་ཉི་ དགོངསམ་ཁྲེལ་ཉི་ རོག་ཏེ་བ་ ཐམས་ཅན་ག་ གཟིགས་ཐཱན་ ཨོ་ཉ་ག་དང་སང་ཁཱན་ སོ་ངོ་ག་གསུངས་མ་ལ་ ན་ག་ ག་དང་ཐྲང་ཅོ་དག༌ཉི། རོ་ཀི་ ཏེང་པ་ཐུར་ག་རང་ ག་དང་དྲག་པ༌ལ། 6ཕ་རི་སི་པ་བ་ ཕིས་ཀ་ཤོན་དི་ཝ་ཐྲེ་ཀེ་རང་ ཡི་ཤུ་ ཧང་ཏེ་ཉི་ བཀྲོངས་མེ་གི་ལ་སྨོ་ ཨོ་ཉ་ཀོར་གེ་ ཧེ་རོ་དི་པ་དག་ཁཱན་ སོ་ངོ་བ་ཀབ་ཉི་ ཏུན་ཆ་ཨ་ཝ༌ལ༎

སོ་ངོ་མང་པུ་ཐུར་གི་ ཡི་ཤུ་ག་ཚིང་ཁོན་ཉི་ དི་ཝ༌ལ།

7-8ཡི་ཤུ་དང་ རོ་ཀ་སློ་མ་བ་ མཚོ་ལོ་ཀ་ཏཱན་ བྱོན་མ༌ལ། ཉི་རོ་ཀི་ མཛད་ཁཱན་ཕྱག་ལཱ་ཀོར་གེ་ ན་ཐ་ཝ་ཨ་དེན་གེ་ ག་ལིལ་དང་ ཡ་ཧུ་དི་ཡ་ ཉི་ཡ་རུ་ཤ་ལེམ་དང་ ཨི་དུ་མེ་ཨ་ ཉི་ཡར་དཱན་རི་དྲང་ ཉ་ལོ་ཀ་ཆོ་ཁཱན་ སོ་ངོ་ཐམས་ཅན་རང་ ཡི་ཤུ་ག་ཚིང་ཁོན་ཉི་ ཨོ་ཕ་མ་ཚཱད་པ་ ས་ཆ་ཏྲུ་རོས་དང་ སི་དོན་དག་ཁཱན་གེ་བུ་ མང་པུ་ཐུར་ཤེག་པ༌ལ།

9སོ་ངོ་བ་ཀི་ རོག་ཟོབ་ཏུ་དག་པ་གི་ རོ་ཀ་སློ་མ་བ་ཀ་ གྲུ་ཕྲིག་ཀིན་ཨ་ཉི་ ཐའི་ན་དག་ཉི་ གསུངས་མ༌ལ། 10ཧང་ཡ་དག་ནེ་ལ་ རོ་ཀི་ སོ་ངོ་མང་པུ་ཐུར་ དྲག་ཉི་གནང་མ་ཨ་དེན་གེ་ ནཱད་པ་བ་ཀི་ རོག་ཐོ་ཕེ་དེན་གེ་ པེད་ཉི་རང་ཕཱན་ཅ་གི་ཝ༌ལ། 11རྣམ་ཤེས་མ་ཙང་མ་གི་ ནོད་ཉི་མར་ཁཱན་ སོ་ངོ་བ་ཀི་ཏ་ ཡི་ཤུ་མཇལ་བ་ཐུར་ག་རང་ རོ་ཀ་ཞབས་ར་ག་ ཐང་ཇོང་ཉི་ ནཱན་དཀོན་མཆོག་ག་ སྲས་གི་ལ་དག་ཉི་ ཤུག་ཨ་ཉི་ ཤ་དར་ཕི་ཉི་ ཞུ་ཝ༌ལ། 12ཡི་ཤུ་གི་ རོ་ཀ་ཀོར་གེ་ མ་ཡེག་ཅོ་དག་ཉི་ ཨོ་ཉ་རྣམ་ཤེས་ མ་ཙང་མ་བ་ཀ་ བཀའ་ན་སྒྲིང་སྒྲིང་ཨ་ཉི་ གནང་མ༌ལ༎

ཡི་ཤུ་གི་ སྐུ་ཚབ་སོང་ཉིག་ཙིང་ སི་ཝ༌ལ།

13ཉི་རོག་ ཐོ་ལ་ཕུ་ཐུང་ཀ་བྱོན་ཐཱན་ རོ་ཀ་ཐུགས་དང་ཏུ་ཉི་ ག་རོག་བཞུགས་ས་ག་ཏཱན་ ཨོ་དོ་དག་ཉི་ གསུངས་ཉི་ ཉི་རོག་ཏེ་བ་ རོ་ཀ་སྐུན་མདུན་ག་ཤེག་པ༌ལ། 14ཉི་རོག་ཏེ་བ་ཀ་པོང་ཀེ་ སོང་ཉིག་ཙིང་སིན་ཐཱན་ སྐུ་ཚབ་ཨ་ཉི་ ཀེ་བ༌ལ། ཉི་རོག་ཏེ་བ་ཤོ་ རོག་ཀབ་ཉི་ ཆོ་ལེ་དེན་གེ་དང་ དཀོན་མཆོག་ག་རྒྱལ་སྲིད་ཀོར་གེ་ བཤད་པེ་ག་ ཀུན་ཏི་ལེ་དེན་གེ་ ཀེ་བ་གི་ཝ༌ལ། 15ཉི་ཨོམ་ཆང་རང་ དོན་སོ་ངོ་གེ་ ཕིས་ཀ་ཤོ་ཉི་གེ་མེ་ག་ དབང་ཚད་བུ་གནང་མ༌ལ། 16རོག་ཏེ་བ་ཀ་ མཚན་ཨོ་ཐེན་གི༌ལ། རོ་ཀི་ པ་ཏྲུས་དག་ཉི་ར་ཁཱན་ སི་མོན་ 17ཇབ་དི་ཡ་ག་ཟ་ ཡ་ཀུབ་དང་ རོ་ཀ་བོ་ཉིང་ཡུ་ཧན་ན། རོག་ཉིག་ཙིང་ག་ ཡི་ཤུ་གི་ བོ་ཨ་ནར་གེས་དག་ཉི་ ར་ཝ༌ལ། དེན་ཐ་ཤོ་ མུང་ཕོག་ཁཱན་ག་ཟ། 18ཉི་ཨན་དྲི་ཡཱས་ ཕི་ལིབ་ བར་ཐོ་ལོ་མའི་ མ་ཏི་ ཐོ་མ་ ཨལ་ཕ་ཡཱས་ག་ཟ་ཡ་ཀུབ་ ཉི་ཐེ་དི་ཡཱས་དང་ རང་ཏེན་ག་ རྒྱལ་ཁབ་ཕང་ཁཱན་དག་ཉི་ ར་ཁཱན་སི་མོན། 19ཉི་རོག་ཙུང་མེ་བི་ཁཱན་ ཡ་ཧུ་ད་ཨིས་ཀ་རི་ཡོད་དག་ཁཱན་ རོག་ཏེ་སོང་ཉིག་ཙིང་གི་ཝ༌ལ༎

ཡི་ཤུ་དང་བལ་ཇི་བུལ།

20ཉི་ཨོ་ཉ་གེ་ རོག་གཟིམ་ཅུང་ག་ ཕེབས་པ༌ལ། ཉི་ཨོམ་ཆང་རང་ སོ་ངོ་བ་ མང་པུ་ཐུར་ཤེག་ཉི་ རོག་ཏེ་བ་ ཟ་ལེ་བུ་མ་ཆིན་མ༌ལ། 21ཉི་རོག་ཏེན་ག་ སོ་ངོ་བ་ཀི་ རོ་ཀ་ཀོར་གེ་ ན་ཐ་ལ་ཀབ་ཉི་ རོག་ཙུང་མེ་ག་དི་ཝ༌ལ། ཧང་ཡ་དག་ནེ་ལ་ རོག་ཏེ་བ་ཀི་ རོག་ཉོས་པ་ལ་དག་ཉི་ མི་ཝ༌ལ།

22ཡ་རུ་ཤ་ལེམ་གེ་ཨུ་ཁཱན་ བཀའ་ཁྲིམས་ག་ སློབ་དཔོན་བ་ཀི་ ཡེག་པ་ལ་ རོ་ཀ་ནང་ཀ་ བདུད་སེ་ཏཱན་ བལ་ཇི་བུལ་ ནུ་ཕ་གི་ཝ༌ལ། ཨོ་ཉི་ཨ་དེན་གེ་ དོན་ག་དཔོན་གི་ དོན་ག་བ་ཤོན་གེམ་ལ་དག༌ཉི།

23ཉི་ཡི་ཤུ་གི་ རོག་ཏེ་བ་ རོ་ཀ་སྐུན་མདུན་ག་ རཱན་ཐཱན་ དཔེ་གཏམ་བ་ཀ་ཐུང་ཀེ་ཨ་ཉི་ གསུངས་མ་ལ་ སེ་ཏཱན་གི་སེ་ཏཱན་ ཧང་ཏེ་ཉི་ཁོན་མེ་ཡ། 24རྒྱལ་ཁབ་ཐུར་ག་ ཆོ་ཁཱན་བ་རང་ མ་ཆ་མཱན་ ཐུར་གི་ཐུར་ག་ དགྲ་ཨ་ནེ་ལ་ རྒྱལ་སྲིད་ ཧང་ཏེ་ཉི་ ཙུང་མེ་རེ་བེ་ཡ། 25ཉི་ཕའི་ནང་ཐུར་ག་ ཆོ་ཁཱན་བ་རང་ མ་ཆ་མཱན་ ཐུར་གི་ཐུར་ག་ དགྲ་ཨ་ནེ་ལ་ ཨོ་ཉ་ཕའི་ཁེ་པ་ ཨོམ་ཏ་ཉི་རང་ ཇཝ་ཆུ༌མེ། 26ཉི་སེ་ཏཱན་གི་སེ་ཏཱན་ རོག་ཏེན་ག་ དགྲ་ཨ་ནེ་ལ་ རོག་དོས་པེ་མར་བཱན་ རོག་བུ་ ཨོམ་ཏ་ཨ་ཉི་རང་ ཇཝ་ཆུ༌མེ། 27དག་པ་ཀབ་ཉི་ ཁེ་ཀོ་ཆོ་ཁཱན་ སོ་ངོ་ག་ ཕའི་ག་ནུབ་ཉི་ ཨི་བི་གི་རང་ རོ་ཀ་ནོ་ཙང་བ་ ཅོམ་པེ་མར༌བ། ཨོ་ཉ་ཁེ་ཀོ་ཆི་ལུ་ཆོ་ཁཱན་ སོ་ངོ་ཁེ་པ་ གོ་མ་གེ་རང་ ཐིག་ཉི་ཐ་ལེ་ཁེ༌ལེ། ཉི་ཤ་ ཅོམ་པེ་རེ༌བེ།

28ཇི་གི་ ན་ཧ་ཐྲང་ཉི་ ཡེག་པེ་ སོ་ངོ་བ་ཀི་ ཧང་ད་བུ་རང་ སྐུར་པ་ཞུ་ཉི་ ཉི་བཱརའ་སྡིག་པ་ ཧང་ད་བུ་རང་ཨ་ནེ་བུ་ བཀའ་དྲིན་བསྐྱང༌མེ། 29དག་པ་ཀབ་ཉི་ དམ་པའི་ཐུགས་ཉིད་ག་ སྐུར་པ་ཞུ་ནེ་ལ་ ཏི་ངེ་རང་ བཀའ་དྲིན་མ་བསྐྱང༌མ། ཨོ་ཉ་སྡིག་པ་ཁེ་པ་ དུས་ཏ་བུ་རང་ སྡིག་པ་ཨ་ཉི་རང་ ལུས་པེ་དག༌ཉི། 30ཧང་ཡ་དག་ནེ་ལ་ རོག་ཏེ་བ་ཀི་ ཡི་ཤུ་ག་ནང་ཀ་ རྣམ་ཤེས་མ་ཙང་མ་ ནུ་ཕ་ལ་དག་ཉི་ ཡེག་པ་ཨ་དེན་གེ་ གསུངས་མ་གི་ཝ༌ལ༎

ཡི་ཤུ་ག་ཡུམ་དང་ བོ་ཉིང༌བ།

31ཉི་རོ་ཀ་ཡུམ་དང་ བོ་ཉིང་བ་ཤེག་ཉི་ ཀོ་ར་ག་ཐིང་ཉི་ ཆོ་ཝ་ཅ་གི་ཝ༌ལ། ཉི་རོག་ཏེ་བ་ཀི་ སོ་ངོ་ཐུར་ རོ་ཀ་སྐུན་མདུན་ག་ རོག་ཞུ་ལེ་ག་ ཀུན་ཏི་ཝ༌ལ། 32ཉི་སོ་ངོ་མང་པུ་ཐུར་ རོ་ཀ་ཀོ་ལོ་ལོ་ལང་ཉི་ ཆོ་ཝ་ཅ་གི་ཝ༌ལ། ཉི་རོག་ཏེ་བ་ཀི་ ཞུ་ཝ་ལ་ ན་ག་ཡུམ་དང་ བོ་ཉིང་བ་ཕིས་ཀ༌ལ། ནཱན་རུ་མེ་དང་དག༌ཉི།

33རོ་ཀི་ རོག་ཏེ་བ་ཀ་ ལན་གསུངས་མ་ལ་ ཇ་ག་ཨ་མ་དང་ ཇ་ག་བོ་ཉིང་བ་ ཨི་བི་གི་ལ་ཡ་དག༌ཉི། 34ཉི་རོ་ཀ་ཀོ་ལོ་ལོ་ལང་ཁཱན་ སོ་ངོ་བ་ཀ་གཟིགས་ཐཱན་ གསུངས་མ་ལ་ ཨོ་ཐ་བ་ཤོ་ ཇ་ག་ཨ་མ་དང་ བོ་ཉིང་བ་གི༌ལ། 35ཨི་བི་གི་ དཀོན་མཆོག་ག་ ཐུགས་དང་ཏུ་ཉི་ ཨན་ཅ་གི་ལ་སྨོ་ ཨོ་ཉ་སོ་ངོ་ཁེ་པ་ ཇ་ག་བོ་ཉིང་དང་ ཇ་ག་ཨུ་ས་ ཉི་ཇ་ག་ཨ་མ་གི་ལ་ན་དག་ཉི་ གསུངས་མ༌ལ༎

Currently Selected:

མར་ཀུས། 3: TNTB

Highlight

Copy