མར་ཀུས། 4

ལི་ཡབ་ཁཱན་ག་དཔེ་གཏམ།

1ཉི་ཚི་ངེ་ ཨོམ་ཆང་རང་ རོ་ཀི་མཚོ་ནེ་མ་ག་ གསུང་གནང་མེ་ གོ་ཙུག་པ༌ལ། སོ་ངོ་མང་པུ་ཐུར་ རོ་ཀ་ཀོ་ལོ་ལོ་ ཛོ་མ་ཨ་དེན་གེ་ མཚོ་ག་ཆོ་ཁཱན་ གྲུ་ནང་ཀ་བྱོན་ཉི་བཞུགས་ཐཱན་ ཉི་ཨོ་ཉ་གེ་ཨ་ཉི་ དཀོན་མཆོག་ག་རྒྱལ་སྲིད་ཀོར་གེ་ ཡེ་ལེ་གོ་ཙུག་པ༌ལ། ཉི་སོ་ངོ་བ་ ཐམས་ཅན་རང་ ཉ་ལོ་ཀ་མཚོ་ནེ་མ་ ས་ག་ཛོ་མ་ཅ་གི་ཝ༌ལ། 2ཉི་རོ་ཀི་ དཔེ་གཏམ་ག་ཐུང་ཀེ་ཨ་ཉི་ མང་པུ་ཐུར་ ཡེ་ཉི་གནང་མ༌ལ། རོ་ཀི་ རོག་ཏེ་བ་ཀ་ ཨོ་ཐེན་གསུངས་མ་ལ་

3ཉཱན་ཅོ་ ལའི་པ་ཐུར་ ལི་ཡ་ཕེ་དི་ཝ༌ལ། 4ཉི་རོ་ཀི་ ལི་ཡ་ཕ་ཀབ་ཉི་ ལི་ཚེ་བང་ ལམ་བར་ཀ་ཁེ་ཝ༌ལ། ཉི་ཁ་ག་བ་ཤེག་ཉི་ ཨོ་ཉ་ལི་ ཐམས་ཅན་རང་ དུང་ཉི་ཟཱན་ཐ་ཝ༌ལ། 5ལི་ཚེ་བང་ ས་ད་ཟེ་རེ་ཆོ་ཁཱན་ ལུང་ཐུང་ཀ་ཁེ་ཉི་ ས་ཏིང་མ་ཝ་ཨ་དེན་གེ་ དོ་ཟོ་རང་ལིག་པ༌ལ། 6དག་པ་ཀབ་ཉི་ ངམ་ཤུག་ཨ་ཉི་ ཚ་ལ་ཀབ་ཉི་ རི་ཇང་པེ་དེན་གེ་ ཙ་ས་ཏིང་ག་སག་པུ་ མ་ཤེག་པ་ཨ་དེན་གེ་ སང་ཉི་ཤི་ཝ༌ལ། 7ལི་ཚེ་བང་ ཟུ་ཙོང་ག་ལི་ཆོ་ཁཱན་ ས་ག་ཁེ་ཝ༌ལ། ཉི་ཟུ་བུ་ག་ལིག་ཉི་ ཉི་ཟུ་ཙོང་གི་ ལོ་མ་ཨ་དེན་གེ་ ཐུར་གི་རང་ སེ་མ་སེ་ཝ༌ལ། 8ཉི་ལི་ཚེ་བང་ ས་ལེག་པུ་ཐུང་ཀ་ཁེ་ཉི་ ག་ཟོག་ཉི་ ཚེ་བང་གི་ སེ་ 30 ཉི་ཚེ་བང་གི་ 60 ཉི་ཚེ་བང་གི་ 100 ཕང་སེ་ཝ༌ལ། 9ཉི་རོ་ཀི་གསུངས་མ་ལ་ ཨི་བི་ག་ཉཱན་པེ་ག་ ན་ཅ་གི་ལ་སྨོ་ ཨོ་ཉ་སོ་ངོ་བ་ ཉཱན་ཅོ་དག༌ཉི༎

དཔེ་གཏམ་བ་ཀ་ཇུང་ཚེན།

10ཉི་རོག་ཐུར་ཏེན་ བཞུགས་པེ་གང་ཀ་ རོག་ཏེ་སོང་ཉིག་ཙིང་དང་ བཱརའ་སློ་མ་བ་ཀི་ ཨོ་ཉ་དཔེ་གཏམ་ག་དེན་ཐ་ཤོ་ ཧང་དག་པ་ཙ་རྩིས་ཡ་དག་ཉི་ ཞུ་ཝ༌ལ།

11རོ་ཀི་ རོག་ཏེ་བ་ཀ་ གསུངས་མ་ལ་ དཀོན་མཆོག་ག་རྒྱལ་སྲིད་ག་ གུམ་ནང་ཡོན་ཏན་ཁེ་པ་ ན་ཧ་བི་ཝ༌ཅ། དག་པ་ཀབ་ཉི་ བཱརའ་སོ་ངོ་བ་ཀ་གི་ནེ་ལ་ དཔེ་གཏམ་ག་ ཐུང་ཀེ་ཨ་ཉི་ཤ་གི༌ལ། 12ཧང་ཡ་དག་ནེ་ལ་ གསུང་རབ་གེ་ཤོ་ཝ་ད་བུ་

རོག་ཏེ་བ་ཀི་ གོད་པུ་ཏ་གོད༌པེ། དག་པ་ཀབ་ཉི་ མ་ཐོང༌མ། ཉི་ཉཱན་པུ་བུ་ཉཱན༌པེ། དག་པ་ཀབ་ཉི་ ཧ་མ་གོ༌ལ། ཨུ་ཉུ་མ་ནེ་ཏ་ རོག་ཏེ་བ་ཀི་ སྡིག་པ་ཨ་ལེ་ག་ ཐུབ་ཐཱན་ཐཱན་ ཉི་རོག་ཏེ་བ་ཀ་སྡིག་པ་ བཀའ་དྲིན་བསྐྱང་མེ་ཆོ་ཝ་#4:12 ཡ་ཤའི་ཡ་ག་དཔེ་ཆ་ 6:9–10 དག༌ཉི༎

ཡི་ཤུ་གི་ དཔེ་གཏམ་ག་དེན་ཐ་ ཁྲེ་ཉི་གནང་མ༌ལ།

13ཉི་རོ་ཀི་ རོག་ཏེ་བ་ཀ་ གསུངས་མ་ལ་ ན་ཤི་ ཨོ་ཐ་དཔེ་གཏམ་ག་ཀོར་གེ་ ཧ་མ་གོ་ནེ་ལ་ བཱརའ་གཏམ་བ་ཀ་ཀོར་གེ་ཏ་ ཧང་ཏེ་ཉི་ ཧ་གོ་ལེ་རེ་བེ་ཡ་དག༌ཉི། 14ཇི་གི་ ལི་ཡབ་ཁཱན་ ལའི་པ་ཀོར་གེ་ ཡེག་ཁཱན་ཤོ་ བཱརའ་སོ་ངོ་བ་ཀ་ དཀོན་མཆོག་ག་ གསུང་བཤད་ཉི་ རོག་ཏེ་བ་ཀ་ ཐིང་ལོམ་ནང་ཀ་ དཀོན་མཆོག་ག་གསུང་ ཆེ་ལེ་མིག་པ་ཕི་ཁཱན་ སོ་ངོ་གི༌ལ། ཉི་ལི་ཤོ་ དཀོན་མཆོག་ག་གསུང་གི༌ལ། 15ལི་ཚེ་བང་ ལབ་ཀ་ཁེ་ཁཱན་གི་ཤོ་ སེམས་ཀག་ཏར་ཆོ་ཁཱན་ སོ་ངོ་བ་ཀ་ཏཱན་ གེན་ཅ་གི༌ལ། ཉི་ཚེ་བང་གི་ དཀོན་མཆོག་ག་གསུང་ ན་ཐ་ཝ་ཐུར་ག་རང་ སེ་ཏཱན་གི་ ཨོ་ཕ་ཐྲེ་ཀེ་རང་ རོ་ཀ་སེམས་ཀ་ཆོ་ཁཱན་ གསུང་ག་བ་ ཤོན་བུ་ཉི་ ཡིད་ཀ་མི་ལེ་བིན་ཅ་གི༌ལ། 16ཉི་ས་ད་ཟེ་རེ་ཆོ་ཁཱན་ག་ ལུང་ཐུང་ཀ་ཁེ་ཁཱན་ལི་ཤོ་ དཀོན་མཆོག་ག་གསུང་ ན་ཐ་ལ་ཀབ་ཉི་ གནམ་མེད་ས་མེད་ ཤོ་ནང་ཕེ་ཉི་ཞུ་ཁཱན་ སོ་ངོ་བ་གི༌ལ། 17དག་པ་ཀབ་ཉི་ རོག་ཏེ་བ་ཀ་ ཙ་ས་ཏིང་ག་ མ་དི་ཝ་ཨ་དེན་གེ་ རེབ་ཀིན་ཐུར་ཤ་ ཐེས་པེ་རེ༌བེ། ཉི་གསུང་ག་ཡོར་ཀེ་ ཀ་ལུ་ཏཱད་ཉི་ དཀའ་ཝ་ཏེ་ཅཱད་པེ་ཁེ་ནེ་ལ་ དོ་ཟོ་རང་ རོ་ཁེ་དི༌ལེ། 18ཉི་ཟུ་ཙོང་ནང་ཀ་ ཁེ་ཁཱན་བ་ཤོ་ དཀོན་མཆོག་ག་གསུང་ ན་ཐ་ཁཱན་བ་གི༌ལ། 19དག་པ་ཀབ་ཉི་ གསུང་ན་ཐཱན་ཐཱན་རང་གི་ནེ་བུ་ འཛམ་གླིང་ག་ཀོར་གེ་ ཚ་གྱང་ཨ་ཉི་ ཉི་རྒྱུ་ནོར་ལོངས་སྤྱོད་ག་ བག་ཆགས་ཨ་ཉི་ ཉི་བཱརའ་ཀོར་གེ་ ངེ་ཆཱད་པ་ཨ་དེན་གེ་ དཀོན་མཆོག་ག་གསུང་གེ་ ཨོ་ཉ་བ་ བང་ཆི་ཉི་ སེ་མ་སེ༌ལ། 20དག་པ་ཀབ་ཉི་ ས་ལེག་པུ་ག་ཁེ་ཁཱན་ ལི་ག་བ་ཤོ་ གསུང་ན་ཐཱན་ཐཱན་ ཨུ་ཉུ་གསུང་ཁེ་པ་ རང་ཏེན་ག་ཚེ་ག་ཞུ་ཉི་ ཉི་གསུང་གེ་ཤོ་ཝ་དང་ཏུ་ཉི་ ལའི་ལེག་པུ་ཨ་ཁཱན་ སོ་ངོ་བ་གི༌ལ། དཔེ་ཨ་ནེ་ལ་ ལི་ཐུར་ག་ ཤིང་ཚེ་བང་གི་ 30 སེ་ཉི་ ཉི་ཚེ་བང་གི་ 60 སེ་ཉི་ ཉི་ཚེ་བང་གི་ 100 ཕང་སེ་ཁཱན་ ཤིང་ད་བུ་ཐུར་གི་ལ་དག་ཉི་ གསུངས་མ༌ལ༎

ལ་ཝང་ག་དཔེ་གཏམ།

21ཨི་བི་གི་རང་གི་ནེ་བུ་ ལ་ཝང་ཐོག་ཐཱན་ ག་ཙ་ཐུང་ཀ་ཀེ་ཉི་ ཐཱན་ཅ་མ་ཏོག་པ་ ཧང་ཤོ་མ་གི་ བུག་ཉི་ཐཱན་ཅ་སྨོ། ཡང་ན་ལ་ པ་ལང་ཕརའ་ཁ་ཙུག་ཉི་ ཐཱན་ཅ་ཡ། 22ནོང་ཐུར་ལ་ ཨོ་མ་གུམ་ཉི་ཐ་ཁཱན་ ཐམས་ཅན་རང་ ཐོང་མེ་གི༌ལ། ཉི་མ་སེ་ཝ་ཨ་ཉི་ ཙང་ཀེན་ཐ་ཁཱན་བུ་ ཐམས་ཅན་རང་ སེ་ལེ་གི༌ལ། 23ཨི་བི་ག་ཉཱན་པེ་ག་ ན་ཆོ་ཝ་ཐུར་ ཉཱན༌ཅོ།

24ཉི་ན་ཤི་ ན་ཐ་ཁཱན་ ཐམས་ཅན་རང་ སེམས་ཀ་ཐ་ཉི་ ཨུ་ཉུ་དང་ཏུ་ཉི་ ལའི་ཨ་ཉི་ ཇང་མེ་ཁེ༌ལེ། ཉི་ན་ཤི་ ཨུ་ཐུ་ད་བུ་ མང་པུ་ཨ་ནེ་ལ་ ཇི་གི་ཡེག་པ་ཀབ་ཉི་བུ་ ན་ཤི་མང་པུ་མང་པུ་ ཧ་གོ་ལེ་རེ༌བེ། 25ཧང་ཡ་དག་ནེ་ལ་ ཆོ་ཁཱན་སོ་ངོ་བ་ཀ་ཐུང་ཀ་པོན༌མེ། ཉི་མ་ཁཱན་སོ་ངོ་བ་ཀེ་ ད་སུར་ཆོ་ཁཱན་བུ་ བུ་ལེ་གི་ལ་དག་ཉི་ གསུངས་མ༌ལ༎

ཟོག་ཁཱན་ལི་ག་དཔེ་གཏམ།

26ཉི་ཨོམ་ཆང་རང་ རོ་ཀི་གསུངས་མ་ལ་ དཀོན་མཆོག་ག་རྒྱལ་སྲིད་ཤོ་ སོ་ངོ་ཐུར་གི་ ས་ག་ལི་ཡབ་ཉི་ ཐ་ཝ་ད་བུ་ཐུར་གི༌ལ། 27ཉི་ངེ་རི་ དག་པ་ཀབ་ཉི་ རོག་ཡིབ་ཉི་ ཉི་ངབ་ཀ་བཱརའ་ལའི་ཨ་ཉི་ གནམ་མེད་ས་མེད་ བདག་འཛིན་ཨ་ལེ་ མ་ཆིན་ནེ་བུ་ ཨོ་ཉ་ལི་ལིག་ཉི་ ནོང་རེ་ནོང་རེ་ ག་ཟོག༌ཅ། དག་པ་ཀབ་ཉི་ ཨོ་ཉ་ལི་ ཧང་ཏེན་ཟོག་ཅ་སྨོ་ རོ་ཀི་སེ་ལུ་མཱན༌ཅ། 28ས་གི་ཨ་ཉི་ ཨོ་ཉ་ལི་ ལིག་པེ་བི་ཝ་ཨ་དེན་གེ་ གོ་མ་རང་ ཉོམ་ཐུང་ཉི་ ཉི་ནམ་ནང་བུ་ཤོ་ཉི་ ཁུ་ཕུག་པ་རིན་ཅ་གི༌ལ། 29ཉི་དུང་མེ་རེན་པ་ཀབ་ཉི་ ཨོ་ཉ་སོ་ངོ་གི་ ཤེབ་ཐུར་ག་རང་ ནང་ཁ་ཅི་ཕཱན་ཐཱན་ དུང་ཉི་བུན༌ཅ༎

མེམ་བ་ལི་ག་དཔེ་གཏམ།

30ཡི་ཤུ་གི་གསུངས་མ་ལ་ ཧང་གི་ཤོ་ དཀོན་མཆོག་ག་རྒྱལ་སྲིད་ཀབ་ཉི་ རེ་ཉི་གོད་པེ་རེ་བེ་ཡ། ཨུ་ཉུ་མ་ནེ་ལ་ ཨ་ཤི་ དཔེ་གེན་མེ་དེན་གེ་ དཔེ་གཏམ་ ཧང་ད་བུ་ཐུར་ ཡེག་པེ་ཁེ་ལེ་ཡ། 31དཀོན་མཆོག་ག་རྒྱལ་སྲིད་ཤོ་ དཔེ་ཨ་ནེ་ལ་ མེམ་བ་ལི་ད་བུ་ཐུར་གི༌ལ། ཨོ་ཉ་ལི་ཁེ་པ་ ས་ག་ཆེ་ལེ་གང་ཀ་ འཛམ་གླིང་ག་ཆོ་ཁཱན་ བཱརའ་ལི་ ཐམས་ཅན་གེ་རང་ཟེ༌མེ། 32དག་པ་ཀབ་ཉི་ ཟོག་ཏེན་གེ་ལ་ བཱརའ་ཤིང་ཟེ་མུ་བ་ཀ་པོང་ཀེ་ རོག་རང་ཆི་ལུ་རིན༌ཅ། ཉི་ད་ཀ་བ་བུ་ གནམ་མེད་ས་མེད་ རིང་མུ་རི་ཉི་ ངབ་ཀེ་ཕེན་ཁཱན་ ཁ་ག་བ་ཀི་ ཤུམ་ཅོད་ཉི་ ཨོ་ཉ་ད་ཀ་ཐུང་ཐུང་ངཱས་ཉི་ ཆོན་ཅ་དག༌ཉི།

33སོ་ངོ་བ་ཀི་ ཧ་གོ་ལེ་རེ་བ་ཐུར་ རོ་ཀི་ དཔེ་གཏམ་ག་ཐུང་ཀེ་ཨ་ཉི་ ཨུ་ཉུ་ད་བུ་ མང་པུ་ཐུར་ ཡེན་གནང་མ༌ལ། 34ཉི་མ་པ་ སོ་ངོ་མང་ཀ་ ཡེ་ཉི་གནང་མ་ཀབ་ཉི་ ཧ་ལ་རང་གི་ནེ་བུ་ དཔེ་གཏམ་ག་ཐུང་ཀེ་ཨ་ཉི་ཤ་ ཡེན་གནང་མ༌ལ། དག་པ་ཀབ་ཉི་ རོག་ཐུར་ཏེན་ རོ་ཀ་ སློ་མ་བ་ཀབ་ཉི་ བཞུགས་པེ་གང་ཀ་ རོག་ཏེ་བ་ཀ་ ཐམས་ཅན་རང་ དང་སང་ཀིན་ཨ་ཉི་ དེན་ཐ་ཁྲེ་ཉི་གནང་མ༌ལ༎

ཡི་ཤུ་གི་ མཚོ་རི་དང་རི་དི་ ཁག་ཉི་གནང་མ༌ལ།

35ཉི་ཨོ་ཉ་ནོང་ཀ་ ངམ་ནུབ་སེ་ཨ་ལ་ཀབ་ཉི་ རོ་ཀི་ རོ་ཀ་སློ་མ་བ་ཀ་ གསུངས་མ་ལ་ ཨ་ཧ་བ་ ཨོ་ཐ་མཚོ་གེ་ཉི་ དི་ཁེ་དག༌ཉི། 36ཉི་རོག་ཏེ་བ་ཀི་ སོ་ངོ་བ་ཐུབ་ཐ་ཉི་ ཡི་ཤུ་བཞུགས་ས་ག་ གྲུ་ནང་ཀ་ནུབ་ཐཱན་ ཡི་ཤུ་ རོག་ཏེ་བ་ཀབ་ཉི་ ཞུ་ཉི་བུ་ཝ༌ལ། ཉི་ཨོམ་ཆང་རང་ བཱརའ་གྲུ་བུ་ མང་པུ་ཐུར་ཆོ་ཝ༌ལ། 37ཨོ་ཉི་ཆོ་ལ་རང་ རི་དི་ གནམ་མེད་ས་མེད་ཨུ་ཉི་ མཚོ་ལག་ཉི་ ཕ་ལ་ཀབ་ཉི་ རི་གྲུ་ནང་ཀ་ནུབ་ཉི་ རི་གི་ གྲུ་ཕུང་མེ་ཅམ་པ༌ལ།

38ཨུ་ཉུ་གང་ཀ་ ཡི་ཤུ་ཤོ་ གྲུ་ཇུ་ཀ་ཨ་ཉི་ ཏཱན་ཐུང་ཀ་གཟིམ་ཉི་ བཞུགས་པ་ཅ་གི་ཝ༌ལ། ཉི་རོ་ཀ་ སློ་མ་བ་ཀི་ ཡི་ཤུ་ ག་ཚོར་བ་ཐྲེ་ཀེ་རང་ ཞུ་ཝ་ལ་ སློབ་དཔོན་ ཨ་ཧ་བ་ ཤི་ལེ་ཅམ་པ་ཀབ་ཉི་ ནཱན་གི་ མ་གཟིགས་པ་སྨོ་དག༌ཉི།

39ག་བཞེངས་ཐཱན་ རོ་ཀི་ མཚོ་རི་ལག་ཁཱན་དང་རི་དི་ག་ བཀའ་གནང་ཉི་ གསུངས་མ་ལ་ ཙང་ཀེན་ཆོའི་དག༌ཉི། ཉི་རི་དི་ ཨོ་ཕེ་ནོར་ཉི་ ཁམས་སངས་ཀིན་རི་ཝ༌ལ། 40ཉི་རོ་ཀི་ རོ་ཀ་སློ་མ་བ་ཀ་ གསུངས་མ་ལ་ ཧང་ཨ་ཉི་ ཡོང་ཁེན་ཅ་ཡ། ཨོ་མ་བུ་ ན་ཧ་དད་པ་ མཱན་ཅ་སྨོ་དག༌ཉི།

41དག་པ་ཀབ་ཉི་ རོག་ཏེ་བ་ གནམ་མེད་ས་མེད་ ཡོང་ཁེ་ཉི་ ཐུར་གི་ཐུར་ག་ ཡེག་པ་ལ་ ཨོ་ཐ་སོ་ངོ་ ཨི་བི་གི་ལ་ཡ། རི་དི་དང་རི་གི་ཆང་ རོ་ཀི་གསུངས་མ་ཀབ་ཉི་ ཆ་གནས་ཐ་ན་དག༌ཉི༎

Currently Selected:

མར་ཀུས། 4: TNTB

Highlight

Copy