མར་ཀུས། 8

ཡི་ཤུ་གི་ 4000 ག་ ལྟོ་གནང་མ༌ལ།

1ཨུ་ཉུ་གང་ཀ་ སོ་ངོ་ཨོམ་ཆང་རང་ཛོམ་ཉི་ ཉི་རོག་ཏེ་བ་ ཟ་ལེ་ག་ ཧང་རང་མ་ཝ་ཆོ་ཝ༌ལ། ཡི་ཤུ་གི་ རོ་ཀ་སློ་མ་བ་རཱན་ཐཱན་ གསུངས་མ་ལ་ 2རོག་ཏེ་བ་ ཇང་ཀབ་ཉི་རང་ཆོ་ཉི་ ངམ་བི་ནང་སམ་དི༌ཝ། ཉི་ཨོམ་ རོག་ཏེ་བ་ ཟ་ལེ་ག་རྒྱུ་ ཧང་རང་མ་ཝ་ཨ་དེན་གེ་ ཇང་ལ་ རོག་ཏེ་བ་ཀ་གོད་ཉི་ ཕང་པེ་ཨུ་ན། 3ཉི་ཨོམ་ ཇི་གི་ རོག་ཏེ་བ་ ཨོ་ཉེན་རང་ལོག་ཉི་ ཕའི་ག་ཀུན་ཏི་ནེ་ལ་ རོག་ཏེ་བ་ བི་ནང་ཁུ་ཝ་ཨ་དེན་གེ་ ལམ་བར་ཀ་ཐང་ཇོང་ཉི་ དྲཱན་མ་མ་ཝ་ཏེ་བུ་རི་དུ། ཧང་ཡ་དག་ནེ་ལ་ རོག་ཏེ་ཚེ་བང་ ལམ་ཐ་རིང་མུ་གེ་ ཨུ་ཁཱན་བུ་ཅ་དག༌ཉི།

4རོ་ཀ་སློ་མ་བ་ཀི་ ཞུ་ཝ་ལ་ ཨོ་ཐ་དོག་ས་ག་ སོ་ངོ་ཐམས་ཅན་རང་ ཁ་ལེ་རེ་བ་ག་ལྟོ་ ཨི་བི་གི་ཤོ་ བི་ལེ་རེ་བེ་ཡ་དག༌ཉི།

5ཉི་རོ་ཀི་ ཇི་མ་ལ་ ན་ཧ་ཀེབ་ཏང་ ཧབ་ཏུར་ཅ་ཡ་དག༌ཉི།

ཀེབ་ཏང་ཟུམ་ལ་དག་ཉི་ རོག་ཏེ་བ་ཀི་ ཞུ་ཝ༌ལ།

6ཉི་རོ་ཀི་ ས་ག་པང་ཐང་ ཐུང་ཐུང་ལང་ཤོ་དག་ཉི་ བཀའ་གནང་མ༌ལ། ཨོ་ཉ་ཀེབ་ཏང་ཟུམ་ རོ་ཀ་ཕྱག་ཀ་བསྣམས་ཐཱན་ བཀའ་དྲིན་བསམ་མ༌ལ། ཉི་རོ་ཀ་ སློ་མ་བ་ཀ་གནང་ཐཱན་ སོ་ངོ་བ་ཀ་བོང་ཉི་བི་དག་ཉི་ གསུངས་མ༌ལ། ཉི་རོག་ཏེ་བ་ཀི་ སོ་ངོ་བ་ཀ་བོང་ཉི་ བི་ཝ༌ལ། 7ཉི་རོ་ཀི་ ང་ཉིག་ཙིང་སམ་ཕང་ ཆོ་ཁཱན་ག་བུ་ དཀོན་མཆོག་ག་ བཀའ་དྲིན་བསམ་ཐཱན་ སོ་ངོ་བ་ཀ་བོང་ཉི་བི་དག་ཉི་ རོ་ཀ་སློ་མ་བ་ཀ་ བཀའ་གནང་མ༌ལ།

8ཉི་རོག་ཏེ་བ་ཀི་ ཧབ་ཏུར་ཟ་ལེ་རེ་བ་ཐུར་ ཟ་ཝ༌ལ། ཉི་ལཱན་ཇུ་ལུས་ཁཱན་བ་ དུས་ཉི་གོད་པ་ཀབ་ཉི་ ཤོ་མ་ཟུམ་ཕུང་མ་ཤོ་ཝ༌ལ། 9ཨོ་ཉ་ཟ་ཁཱན་ སོ་ངོ་ 4000 ཕང་ཆོ་ཝ་གི་ཝ༌ལ། 10ཉི་རོ་ཀི་ ཨོ་ཉ་ཐྲེ་ཀེ་རང་ སོ་ངོ་བ་ཀུན་ཏིན་ཐཱན་ གྲུ་ནང་ཀ་ནུབ་ཉི་ རོ་ཀ་སློ་མ་བ་ཀབ་ཉི་ དལ་མ་ནུ་ཐ་དག་ས་ག་ ཆ་འོག་ག་ཏཱན་བྱོན་མ༌ལ༎

ཕ་རི་སི་པ་བ་ཀི་ ཞིང་ཁམས་ག་ རྟགས་གེན་ཤོ་དག་ཉི་ ཞུ་ཝ༌ལ།

11ཉི་ཕ་རི་སི་པ་བ་ཤེག་ཉི་ རོ་ཀེ་ཅོན་ལ་མེ་དེན་གེ་ རྩོད་པ་ཕི་ཉི་ ཞིང་ཁམས་ག་ རྟགས་གེན་ཤོ་དག་ཉི་ ཡི་ཤུ་ག་ཚེ་གོད་ཉི་ ཞུ་ཝ༌ལ།

12རོག་ཏེ་བ་ཀ་ཆཱས་ག་གོད་ཉི་ རོག་ཐུགས་དོགས་པེ་ཨུ་ཉི་ ཤོང་རིང་མུ་ཇང་ཐཱན་ རོ་ཀི་གསུངས་མ་ལ་ ན་ཧ་བ་ ཧང་ཨ་ཉི་ རྟགས་ཚཱས་པ་ཡ། ཇི་གི་ ན་ཧ་ཐྲང་ཉི་ཡེག་པེ་ ན་ཧ་རྟགས་ཏི་ངེ་རང་ མ་གེན་མ་དག༌ཉི། 13ཉི་རོག་ཏེ་བ་ ཐུབ་ཐཱན་ཐཱན་ གྲུ་ནང་ཀ་ནུབ་ཉི་ ལོག་ཉི་རང་ ཨོམ་ཐུར་ལོ་ཀ་ཏཱན་ བྱོན་མ༌ལ༎

ཕ་རི་སི་པ་བ་དང་ ཧེ་རོད་ག་བི་ཏོ།

14ཨོམ་ རོག་ཏེ་བ་ཀི་ ཀེབ་ཏང་ཕ་ལེ་ ཡིད་ཀ་མི་ཝ་ཨ་དེན་གེ་ གྲུ་ནང་ཀ་ ཀེབ་ཏང་ཐུར་ཤ་ ལུས་པ་ཅ་གི་ཝ༌ལ། 15ཉི་ཡི་ཤུ་གི་ རོག་ཏེ་བ་ཀ་གསུངས་མ་ལ་ ན་ཧ་བ་ རིག་པ་སྒྲིམ༌ཅོ། ཧང་ཡ་དག་ནེ་ལ་ ཕ་རི་སི་པ་དང་ ཧེ་རོད་གི་ཡེ་ཁཱན་བ་ཤོ་ ཀེབ་ཏང་ཕོར་པེ་བི་ཁཱན་ བི་ཏོ་ད་བུ་ཐུར་གི་ལ་དག༌ཉི།

16ཉི་རོག་ཏེ་བ་ནང་དོ་ ཐུར་གི་ཐུར་ག་ཆཱས་ཕི་ཉི་ ཡེག་པ་ལ་ ཨ་ཤི་ཀེབ་ཏང་ཕ་ལེ་ ཡིད་ཀ་མི་ཝ་ཨ་དེན་གེ་ གསུངས་ལ་མེ་དག༌ཉི། 17རོ་ཀི་ རོག་ཏེ་བ་ཀ་ཆཱས་ སྙན་གསེང་ཉི་གསུངས་མ་ལ་ ན་ཧ་བ་ ཧང་ཨ་ཉི་ ཀེབ་ཏང་མ་ལ་དག་ཉི་ ཆཱས་ཨན་ཅ་ཡ། ཧང་ ན་ཤི་ཨོ་མ་བུ་ ཧ་གོ་ལུ་མ་ལ་སྨོ། ན་ཧ་སེམས་ལུང་གི་ལ་སྨོ། 18མིང་ཆོན་ཐཱན་ ཐོང་མུ་མ་ལ་སྨོ། ན་ཐཱན་ཐཱན་ ཐ་ལུ་མ་ལ་སྨོ། ན་ཤི་ཡིད་ཀ་ཨ་ལུ་མ་ལ་སྨོ། 19ཇི་གི་ཀེབ་ཏང་ལྔ་བིརིང་ཐཱན་ སོ་ངོ་ 5000 ག་བི་ལེ་གང་ཀ་ ན་ཤི་ལཱན་ཇུ་ལུས་ཁཱན་བ་ དུས་པ་ཀབ་ཉི་ ཤོ་མ་ཧབ་ཏུར་ཤོ་ཝ་ཡ་དག་ཉི་ ཇི་མ་ཀབ་ཉི་ རོག་ཏེ་བ་ཀི་ཞུ་ཝ་ལ་ ཤོ་མ་སོང་ཉིག་ཙིང་ཤོ་ཝ་དག༌ཉི།

20ཉི་སོ་ངོ་ 4000 ག་དེན་གེ་ ཀེབ་ཏང་ཟུམ་བི་ལེ་གང་ཀ་ ཀེབ་ཏང་བིརིང་མ་ཨ་ཝ་ ཤོ་མ་ཧབ་ཏུར་ ལུས་པ་ཆོ་ཝ་ཡ་དག་ཉི་ ཇི་མ་ཀབ་ཉི་ རོག་ཏེ་བ་ཀི་ཞུ་ཝ་ལ་ ཤོ་མ་ཟུམ་ཤོ་ཝ་དག༌ཉི།

21ཉི་རོ་ཀི་གསུངས་མ་ལ་ ན་ཧ་བ་ ཨོ་མ་བུ་ ཧང་ཨ་ཉི་ ཧ་མ་གོན་ཅ་ཡ་དག༌ཉི༎

ཡི་ཤུ་གི་བེད་སེ་ད་ག་ མིང་ཀ་ན་དྲག་ཉི་གནང་མ༌ལ།

22ཉི་རོག་ཏེ་བ་ བེད་སེ་ད་ག་ཕེབས་པ་ཀབ་ཉི་ སོ་ངོ་ཚེ་བང་གི་ མིང་ཀ་ན་ཆོ་ཁཱན་ སོ་ངོ་ཐུར་ རོ་ཀ་སྐུན་མདུན་ག་ ཕཱན་ཐཱན་ རོག་ད་སུར་ ཐོབ་ཉི་གནང་ཤོ་དག་ཉི་ ཞུ་ཝ༌ལ། 23ཉི་ཡི་ཤུ་གི་ ཨོ་ཉ་མིང་ཀ་ན་ རོ་ཀ་ཕྱག་ཀི་ཨ་ཉི་ཙུང་ཉི་ དུང་གེ་ཕིས་ཀ་ ཤོ་ལེ་བིན་ཐཱན་ མིང་ཀ་ན་ག་མིང་ནང་ཀ་ ཐོབ་ཏང་ཚེ་ཉི་གནང་ཐཱན་ རོ་ཀ་ཕྱག་ མིང་ཀ་ན་ཐུང་ཀ་ཀེ་ཉི་ གསུངས་མ་ལ་ ནཱན་གི་ ཧང་ཐུར་ཐོང་ལ་སྨོ་དག༌ཉི།

24ཉི་རོ་ཀི་ ག་ཏ་གོད་ཐཱན་ ཞུ་ཝ་ལ་ ཇི་གི་སོ་ངོ་བ་ ཤིང་པུརུས་ཀིན་ཨ་ཉི་ དང་མ་ཐོང་ལ་དག༌ཉི།

25ཉི་ཡི་ཤུ་གི་ རོ་ཀ་ཕྱག་ ཨོམ་ཆང་རང་ ཨོ་ཉ་སོ་ངོ་ག་མིང་ག་ ཀེ་ཉི་གནང་མ༌ལ། ཉི་རོ་ཀི་ མིང་ཏི་ཉི་ གོད་པ་ཀབ་ཉི་ རོ་ཀ་མིང་དྲག་པ་ཨ་དེན་གེ་ ཧང་རང་དང་སང་ཀིན་ཨ་ཉི་ ཐོང་མེ་རེ་བ༌ལ། 26ཉི་ཡི་ཤུ་གི་ རོ་ཀ་དུང་ནང་ཀ་མ་ནུ་ཕཱན་ ཐྲང་ཉི་རང་ ཕའི་ག་དི་ན་དག་ཉི་ གསུངས་ཐཱན་ ཀུན་ཏི་ཝ༌ལ༎

པ་ཏྲུས་གི་ ཁིརིས་ཀོར་གེ་ ཁ་དོག་པ༌ལ།

27ཉི་ཡི་ཤུ་ རོ་ཀ་སློ་མ་བ་ཀབ་ཉི་ ཆ་འོག་ ཀའི་ས་རི་ཡ་ ཕི་ལིབ་པི་ག་ཆོ་ཁཱན་ དུང་ཁོན་བྱོན་མ་ཀབ་ཉི་ ལབ་ཀ་ རོ་ཀི་ རོ་ཀ་སློ་མ་བ་ཀ་ ཇི་མ་ལ་ སོ་ངོ་བ་ཀི་ ཇང་ཨི་བི་གི་ལ་ཨ་ཉི་ ཡེག་ལ་ཡ་དག༌ཉི།

28ཉི་རོག་ཏེ་བ་ཀི་ ཞུ་ཝ་ལ་ ཚེ་བང་གི་ཨ་ནེ་ལ་ ཁྲུས་གསོར་པ་ཡུ་ཧན་ན་དང་ ཚེ་བང་གི་ཨ་ནེ་ལ་ ཨེ་ལི་ཡ། ཉི་ཚེ་བང་གི་ཨ་ནེ་ལ་ ལུང་བསྟན་པ་ཐུར་ གི་ཝ་ཨོ་ཕེ་ལ་ཨ་ཉི་ ཡེག་ལ་དག༌ཉི།

29ན་ཤི་ཨ་ནེ་ལ་ ཇང་ཨི་བི་གི་ལ་ཡ་དག་ཉི་ ཇི་མ་ཀབ་ཉི་ པ་ཏྲུས་གི་ལན་ཞུ་ཝ་ལ་ ནཱན་ཁིརིས་གི་ལ་དག༌ཉི།

30ཉི་རོ་ཀི་ རོག་ཏེ་བ་ཀ་ རོ་ཀ་ཀོར་གེ་ ཨི་བི་ག་རང་ མ་ཡེག་ཅོ་ན་དག་ཉི་ བཀའ་ན་སྒྲིང་སྒྲིང་ཨ་ཉི་གནང་མ༌ལ༎

ཡི་ཤུ་གི་ རོག་དཀའ་ཝ་ཅཱད་པེ་ ཁེ་ཝ་ཀོར་གེ་དང་ གཤགས་པེ་ ཁེ་ཝ་ཀོར་གེ་གསུངས་མ༌ལ།

31ཉི་རོ་ཀི་ རོག་ཏེ་བ་ཀ་ ཡེན་གནང་མེ་ གོ་ཙུག་པ༌ལ། སོ་ངོ་ག་ཟ་ཤོ་ གནམ་མེད་ས་མེད་ དཀའ་ཝ་ཅཱད་པེ་ཁེ༌ལེ། སོ་ངོ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ ཉི་ཡ་ཧུ་དི་པ་ག་ བླ་མ་ཆི་ལུ་བ་ཀི་ མ་ཟེས་པཱན་ཤེ༌ལེ། དག་པ་ཀབ་ཉི་ ངམ་བི་ནང་སམ་ག་ཚི་ངེ་ ལོག་ཉི་དངོས་སུ་ཨ་ཉི་ ཝུ་ལེ་ན་དག༌ཉི། 32རོ་ཀི་ ཨོ་ཐ་བ་ དང་སང་ཀིན་ཨ་ཉི་རང་ གསུངས་མ༌ལ། ཉི་པ་ཏྲུས་གི་ ཡི་ཤུ་ལོག་ཐུར་ག་ཏཱན་ ཞུན་ཐཱན་ བཱརག་ཉི་ ནཱན་གི་ ཨུ་ཐུ་ད་བུ་ གསུངས་མེ་མང་ཕ་དག་ཉི་ ཞུ་ཝ༌ལ།

33གིར་ཉི་ རོ་ཀ་སློ་མ་བ་ཀ་གཟིགས་ཐཱན་ རོ་ཀི་པ་ཏྲུས་ག་ ཇུར་ཇང་གནང་ཉི་ གསུངས་མ་ལ་ སེ་ཏཱན་ ནཱན་ཇང་ཐུབ་ཐཱན་ཇོང༌ཤོ། ནཱན་གི་མི་ཁཱན་ཁེ་པ་ དཀོན་མཆོག་ག་ ལོ་ཀེ་མང་གི་ཝ་ སོ་ངོ་ག་ལོ་ཀེ་གི་ཝ་ལ་དག༌ཉི།

34ཉི་རོ་ཀི་ རོ་ཀ་སློ་མ་བ་དང་ སོ་ངོ་མང་པུ་ཐུར་ ཏབ་ཐུར་རཱན་ཐཱན་ གསུངས་མ་ལ་ ཨི་བི་རང་གི་ནེ་བུ་ ཇ་ག་ཚིང་ཚིང་ ཨོ་ཕེ་ག་སེམས་ཆོ་ནེ་ལ་ རོག་རོག་ཏེན་བུ་སྤང་ཉི་ ཉི་རོ་ཀ་ ཁྲིམས་ཤིང་བང་ཉི་ ཇ་ག་ཚིང་ཚིང་ཨོ་ཕེ་ཁེ༌ལེ། 35ཉི་ཨི་བི་གི་ རང་ཏེན་ག་སྲོག་རྒྱབ་ ཨ་ལེ་གོད་ཅ་གི་ལ་སྨོ་ ཨོ་ཉ་སོ་ངོ་བ་ཀ་ སྲོག་གེ༌མེ། ཉི་ཇང་དང་ འཐེན་ལེག་པུ་ག་ཡོར་ཀེ་ ཨི་བི་ག་ སྲོག་གེ་མ་ཐུར་ཉོང༌པེ། 36འཛམ་གླིང་ཉོང་ཐཱན་རང་གི་ནེ་བུ་ རོ་ཀ་སྲོག་གེམ་ནེ་ལ་ ཨོ་ཉ་སོ་ངོ་གི་ ཧང་ཉོང་པ་ཆིན་མེ་ཡ། 37རོ་ཀ་སྲོག་གེ་ལག་པ་ ཁག་ཆི་ལུ་ཧང་ཅ་ཡ། 38ཉི་ཨི་བི་གི་ ཇང་དང་ ཇ་ག་ཆཱས་ག་ཀོར་གེ་ ཨོ་ཐ་དད་པ་ མ་ཨ་ཁཱན་དང་ སྡིག་ཅན་སོ་ངོ་བ་ཀ་གུབ་ཀ་ ངི་ནང་ཁུན་ཅ་གི་ལ་སྨོ་ སོ་ངོ་ག་ཟ་གི་བུ་ རོ་ཀ་ཡབ་ག་དབང་དང་ དམ་པའི་ཞིང་ཁམས་ག་འཐེན་པ་བ་ཀབ་ཉི་ ལོག་ཉི་ཨོ་ཕེ་གང་ཀ་ ཨོ་ཉ་སོ་ངོ་གེ་ ངི་ནང་ཁུ་ལེ་གི་ལ་དག་ཉི་ ཡི་ཤུ་གི་གསུངས་མ༌ལ།

Currently Selected:

མར་ཀུས། 8: TNTB

Highlight

Copy

Want to have your highlights saved across all your devices? Sign up or sign in

Tshangla New Testament

Learn More About Tshangla New Testament (BSI)