རོ་མི། 1
1
1ཨོ་ཐ་ཡི་གུ་ཤོ་ དཀོན་མཆོག་གི་ སྐུ་ཚབ་ཨ་ཉི་སིན་ཐཱན་ འཐེན་ལེག་པུ་བཤད་པེ་ག་དེན་གེ་ སོ་སུ་ཨ་ཉི་པག་ཁཱན་ ཡི་ཤུ་ཁིརིས་ག་གཡོག་པ་ པ་ཝལ་གེ་གི༌ལ། 2འཐེན་ལེག་པུ་ག་ཀོར་གེ་ དཀོན་མཆོག་གི་ གོ་མ་གེ་རང་ དམ་པའི་གསུང་རབ་ནང་ཀ་ རོ་ཀ་ལུང་བསྟན་པ་བ་ཀ་ཐུང་ཀེ་ཨ་ཉི་ དབུ་མནའ་བཞེས་ཉི་ གསུངས་གནང་མ༌ཅ། 3ཉི་ཨོ་ཉ་འཐེན་ལེག་པུ་ཤོ་ ལུས་པུ་ག་ དཔོན་ད་ཝུད་ག་ མི་རྒྱུད་ཨ་ཉི་འཁྲུངས་ཁཱན་ དཀོན་མཆོག་ག་སྲས་ ཡི་ཤུ་ག་ཀོར་གེ་གི༌ལ། 4ཉི་དཀོན་མཆོག་གི་ དམ་པའི་ཐུགས་ཉིད་ག་ཐུང་ཀེ་ཨ་ཉི་ ཡི་ཤུ་ཁིརིས་གཤགས་པ་གེ་ གསོན་པོ་ཨ་ཉི་སྐུ་བཞེངས་གནང་ཉི་ སྟོབས་དབང་ག་བུ་ རོག་ཤོ་ དཀོན་མཆོག་ག་སྲས་གི་ལ་དག་ གེན་ཉི་གནང༌མ། 5ཁིརིས་ག་ཐུང་ཀེ་ཨ་ཉི་ ཉི་རོ་ཀ་མཚན་ག་ཡོར་ཀེ་ ཡ་ཧུ་དི་པ་མང་གི་ཁཱན་བ་ ཨོ་ག་རང་ཆོ་ནེ་བུ་ རོག་ཏེ་བ་ཀ་ འཐེན་ལེག་པུ་བཤད་པེ་ག་དེན་གེ་ དཀོན་མཆོག་ག་ ཐུགས་རྗེ་དང་དབང་ཚད་ ཨ་ཤི་ཉོང་པ༌ཅ། ཧང་ཡ་དག་ནེ་ལ་ རོག་ཏེ་བ་ཀི་ དད་པ་ཨ་ཉི་ རོ་ཀ་ཆ་གནས་ཐཱན་ཆེན་དག་པ་གི་གི༌ལ།
6ཉི་ན་ཧ་བ་བུ་ ཡི་ཤུ་ཁིརིས་ཀབ་ཉི་ ཆོ་ལེ་དེན་གེ་ ར་ཁཱན་བ་ཀ་པོང་ཀེ་གི༌ལ།
7ཇི་གི་ཨོ་ཐ་ཡི་གུ་ཁེ་པ་ རོམ་ག་ཆོ་ཁཱན་ དད་པ་ཨ་ཁཱན་ ཐམས་ཅན་ག་ཏཱན་འབྲི༌ཅ། ན་ཧ་བ་ཤོ་ དཀོན་མཆོག་གི་ཕང༌ཅ། ཉི་རོ་ཀི་ནའི་ རོག་ཏེན་ག་སོ་ངོ་ཨ་ཉི་ རཱན་གནང་མ༌ཅ། ཨ་ཧ་ཡབ་དཀོན་མཆོག་དང་ གཙོ་བོ་ཡི་ཤུ་ཁིརིས་གི་ ན་ཧ་ཐུགས་རྗེ་དང་ སྐྱིད་པུ་གནང་ཆེན༎
དཀོན་མཆོག་ག་འཐེན་ལེག་པུ།
8གོ་རང་ ནའི་ཐམས་ཅན་ག་དེན་གེ་ ཇི་གི་ཡི་ཤུ་ཁིརིས་ག་ཐུང་ཀེ་ཨ་ཉི་ ཇ་ག་དཀོན་མཆོག་ག་ བཀའ་དྲིན་བསམ༌ཅ། ཧང་ཡ་དག་ནེ་ལ་ འཛམ་གླིང་ཐམས་ཅན་གི་ ན་ཧ་དད་པ་ཀོར་གེ་ ན་ཐ་ཝ༌ཅ། 9ཇི་གི་ན་ཧ་ཀོར་གེ་ མ་ཆཱད་པ་ཨ་ཉི་རང་ སྨོན་ལམ་ཏབ༌ཅ། ཉི་ཇི་གི་སེམས་ནང་ཀེ་ཨ་ཉི་རང་ ཕྱག་ཞུ་ཉི་ རོ་ཀ་སྲས་ག་ཀོར་གེ་ འཐེན་ལེག་པུ་བཤད་ཁཱན་ དཀོན་མཆོག་ཤོ་ ཨོ་ཐ་ཆཱས་ག་ འཛོམས་དཔང་གི༌ལ།
10ཇི་གི་ཧ་ལ་སྨོན་ལམ་ཏ་པ་ཐུར་ དཀོན་མཆོག་ག་ ཐུགས་བཞེད་ཆོ་ནེ་ལ་ ཇུ་ཀ་དག་པ་ཀབ་ཉི་ཏ་ ཇང་ན་ཧ་བ་ཆོ་ས་ཨོ་ཕེ་ག་ ཀོ་ཕེག་ཉི་གནང་ཤོ་དག་ཉི་ སྨོན་ལམ་ཏབ༌ཅ། 11ཧང་ཡ་དག་ནེ་ལ་ ན་ཧ་བ་སྒྲིང་སྒྲིང་ཅོད་པེ་དེན་གེ་ ཇི་གི་ན་ཧ་ ཐུགས་ཉིད་ག་སེ་རབ་ ཤ་མེ་རེ་ཆེན་དག་པ་གི་ ཇང་ན་ཧ་བ་རུ་མེ་ལ་མ༌ཅ། 12ཇི་གི་ཡེག་པེ་དེན་ཐ་ཤོ་ ཨའི་ཐམས་ཅན་ག་ ཕཱན་ཏོག་ཅེན་དག་པ་གི་གི༌ལ། ཇ་ག་དད་པ་གི་ ན་ཧ་སེམས་གསོ་ཨ་ཉི་ ཉི་ན་ཧ་དད་པ་གི་ ཇ་ག་བུ་སེམས་གསོ་ཨ༌ལེ།
13ཇ་ག་ཡུང་ཟི་བ་ བཱརའ་ཡ་ཧུ་དི་པ་ མང་གི་ཁཱན་བ་ཀ་པོང་ཀ་ ཇུང་མ་པུརུས་ཀིན་ཨ་ཉི་ ན་ཧ་པོང་ཀ་བུ་ ཐོག་དུང་མེ་དེན་གེ་ ཇི་གི་ན་ཧ་བཱརང་ཀ་ ཨོ་ཕེ་ག་ཤེབ་མང་པུ་ཐུར་ ཙ་དྲེག་ཉི་གོད་པ་དག་ཉི་ ན་ཤི་སེ་ལེ་ཁེ༌ལེ། དག་པ་ཀབ་ཉི་ ཨོ་མ་སག་པུ་བུ་ ཇང་ཨོ་ཕེ་མ་ག་ལཱན་ ཁག་ཉི་རང་ཐ་ཝ༌ཅ། 14གིརིག་དང་ གིརིག་མང་གི་ཁཱན་ ཐམས་ཅན་ག་ ཉི་སེ་བུ་དང་ཡོང་བ་ ཐམས་ཅན་ག་རང་ ཇི་གི་དྲིན་ལམ་ཇོར་པེ་ཁེ་ཝ༌ཅ། 15ཨོ་ཉི་ཨ་དེན་གེ་ ནའི་རོམ་ག་ཆོ་ཁཱན་བ་ཀ་བུ་ འཐེན་ལེག་པུ་བཤད་པེ་ག་ ཇ་ག་སེམས༌ཅ།
16ཧང་ཡ་དག་ནེ་ལ་ ཇི་གི་འཐེན་ལེག་པུ་ག་ཀོར་གེ་ ངི་ནང་ཁུ་ལུ་མཱན༌ཅ། ལག་ཏང་ འཐེན་ལེག་པུ་ཤོ་ ཡ་ཧུ་དི་པ་བ་དང་ གིརིག་གི་ནེ་བུ་ དད་པ་ཨ་ཁཱན་བ་ཀ་ ཐར་པ་གནང་ཁཱན་ དཀོན་མཆོག་ག་ སྟོབས་དབང་གི༌ལ། 17ཧང་ཡ་དག་ནེ་ལ་ དཀོན་མཆོག་གི་ རོ་ཀ་སྤྱན་ག་ ཨའི་ཧང་ཏེན་ དྲང་པུ་ཅོད་ཉི་གནང་ཅ་གི་ལ་སྨོ་ ཨོ་ཐ་འཐེན་ལེག་པུ་གི་ ཨ་ཧ་གེན༌ཅ། གོ་གེ་ཇུ་ཀ་སག་པུ་རང་ དད་པ་གེ་ཨ་ཉི་ དྲང་པུ་རིན་ཅ་གི༌ལ། ཉི་གསུང་རབ་གེ་ ཤོ་ཝ་པུརུས་ཀིན་ཨ་ཉི་ སོ་ངོ་དྲང་པུ་གི་ དད་པ་ག་ཐུང་ཀེ་ཨ་ཉི་ ཚེ་ཉོང་ཅ་གི༌ལ༎#1:17 ཧ་བ་ཀུག་ག་དཔེ་ཆ་ 2:4
དཀོན་མཆོག་དགོངསམ་ཁྲེལ་པ༌ལ།
18སོ་ངོ་སྡིག་ཅན་བ་ཀི་ ངན་པ་ཨ་ཉི་ དེན་པ་བུག་ཉི་ཐ་ཁཱན་བ་ཀ་ དཀོན་མཆོག་དགོངསམ་ཁྲེལ་ཉི་ ཞིང་ཁམས་གེ་དོང་ གེན་གནང་མ༌ཅ། 19ཧང་ཡ་དག་ནེ་ལ་ དཀོན་མཆོག་གི་ རོག་ཏེ་བ་ཀ་དེན་གེ་ ཡ་ལུ་ཅོད་ཉི་གནང་མ་ཨ་དེན་གེ་ རོག་ཏེ་བ་ཀི་ དཀོན་མཆོག་ག་ཀོར་གེ་ སེ་ལེ་ཁེ་ཁཱན་ཁེ་པ་ ཡ་ལུ་ཤ༌ཅ། 20འཛམ་གླིང་བཀོད་ཏེན་ཐུར་གེ་ག་ཏཱན་ མཇལ་བེ་མར་ཁཱན་ དཀོན་མཆོག་ག་ཀོར་གེ་དང་ མ་འགྱུར་བརྟན་པ་ག་དེན་གེ་ཆོ་ཁཱན་ རོ་ཀ་སྟོབས་དབང་ ཉི་དཀོན་མཆོག་ག་ རང་བཞིན་ཁེ་པ་ ཨོ་ཉ་བཀོད་ཉི་ཐ་ཁཱན་བ་ཀ་གོད་ཉི་ དང་སང་ཀིན་ཨ་ཉི་ ཧ་གོ་ལེ་རེ༌ཅ། ཨོ་ཉི་ཨ་དེན་གེ་ རོག་ཏེ་བ་ཀི་ དགོངས་ཡངས་མ་ཉོང༌པ།
21རོག་ཏེ་བ་ཀི་ དཀོན་མཆོག་ གུམ་ཡེན་ཐཱན་རང་གི་ནེ་བུ་ རོག་ཏེ་བ་ཀི་ དཀོན་མཆོག་ག་ གསོལ་ཝ་མ་ཏབ་ཅི། ཉི་རོ་ཀ་བཀའ་དྲིན་མ་བསམ་ཤི། དག་པ་ཀབ་ཉི་ རོག་ཏེ་བ་ཀ་མི་ཐང་ ཇུང་ཁུངས་མ་ཝ་རི་ཉི་ རོག་ཏེ་བ་ཀ་ སེམས་ཡོང་བ་མེར་བུ་རི༌ཝ། 22རོག་ཏེ་བ་ཀི་ མཁས་ཏྲ་ཆོ་ཝ་ཅོད་ཉི་ ལག་ཏང་ གནམ་མེད་ས་མེད་ ཡོང་བ་རི་ཝ༌ཅ། 23ཧ་ལ་རང་མ་གཤགས་ཁཱན་ དཀོན་མཆོག་ག་གཟི་བརྗིད་ཁེ་པ་ སོ་ངོ་བ་དང་ཁ་ག་བ་ སེམས་ཅན་བ་དང་ རུ་གེ་ནང་བ་ད་བུ་ ཅོད་ཁཱན་བ་ཀབ་ཉི་ ལེང་མ༌ཅ།
24ཨོ་ཉི་ཨ་དེན་གེ་ རོག་ཏེ་བ་ཀ་སེམས་ཀི་ ངན་པ་ཧང་ཨ་ལེ་ལ་མ་ཐུར་ དཀོན་མཆོག་གི་ རོག་ཏེ་བ་ཀ་ ཐང་ཨ་ཉི་ཐཱན་གནང་མ༌ཅ། ཉི་རོག་ཏེ་བ་ཀི་ རོག་ཏེ་བ་ནང་དོ་ ངི་ནང་ཁུ་སི་སི་ཨ་ཝ་ ལའི་ཨ་ཝ༌ཅ། 25རོག་ཏེ་བ་ཀི་ དཀོན་མཆོག་ག་དེན་པ་ཁེ་པ་ སོ་ད་ཀབ་ལེང་ཉི་ བཀོད་ཁཱན་དཀོན་མཆོག་ག་ གསོལ་ཝ་ཏ་པེ་མང་གི་ཝ་ དཀོན་མཆོག་གི་ བཀོད་ཉི་ཐ་ཁཱན་ཅ་ལ་བ་ཀ་ གསོལ་ཝ་ཏབ་ཉི་ ཕྱག་ཞུ་ཝ༌ཅ། མ་པ་ཏ་ མ་འགྱུར་བརྟན་པ་ཨ་ཉི་ བསྟོད་པ་ཕུལ་བེ་རུང་ཁཱན་ཤོ་ བཀོད་ཁཱན་དཀོན་མཆོག་གི༌ལ། ཨ་མེན། 26ཨོ་ཉི་ཨ་དེན་གེ་ རོག་ཏེ་བ་ཀི་ ངི་ནང་ཁུ་སི་སི་ཨ་ཝ་ ཨ་ལེ་ག་སེམས་ཨ་ནེ་བུ་ དཀོན་མཆོག་གི་ རོག་ཏེ་བ་ཀ་ ཐང་ཨ་ཉི་ཐ་ཝ༌ཅ། ཉི་མེ་ཝག་ཙ་བ་ཀི་ རང་བཞིན་གེ་རང་ ཕེ་ཝག་ཙ་བ་ཀབ་ཉི་ ཨ་ལེ་མང་གི་ཝ་ རོག་ཏེ་བ་ནང་དོ་ག་ ཨ་ཝ་རི་ཝ༌ཅ། 27ཨུ་ཉུ་པུརུས་ཀིན་ཨ་ཉི་ ཕེ་ཝག་ཙ་བ་ཀི་ རང་བཞིན་གེ་རང་ མེ་ཝག་ཙ་ཀབ་ཉི་ ཨ་ལེ་ཁེ་ཁཱན་ཁེ་པ་ཐུབ་ཐ་ཉི་ ཕེ་ཝག་ཙ་ནང་དོ་ ཨ་ལེ་ག་སེམས་ཨ་ཉི་ ཕེ་ཝག་ཙ་གི་ ཕེ་ཝག་ཙ་ཀབ་ཉི་ ངི་ནང་ཁུ་སི་སི་ཨ་ཝ་ག་ ལའི་ཨ་ཝ༌ཅ། ཉི་ཨོ་ཉ་ལའི་ག་ཐཱན་ཇུ་ཤོ་ རོག་ཏེ་བ་ཀི་ རོག་ཏེ་བ་ཀ་ལུས་པུ་ག་ ཁྲིམས་ཉོང༌ཅ། ཉི་ཨུ་ཉུ་ཤོ་ རོག་ཏེ་བ་ཀ་ ཐོབ་ཐང་གི༌ལ།
28རོག་ཏེ་བ་ཀི་ དཀོན་མཆོག་ ཙི་ལེ་མ་ན་ཝ་ཨ་དེན་གེ་ དཀོན་མཆོག་གི་ རོག་ཏེ་བ་ཀ་ ཐང་ཨ་ཉི་ཐ་ཝ་ཨ་དེན་གེ་ རོག་ཏེ་བ་ཀ་ ངན་པ་སེམས་ཀི་ ཧང་ཨ་ལེ་ལ་མ་ཐུར་ཨ་ཉི་ ཨ་ལེ་མ་ན་ཁཱན་ ལའི་བ་བུ་ཨ༌ཝ། 29རོག་ཏེ་བ་ཀ་ཚེ་ཁེ་པ་ ངན་པ་ཐམས་ཅན་གི་ ཕུང་མ་རི༌ཝ། དཔེ་ཨ་ནེ་ལ་ སྡིག་པ་ཨན་ཅ་ འདོད་པུ་ཆི་ལུ་ཨན་ཅ་ མ་ལེག་པ་ཨན་ཅ་ སོ་ངོ་ཤེན་ཅ་ ཁོ་ལོང་ཨན་ཅ་ མགུ་སྐོར་ཕིན་ཅ་ བཱརའ་ག་མ་ལེག་པ་ཨ་ལེ་གོད་ཅ་ ཀོ་ཁ་ཨན་ཅ་ 30ཁ་ཏང་ཅ་ དཀོན་མཆོག་ཟེས་པུ་མཱན་ཅ་ བཱརའ་ག་དམའ་ཕ་ཕིན་ཅ་ ཁམ་ཏག་ཅ་ ཁམ་ཙོང་ཅ་ ངན་པ་ཨ་ལེ་ག་ གནས་སྐབས་སིང་མ་ཙམ་ཅ་ ཕ་མ་ག་ངོ་ལོག་ཅ་ 31དེན་པ་ཧ་གོ་ལུ་མཱན་ཅ་ དྲང་པུ་ཨ་ཉི་ཨ་ལུ་མཱན་ཅ་ སྙིང་རྗེ་ཨ་ལུ་མཱན་ཅ་ ཉི་བཀའ་དྲིན་བསྐྱང་མུ་མཱན༌ཅ། 32ཨུ་ཉུ་ད་བུ་ ལའི་ཨ་ཁཱན་ཁེ་པ་ ཤི་ལེ་ཁེ་ལེ་དག་ཉི་ དཀོན་མཆོག་ག་ བཀའ་ཁྲིམས་དྲང་པུ་ཀོར་གེ་ རོག་ཏེ་བ་ཀི་ ལེག་པུ་ཨ་ཉི་རང་ ཧ་གོ་ལེ་ནང་ནང་རང་ རོག་ཏེ་བ་ཀི་ ཨུ་ཉུ་ད་བུ་ལའི་ ཨ་ལུ་ཨ་ས་རང༌ཅ། ཉི་ཨུ་ཉུ་མ་ཚཱད་པ་ བཱརའ་སོ་ངོ་བ་ཀི་ ཨུ་ཉུ་ད་བུ་ལའི་ཨ་ལ་ཀབ་ཉི་ རོག་ཏེ་བ་ཀི་ ལེག་པུ་ཙིན༌ཅ༎
Currently Selected:
རོ་མི། 1: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
