རོ་མི། 12
12
གསོན་པོ་ཨ་ཉི་ དཀོན་མཆོག་ག་མཆོད་པ་ཕུལ༌ཤོ།
1ཨོ་ཉི་ཨ་དེན་གེ་ ཇ་ག་ཡུང་ཟི་བ་ ཇི་གི་ན་ཧ་ཡེག་ཅ་ དཀོན་མཆོག་ག་ སྙིང་རྗེ་ཆི་ལུ་ཆོ་ཝ་ཨ་དེན་གེ་ ན་ཧ་ལུས་པུ་ཁེ་པ་ གསོན་པོ་ཨ་ཉི་ དཀོན་མཆོག་ག་ཏཱན་ མཆོད་པ་ཕུལ༌ཤོ། ཨུ་ཉུ་གི་ རོ་ཀ་ཕྱག་ཞུ་ལེ་དེན་གེ་ རོ་ཀ་ཐུགས་ཀ་ཚུད༌པེ། ཨུ་ཐུ་ཤོ་ ན་ཤི་ཏ་པེ་ཁེ་ཁཱན་ ཐུགས་ཉིད་ག་ཐུང་ཀེ་ཨ་ཉི་ གསོལ་ཝ་ཏབ་ཅ་གི༌ལ། 2ན་ཧ་བ་ ཨོ་ཐ་འཛམ་གླིང་ག་ སོ་ངོ་བ་ད་བུ་ཨ་ཉི་མ་ཆོའི། དག་པ་ཀབ་ཉི་ ན་ཧ་མི་ཐང་ཁེ་པ་ དཀོན་མཆོག་ག་ སོར་པེ་བི་ཉི་ ན་ཧ་བ་ཤོ་ སོ་ངོ་སིང་མ་རི་ལེ་ཁེ༌ལེ། ཉི་ཤ་ ན་ཤི་དཀོན་མཆོག་ག་ ཐུགས་བཞེད་ལེག་པུ་དང་ ཐུགས་ཀ་ཚུད་ཁཱན་ ཉི་ཅོན་ད་སུ་རང་ མ་ཁཱན་ཁེ་པ་ སེ་ལེ་རེ༌བེ།
3དཀོན་མཆོག་གི་ ཐུགས་རྗེ་གཟིགས་ཉི་ ཇ་ག་གནང་མ་དང་ཏུ་ཉི་ ཇི་གི་ན་ཧ་ཡེག་ཅ་ ན་ཤི་མི་ལེ་ཁེ་ཝ་གེ་ལག་ཉི་ ན་ཧ་བ་ གནམ་མེད་ས་མེད་ ཆི་ལུ་ཅ་དག་ཉི་ ནའི་ཏེན་གི་མ་མི། ལག་ཏང་ རང་ཏེན་ག་ཀོར་གེ་མིན་ཅ་ཨ་ཉི་ རིག་པ་སྒྲིམ་ཉི་ དཀོན་མཆོག་གི་ ན་ཧ་དད་པ་ ཧབ་ཏུར་གནང་མ་ལ་སྨོ་ ཨུ་ཉུ་དང་ཏུ་ཉི་ ན་ཤི་ནའི་ཏེན་ག་ བརྟག་དཔྱད་ཕི་ཉི་གོད༌ཅོ། 4ཨ་ཧ་ལུས་པུ་ག་ དབང་པོ་མང་པུ་ཐུར༌ཅ། ཉི་དབང་པོ་ཐམས་ཅན་ག་ རང་རང་ས་ ལའི་ཆོ་ཝ་པུརུས་ཀིན་ཨ་ཉི་ 5ཁིརིས་ག་སྐུ་གཟུགས་བུ་ ཨུ་ཉུ་པུརུས་ཀིན་རང་གི༌ལ། ཨའི་ཐམས་ཅན་རང་དོབ་ཉི་ རོ་ཀ་སྐུ་གཟུགས་ཅོད་ཅ་གི༌ལ། ཉི་ཨའི་ཐམས་ཅན་རང་ ཐུར་དང་ཐུར་ག་གི༌ལ།
6དཀོན་མཆོག་གི་ ཐུགས་རྗེ་གཟིགས་པ་དང་ཏུ་ཉི་ ཨའི་ཐམས་ཅན་ག་ སེ་རབ་མ་འདྲ་ཝ༌ཅ། སོ་ངོ་ཐུར་གི་ ལུང་བསྟན་མེ་ག་ སེ་རབ་ཉོང་པ་ཆོ་ནེ་ལ་ ཨ་ཧ་དད་པ་དང་ཏུ་ཉི་ ཨ་ཤི་ལུང་བསྟན་མེ་ཁེ༌ལེ། 7བཱརའ་ག་ཕྱག་ཞུ་ལེ་ག་ སེ་རབ་ཉོང་པ་ཆོ་ནེ་ལ་ བཱརའ་ག་ཕྱག་ ལེག་པུ་ཨ་ཉི་ཞུའི། ཉི་ཡེ་ལེ་ག་ བྱིན་རླབས་ཉོང་པ་ཆོ་ནེ་ལ་ ལེག་པུ་ཨ་ཉི་ཡེ། 8སེམས་གསོ་ཨ་ལེ་ག་ སེ་རབ་ཉོང་པ་ཆོ་ནེ་ལ་ རོ་ཀི་སེམས་གསོ་ཨ་ལེ་ཁེ༌ལེ། ཉི་ཚཱས་ཁཱན་སོ་ངོ་བ་ཀ་ རུམ་པེ་ག་སེ་རབ་ ཉོང་པ་ཆོ་ནེ་ལ་ རོ་ཀི་སེམས་ནང་ཀེ་ཨ་ཉི་རང་ རུམ་པེ་ཁེ༌ལེ། འགོ་དཔོན་ཨ་ལེ་ག་ སེ་རབ་ཉོང་པ་ཆོ་ནེ་ལ་ རོ་ཀི་འགོ་དཔོན་ག་ འགན་ཁུར་ཁེ་པ་ ལེག་པུ་ཨ་ཉི་བང་མེ་ཁེ༌ལེ། ཉི་བཱརའ་སོ་ངོ་བ་ཀ་ བྱམས་པར་གེན་མེ་ག་ སེ་རབ་ཉོང་པ་ཆོ་ནེ་ལ་ རོ་ཀི་ཤོ་ནང་ཕེ་ཉི་ བཱརའ་ག་བྱམས་པར་ གེན་མེ་ཁེ༌ལེ༎
ཕང༌ཅོ།
9ངོ་མ་ཨ་ཉི་ཕང༌ཅོ། ཉི་ངན་པ་ཁེ་པ་མ་ཟེས༌ཅོ། ལེག་པུ་ཁེ་པ་ ཙུང་ཉི་རང་ཐའི། 10ཡུང་ཟི་ནང་དོ་ ཕང་པ་པུརུས་ཀིན་ཨ་ཉི་ ན་ཧ་བ་ ཆམ་ཉི་ཆོ་ལེ་ཁེ༌ལེ། ཉི་རང་ཏེན་གེ་ལག་ཉི་ ཐུར་དང་ཐུར་ག་ཏཱན་ གུས་ཞབས་ཨའི། 11ཉི་སེམས་ཤོ་ཉི་ གཙོ་བོ་ག་ཕྱག་ཞུན་ཅ་ཨ་ཉི་ ཙ་དྲེག་ཉི་ལའི་ཨའི། ཉི་ཀ་ཤི་ ཧ་ལ་རང་མ་ཨའི། 12ན་ཤི་རེ་ཆ་ཨ་ཁཱན་ག་ ཤོ་ནང་ཕེ། དཀའ་ཝ་ཅཱད་པེ་གང་ཀ་ བཟོད་པར་སྒོམ༌ཅོ། ཉི་དུས་ཏ་བུ་རང་ སྨོན་ལམ་ཏབ༌ཅོ། 13ཚཱས་ཁཱན་ དཀོན་མཆོག་ག་ སོ་ངོ་བ་ཀ་རུམ༌ཅོ། ཉི་ཤི་མིན་བ་ཀ་ཁབ་ཟང་ཨ་ཉི་ དྲང་མེ་ཕུལ་བེ་ག་ལམ༌ཅོ།
14ན་ཧ་མ་ལེག་པ་ ཨ་ཁཱན་བ་ཀ་དེན་གེ་ བྱིན་རླབས་ཞུའི། རོག་ཏེ་བ་ཀ་ ཁ་རབ་ཕི་ལེ་མང་གི་ཝ་ རོག་ཏེ་བ་ཀ་དེན་གེ་ བྱིན་རླབས་ཞུའི། 15ཤོ་ནང་ཕེ་ཁཱན་བ་ཀབ་ཉི་ ཤོ་ནང་ཕེ་ཉི་ཆོའི། ཉི་གེབ་ཁཱན་བ་ཀབ་ཉི་ གེབ་ཉི་ཆོའི། 16ཐུར་དང་ཐུར་ཀབ་ཉི་ ཆམ་ཉི་ཆོའི། ཆི་ལུ་རི་ལེ་མ་གོད་པཱན་ སོ་ངོ་ཉམ་ཆུང་བ་ཀབ་ཉི་ ཤོ་ནང་ཕེ་ཏོག་ཏོ་ཨ་ཉི་ཆོའི། ན་ཤི་རང་ཏེན་ཤ་ སེ་ཁཱན་གི་ལ་དག་ཉི་མ་མི།
17ངན་པ་ཨ་ཁཱན་ག་ཏཱན་ ལོག་ཉི་ཧ་ལ་རང་ ངན་པ་མ་ཨའི། དག་པ་ཀབ་ཉི་ སོ་ངོ་ཐམས་ཅན་ག་གུབ་ཀ་ ལའི་ལེག་པུ་ཤ་ ཨ་ལེ་གོད༌ཅོ། 18ན་ཤི་ཧབ་ཏུར་རེ་བ་ཐུར་ སོ་ངོ་ཐམས་ཅན་ཀབ་ཉི་རང་ཆམ་ཉི་ སྐྱིད་པུ་ཨན་ ཆོ་ལེ་མིག་པ་ཕི།
19ཇ་ག་ཇ་རོ་བ་ ཧིང་འགྲམ་ཧ་ལ་རང་མ་ཐའི། དག་པ་ཀབ་ཉི་ དཀོན་མཆོག་ག་ཕྱག་ཀ་ཐའི། ཧང་ཡ་དག་ནེ་ལ་ གསུང་རབ་ནང་ཀེ་ཤོན་ཅ་
ཧིང་འགྲམ་ཤོ་ ཇི་གི་ཐ༌ལེ། ལོག་ཉི་ཏ་པེ་ཁེ་ཁཱན་བ་ཀ་ ཇི་གི་ཏ་པེ་དག༌ཉི་#12:19 ཁྲིམས་ལུགས་ག་དཔེ་ཆ་ 32:35 གཙོ་བོ་གི་གསུངས་མ༌ཅ།
20ལག་ཏང་ གསུང་རབ་གེ་ ཤོ་ཝ་དང་ཏུ་ཉི་ ན་ཤི་ཨའི།
ན་ཧ་དགྲ་བྱང་ཕིཤི་ བི་ནང་ཁུ་ཝ་ཆོ་ནེ་ལ་ རོ་ཀ་ལྟོ་བི། རོག་ཏེ་བ་ རི་ནང་སོ་ཕ་ཆོ་ནེ་ལ་ རོག་ཏེ་བ་ཀ་ ཧང་ཐུར་ཇ་མེ་ག་བི། ཉི་རོག་ཏེ་བ་ཀི་ ཨ་ཁཱན་ག་གོད་ཉི་ རོག་ཏེ་བ་ངི་ནང་ཁུ༌ལེ།#12:20 དཔེ་གཏམ་རིག་པ་ག་དཔེ་ཆ་ 25:21, 22
21ངན་པ་གི་ཟག་པེ་མང་གི་ཝ་ ན་ཤི་ལེག་པུ་ཨ་ཉི་ ངན་པ་ཕ་མེ་ཁེ༌ལེ༎
Currently Selected:
རོ་མི། 12: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
