Yawhana 2

Yɛsu Mǝrti Yimi ka 'Ya Yimǝr Inabi

1Akwa vǝr makǝrkur ndǝ ka 'ya gyaliyir kǝldzi akwa Kana nǝr Galili. Angǝra Yɛsu akwanda, 2ba Yɛsu kaka ndzǝr nuwurni yɛ ndǝ gha ala dar kǝldzǝ ndari. 3Sakatǝ yimǝr inabi tara kuri, angǝra Yɛsu ka nkǝrɛ alari apǝri, “Yimǝr inabi tsu adi wɛ.”

4Yɛsu ka nkǝrɛ alari apǝri, “Ma, kami tǝ gǝ awa gha alai sǝ ǝni? Sakarna ta 'ya kwataku wɛ.”

5Angǝri ka nkǝrɛ ala madar kǝi yarni apǝri, “Kǝlara sǝ nam tǝ dzǝ gha, ka gǝri 'ya.”

6Akwa vui ndari tsuwɛ gǝlam nkwa ada pui nam tǝ ndǝ hǝn tǝ paya, ndzǝli nam tǝ ndzǝr Yahudi ada 'ya wudzǝr kǝtsǝdzi akǝr, kǝlara gǝlam ada kǝtǝ ata 'ya kyahǝla yimi fwaɗǝthlani ka la nkwathlani.

7Antǝ Yɛsu ka nkǝrɛ ala dar apǝri, “Ghǝiyatamɛ gǝlam yarni aka yimi.” Ani dar ka ghǝiyati tǝ dar piyar-piyar.

8Aghǝla ǝnda dzǝ ka nkǝrɛ ala dar apǝri, “Yau, kulini dzá kǝtsamɛ ka gǝri mwari akǝri ala thlakǝr wudzǝr ni.”

Antǝ dar ka mwari akǝri. 9Thlakǝr wudzǝr ni kǝnya yimi ndari nam tǝ ndǝ sǝmwati ka 'ya yimǝr inabi ni. Dzǝ ta zǝndi vui nam tǝ ndǝ ɓui akwa wɛ, ama madar kǝi yarni nam tara kǝ yimi ni zǝndi. Antǝ dzǝ ka kǝga sala kǝdǝwa ni, 10ka nkǝrɛ alari, “Sanga ndzǝr wudzǝr ada hamnta yimǝr inabi nam ɗakari tangkǝma, kama nam kura sǝɗa, sakatǝ ndzi sǝsa ka ghǝi. Ama gǝ ɗǝwar nam ɗakari si kulini.”

11Yɛsu 'ya parsu nǝr ndatǝdzi ǝni nam tangkǝma akwa Kana akwa diyir Galili. Akwa whal ǝni dzǝ tsanti nggakurni, antǝ ndzǝr nuwurni ka hamnta dzǝri aka dza.

Yɛsu Tsarba Fǝr Hyal

(Mat 21:12-13; Mar 11:15-17; Luk 19:45-46)

12 # Mat 4:13 Aghǝla ǝni dzǝ ka mwari akwa Kafarnahum, vwam aka angǝri, madar angǝri, kaka ndzǝr nuwurni. Dar ka ndzai akwanda nǝr vǝri yar laka.

13 # Sǝb 12:1-27 Wudzǝr ngǝmba nǝr ndzǝr Yahudi kǝ si kudzǝghɛ, antǝ Yɛsu ka mwari akwa Ursalima. 14Akwa babalǝr fǝr Hyal dzǝ ɓui ndzǝ ada ɗǝlnta thla, tǝma, kaka kǝtǝpǝr, ba tsuwɛ ndzǝr tsandi kwapa ada ndzai ata vui kǝthlǝr dar. 15Antǝ dzǝ ka nati kwangyang aka suwɛ, dzǝ ka kǝdlǝba sanga dar akwa babalǝr fǝr Hyal, sanga tǝma kaka thla yarɛ ni, dzǝ nkǝnkanta tɛbǝr ndzǝr tsandi kwapa ka yirnta kwapar dar. 16Dzǝ ka nkǝrɛ ala ndzǝr ɗǝlnta kǝtǝpǝr, “Fantamɛ sǝ yarni akwani! Ta gǝr ta mǝrti kǝiyir Bana kasuku.”

17 # Zab 69:9 Antǝ ndzǝr nuwurni ka ɗǝngati rǝbwa-rǝbwa apǝri, “Yiɗǝdzi nam tǝ Yi ada 'ya ala kǝiyir ngɛ ada mba apa u'u.”

18Ndzǝr Yahudi bara akari, “Parsu nǝr ndatǝdzi madi tǝ gǝ awa tsanti ala yar ka tsanǝba nggakur ngɛ tǝ gǝ ada 'ya sanga sǝ ǝni?” 19#Mat 26:61; 27:40; Mar 14:58; 15:29Yɛsu ka sǝnau ala dar apǝri, “Whuzanta mɛ fǝr Hyal ǝni, Yi tsuwɛ ka Yi hǝnti tǝni akwa vǝr makǝr.” 20Ndzǝr Yahudi ka nkǝrɛ apǝri, “Kǝtǝ ndɛ fá fwaɗu thlani kapu nkwa tǝ ndɛ ada tsa fǝr Hyal ni, gǝ tsuwɛ akwa vǝr makǝr tǝ gǝ ata hǝnti tǝni?” 21Ama fǝr Hyal nam tǝ Yɛsu ada gha ni ani dzari. 22Aghǝla tǝ ndǝ hyanti tǝni akwa ntǝnti, ndzǝr nuwurni ka ɗǝngati sǝ tǝ dzǝ nkǝrɛ. Antǝ dar ka mbǝrsa aka Labar Hyal ni ba labar yarɛ nam tǝ Yɛsu tara gha.

23Yau, saka nam tǝ dzǝ akwa Ursalima sakar Wudzǝr Ngǝmba, ndzi hang wula parsu nǝr ndatǝdzi yarɛ nam tǝ dzǝ ada 'ya, dar ka hamnta dzǝri aka thlǝmari. 24Ama Yɛsu ta dlutsi apǝri mbǝrsa dar dzǝri wɛ, kadǝbar dzǝ zǝndi ɗǝfa kǝlara ndɛ. 25Dza adi ada bara ka ndǝ dza gha alari su ata kǝra ndǝ wɛ, dzǝ kurta zǝndi sǝ nam akwa ɗǝfa ndɛ.

Currently Selected:

Yawhana 2: CKL

Highlight

Copy