Yawhana 20

Hyatǝr Yɛsu Akwa Ntǝnti

(Mat 28:1-10; Mar 16:1-8; Luk 24:1-12)

1Kula-kula mbǝk vǝr nam tang akwa magu tsu ɗar zǝgut-zǝgut, Maryamu Magǝdaliya mwar ata kǝr kul ni, dzǝ ka wula ndǝ mbǝyanta paya nam ata nya kul ni. 2Ani dzǝ ka whuiya lǝngui adzǝ Simaun Bitrusu, ba ndǝr nuwurni nam tǝ Yɛsu ada yiɗɛ, dzǝ ka nkǝrɛ ala dar, “Ndǝ kǝlba Thlaku akwa kul ndari, yar ta zǝndi vui nam tǝ dar vu tǝni akwa wɛ!”

3Antǝ Bitrusu aka ndǝr nuwurni damwa dar baditsǝni mwari ata kǝr kulari. 4Dar gyapu ada whui, ama ndǝr nuwurni damwa ni ka whui atǝra angyar Bitrusu, ka si adzǝ nya kulari kǝma. 5Dzǝ ngai kǝrni ba dzǝ ka wula baktar lilǝng yarɛ ǝnda ada pui, ama dza dzǝ ta lǝkwa wɛ. 6Simaun Bitrusu, nam aghǝlari, dzǝ si ka lǝkwa kuta kul ni. Dzǝ ka wula baktar lilǝng ni ada pui, 7ba dzǝ wula zǝr bakta nam tǝ ndǝ tara bar kǝra Yɛsu akǝri. Bakta ni patǝdzi tǝ kǝrni ada vi tǝ ngwam. 8Antǝ ndǝr nu nam tara si ata nya kulari kǝma nda dzǝ yɛ dzǝ ka lǝkwa. Dzǝ ka wula, dzǝ ka mbǝrsa. 9Akuya har saka ǝnda dar tsu ta ngaba Labar Hyal nam tara nkǝrɛ kǝ ndzai ntsakǝr Yɛsu ata hyati akwa ntǝnti wɛ.

Yɛsu Tsantǝdzi ala Maryamu Magǝdaliya

(Mar 16:9-11)

10Antǝ ndzǝr nuwurni ka ɓita lǝhǝi. 11Ama Maryamu ada hyati abǝla ata nya kulari tǝ dzǝ ada tuwa. Dzǝ tsu awa akwa tuwa, dzǝ ka ngai kǝrni tǝ dzǝ ada wul kuta kulari, 12ba dzǝ ka wula ndzǝr hyantǝr Hyal sǝɗɛ aka kari mwapu. Ada ndzai ata vui nam tǝ ndǝ vi saiyir Yɛsu, pathlu tǝbwar kǝr ba pathlu tǝbwar thlǝlɛ.

13Dar ka yu tǝni, “Mwala, kami tǝ gǝ ada tuwa?”

Dzǝ ka nkǝrɛ, “Dar kǝtǝ Thlakǝrna atǝra ba Yi ta zǝndi vui nam tǝ dar vi tǝni akwa wɛ.” 14Antǝ dzǝ ka mbalar kǝmari ma dzǝ ata wulɛ Yɛsu ada hyati, ama dzǝ ta zǝndi apǝri Yɛsu wɛ.

15Dzǝ yu tǝni, “Mwala, kami tǝ gǝ ada tuwa? Wa tǝ gǝ ada bara?”

Dza ada ɗǝnga apǝri dzǝ ndǝr wul fu yarɛ nda, ani dzǝ ka nkǝrɛ alari, “Thlaku, ma apǝri gǝ dzǝ kǝtǝ tǝni atǝra, gha alai vui tǝ gǝ vi tǝni akwa, ka Yi lǝka kǝtǝ tǝni.”

16Yɛsu nkǝrɛ alari, “Maryamu!” Dzǝ ka mbalti kǝmari tǝbwar ni ka nkǝrɛ akwa nyar Yahudi, “Rabwani!” (nam ada nkǝrɛ Malǝm).

17Yɛsu nkǝrɛ, “Ta gǝ ta ngǝzǝ tǝra mai, akuya har ba kulini Yi ta tǝra alǝti adzǝ Tada kwataku wɛ. Ama mwari adzǝ madar mana, ka gǝ nkǝrɛ ala dar apǝri, ‘Yi ata tǝra adzǝ Babarna ba Babar gǝri, adzǝ Hyalǝrna ba Hyalǝr gǝri.’ ”

18Ani Maryamu Magǝdaliya mwari ka gha ala ndzǝr nuwurni apǝri, yǝ wula Thlaku ba dzǝ ka tsǝba ala dar sǝ nam tǝ dzǝ gha alari.

Yɛsu Tsantǝdzi ala Ndzǝr Nuwurni

(Mat 28:16-20; Mar 16:14-18; Luk 24:36-49)

19Akwa vǝr ndari apa kǝmar tǝhaku, vǝr nam tang akwa magu, ndzǝr nuwurni atakǝmaduku, dar ka harti nyavǝr fǝr nam tǝ dar akwa, akuya ka hyivǝr ndzǝr Yahudi. Yɛsu si ka hyati akwa ntsa dar, dzǝ ka gha ala dar, “Lapiyakur ala gǝri!” 20Aghǝla tǝ dzǝ gha apani, Dzǝ tsanti ala dar tsiyari ba ghyimbiyari. Ndzǝr nuwurni ka 'ya kutsari kadǝbar tǝ dar wula Thlaku.

21Yɛsu nkǝrɛ ala dar kadamwa, “Lapiyakur ala gǝri! Apa tǝ Tada tara hyanti tǝra, ani apani Yi ma tǝ Yi hya tǝ gǝri.” 22Antǝ Dzǝ ka pu mpihǝrni ata kǝra dar, dzǝ ka gha, “Dlutsamɛ Mambǝl Kartǝ. 23#Mat 16:19; 18:18Kǝlara ndzǝ nam tǝ gǝr kyifǝnta alari bikǝrni, bikǝrni kyifǝntadzi; ma gǝri ta kyifǝnta ala dar wɛ, ndǝ adi ata kyifǝnta ala dar wɛ.”

Yɛsu Tsantǝdzi ala Tauma

24Yau, Tauma (tǝ ndǝ ada ka tǝni tǝ Ɓwalɛ), pathlu akwa ntsa kum kapu sǝɗɛ, dzǝ adi kaka ndzǝr nuwɛ saka nam tǝ Yɛsu si wɛ. 25Ani laka ndzǝr nuwɛ yarɛ ni ka nkǝrɛ alari, “Yar wula Thlaku!”

Ama Tauma nkǝrɛ ala dar, “Ma Yi ta wula kawur kusa ata tsiyari, ka Yi hau gulanda wai akwa kawur kusa ndari, ba ka Yi hau tsiyawai akwa ghyimbiyari wɛ, Yi adi ata mbǝrsa wɛ.”

26Aghǝla vǝr ntsisu, ndzǝr nuwurni akwa kǝi ndari kadamwa, Tauma vwam kaka dar. Kwahani tǝ nyavǝr yarari dǝgǝldǝgǝli, Yɛsu si ka hyati akwa ntsa dar, dzǝ ka nkǝrɛ, “Lapiyakur ala gǝri!” 27Antǝ dzǝ nkǝrɛ ala Tauma, “Hau gulanda gɛ akwani, ka gǝ wula tsiyawai yarɛ. Ha tsiya gɛ ka gǝ vu akwa ghyimbiyawai. Ta gǝ ta ndzai ndǝ nam kura aka mbǝrsa, ka gǝ ndzai ndǝ nam aka mbǝrsa.”

28Tauma ka sǝnau alari, “Thlakǝrna, ba Hyalǝrna!”

29Yɛsu nkǝrɛ alari, “Kadǝbar tǝ gǝ wula tǝra, ani gǝ ka mbǝrsa; barka ala ndzǝ nam kura ta wula ama dar mbǝrsa.”

30Yɛsu 'ya parsu nǝr ndatǝdzi yar laka pam-pam hang, akǝma ndzǝr nuwurni, nam kura ndǝ ta rǝbwai akwa kakadu ni. 31Ama ndǝ rǝbwai ǝni yarni ani ka gǝri mbǝrsa apǝri Yɛsu dzǝ ani Kǝrsti, Zǝr Hyal, ba kadǝbar tǝ gǝr mbǝrsa, gǝri ata ɓui mpikɛ akwa thlǝmari.

Currently Selected:

Yawhana 20: CKL

Highlight

Copy