Mata 7
7
'Ya Haka ala Ndzǝ Damwa yarɛ
(Luk 6:37-38)
1“Ta gǝri ta 'ya haka ala ndzi kadǝbar gǝri yɛ ta ndǝ ta 'ya ala gǝri haka. 2#Mar 4:24Akuya tsu apa tǝ gǝri ada 'ya haka ala ndzi damwa yarɛ, ani tǝ ndǝ ata 'ya ala gǝri haka, ba aka daram nam tǝ gǝri ngalɛ ala ndzi, aka dza tǝ ndǝ ata ngalɛ ala gǝri.
3“Kami tǝ gǝ ada wul kukutǝr fwɛ ata ntsa zǝrma, ama gǝ adi ada ɗǝnga bangǝlang nam ata ntsa gǝ wɛ? 4Mǝmi tǝ gǝ awa gha ala zǝrma, ‘Ngyar ka Yi kǝli ala gǝ kukutǝr fwɛ ata ntsa gɛ,’ aghǝla tǝ sanga saka bangǝlang ata ntsa gɛ? 5Gǝ nam kǝlikatsaɗǝm, tangkǝma ka gǝ kǝli bangǝlang ni nam ata ntsa gɛ, ba antǝ gǝ ata wula su paraku ka gǝ kǝli kukutǝr fwɛ nam ata ntsa zǝrma.
6“Ta gǝri ta la kǝya yarɛ sǝ nam nǝr Hyal; Ta gǝri ta la sǝ nam ada mbǝlmbǝli apa lipǝla ala gadu yarɛ. Ma gǝri 'ya apani dar ata dlǝdlaɓuti aka thlǝla dar, ba dar ata mbalti kǝr dar ka dar thlǝkwanta tǝ gǝri palai-palai
Kǝgyɛ, Bara, Tsa
(Luk 11:9-13)
7“Ka gǝri kǝgyɛ ndǝ ata la gǝri; ka gǝri bara gǝri ata ɓui; ka gǝri tsa ndǝ ata mburnta ala gǝri nyavǝrari. 8Akuya kǝlara ndǝ nam tara kǝgyɛ dzǝ ata dlutsi; ndǝ nam tara bara dzǝ ata ɓui; ba ala ndǝ nam tara tsa nyavǝr ndǝ ata mburnta alari.
9“Wa akwa ntsa gǝri, ma zǝrǝrni kǝgyǝ mantsǝkǝl, ka dzǝ lari paya? 10Wala ma dzǝ kǝgyǝ kulfa, ka dzǝ lari pwapu? 11Ma gǝri nam ndzǝ kulɗa, gǝri zǝndi whal nam tǝ gǝri ada la sǝga yarɛ nam ɗaku ala madar gǝri, mǝmi hangkur nam tǝ Tada gǝri nam atahyal ata la sǝga nam ɗaku ala ndzǝ nam kǝgyǝ tǝni! 12#Luk 6:31Ani akwa kǝlara su, ka gǝri 'ya ala ndzǝ laka yarɛ sǝ nam tǝ gǝri ada bara ka dar 'ya ala gǝri, akuya ǝni ani sǝ nam tǝ Mabari ba nabi yarɛ tara nkǝrɛ.
Nyatǝfu nam Hyɛɗu ba nam Dlaɓu
(Luk 13:24)
13“Ka gǝri livi ata nyatǝfu nam hyɛɗu. Akuya nyatǝfu nam dlaɓu ni ani nyatǝfu nam tǝ nuwari butu ani whal nam ada mwari akwa vui santadzi, tǝ ndzǝ hang ada livi ati. 14Ama nam nkyiɗu ni ani nyatǝfu nam hyɛɗu whal nam ada mwari akwa vui mpikɛ, ba ndzǝ yiɗau laka ani ata ɓui tǝni.
Fwɛ ba madarni
(Luk 6:43-44)
15“Ka gǝri hankal aka nabiyir hawi yarɛ. Dar ada si adzǝ gǝri akwa kutsǝr tǝma, ama akwa ɗǝfu dar apa kǝyar ntaku yarɛ nam aka mi. 16Atar madar dar gǝri ata zǝndi tǝ dar. Akuya ndǝ adi ada ɗǝm munyar inabi ata fur ntsǝkǝɗa wɛ, wala kanda ata fur angavǝlɛ wɛ. 17Apani tsuwɛ kǝlara fwɛ nam ɗaku ada yai madar nam ɗaku, ama fwɛ nam kulɗa ada yai madar nam kulɗa. 18Fwɛ nam ɗaku adi ada ya madar nam kulɗa wɛ, ba fwɛ nam kulɗa adi ada ya madar nam ɗaku wɛ. 19#Mat 3:10; Luk 3:9Kǝlara fwɛ nam kura ada ya madar nam ɗaku ndǝ ata dlǝnta tǝni ka ɗalu tǝni akwa u'u. 20#Mat 12:33Apani atar madar dar gǝri ata zǝndi tǝ dar.
21“Adi kǝlara ndǝ nam ada nkǝrɛ alai, ‘Thlaku, Thlaku,’ ani ata lǝkwa Kuhyikur nam atahyal ni wɛ, ama ɗiɗi ndǝ nam ada 'ya sǝ nam tǝ Bana nam atahyal ada yiɗɛ. 22Ndzǝ hang ata nkǝrɛ alai akwa vǝr nda, ‘Thlaku, Thlaku, Yar ta 'ya nabikur akwa thlǝma gǝ, ba akwa thlǝma gǝ tǝ yar kǝdlǝba mambǝl yarɛ nam kulɗa ba 'ya sǝr ndati yarɛ nam hang wɛ?’ 23#Zab 6:8Antǝ Yi ata gha ala dar ata babal, ‘Yi ta saga zǝndi tǝ gǝri wɛ. Tǝramɛ adzǝra, gǝri ndzǝr 'ya su kulɗa!’
Ndzǝr Tsa Fǝr nam Ɓǝrkawa ba nam Dlang ni
(Luk 6:47-49)
24“Kadǝbar ǝni kǝlara ndǝ nam tara ngati ndǝrǝrna ǝni yarni ka hau tǝ dar akwa kǝthlǝr ani dzǝ apa ndǝ nam bǝrkawa nam tara tsati kǝiyirni ata paya. 25Yimi kǝ sǝgǝl, zǝlkǝ yarɛ ka ghǝiyatǝdzi, sambar padɛ ka tsa kǝi ndari; wala apani dzǝ ta dla wɛ, kadǝbar ndǝ piyartsǝni tǝni ata paya. 26Ama kǝlara ndǝ nam tara ngati ndǝrǝrna ǝni yarni ba kura dzǝ ta hau tǝni akwa kǝthlǝr ani dzǝ apa ndǝ nam dlang nam tara tsati kǝiyirni ata wuyahu. 27Yimi kǝ sǝgǝl, zǝlkǝ yarɛ ka ghǝiyatǝdzi, sambar padɛ ka tsa kǝi ndari, ba dzǝ ka dla ka whuzantadzi.”
28 #
Mar 1:22; Luk 4:32 Sakatǝ Yɛsu tara kurai gha sǝ ǝni yarni, dlamiyir ndzi ni ka ndatǝdzi ata kǝra sǝr hyipǝrni ni, 29kadǝbar dzǝ ada hyipɛ apa ndǝ nam aka wada, ba adi apa malǝmǝr mabari yarni wɛ.
Currently Selected:
Mata 7: CKL
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
