Luk 5

Yesu n'ajifan eriboora i étiyar i

(Májiye 4.18-22; Mark 1.16-20)

1Hike hunak, Yesu n'áyemi t'asiiŋee ti katafa kite *han hite Senesaret, hahooja hu ni híyemi toko ti sítiŋgoor kaanuku keeloho, keejam hirim hite Atambatun. 2N'ajuk ñusoona ñúsuba ñeeyee. Embaala i kawanawano, kéeyemi ti kañawu simbaalu sooniin. 3Bike tu ñusoona ñondu bite bu Simoŋ. Yesu n'ájufo abe n'aane Simoŋ atiŋg bo tu móhujo mu. Ahaban, n'ariiko te bo, éeyemi ti kaliiken hahooja hu mite m'Atambatun.

4H'átibane hu, n'aane Simoŋ:

—A̱tof nu busoona bu t'ásulie du, abe n'árifiiten simbaalu soonuun awe ni bakani ariimbaal.

5Simoŋ n'aano:

—Ámuse u, irimbaalambaal fu huhuk he fe írilaam, abe irijokut doon tus. Bare makamu awe a̱soke fee, íñje káfiiten simbaalu su.

6Ni káfiiten so, ni kajok bisaan úkaan, simbaalu sooniin siyak sulohen bijeho#5.6 A̱juk yooŋ Saaŋ 21.3-6.. 7Ni kayit bakaniin kéeyemie ku ti baabu busoona sumoŋu, kaanuku keebin kéeyokunaniin. Ni kabin, abe ni kahoojan ñusoona ñu t'ésuba te ño. Ñútumb ñuhooj ayak abin áami ñulohena bísiimo. 8Hi Simoŋ Piyeer ajuke hu bondu, n'asaaho éejiŋgitan hágila Yesu abe n'aane:

—A̱kambam Anahaan u, ábuki íñje ahoofoora!

9Múniyo Simoŋ ni kéeyemie ku ne o fe kajahalajahale iŋ'ite bisaan beehooje bii bi kajoke bu. 10Bakano yooŋ, Saak ni Saaŋ biñi bite Sebede kéeyemie ku ti baabu busoona, mo mifeeneŋ mu. Bare Yesu n'aane Simoŋ:

—Atum'á̱koleyi. Áfiitin ti hahiye, kúŋgowulan k'a̱ja fu kajoku.

11Ni kaya, abe ni kawas toko buroon booniin fe keeriboor ni Yesu.

Yesu n'áhin ániine eebaje u yafot i éekoyi

(Májiye 8.1-4; Mark 1.40-45)

12Hike hunak, Yesu t'eke ésuk, ake ániine n'abin, abe *yafot i ejokajok enio ereyi fe. H'ajuke hu Yesu, n'ájiŋgitan hágilao ayak abin áami buhooŋio biyaa t'etaam, abe n'áwasiyano aano:

—Ámuse u, af'á̱maŋi, á̱nooniam káhinu íikoyi#5.12 íikoyi: ti *kigerekaay, akiñjeekiñj: «Af'á̱maŋi, á̱yinooniam (káhinu) *iikuur but.» T'eluwa yite Esuwif i, an eebaje kásomut kondu akuurut; awarut kalohu ésuk i..

13Yesu n'araaw emoŋio, eegoro abe n'aane:

—Ímaŋamaŋi fu, á̱koyi!

Toko-toko yooŋ, yafot i n'étowuto t'ániine u. 14Yesu n'áhamino ayan faŋ aano:

—Atum'a̱sok bo an fe, bare a̱ja *t'asaraha u á̱awufooro naane a̱amo i, abe n'á̱hin kaasarah ki *Moyis asoke ku, beekuur ésuk i fe kaanuku á̱koyia#5.14 Kóŋkeyin t'Esuwif i, *yafot i ef'éyemi t'an, at'akin t'afeeneŋ n'ésuk i. O kanuutanee tíyaŋ hikinu hu. Áhina ite *wusarah wu taŋ aware fu kajuku te o n'aano ákoyia. Bare bala an ondu ábatikein éeŋaabein ésuk i, o kajabu áhin wusarah weesokee wu *t'Eluwa yite Moyis. A̱juk Esaraha i 14.1-32..

15Bare huruwu hite Yesu ti kahaŋu bijamo kep. Bakan keehooje-hooj iŋi kaja kaŋaaboo kaanuku keejamatano, abe n'aritan yooŋ kéesomute ku. 16Bare Yesu n'aŋ'aja áriikein t'eramba i unoono, aŋ'alaw bo.

Yesu n'aritan ániine eeyinaat bija

(Májiye 9.1-8; Mark 2.1-12)

17Hike hunak, Yesu n'áyemi ti kaliiken ésuk i mite m'Atambatun. *Efarisiyeŋ i, *n'émuse yite Eluwa yite Moyis ni kariiko toko, kánuutin ti kikinu kite *Gálile, nu *Súde, bija Serusalem fe. Atemit n'awun Yesu sembe aŋ'aritan kéesomute ku. 18Bakaake ni káreeŋin, kéeyitina ti kabaŋ ániine eeyinaat bija. Ni kaŋes kaanuku keeyooso ne o t'enuuf i, keewanano hágila Yesu. 19Bare kabajut ti kaware kaŋaasu ne o iŋ'ite hahooja hu. Ni kasiro ne o t'ewulen ite enuuf i#5.19 Kóŋkeyin, sunuuf site *Israyel iŋi sibaj suwulen naane site bitaah. Iŋi kateef so. Ésuk i iŋi kafand bisiro toko keeyih., kéehin toko efulu, abe ni kawanano ti kabaŋ koone t'etut hahooja hu, hágila Yesu. 20Hi Yesu ajuke hu káyilen kooniin, n'aane ániine eeyinaat u bija:

—Óom, wuhoofoor wúuwe wuboŋketee.

21Émuse yite Eluwa yite Moyis, n'Efarisiyeŋ i ni kayinoor ti kikawiin iŋi kaane:

—Kame áyin ondu aañ, aa álafatin ii Atambatun? Aañ ayino kaboŋket wuhoofoor t'arkut Atambatun unoono?

22Yesu n'ámeyi kaayinoor kooniin. N'aaniin:

—Kame baŋka bu kereŋ? 23Kame naŋ nihaŋe fu katoofu kasoku tu bonde? Kaanu kite: «Wuhoofoor wúuwe wuboŋketee», man yooŋ: «A̱rito a̱aja»? 24Bare íñje káwufooruun kaanuku *Añi ute Húŋgowulan hu ákooki t'etaam ye sembe site kaboŋket wuhoofoor.

N'aane ániine eeyinaat u bija:

—Íñje isok fee n'awe: a̱rito, abe n'a̱yit kabaŋ kúuwe a̱ayeet!

25Toko-toko, ániine u n'arito tu buhooŋu ésuk i fe, eeyit kabaŋ ku t'ahurusanee du yéeni, abe n'ayeet aŋ'akaro asokoroor Atambatun. 26Kéeyemie ku toko ni kajahale kareyi fe. Ni kasokoroor Atambatun, káakoleyin naane. Iŋi kaanoor:

—B'újuke bu úmiye bihaŋahaŋ úne kikaw!

Yesu n'aruw Lefi

(Májiye 9.9-13; Mark 2.13-17)

27Bondu buwas, Yesu n'anuut toko eeja. O ti bija bu, n'ajuk ake ti *kiŋki kasa búhal bu, huruwu hoone Lefi#5.27 Lefi: iŋi kaano yooŋ Májiye; a̱juk Májiye 9.9; Mark 2.14.. Ámoomi t'ariikee t'ásukut u tindi kajaam búhal bu. Yesu n'aano:

—Á̱seinam ti hiñaawu!

28Lefi n'arito, abe n'awas toko areyi fe eesao ti hiñaawu.

29Abe Lefi n'añun Yesu. Keehooje ti kiŋki kasa búhal bu, ni bakaake yooŋ kámoomi toko tu buñoofo bu nu boko. 30*Efarisiyeŋ i, ni bakaniin *émuse yite Eluwa yite Moyis hutoofutiin. N'iŋi káŋuŋunoor toko abe ni kaane eriboora yite Yesu:

—Iŋi naŋ n'ariñoofo abe n'árihujo t'afeeneŋ n'esaa yite búhal bu, ni bísambaŋ bu#5.30 Kéegilane ku ti bítim bite Esuwif i kajokajok ehoofoora i kéeyemie ku tu buñoofo bu ni Yesu naane bakan *keekuurut. Iŋi kaane an af'añoofo nu boko t'afeeneŋ, n'aŋ'áyemi yooŋ an eekuurut. A̱juk yooŋ Luk 15.1-2.?

31Yesu n'aaniin:

—Bakan keeemo káasuumaayiin kasawuleit asontena. Kéesomute ku kasawuloo fu. 32Ibinut karuwu bakan keejoŋoore ku, bare bísambaŋ bu kákinineŋe fu n'ibin kaanuku man buroŋ booniin nu buwayo.

Yesu n'asok bike ti baawoor bu

(Májiye 9.14-17; Mark 2.18-22)

33Kéeyemie ku ti báhamin bu ni Yesu ni kaano:

—Eriboora yite Saaŋ, ni bakate *Efarisiyeŋ i iŋi kafand *kawooru, abe ni kalaw. Bare bákuuwe ku buñoofo taŋ nu búhujo.

34Yesu n'aaniin:

—Árinooni kanoŋkooran bakan keeje kamaatu biseño keewoor, abe bare an eeemo u ti bisayi bu o toko nu boko? Aaa fu! 35Bare bibin birko, an eeemo u ti bisayi bu karamiee tu sumoŋiiin. Náami kunak kondu, n'iŋi katik kawoor.

36Abe n'asooñ akolofaniin báhamin bonde:

—An ájehaariit eres ti kaawañ kíyeni, kaanuku eekiik yo ti kihaan. Káhinu iyu, n'aŋ'ábuj kíyeni ku, abe eres y'ajehe i te ko et'eriib ni kihaan ku. 37An yooŋ áyunanaariit bunuk bíyeni ti bikeen beehaane. Af'áhin ii, bunuk bíyeni bu kawelej sikeen su#5.37 Kóŋkeyin, iŋi kalof ehob yeeniin ti bikeen bu.. Bo búyuuso, sikeen su yooŋ buwelejo. 38Aaa! Bunuk bíyeni uŋu búyunanee ti bikeen bíyeni! 39Abe an af'áhujo bunuk beeyaŋge ahaban, at'ámaŋi búhujo bíyeni. Úne uf'úene: «Beeyaŋge bu bihaŋe katoofu.»

Currently Selected:

Luk 5: cwt

Highlight

Copy