Aposolo 3
3
Ange koae ali menda ma-epeaisaya ei
1Naare mendana Pida Dioni laapore nipuna yainya puae naarele ipisayanda gaepame nane naare pambala-ainya mo Gode para alinau puaisimiya andaa anda para yainya pulameya paisipiya. 2Gupuma ali komea angimi pena mandisaya dina pora pamuape-na-ae ali, naare raayo ria puala puma mo Gode para alinau puaisimiya andaa anda pora gapena biri Ora Epele pora gape, go para yainya pulame popala pisimiya wenaali para muni menda gialepa, loma kongeyala pinyaya pua ru siala pisimiya. 3Monde pora pope-nae alimi Pida Dioni laapo mo Gode para alinau puaisimiya andaa anda para konda pambolame-ainya lalore, Ale menda gipae, loma konge lisaya. 4Go lisayanda Pida Dioni niipu laapo komea para ara monde ali anda moneala ara Pidame nipu para lalore, Saa laapo andae, lisaya. 5Monde pora pope-nae alimi kone sialore, Go ali laapome alenda menda go gialependae, kone siala ara mo ali laapo ora waru andae wisaya.
6Gupuma Pidame lalore, Niri muni pange ale menda diayapare neme sia-ayo lere gianoae, lisaya. Nasarere ali Yesu Kerisona bina lalole, Rekoma pora puae, lisaya.
7Go lisayandare Pidame nipuna popeke nane ki muma ma-rekaisaya. Gupuma goleme mo alina ange kalalo kuli kongapu aoma pongo pongo lisaya. 8Gupuma monde ali rekoma nipuna ange rendepona aoma pamulopisaya. Mo ali laaposi mo Gode para alinau puaisimiya andaa anda para pumare monde pora pope-nae aliri ange rindapeaoma pongo dada puala pisaya. Gupuma Godena bi pange ma-minyasia eiri paisaya.
9Go eina mo anda para pirisimiya wenaalimi monde ange koae ali pupula ara Godena bi ma-minyasia eiri popisaya ei andisimiya. 10Go ei andoma mo wenaalimi go aliri monde Gode para alinau puaisimiya andaa anda pora gape Ora Epele para piri, muni kongeyo aripande aliae, kone wisimiya. Gupuma monde ali pamulopisaya ei andala ara rungula mealo pambisimiya pange ki kapura kapura pisimiya.
Pidame mo Gode para alinau puaisimiya andaa anda rupara ara angele walisaya ei
11Monde alimi Pida Dioni laapona ki para siamba-ainyaloma mo ali repo Solomono nipuna epe anda polo para arare lee opo andomare go para alo puma pua mombelisimiya. 12Pidame go au andoma mo alinu para lalore, Isaraeli alinuo, akepeanda go eina lee opo andae sialemepae pange saa akepeanda andae sialemepae. Go ali pena dapa eiri saana kongapuna na-pipapare Godena kongapuna go ali pora pena dapa, lisipiya.
13Eparame Aisake Dieikopo naana apa kasuanuna Godeme nipuna puri waru pale eiri, nipuna pupudengi nao-aisaya ali Yesu para alaya. Nimimi duameya Pailadi para karu puamende Pailadimi wala pena doameya rapalo ainyale, nimimi liiamende ali para lawa, lisaya.
14Nimimiri mo Epe Yaakopi Ali para nimimi kou walomare mo ali menda lu komao-aya ali Pailadi ali para ma-alamende, lisaya. 15Nimimi naa para endoaya ei guaya Ali liamendepare Godeme wala ma-rekaripa, lisaya. Go ei naame andoma go la gialemanda, lisaya.
16Gupuma Yesu nipuna bina kone komea wi eina, go nimimi andaleme aliri kongapu alande, lisaya. Mo paripande ei nipuna bina kone rulae eimi andamende pange kone wimi, lisaya. Yesu para kone rulae eimi go ali ma-epearipande eiri nimi raayome andamende, lisaya.
17Na amenuo, nimimi pange nimina kalu alinumi Yesu para pamende ei go au pima lo kone na-wi ara pamende, kone sialo. 18Ambaisenande Godena poropedi alinu raayome nipuna angele wenaali menda para la alalore, Gode nipuna Kerisome rendaa andaai milia loma la wisimiya. Go angele minyaya Yesu nimina kimi rendaa ma-meariminde. 19Go einare kone menda perekeminyu sumare koae koae einu giaoma Gode para lekeya ipulupape. Gupilimindare Godeme nimina koae koae einu kunalia, lisaya. 20Kone menda lekeminyu suma koae koae einu gialimindare Realimi nimina konenu puri ma-palalia. Gupuma pange Yesu Godeme muma ma-maya Keriso nimi para rapalia, lisaya. 21Yesu wala epe auri ambe na-pi Godeme alenda alenda raayo wala penai waruape naare epelea dina warilia ei maisambao Gode Aya para aya. Go eiri ora ambalande Godena yaakopi poropedi alinumi la wisimiyande rupa. 22Ambaisenande Mosesimi wenaalinu para lalore,
Reali nimina Godeme, ni raparipa rupa
Godena poropedi ali menda nimi para
rapalia, lisaya.
Nipuri nimina anda ruru ali alia, lisaya.
Nipuna mana angele raayo waru pangoma
pipape, lisaya.
23Ali apimi go Godena poropedi alina angele
na-pangeleandare Godeme nipuna Isaraeli
wenaali rapu na-ainyale rungulu rumbuma
ma-koyalia, lisayande.
24Gupuma pange Godena angele ma-ipisimiya Godena poropedi ali Samuele pange nipuna kou nane ipisimiya Godena poropedi alinu aisimiya dina go aunu pilia lo la wisimiyande ei ambia go gole ora pande, lisaya.
25Godena angele la wi ei Godena poropedi alinumi lisimiya. Go la wi ei nimi para Godeme lea. Godena angele la suma Godeme nimina aya kasuanu rapu ara la wisimiyande. Go angele nimi para pange lea. Godeme Eparame para lalore,
Nena mandu rangala pili wenaali para neme
na epe aunu nimu para adoa, lea.
Gupuma nimumi suna paidimi anda ruru wenaali
raayo para na epe aunu nimu para
adaminya doa, lisaya.
26Go einare Godeme kone sia muma wenaalinuna pupudengi noae ali ririna nimi para ambala raparipa. Wenaalina pupudengi noae ali nimi para raparipa eiri kone menda perekeminyu ma-giaoma nimina koae koae einu ma-giaoma nipuna epe aunu alenaya, raparipa, lisaya.
Currently Selected:
Aposolo 3: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
