Aposolo 7
7
Sidipeni nipumi angele lisaya ei
1Go eina mo Gode repara alinau puaisimiya alinuna kalu alinuna andaa alimi Sidipeni para lora pula ara lalore, Go alinumi angele yokanali pula ara neeme puale dame einuri ora puale einu damepae, lisaya.
2Sidipenimi nipuna angele yango liada ara lalore, Apa amenuo, na angele pangalepae, lisaya. Naana kasua Eparame Arani ree anda nane ambe na-yokape Mesopodemia andasu nane pa ainya, Gode nipuna bi kende andaai wi Gode, nipunale Eparame para penameyao ipisaya. 3Go naarelena Godeme Eparame para lalore,
Nena andasu, nena anda ruru wenaali raayo
giaoma neme wadoa andasu nane
yoka pope, lisaya.
4Gupuma Kaladia andasu giaoma Arani ree anda para yoka popisaya. Werepena Eparamena apa komisayandare ambia go nimi aeme su nane Godeme Eparame wi loma karu ipuma walisaya. 5Go naarena Godeme Eparame para su engesi pange komenda na-alisayapare nipumi la wi angele lala ara lalore, Go yoka ipuma epa ale suri nee pange nena mandu rangala pili wenaali para gula pange adoa, lisaya. Godeme Eparame para la wisaya angelere Eparame nipu nongo naki menda ambe na-mandu winyaloma lisaya. 6Godeme Eparame para gurupa lisaya. Nena mandu rangala pili wenaali reena andasu nane kuni gipanu anderede malapu rupa ao-alimi. Go kuni gipa anderede malapu ruparare pa anda menda wenaalinuna pakama pupudengi nao-ae wenaali mandana ara rendaa rendaa andaainu waru mualimi, lisaya.
7Go au puala pemepare nimuna yangi na-ademe
realinu nimuna rendaa rendaa einu pakama
ademe alinu para koae eina yangi andaai
adoa, lisaya.
Gupuma werepe nane nena mandu rangala pili
wenaali raayo nimumi reena andasu giaoma
neme go nee ale suna karu epola.
Go lena nimumi panda punyaoma ni para
yainya pualimi angele Godeme lisaya.
8Go naarena Godeme Eparame para lalore, Nee pange nena mandu rangala pili ali naki raayome yongale runguli au pualepape, lisaya. Go yongale runguli au pualepape lisaya eiri Godeme Eparame para la wi angelenu kone rungulalimi loma rombo walena pualepape, lisaya. Go einare Aisake mandu sia ainya naarele pula komeana yapi repo popisaya dinare Eparameme yongale runguli au paisaya. Gurupare Aisakemi nipuna naki Dieikopo yongale runguli au paisaya. Wala gurupa Dieikopo nipumiri nipuna mandu wisayande ki laapo pereyoma angena laapopu nakinuna yongale runguli au paisaya. Go nakinumi andayoma werepe nane Isaraelimi mandu rangala pae wenaali ki laapo pereyoma angena laapopu anda ruru mandu rangala pisimiya kasuanu aisimiya.
Isaraelimi anda repaa mandu rangala pisimiya alinu Idiapi andasu para paisimiya ei
9Ririna mo Isaraelimi anda repaa mandu rangala pisimiya alinumi Diosepa para rono pangala ara kundipa pisimiya. Gupuma pa anda menda alinuna yangi na-mi pakama pupudengi nao-ainyaya Idiapi alinu para ma-karu aloma muni misimiya. Gupisimiyapare Godere Diosepa rapu ao-aisaya. 10Gode gurupa Diosepa nipu rapu aisaya eimi nipuna kenda pi einu epe rupa andere-ao-aisaya. Diosepa nipu Pearo Idiapi andasu wenaalina kini ali andola paisaya dinare Pearona lee angaana ara da pisaya angelenu Godeme kone ma-siaisaya. Godeme rambameala-ainya Pearome Diosepa andisayapare nipuna lee kuma pisayanda Diosepa raname waru komisaya. Gupisayanda Pearome Idiapi andasu raayosi pange Pearona alenda alenda raayosi pange nipuna pupudengi nao-aisimiya wenaali raayo Diosepame andere-ainya, lisaya. 11Go dina Idiapi andasu nane pange Kaenani andasu laapo raida para rea gipa ora andaai pambisaya. Gonde rea pambisayande eimiri naana aya kasuana enda meape para ora maroma ipa kapu komeanda ma-naisaya.
12Gupisayapare Dieikopome Idiapi andasu nane enda wia angele pangisaya. Gupisayanda nipuna nakinu nana kasuanu ambala komenda na-pe rupa ora ririna gurupa Idiapi andasu nane pena kini pu penaya rapaisaya.
13Gupuma Dieikopona nakinu rana laapopao Idiapi andasu para popisimiya dinare Diosepame nimu para lalore, Niri nimina ame Diosepa ayo, loma penameyao walisaya. Gupisaya dinare go Idiapi andasu kini alimi Diosepana anda ruru wenaali pa pimi ei pangoma kone wisaya. 14Gupuma Diosepame nipuna amenu rapu nipuna ara Dieikopo para angele rapaisaya. Angele rapada ara lalore, Nee pange nena anda repaa wenaali nongo naki ali ria repo pereyoma ali mendana ki laapona ange kalelepu nimi raayosi Idiapi andasu nane yoka ipulupape, lisaya. 15Go rapaisaya angele pangoma Dieikopo Kaenani andasu minyapalaoma Idiapi andasu nane yoka popisaya. Go Idiapi andasu para pua ainyare Dieikopo pange naana kasuanu komea komealo komoma paisimiya. 16Ambala ririna Eparameme Sekeme anda para aisimiya Amoa anda repaa para ali dapa pape su munimi kambo wisaya. Gonde kambo wisayande sunare naana kasuanu Idiapi nane ainya komisimiyande alinu epa dapa puala pisimiya.
Godeme Mosesi Idiapi andasu para rapaisaya ei
17Godeme Eparame para ambaisenande la wisayande angele minyalape naare repara ipisayandare ande Idiapi andasu nane palisimiya Isaraelimi mandu rangala pae wenaali waru ralala aisaya. 18Gupuma werepe nane pena kini ali menda Diosepa kone na-wi ali mendame Idiapi andasu epa andere-aisaya.
19Go pena kini alimiri naana aya kasuanu para waru ma-kea kea pu rendaa rendaa waru alisaya. Nimu para rendaa rendaa alala arare nimuna nakinu pa komenaya kama mandu rumbepe pinya, lisaya. 20Go au pula-ainya Isaraeli wena mendame Mosesi mandu wisaya. Mosesi ora epe yole nakisi mandu wisaya. Sumba repomere apa ama laapome anda para kundiripu pa mandu sia aisipiya. 21Gupuma Mosesi nipu kamaa ma-pangawisimiyande dinare Pearona waneme andasuma misaya. Gupuma nipuna naki aulaoma ma-mandisaya.
22Gupuma Mosesi nipuri Idiapi andasu alinuna kone su rekele pu aisimiya einu pena andayala-ainya walisimiya. Gupuma Mosesi nipuna pisaya eimi pange epe rupa ao-paliala ara lisaya angelenumi nipu bi wia ali mandana aisaya.
23Mosesina kuni gipanu ali ria laapo mula popisaya dinare Mosesimi kone sialore, Na Isaraeli anda repaa wenaali epe rupa andabao-aemepae, lo andolameya nimuna anda paranu kimisu pola, kone wisaya. 24Mosesi nipuna Isaraelimi mandu rangala pae wenaalinu pamu andala-ainya Idiapi andasu ali mendame Isaraelimi mandu rangala pae ali menda lu komada-ainya andisaya. Gupuma nipuna Isaraeli ali rambameala ara monde Idiapi andasu ali menda lu ropo paisaya. 25Mosesi nipuna konemere Isaraelimi mandu rangala pae wenaalinu rambamu ora nimuna andaa karu ponoya Godeme nipu mea ma-aya, kone wisaya. Gupuma nipuna Isaraelimi mandu rangala pae wenaalinumi pange go kone wilimi kone wisayapare mo wenaalimi go kone na-wisimiya. 26Naare mendana Isaraeli ali laapome yanda pula-ainya Mosesi ipuma andisaya. Go au ana na-pea kone suma Mosesimi lalore, Ali laapo o, pangalepape. Niipiri mendaa ruru aepele akepeanda yanda pipipae, lisaya. 27Yanda ririna ma-rekaisaya alimi Mosesi waro lopada ara lalore, Neere naana kalu ali pange naana angele yokanali pi ei pangoaya ali apimi go pupudengi geapae, lisaya.
28Ambala monde Idiapi ali liiaende rupa neeme ni duame lalepae, lisaya. 29Mosesimi go angele pangoma Idiapi andasu minyapalaoma Midiani andasu nane pongola popisaya. Go andasu para pua arare Mosesimi wena lamuma naki laapo mandu wisaya.
30Mosesi kuni gipa ali ria laapo mula popisaya dinare Eindiolo nipu repara penameyao walisaya. Go penameyao wale eiri wenaali na-ao-pali weambi pi su Sainai kana reena onge repana ree aisaya para repana sula risaya eimi penameyao walisaya. 31Mosesimi onge repana ree para repana risaya ei andoma rungula mealo pambisaya. Nipu ora waru andolameyanda repara popisayapare repara pula-ainya Realina angele pangisaya. 32Realimi lalore,
Niri nena kasuanuna Gode ayo, lisaya. Eparame,
Aisaki, Dieikopo nimuna Gode ayo, lisaya.
Mosesimi Realina angele pangoma nipuna dome paalame komala ara pururu puma pa ale andala ara go ei na-andisaya. 33Realimi angele wala lala ara lalore,
Nee ale suri na epe yaakopi suna alele
nena ange anda koyo siae, lisaya.
34Angele wala lala ara lalore,
Neme andawapare Idiapi andasu nane
na wenaalinumi pakama muaeme rendaa rendaa
pi einu andawa.
Nimumi e ree loaemenda neme pangoma
nimu rambamulame epawa.
Neme nee repara lalo, Neme neere Idiapi andasu
nane wala lekeya puainyayanda neme lalo
loma lisaya.
35Isaraelimi mandu rangala pae alinumi Mosesi giaisimiya. Nimumi lalore, Neere naana kalu ali pange naana angele yokanali pi ei pangoaya ali apimi go pupudengi geapae, lisimiya. Go ali Mosesi gole Isaraelimi mandu rangala pae wenaalinuna kalu ali pange rambamuaya ali Godeme raparipaya. Mosesimi go pupudengi nea auri ande onge repana ree para repana risayande ei para ara penameyao walisayande Eindiolona wele kongapuna ara nisaya. 36Mosesimi monde Isaraelimi mandu rangala pae wenaali Idiapi andasu minyapalaoma karu paisaya. Gurupa karu pula ara Idiapi andasu para pange Wee Pi Andaa Ipa wia lena pange wenaali na-ao-pali weambi pi su para pange karu pamuala ara na-andoaisimiya pena aunu pange andoma rungula mealo pambala pisimiya dina kuni gipa ali ria laapo rupara pa ari pamisimiya.
Isaraelimi mandu rangala pae wenaalinumi Gode para kou wade ei
37Mosesimiri Isaraelimi mandu rangala pae wenaali raayo para lalore,
Godeme nimi para ni raparipa rupa
nimi para Godena poropedi ali menda rapalia.
Nipuri nimina anda ruru ali ipuma epa alia, lisaya.
38Isaraelimi mandu rangala pae wenaali monde wenaali na-ao-pali weambi pi su para mombeala pisimiyande dinare Mosesi pange nimu rapu ala pisaya. Naana apa kasuanu rapu pange aisaya. Gupuma pange Godena angele lisaya Eindiolo rapu monde Sainai kana rumuna aisaya. Godena Eindiolome Mosesi para alisayande rupa Godena endoae angelenu naa para la gea.
39Mosesiri Godena rapaisaya ali aisayapare naana apa kasuanumi nipuna loaisaya angelenu na-pangoaisimiya. Nimumi Mosesi pane ma-aoma giaoma Idiapi su kana nane lekeya polame nimumi puawe kone suma wee pambae konenu suaisimiya. 40Go pamenda naana apa kasuanumi Mosesina ame Eroni para lalore,
Naana pora riri minya polapea godenu
neeme waruma Idiapi andasu nane aoma
naa raayo karu epande ali Mosesi a para ayapae,
naa marea, lisimiya.
41Go naare nainiri naana apa kasuanumi gawasi payapo gode waruma nipu ora gode para pimi rupa alinau pula ara lu kirisimiya. Nimuna kimi warisimiya payapo gode para raname komala ara enda andaai pambisimiya.
42Gupisimiyanda Godeme Isaraelimi mandu rangala pae wenaali para kou walisaya. Gupuma mo wenaalimi yaa para aya kumba danganu para panda punyaoma yainya pisimiya ei andoma giaisaya. Go pisimiya eiri ambaisena monde Godena poropedi alimi bukanu para wape pisaya ei minyaya pisimiya. Gupuma lalore,
Isaraelimi mandu rangala pae wenaalinuo,
monde wenaali na-ao-pali weambi pi suna
kuni gipa ali ria laapo rupara pamu paliala ara
alinau pula ara sipisipi menanu lu kiruariminde
eiri ni para na-pisimiyande, lisaya.
43Nimina payapo gode Moloke nipuna puri pale
aka anda riariminde pange payapo gode Repane
nipuna kumba danga ware ei pange riariminde.
Gupuma nimina panda punyaoma yainya pi auri
ora go payapo gode laapo para pisimiyande,
lisaya.
Go einare nimi pa reena andasu Bapiloni ree anda
ma-wanduaoma pualiminya ralu dua, lisaya.
44Rana menda naana apa kasuanumi mo weambi pi su para pamulopala ara Godena ora epe puri pale aka anda pange ma-pamulopala pisimiya. Mo epe puri pale aka andare Gode nipu aisaya ei. Godeme mo epe puri pale aka andare Mosesi para gurupa waruape loma walisayandare Mosesimi gurupa warisaya. 45Werepe nanere naana apa kasuanumi monde epe puri pale aka andare nimuna apanu para muma nimu pamulopisimiya paranu ria pamisimiya. Mo epe puri pale aka anda ria pamulopala ara Diosua rapu pena andasu para paisimiya. Ambalande Isaraelimi mandu rangala pae wenaalinu ipisimiyanda go su para pirisimiya wenaalinuri Godeme ralu liisayandare pawasi yokama yokama puma paisimiya. Monde epe puri pale aka andare pena andasu para pua ainyare Deipidi ipisaya. 46Deipidi nipuna epe aunu puaisaya eimi Godeme nipu para raname waru komisaya. Go eina Gode raname ma-komaoma Deipidimi Gode para lora pula ara lalore, Dieikopona Gode nena pena epe anda panoyapae, lisaya. 47Deipidimi go angele lisayandeparere nipu koma penaloma nipuna naki Solomonome warisaya.
48Nipumi warisayapare Gode ora bi waru wi andaa Gode alimi waru ma-ae anda para ao-paliape-nae-ya. Go eiri mo Godena poropedi alimi gurupa lea.
49Godeme lalore,
So yaare na piruayo ei, lea pange
go suri nina ange aonyaoma ayo ei, lea.
Nimimi nina andare akipi anda palimiyapae, lea.
Nina liru pirape andare a para ayapae, lea.
50Godeme lalore, Nina gole gonde alenda alenda
raayo warisua, lisaya.
51Sidipenimi angele lala ara lalore, Nimiri lindimi ande alinu aeme. Nimiri pereke pereke aunu puaeme. Godena angele na-pangoaeme. Nimi pange nimina aya kasuanumi andeme. Nimina aya kasuanumi pisimiyande rupa mo Epe Yaakopi Sipiridimi walea einu gipia loma na-pangoaeme, lisaya. 52Godena ambaisena poropedi ali raayore nimina apa kasuanumi rendaa rendaa einu pakama aloaisimiya. Nimumi Godena angele lao-aeme alinu liisimiya. Go alinumiri ande Gode Ora Rendepona Aoma Pupudengi Nao-ae Ali diapeme ei ambalande gole angele lisimiya. Ambia nimimiri gonde ali pakama liiamende, lisaya. 53Godena eindiolonumi nimi para Godena Rudule Angelenu giamendepare nimimi pangoma na-pamende, lisaya.
Sidipeni kaname lu komaisimiya ei
54Sidipenimi lisaya angele pangoma mo Isaraelimi mandu rangala pae wenaalinuna kalu alinumi nipu para rono waru pangala ara angaa lu yaruma aisimiya.
55Go pisimiyapare Sidipeni Epe Yaakopi Sipiridimi rumbia-ae alimi so yaa para andasiaoma andasiaisayapare Godena paa pi ei pange Yesuri Godena popeke nane kina reka aisaya ei pange andisaya.
56Andala ara lalore, Andalepa. Nemere so yaa wapemare Alina Si Naki Godena popeke nane kina so aya ei andalo, lisaya.
57-58Go lisayapare mo alinumi kongapu aoma rae rae loma nimuna kalere poma aisimiya. Gupuma mendaa dina alo puma mo ali Sidipeni anda minyapalaoma ree anda kama nane yola ma-pumare kaname liisimiya. Gupuma mo payapo angele la alisimiya alinuna mandaa ma-pambaisimiya akanuri pena naki menda nipuna biri Solo, go alina ange repara koyo pambisimiya. 59Gupuma kaname liiala-ainya Sidipenimi yainya pula ara lalore, Reali Yesuo, na remo neeme meae, lisaya. 60Gupuma rumu wala yaruao piri wi loma lalore, Realio, go alinumi koae au pimi eiri pa na-winyale, neeme pereyape loma wi lisaya. Go angele lo pereyomare komisaya.
Currently Selected:
Aposolo 7: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
