Dioni 16
16
1Nimimiri kone rulao-aeme ei werepe nane gialimiyanda go angelenu raayo nimi para la gialoae, lisaya. 2Alinu mendame monde Godena angelenu kuruaeme anda paranu nimi na-pualiminyaya, nimi rudu loma yokeleme. Gupuma werepe nane alinu menda parame nimi liiala arare Godena pupudengi nademe loma kone wilimi, lisaya. 3Na Apa saa na-andame eina, go aunu pilimi, lisaya. 4-5Gupula pemepare go aunu pula peme naare epeleandare ande neme lawa einu nimimi kone sialiminyaya, go angelenu nimi para la gialo, lisaya.
Epe Yaakopi Sipiridimi pupudengi nea ei
Pena para niri nimi rapu arare go angelenu nimi para na-la giawapare ambiare ni rapaya Gode para wala pulu. Gupula pepare ali komeame, Neeme ane pulipae, loma pange na-angaa mili, lisaya. 6Gupuma ambiare gonde angelenu la giawa eina nimiri nimina pu rendaame komaleme, lisaya. 7Go peapare neme nimi para ora angele lalo. Neme nimi giala pulu eiri ora epeleae loma lalore, Go einaya lawa. Ni na-polandare nimi Rambamula pea Epe Yaakopi Sipiridi na-epelea. Gupuma ni polandare ande Yaakopi Sipiridiri nimi para neme ma-rapalua, lisaya. 8Gupuma ma-rapaluandare ipuma nipumiri su wenaalimi koae au pimi ei pange epe au pimi ei pange angele yokanali pimi ei para pange nimina kone su koyademe ei ma-penameyao wadea, lisaya. 9Ni para kone na-rulao-aeme einare koae au pimi ei para kone su koyademe ei wadea, lisaya.
10Gupuma niri na Apa para pulu eina pange ni wala na-andola peme eina pange rendepona au pi ei para kone su koyademe ei wadea, lisaya. 11Gupuma go su auna andere-aya kalu aya eina angele yokanali pula pea eiri ambala alu peanda monde angele yokanali pula pea ei para nimina kone su koyademe ei wadea, loma lisaya.
12Angele mendane einu neme la gula pepare ambiare nimimi pangoma meape-na-ya, lisaya.
13Gupimipare ande ora au pia Yaakopi Sipiridiri ipuma ande ora au pi ei raayore nimimi paliminyaya nipumi nimi ma-rendepoyalia. Nipumiri nipunale angele na-deapare nipumi nipuna pange lea ei la gilia. Gupilia pange werepe nane pula pea einu la gilia, lisaya. 14Na angele loayo ei nipumi pangoma nimi para la giliandare go ei piliandare na bi ma-minyasialia, lisaya. 15Na Apame siaya leenu raayosi na ei. Go pea eimiri nimi para go angele laloae. Na angele doa ei nipumi pangoma nimi para la gilia lalo, lisaya.
Kenda pi einu pereyoma rana pe einu milimi, lisaya ei
16Engeisinda aoma nimimi ni wala na-andola pemepare werepe engeisinda ama ama pumare ni wala andeleme, lisaya.
17Go eina, nipuna kou nane raluaisimiya alinu menda parame nimunale angele kurala ara gurupa lisimiya. Go da angelere ree aina dapae. Nipumi na para lalore, Engeisinda aoma ni wala na-andola pemepare werepe engeisinda ama ama pumare ni wala andeleme, da. Gupuma wala gupa pange da. Na Apa para polameya piae, loma da paleya, lisimiya. 18Ande engeisinda aoma da eiri ree ai apina dapae. Nipuna da angelere ale para dapae, loma naare kone waru na-sialema, lisimiya.
19Nimumi angaa mulame kone wisimiya eiri Yesumi ambala kone suma nimu para lalore, Neme lawa angelere gurupae, lisaya. Engeisinda aoma nimimi ni wala na-andola pemepare werepe engeisinda ama ama pumare ni wala andaleme loma lawa eina, nimina gole angaa angaa mealemepae, loma, lisaya. 20Nimi para ora angele laloae. Werepe nimimi ree andaai waru da pemepare su wenaalimi raname waru komeleme. Go eina nimiri werepe pu rendaame komoma kendame komola pemepare go eiri ropo puma raname komeleme, loma lisaya. 21Wename naki maiduame nipuna rendaa mula pea naare epeleandare kendame komola peapare nipumi naki mandu suma raname komala ara ande rendaa mea eiri kone rungulalia, lisaya. 22Nimimi pange gurupa, lalo. Ambiare nimimi kendame komalemepare neme nimi wala andolandare nimimi raname komeleme. Gupuma nimimi go raname komola peme eiri ali mendame ora yokape-na-ya, loma lisaya.
23Ande naare epeleandare nimimi alenda menda ni para konge na-deme. Go eina nimi para ora angele laloae. Nimimi na bi lala ara na Apa para alenda menda konge demendare nipumi nimi para ora gilia loma, lisaya. 24Ambalandere nimimi na bi lala ara alenda menda na-kongeyamepare ambiare konge demendare ora milimi. Gupuma nimimi ora raname waru komeleme, lisaya.
Yesumi suna aunu raayo bembolaisaya ei
25Neme go lalo angelere nimi para siapi loma lalopare werepe nane nimi para siapi loma na-doa. Go naare epeleandare na Apana pea einu walala arare angele lala ara wadoa, lisaya. 26-27Go naarenare nimimi nipu para na bi loma konge demendare neme na Apa para nimina yainya pao-alua angele na-lalopare na Apamere nimi para kone wia. Nimimi ni para pumi raname komala ara ni Gode lapo aoma ipuma pia, kone wimi eina, na Apame nipuna pumi nimi para raname komala, loma lisaya. 28Niri na Apa lapo aoma go suna epawapare ambiare go su minyapaoma na Apa para wala pola, loma lisaya.
29Go lisayanda Yesu nipuna kou nane raluaisimiya alinumi nipu para lalore, Ee ambiare neeme siapi angele loma na-lalepare naa para ora la giale, lisimiya.
30Neeme alenda alenda andele eiri ambiare naame kone sialema. Go eina ambiare nee para mendame na-angaa milima. Go pea eina, neere Gode lapo aoma ipuma pele loma kone sialema, lisimiya.
31Yesumi nimuna angele yango liada ara lalore, Ambiare nimimi kone rulademepae, lisaya. 32Naare ipula para ambala epea. Nimi raayo komea komealo nimina anda naini pongola pula ara niri na angurapo ano gioma pongola peleme. Gupula pemepare niri na angurapo na-alua. Ande na Apare ni lapo aya eina lawa, lisaya. 33Neme nimi para go lalo angelere nimimi ni raminyeke puma ara nimina pu para kuma puma aliminyaya lawa. Su wenaalimi nimi para rendaa gula pemepare nemere suna ei ma-bembolayo einare nimi pange puri paloma ao-alepape, loma lisaya.
Currently Selected:
Dioni 16: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
