Dioni 4
4
Yesumi Sameria andasu wena rapu angele lisipiya ei
1Go naarenare monde Parisi alinumi angele menda gurupa pangisimiya. Yesumi kou nane raluaisimiya wenaali waru andapu mumare baparaisi pala pimi eimi Dionimi pea eiri werepe nane meayada loma pangisimiya. 2Go ei pangisimiyapare Yesu nipumi baparaisi au na-pisaya. Nipuna kou nane raluaisimiya alinumi komea baparaisi pala puaisimiya. 3Mo Parisi alinumi lisimiya angele Yesumi pangomare monde Diudia andasu nane gioma mo Galili andasu nane paisaya. 4Gupuma go nane pula ara Yesumi Sameria andasu nane pope kone ipisayanda Sameria andasu runguluma paisaya.
5Nipuri Sameria andasu naneyame pumare ree andasu komea para opapala paisaya. Mo ree anda biri Saika, lisimiya. Go ree andare ande Dieikopome nipuna naki Diosepa para alisaya su repara ma-rilao-aisaya anda. 6Go su para Dieikopome awisaya pasa ipa pirisaya. Gupuma Yesuri porana ipuo puma nipuna ange do rendaa rendaa puma pange puri na-palisayanda mo pasa ipa repara epa pirisaya. Naare kalu rikirana ainyaloma pirisaya.
7Gupuma pirinya Sameria wena komea ipa nola ipisaya. Yesumi nipu para lalore, Ipa menda nano giae, lisaya. 8(Nipuna kou nane raluaisimiya alinuri mo ree anda para enda kambola penaloma Yesu nipuna piri, lisaya.)
9Mo Sameria wename Yesuna angele yango liada ara lalore, Niri Sameria wenayale neere Isaraelimi mandu rangala pae aliyale akepea ni para ipa menda nano gi loma kongeyalepae, lisaya. (Mo Sameria wenaalinumi nimuna enda ipa noaeme koponuri mo Isaraelimi mandu rangala pae wenaalimi mendaa para yolanali puma nape ana na-peanda lawa.)
10Yesumi nipuna angele yango liada ara lalore, Neemere Godeme gialale pange nee para ipa menda nano gi loma konge da alina bi pange kone sula paeyalore gore nena kongeyale ei nipumi pangoma endoaya ipa gula pa, lisaya.
11Mo wename Yesu para lalore, Realio, go pasare ora no para le awe ei, go pe eina neere ipape na-sialepare endoaya ipare akipuma noma gulame lalepae, lisaya. 12Naana apa kasua Dieikopome go pasa ipare naa para gisaya. Go ipare nipumi pange nipuna si nongo nakinu pange nipuna gawa sipisipi menanumi pange nala puaisimiya. Neere Dieikopo angulaluame lalepae, lisaya.
13Yesumi mo wena para lalore, Ali apimi go pasa ipa neleandare werepe nane pange ipa nala wala pala pilia, lisaya. 14Gupiliapare ali apimi neme alalo ipa noma aliandare go aliri ipa nala wala na-pilia. Neme go lalo eiri go einaya lawa. Neme alalo ipare mo ali rupara piri yokala pia ipa rupa pidia. Gupuma ande ipamere ipula ipula ara mo aliri endoma ainya dea, lisaya. 15Mo wename nipu para lalore, Andaa Alio, neeme go lale ipare ni menda giae. Gupuma werepena ipa nala wala na-pula ara go pasa ipa wala na-nola epala pula, lisaya.
16Yesumi nipu para lalore, Nena ali ambala wi da pumare go para wala epape, lisaya. 17-18Mo wename lalore, Niri ali dia, lisaya. Go lisayanda Yesumi nipu para lalore, Neemere niri ali dia lale eiri ora lale lomare neere supu alinuna anda ambala pelepare ambia aepe ali pange ora nena ali dia. Neeme lale eiri ora eiye, lisaya.
19Mo wename Yesu para Ialore, Realio, ambiare nee andalo. Neere Godena poropedi aliyanae, lisaya.
20Naana apa kasuanumi naa Sameria wenaali para go kana para pua mombema Gode para yainya pipape loma lisimiyapare Isaraelimi mandu rangala pae alinumi lalore, Diurusaleme andaa ree anda para pua mombema Gode para yainya pipape loaeme, lisaya.
21Yesumi nipu para lalore, Wenao, neeme go lalo ei pangape. Go eina naare menda epelea. Go naare epeleandare gore go kana para ara pange mo Diurusaleme ree anda para ara pange alinumiri ande Apa para yainya na-pilimiae, lisaya. 22Sameria wenaali nimimi yainya pimi aliri nimimi kone na-suaemepare Isaraelimi mandu rangala pae wenaali naame yainya puaema aliri naame kone suaema. Gore go eiri wenaali ma-endada eiri Isaraelimi mandu rangala pae wenaali para kini puma ipulanda lawa, lisaya.
23Werepe ande epola pea naarere go naarere ambia ambala epea eina ande Epe Sipiridimiri wenaalinu para Gode penameyaoma wenaalinumi gonde Apana bi ma-minyasiainyayanda puri ma-palao-aya, lisaya. Go rupa nipu para nipuna bi ma-minyasiao-aeme wenaaliri, Apame kone wia, lisaya. 24Godere endoaya eina ree. Epe Sipiridimiri wenaalinu ma-endaoma nimu para Gode pange nipuna ao-paluaya ei pange penameyaoma gonde wenaalinumi Godena bi ma-minyasiainyayanda puri ma-palao-aya, lisaya.
25Mo wename Yesu para lalore, Monde Mesayana bi mendare Kerisore epola pea eiri kone sialoae, lisaya. Nipu ipumare au raayo pea eiri la gilia, lisaya.
26Yesumi nipu para lalore, Neeme go lale aliri niae, lisaya. Nee lapo go angele dapa aliae, lisaya.
27Go angele lala-ainyalomare Yesu nipuna kou nane raluaisimiya alinu go para wala ipuma Yesu mo wena lapo angele lala aisipiya ei andomare kone rando rando wisimiya. Gupisimiyapare ali komea mendame gurupa lo na-angaa misaya. Ale mulameya lalepae, o akepeanda niipu laapo angele dapepae loma na-angaa misaya.
28-29Gupuma mo wename nipuna ipape minyapaoma mo ree anda nane pumare go para aisimiya wenaali para lalore, Ali menda andaliminya ipulupa loma pua lalore, Neme ambalande ara pawa einu raayore nipumi la gianda laloae. Nipuri ande Kerisopae, lisaya. 30Go lisaya einare gore mo wenaalimi mo ree anda minyapaoma Yesu andolame paisimiya.
31Go au pula-ainyare ande kou nane raluaisimiya alinumi Yesu kongeyala ara lalore, Waloale alio, enda menda nae, lisimiya.
32Go lisimiyapare Yesumi nimuna angele yango liada ara lalore, Na endare menda wiapare nimimi na-andaleme, lisaya.
33Go lisaya angele pangomare mo kou nane raluaisimiya alinumi nimuna nimunale mone la, one la pula ara lalore, Mendame nipuna enda ma-eparipapae, lisimiya.
34Yesumi nimu para lalore, Na endare gurupa loma lalore, Ni rapaya Godeme kone pea ei pulame pange nipumi ni para walea pupudengi pange nao pereyaluame lawa, lisaya. 35Nimina dame angelere gurupa. Sumba malapu popeleandare enda nape napedea naarena po mipi pilimi dame, lisaya. Neme nimi para lalore, E mapunu leeme leeme puma andalepape. Ambia gore enda nape na-peleandare po mipi papeya, lisaya. 36Enda nape po mipi pia alimiri nipuna yangi mumare gore monde enda napenu ma-puma mombe sumare gore endoma ao-aya ei dea. Gupiliandare enda wai poala ali pange napenu po mipi pia ali pange niipu laapome raname komelepe, lisaya. 37Gupi eimi ande loaema eiri gurupa. Ora penameyada ali mendare wai ale poalapare wala ali mendare mo enda nape po mipi pia dama, lisaya.
38Nimimi na-poame e mapu parare enda napenu po mipi paliminyaya nimi rapayo loma lalore, Alinu menda parame poame e mapu parare nimimi enda nape po mipi pula pulumipare mo ambala alinumi puri paloma e mapu pu wimi eina pimiae, lisaya.
39Monde wename lalore, Neme pawa einu raayo nipumi la giandare mo ree anda para aisimiya Sameria wenaali andapumi Yesu para kone perekeyao suma nipu para kone rulaisimiya. 40Go eina monde Sameria wenaalimiri Yesu para pumare Naa rapu ongesinda aoma puainya loma konge lisimiya. Go lisimiyanda koro laapome Yesu go para aisimiya.
41-42Gupuma mendane wenaali andapumi Yesumi walisaya angelere pangala ara nipu para kone rulada ara mo wena para lalore, Ambiare nipu para kone ruladema eiri neeme lale eina kone na-rulae pa pangalemapare naamere nipuna angele pangoma nipuri su wenaali lamu mea ma-endada Ali ora aya kone sialema, lisimiya.
Yesumi gapamani alina si naki ma-epeaisaya ei
43Yesuri koro laapo go para aoma wala Galili andasu nane popisaya. 44Yesumi gurupa lisaya. Godena angele lao-aya aliri nipuna ora anda repa aliandare nipuna bi na-wilia, lisaya. 45Yesuri mo Galili andasu nane opapala paisaya dinare wenaali raayome nipu lamu misimiya. Go eina lamu misimiya. Mo wenaali nimuri Diurusaleme ree anda nane pumare ande lombae pupa pope Pasopa naarena enda nala ara Yesumi pisaya einu raayo ambala andisimiya.
46Gupuma Yesuri mo Galili andasu nane aisaya. Kaena ree anda para opapala paisaya. Ambala ririnare go anda para ara Yesumi ora ipa, waini ipa pirinya, lisayande. Go anda parare gapamani ali komea aisayapare nipuna nakiri Kapeneame ree anda para yainya andaai komisaya. 47Goleme Yesumi Diudia andasu nane gioma Galili andasu nane epa aya lea ei pangomare mo ali Yesu para paisaya. Yesumi mo Kapeneame ree anda nane puma mo naki komolame pala pirinya pua ma-rekainyaya, konge lisaya. 48Yesumi mo ali para lalore, Au andaai ipula ei andala ara komea, kone ruladeae, lisaya.
49Monde gapamani alimi lalore, Na naki komapana, saana mendaa bana, loma konge lisaya.
50Yesumi nipu para lalore, Nena naki endeleale puae, lisaya. Ande alimi Yesumi lisaya angele pangoma kone rulaoma paisaya. 51Mo nipuna anda nane wala polameya pula-ainya nipuna pupudengi nae alinumi porana mandaoma lalore, Nena naki endoma pia, lisimiya. 52Nipumi mo alinu para angaa meala ara lalore, Naa naki engeisinda ende auri, naare a para amono papae, loma angaa misaya. Mo alinumi nipuna angele yango liada ara lalore, Ambala naare perekeyala ainya gaepame nane, nipuna riripu ringi yainya randalae, lisimiya. 53Apame kone sialore, Ambala go naarenare Yesumi ni para lalore, Nena naki endelea, loma la naarena, kone wisaya. Go eina mo alina repaame pange Yesu para kone rulaisimiya.
54Yesuri Diudia andasu nane gioma Galili andasu nane pua aisaya dinare go au andaai pisaya eiri rana laapo ei pisaya ei.
Currently Selected:
Dioni 4: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
