Dioni 9
9
Lee rumbu pupale mandi ali menda Yesumi ma-kiyaisaya ei
1Yesumi porana pula ara andisayapare angimi pena mandi para lee rumbu pupale mandi ali komea andisaya. 2Gupuma nipuna kou nane raluaisimiya alinumi Yesu para angaa meala ara lalore, Waloale alio, go aliri pena mandisaya para nipuna lee rumbu pi auri, apimi pea koae auna peapae. Ara angina eina peapae, o nipuna ei mili peapae, loma angaa misimiya.
3Gupuma Yesumi nimuna angele yango liada ara lalore, Go alimi pange ara angimi pange nimuna koae au peme eina na-pea, lisaya. Godena puri pale eimi go ali epe ada ei andenaya lee rumbu pi ali manduma pea, lisaya. 4Godena naare pena epa rala-ainya naame ni rapaya Godeme ni para go au pa go au pa loma pula pea ei paminyae. Gupuma rimbadeandare ali apimi Godena pula pea ei pulame kone wiliandare nipumi Godena pula pea ei pape-na-dea, lisaya. 5Ni suna epa ayo dinare niri su raayona Paa ayo, lisaya.
6-7Go lisayandare Yesumi suna supi roma su rapu dakole paoma mumare mo alina lee para kirada ara nipu para lalore, Monde rungula pa pia Sailome ipa para puma nena lee angaa randepeape, loma lisaya. (Mo ipa bi angelena reere Rapaisaya ei loma loaisimiya.) Go eina mo ali pumare nipuna lee angaa randepema alenda alenda pena andoma wala perekeya ipisaya.
8Gurupa nipuna anda wenaalimi pange mo piru ara kongeyala pi ei pangisimiya wenaalimi pange lalore, Go aliri ande piru ara kongeyao pirala pande ali diaeyapae, loma lisimiya.
9Mendane wenaalinumi lalore, Ee go aliyara lisimiyapare mendane wenaalinumi lalore, Diae. Go alimi ande ali menda ara pea, lisimiya. Go lisimiyanda mo alimi nipunale lalore, Niyara, lisaya. 10Wenaalinumi nipu para angaa meala ara lalore, Akipuma nena lee kiyoma peapae, loma lora pisimiya.
11Go lisimiyapare nipumi nimuna angele yango liada ara lalore, Monde Yesu bi loaeme alimi kenge muma supi rengelaoma kirada ara ni para lalore, Mo Sailome ipa para puae, lama nena lee angaa randepeape, lae. Go landa ni puma randepeawapare alenda alenda go para pena andawa, lisaya.
12Go lisayanda mo wenaalimi angaa meala ara lalore, Go aliri a para ayapae, lama lisimiyapare nipumi lalore, Ni na-ande, lisaya.
Parisi alinumi lee ma-kiyaisaya eina akipuma peapae, loma aisa pisimiya ei
13Gupuma mo alinumi ande ambala lee rumbu pi ali lamuma mo Parisi alinu para wadoameya karu ma-paisimiya. 14Yesumi su rengelaoma mo alina lee kiyaripaya eiri Isaraelimi mandu rangala pae wenaalinuna koro piri naarena pisaya. 15Gupuma mo Parisi alinumi mo ali wala angaa meala ara lalore, Nena leere akipuma epeaoma peapae, loma angaa misimiya. Mo alimi nimuna angele yango liada ara lalore, Nipumi su muma supi roma rengelaoma na lee laapo para kiraripanda ipa para pua randepeawandare ambiare alenda alenda pena andalo, lisaya.
16Parisi alinu menda parame lalore, Go au pea aliri naana koro piri naarena Rudule Angele wi ei runguda einare nipuri Godeme na-rapae aliyanae, lisimiya. Gupi lisimiyapare alinu menda parame lalore, Gupi puri pale eiri koae au pia alimi akipuma pilipae, loma lisimiya. Go eina nimunale rumalapao angele rando rando lisimiya.
17Gupuma mo Parisi alinumi mo ali para wala angaa meala ara lalore, Neeme lalore, Na lee ma-kiyaripa lalepare nipu parare ale kone sialepae, lisimiya. Mo alimi nimuna angele yango liada ara lalore, Nipuri Godena poropedi aliae, loma lisaya.
18Mo Isaraelimi mandu rangala pae wenaalinuna kalu alinumi mo aliri ora lee rumbu puma aripapare nipuna lee ma-epearipa ei angele pangape giada ara mo alina ara angi laapo wi la misimiya. 19Niipu laapo para angaa meala ara lalore, Go aliri niipina nakiyapae. Nipuri pena mandisi pi dinare lee rumbu pi naki mandisi palo dapae, lisimiya. Gupula payalore gore ambiare akipuma andalapae, loma angaa misimiya.
20-21Mo alina ara angimi nimuna angele yango liada ara lalore, Go aliri saana nakiyapare maidapa dinare lee rumbu pi naki maidapa eiri kone wipaparere ambia nipuna lee kiyoma aya ei pange nipuna lee ki laripa auri apimi peapae. Go eiri saare marea, loma lisipiya. Nipu para pua lora pipae. Nipuna kuni gipanu andapuyapulu nipumi nipuna gole kone suma anana la gilia, lisipiya. 22Ara angi laapome mo Isaraelimi mandu rangala pae wenaalinuna kalu alinu para paalame komala ara gurupa lisipiya. Mo kalu alinumiri, Ali apimi Yesu ande Keriso aya deme wenaaliri mo Godena angele kuruaeme andanu para na-epenayanda ora ralu liiaminya, lisimiya. Go angele la wisimiya einu pangoma ara angi laapome paalame komisipiya. 23Go eina mo repaayame lalore, Nipuna kuni gipare andapuyale nipu para pua lora pipae, loma lisipiya.
24Gupuma koro laapopao ande lee rumbu pupale mandisi pi ali mo alinumi wala wi loma nipu para lalore, Gode para angele la siala arare ora ei lape. Naame kone wima gonde aliri koae au puaya aliae, loma lisimiya.
25Gupuma mo alimi nimuna angele yango liada ara lalore, Nipuri koae au pia aliyapae ni marea. Au komeare neme ande. Ambalande na lee rumbu puma aripupare ambiare na lee kiyoma andalo ae, lisaya.
26Mo alinumiri nipu para angaa meala ara lalore, Nee para ake au papae. Nena leere akipuma ma-kiyaripapae, loma wala lora pisimiya.
27Mo alimi lalore, Ambia la giawandepare na-pangalemeae. Akepeanda wala pangolameya damepae. Nimi pange monde alina kou nane raluae alinu aluame kone sialemepae, loma lisaya.
28Go lisayandare mo alinumi nipu giri loma ero lada ara lalore, Neere monde alina kou nane raluae ali alepare naare Mosesina kou nane raluae alinu aema.
29Godeme Mosesi para lea eiri naame kone wimapare gonde aliri a para aoma ipuma peapae. Naamere na-andema, loma lisimiya.
30Go eina mo alimi nimuna angele yango liada ara lalore, Nimimi go aliri a para aoma epapae damepare na leere nipumi kiyaripa, lisaya. 31Godeme koae wenaalina angele na-pangala eiri naame andemapare Godemere nipu para kuma puma ara nipuna kone pea au pademe wenaalina angelere pangoaya, lisaya.
32Pena para alenda alenda warisaya dina mandisaya dinare lee rumbu pi alina lee kiyaripa eiri mendame guru payanae angele na-pangema, lisaya. 33Go aliri Gode rapu aoma na-epola payalore au komeanda pape-nae-da pa, lisaya.
34Go eina mo Isaraelimi mandu rangala pae wenaalinuna kalu alinumi nipuna angele yango liada ara lalore, Nena amame koae ei rupara ara mandeanda andayoma ale alimi naa para wadoameya lalepae, lisimiya. Go loma mo alinumiri mo Godena angele kuruaeme anda para na-epenaya, yokoma rando pane ainya lisimiya.
Alinumi Naare lee rumbu pi alinu na-aema, lisimiya ei
35Yesumi mo ali ralu luma rando pa nane ainyaleme lisimiya ei pangomare mo ali aisa puma andawisaya. Yesumi mo ali andasumare nipu para lalore, Alina Si Naki para kone rulaoma alepae, loma lisaya.
36Mo alimi Yesuna angele yango liada ara lalore, Andaa alio, neme Alina Si Naki para kone rulaluame lalole nipuna bi la giae, lisaya.
37Yesumi nipu para lalore, Nipuri ambala andaende. Nee lapo go angele dae aliae, loma lisaya.
38Mo alimi Yesu para lalore, Realio, kone ruladoae, lomare Yesu para rumu yaruaoma piruma panda punyada ara pisaya.
39Gupuma Yesumi lalore, Go su wenaalina angele yokanali pulameya epawa loma lee rumbu pi wenaalimi andenaya, pange lee na-rumbu pi wenaalimi pange lee rumbu puma ainyaya epawa, loma lisaya. 40Mendane Parisi alinumi go lisaya ei pangoma Yesu para angaa meala ara lalore, Naare lee rumbu pi alinu aema lalepae, lisimiya.
41Yesumi nimu para lalore, Lee rumbu pi alinu ala pameyalore nimi para koae au menda na-sula pae. Gupula papare nimimi lalore, Naare andema dame eimi, nimi para koae au pa wia, lisaya.
Currently Selected:
Dioni 9: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
