Luka 22

Kalu alinumi Yesu duame rapisaya ei

(Madiu 26:1-5; Maka 14:1-2; Dioni 11:45-53)

1Ande palawa ma-poyao-aya danga na-pambe pakama palawa kiri wapuma naleme Pasopa naare loaeme naare repara epolameya pisaya.

2Ande Gode repara alinau puaeme alinuna kalu alinu pange Mosesimi Rudule Angele waloaeme alinumiri monde wenaali paalame komomare Yesuri kundiripusi lamu muma duameyanda pora aisa pisimiya.

Diudasimi Yesu rombisaya ei

(Madiu 26:14-16; Maka 14:10-11)

3Gupuma Sadani ande ki laapo pereya angena laapo alinu Yesu nipuna kou nane raluaisimiya ali menda nipuna bi Diudasi Isakariodi ali menda rupara konda pambisaya. 4Go eina Diudasi nipumi Gode repara alinau puaeme alinuna andaa alinu pange Gode repara alinau puaeme andaa anda andere-aeme alinuna kalu alinu para puma Yesu makiraoma nimuna ki nane ma-alo moneda paya rupa angele lisaya. 5Gupi lisayandare monde alinumi raname komala ara, Kana adema, lisimiya. 6Diudasi nipumi go angele loma raname komala arare nipumi wenaalinumi na-andola pame rupa Yesu go alinuna ki nane ma-alo monedoame pora aisa pisaya.

Yesumi Pasopa enda nolameya analao pisaya ei

(Madiu 26:17-25; Maka 14:12-21; Dioni 13:21-30)

7Ande palawa ma-poyao-aya danga na-ralae palawa kiri naleme naarele rupara Pasopa enda nape sipisipi menana sinu lu pulameya pisimiya. 8Yesumi Pida pange Dioni niipu laapo mana loma rapada ara lalore gupi lisaya. Naame ande Pasopa enda naminya pua wamo pula pidapa, lisaya.

9Nena ranare saame ale para wamopu siala pida pelepayapae, lisipiya.

10Yesumi niipu laapona angele yango liada arare gupi lisaya. Niipi mo Diurusaleme ree anda para pulu ali pinyare ali menda kaname wari kenangena ipa apo noria ipulu pidiale raluma nipu pua konda pambalia anda para pua konda pambalepapeae, lisaya.

11Gupuma go andana reali para lalore gupi dapape, lisaya. Ande Waloae Alimi nee para lalore, Ande ni pange naa kou nane raluaeme alinu naame ande Pasopa enda nola pema anda pandare a para wiapae, dapape, lisaya. 12Go au dependare nipumi so mandaa anda para anda panda komea olemolenu raayosi analaoma wilia lena niipimi pua olemole raayosi wamo puma sialepape, lisaya.

13Monde ali laapo puma pua andapeyapare alenda alenda raayosi Yesu laya rupa pisayandare niipu laapore ande Pasopa enda wamopu wisipiya.

Yesumi nipuna kou nane raluaisimiya alinu para enda ipa alisaya ei

(Madiu 26:26-30; Maka 14:22-26; 1 Korindi 11:23-25)

14Ande naarele mula epayandare Yesu nipuna pirape alena nipuna angele ma-pamuao-aeme alinu rapu pirisaya. 15Gupuma nipumi nimu para lalore gupi lisaya. Ni rendaa ambe na-nola pe ara nimisi go Pasopa enda nolameya neme kone ora waru ma-puao-aripu, lisaya. 16Go eina neme nimi para la gialo. Neme Pasopa enda menda wala na-ne pa ano Godena Ki Rambuao-aya Ei epeleandare nimimi go eina ree andeleme, lisaya.

17Gupuma Yesumi kapo menda muma waini ipa ma-piraoma Gode repara ranae angele loma nipuna kou nane raluaisimiya alinu para lalore, Mendame onge nala mendame onge nala pipae, lisaya. 18Go eina neme nimi para lalo. Ambia pa eiri puma Godena Ki Rambuao-aya Ei epelea ei andomare gore neme go Pasopa naarenare waini ipa neme mandana wala nolae, lisaya.

19Gupuma Yesumi palawa kiri runguli menda muma Gode repara ranae angele loma rungula rungula puma mo nipuna kou nane raluaisimiya alinu para alama alama pulu ara lalore gupi lisaya. Gore nina do nimiyalo Gode repara alinau pulu ara ala monelea aleyale ni kone sulameyandare go au pala pipapeae, lisaya. 20Mendaa rupa enda noma piri ande kapo nimu repara alala ara gupi lisaya. Go kapore Godena Angele pena lo koro wi ei nimi mana na wee lopisaya eimi koro rumbi ei, lisaya.

21Go peapare andalepae, lisaya. Ni makiraoma yanda runguli alinuna kina ma-ala moneda pea ali go mendaa lena enda go nalepandae, lisaya. 22Alina Siri Gode nipuna pinya kone wia rupa komola peapare go nipu makirada ali nipuri koaeyanda ora andaai andeleae, lisaya.

23Go lisayandare monde nipuna kou nane raluaisimiyande alinumi nimuna gole lora pipi pula ara lalore, Apimi pulu pea eina dapae, loma walisimiya.

Yesuna kou nane raluaisimiya alinumi andaa ali pirape eina ape lisimiya ei

24Ande Yesuna kou nane raluaisimiya alinu nimuna ape lalo ara lalore nimuna rupara andaa ali api aliayapae, loma ape lisimiya. 25Gupi lisimiyandare Yesumi gupi lisaya. Ruru mendare kalu alinumiri nimuna wenaalinuri nimuna rolea para pirinyaloma andere pimi, lisaya. Gupuma mo wenaali andere pimi kalu alinu nimuri wenaalinuna rambami alinu lo bi ma-aeme, lisaya. 26Go peapare nimi ruparare go au na-pinyademe, lisaya. Go aunu na-piri nimi rupara andaa ali aliandare wala bi na-wia ali mandana ainya, lisaya. Gupuma nimi rupara kalu ali alia aliri wala pupudengi nao-ae ali mandana ainya, lisaya. 27Enda nenayanda panapada aliri andaa ali o enda nala aliri andaa aliyapae, lisaya. Eeye, lisaya. Enda nala ali ae, lisaya. Go peapare niri nimi rapu arare enda panapu gida ali mandana ayoae, lisaya.

28Ni rendaa pi einu andapu meawa paranu pangere nimimi ni rapu kama arimiae, lisaya. 29Nina Apame neme andere piranoyanda puri gisaya rupa neme nimi pange mendaa rupa andere aliminyayanda puri gulae, lisaya. 30Nimimiri na Ki Rambu-aoma Pidua rupara ni rapu mendaa lena piri endanu pange ipanu neleme pange Isaraeli su rupara aeme ruru ki laapo pereyaoma angena laapo wenaali andere pidimiae, lisaya.

Yesumi Pida para lalore Ni kou wade lisaya ei

(Madiu 26:31-35; Maka 14:27-31; Dioni 13:36-38)

31Saimonoae, Saimonoae, pangae, lisaya. Sadanimi nimi raayosi la andala ara nipumi epe ei para koae ei laapo rali pinyayanda Godeme angele ambala apo la lae, lisaya. Ande e mapu puaya alimi pia rupa epe wai alenu meala ara koae einu rali pula pea aunu manda piliae, lisaya. 32Go peapare Saimonoae, neme nena kone rulale ei na-lopenaya nee yainya ambala paripuae, lisaya. Gupuma neeme ni repara wala lekeya epelendare nena amenu wala ma-puri palapeae, lisaya.

33Pidame lalore gupi lisaya. Realio. Niri nee rapu dipula menda puma pua komapanaya ni ambala analao suma ayoae, lisaya.

34Yesumi lalore, Pidao, neme nee para la gialo, lisaya. Ambia rimbala kokola e ambe na-le-ainyalomare neeme rana repopao neeme ni na-ande, deae, lisaya.

Yesumi nipuna kou nane raluaisimiya alinu repara kingi angele lisaya ei

35Gupuma Yesumi nipuna kou nane raluaisimiya alinu angaa meala arare gupi lisaya. Ande rana menda nimi raparipunde naarenare nimimi muni pasu pange nu pange ange andanu komenda na-ma-paisimendele ale menda wali auri pamepae, lisaya. Go lisayanda mo alinumi lalore, Naame ale menda na-waisamae, lisimiya.

36Go peapare ambiare Yesumi lalore, Ali menda apimi muni pasu pange nu siamba alimiri pa ma-ripinyapeae, lisaya. Gupuma rai dia dea ali nipumiri nipuna mandaa aka rapaoma rai kambeleae, lisaya.

37Akepeare neme nimi para lalo. Ande Godena angele wia bukame lalo ande koae aunu pimi alinumi naleme rendaa mandanare nipumi nelea lea ei ora miliae, lisaya. Akepeare na angele lada ara lea aunuri ora miliae, lisaya.

38Go lisayandare mo nipuna kou nane raluaisimiya alinumi lalore, gupi lisimiya. Realio, rai laapo goyale andae, lisimiya. Go lisimiyandare ande Realimi lalore, Go angele mandayale gialepae, lisaya.

Yesu Olipi Su Rundu para yainya pisaya ei

(Madiu 26:36-46; Maka 14:32-42)

39Yesu ande ree anda minyapalaoma nipuna pala pisaya rupa Olipi Kana repara nipuna kou nane raluaisimiya alinu rapu paisaya. 40Nipu monde para opo paisaya naaremere nipuna kou nane raluaisimiya alinu para gupi lisaya. Nimi la andala einumi na-ma-lopainya yainya puma alepape, lisaya.

41-42Gupuma nipu kana kili wakima rumbu monedamanda pua lopala rupa mandana pua piri rumu yaruaoma yainya pulu piri gupi lisaya. Apao, nena rana piliandare neme rendaa na-nola peae, lisaya. Go peapare nina rana pea ei na-raliri nena rana pea ei komea raliae, lisaya. 43Gupumare eindiolo menda Godena Aya Lenayame ipuma nipu epa puri ma-palaisaya.

44Go pisayapare Yesu nipu kenda peme epa rambuaisayandare nipumi puri paloma ara yainya waru pisaya. Gupuma nipuna pundu riripuri wee yano rakupilisaya.

45Go aunu pu perelisayandare nipu yainya pu pereyaoma rekomare nipuna kou nane raluaisimiya alinu pirisimiya para paisayapare u palu perere pinyaloma andisaya. Nimu pu kendame komisimiya eimi pisaya. 46Go au pisimiyandare nipumi lalore go lisaya. Nimiri akepa u palu pimipae, lisaya. Rekoma nimi la andala einumi na-ma-lopainya yainya pipape, lisaya.

Yesu epa ripinyisimiya ei

(Madiu 26:47-56; Maka 14:43-50; Dioni 18:3-11)

47Yesu nipuna kou nanere ki laapo pereya angena laapo alinumi raluaisimiya. Diudasi nipuri go ki laapo pereya angena laapo ali menda. Yesu angele pa lala-ainyalomare Diudasimi ali andapu yolo ria ipisaya. Nipumi Yesu repara ipuma Yesu nunu pulameya pisaya.

48Gupulameya pisayapare Yesumi gupi lisaya. Diudasio, neemere Alina Siri nunu pili eimi golere nipuna yanda runguli alinuna ki nane ala monedepae, lisaya.

49Yesu nipuna kou nane raluaisimiya alinu nipusi pirisimiya alinumi Diudasimi pa eimi pulupa au andomare gupi lisimiya. Realio, naana rai meamonoyapae, lisimiya. 50Go lomare nimu mendame Gode repara alinau puaisimiya alinuna andaa alina pakama pupudengi noaisaya ali mendana popeke kale runguluma rumbisaya.

51Go au pisayapare Yesumi lalore, Manda, lisaya. Go loma monde alina kale waraisayandare ma-epeaisaya.

52Gupuma Yesumi mo nipu mula ipisimiya Gode repara alinau puaisimiya alinuna andaa alinu pange Gode repara alinau puaeme andaa anda andere pirisimiya andaa alinu pange anda rili alinu para gupi lisaya. Nimimi ni repara epolameyare niri reena alenu pakama ralu lopoma muaya aliyanda rodo para pange rainu ripinyapale epamepae, lisaya. 53Niri mo Gode repara alinau puaisimiya andaa anda parare naare raayosi nimi rapu pirawapare ni seseka doame na-rapamende. Go peapare ambiare ande rimbayo pambe ei andere pia remome andere pida naareyandare nimina naare, lisaya.

Pida Yesu ni na-ande lisaya ei

(Madiu 26:57-58,69-75; Maka 14:53-54,66-72; Dioni 18:12-18,25-27)

54Gupuma ande alinumi Yesu seseka lomare mo Gode repara alinau puaisimiya alinuna andaa ali repara nipuna anda para ma-paisimiya. Pida nipuri ongepusi werepe raliama raliama pisaya. 55Go anda pape punyaisimiya rupara piri repana kirumba pirisimiyandare Pida nipu pange go repana kira pirisimiya repaa rapu pua pirisaya. 56Go anda para pupudengi nao-ae nongo mendame nipu no repanana pirisaya ei andoma nipuna lee para andala ara lalore, Go ali nipu pange Yesu rapu pamuaripae, lisaya.

57Go lisayapare Pidame lalore, Wenao, niri apo lale aliri ni na-ande loma makiraripaya, lisaya.

58Ongepusi werepe nane ali mendame Pida andomare gupi lisaya. Nee pange nimu rapu pamuaendeae, lisaya. Go lisayapare Pidame lalore, Alio, niri go lale ali diae, lisaya.

59Gupuma werepe nane aoma ali mendame ora puri pale rupa lalo ara lalore, gupi lisaya. Menda ara ake na-peae, lisaya. Go aliri Yesu rapu ora aripae, lisaya. Nipu pangere ora Galili andasu ali ae, lisaya.

60Go lisayandare Pidame mo alina angele yango liada ara lalore gupi lisaya. Alio, neeme lale angelere na kale para na-konda pambalae, lisaya. Go alesimi gole nipu angele pa lala-ainyalomare kokola rekisaya. 61Go pisayandare ande Yesu nipu wala lekeyoma Pida nipuna lee para andisaya. Yesumi go pisaya ei andomare Pidame kone niminyaripayapare Yesumi ambalande naarena nipu para lalore, Kokola ambe na-reke-ainyaloma ambia rimba neeme rana repopao neeme ni na-ande deae, lisaya ei kone niminyaisaya. 62Gupuma Pida kama opolumba puma pu yokoma ara ree loaisaya.

Yesu giri lala puma yambisimiya ei

(Madiu 26:67-68; Maka 14:65)

63Gupuma ande Yesu andere-aisimiya alinumi Yesu giri lala puma yambu pisimiya. 64Gupuma nipuna lee kora rumbuma ara lalore, Neere apimi liiapae, lomare la sia, lisimiya. 65Gupuma nipu manda manda me einu waru lisimiya.

Yesu angele yokanali pisaya ei

(Madiu 26:59-66; Maka 14:55-64; Dioni 18:19-24)

66Ande naare opola ipisaya naarenare ande anda rili alinu pange ande Gode repara alinau puaisimiya alinuna kalu alinu pange Mosesimi Rudule Angele waloaisimiya alinu pange komea para mombelisimiya. Gupuma Yesu go Kalesoro alinu repara ma-paisimiya.

67Gupuma Yesu para lalore, Neere ande Kerisoyapae, lisimiya. Neeme naa la gi, lisimiya. Yesumi nimuna angele yango liala ara lalore, gupi lisaya. Neme nimi la gulandare neme payapo lalo, kone wilimiae, lisaya. 68Gupuma neme nimi angaa mea ei menda angaa mulandare nimimi wala na-la sialimiae, lisaya. 69Go peapare ambia ara kini puma Alina Si Naki nipuri Puri Pale Gode nipuna popeke ki nane pidiae, lisaya.

70Go lisayanda nimu raayome lalore, Go neere Godena Siyapae, lisimiya. Go lisimiyanda Yesumi lalore, gupi lisaya. Nimina gole go damendae, lisaya.

71Go lisayandare monde alinumi lalore, gupi lisimiya. Wala naamere ale angele menda pangolameya pimapae, lisimiya. Naana kaleme gole naana pangamande, lisimiya.

Currently Selected:

Luka 22: POLENT23

Highlight

Copy