Madiu 13
13
Wai alenu poae alina siapi angele lea ei
(Maka 4:1-9; Luka 8:4-8)
1Go menda yapina golere Yesu anda giaoma wenaali repara angele wadoame Galili reena pua pirisaya. 2Monde nipuna angele doame pisaya ei pangolame pisimiya wenaali andapu lisaya eimiri mo wenaali ipa reena ainya Yesu nipu kawaso menda mandaa pua pirisaya. 3Yesu nipumi olemolena angele doameyayandare siapi angeleme kama lo aisaya. Yesu nipumi siapi angele menda gupa la lisaya.
Naare mendana ali mendame wai alenu polame paisaya. 4Nipumi monde wai alenu randalama pisayandare mendapare porana lopisaya. Go au pisaya eiri yaanumi epama nama nama pisimiya. 5Menda paranuri kana mandaa onge susinu wisaya lena lopisaya. Go alena lopisimiya einuri monde su waru na-wisaya eimiri rana komea opisimiya. 6Go payapare ande naare risaya dinare ande pena opala piri guni roma rumbisaya. Gupuma monde pidanu punyaoma na-pe guninuyalo arare ande guni raayo kapulisaya.
7Menda paranuri reke reke ae paranu lopisaya. Go einu rambuaisimiya einumi komo perere pisimiya. 8Go pameyapare mendaparenuri epe suna lopisimiya. Gupuma epe rupa opomare nape wisimiya. Mendane einumi ali ria komea mendane ki laapo rupa, mendane einumi ali ria repo rupa, mendane einumi ali ria ki komea rupa elala pame, lisaya.
9Neme go lalo angele nimi kale ae alenu deandare gore pangalepa lisaya.
Yesumi siapi angelenu kama lisaya einuna ree lisaya ei
(Maka 4:10-12; Luka 8:9-10)
10Go ei loma pirinare nipuna kou nane raluaisimiya alinu ipumare gupi lisimiya. Neeme wenaali repara angele doameyandare siapi angeleme kama loalele akepeanda pualepae lisimiya.
11Yesumi nimuna angele yango lialo arare gupi lisaya. Godena Ki Rambuao-aya Eina kundiri angelenuri nimi para ambala gea lisaya. Go peapare go wenaali parare ambe na-walea lisaya. 12Ali mendame alenda kone wiliandare Godeme go ali repara olemole waru wadea lisaya. Gupuma go alimi olemole waru kone wilia lisaya. Go peapare ali mendame ale menda kone na-wiliandare nipuna ora ongepu andelea alenu gole Godeme pane mupalia. 13Neme siapi angelenu kama loayo eina reere go einayanda loayo. Nimuna leenumiri andelemepare ale menda goyana loma waru na-andeleme. Nimumi angelere pangola pemepare go ale para da lore na-pangeleme pange na-kone wilimi. Gupuma nimumi ande ale kama wala andala pula pemepare ale menda ora na-andeleme. 14Ande Aisayame lisande angele go repaa para lisaya. Go angelere go ei.
Go wenaalimiri wala kama pangala pula pemepare
kone ora na-wilimi.
Gupuma ora andala andala pula pemepare
ale menda na-andeleme.
15Akepeare go repaa nimuna konenuri raayo
rambulia pange angele pangapeyandare giame
pange olemole andapeyandare giame.
Go aunu na-pulapameyalore
nimuna leeme olemole andolapame pange
nimuna kaleme angele pangolapame pange
nimuna kalunumi kone sulapame.
Go au pumare ni repara wala lekeya epolapame.
Gupuma neme nimuna remona leenu
wala ma-kiyala pawa.
Gurupa angelere Godeme lea.
16Go peapare nimiri kokele na-pea. Nimiri nimina kalenumi pangeme leenumi ando peme. 17Yesumi neme nimi para lalo lisaya. Poropedi alinumi pange Godena wenaali andapumi nimimi pangaleme angelenu pange andaleme alenu andolameyanda wee pambao-aisimiyapare nimumi manda andape-na-lisaya pange pangape-na-lisaya.
Mo wai alenu randalisaya eina siapi angelenu Yesumi walisaya einu
(Maka 4:13-20; Luka 8:11-15)
18Gupuma Yesumi nimu para lalore, Go einare pangalepa lisaya. Go siapi lalo einuna reere pangoma kone waru sialepa, lisaya. 19Mo porana wai alenu lopisaya eiri go Ki Rambuao-aya Eina angele pangoma kone waru na-wi wenaali manda aeme lisaya. Sadani ipuma mo Godena angele pangoaeme wenaalina pu kana ma-aulaoma Godena angelenu yoko mipi pea lisaya. 20Mo kana mandaa onge susina wisaya lenare wenaali mendapareme Godena angele pangoma raname komalo ara ambe midame einu manda.
21Go wenaalinumiri Godena angele raname komoma midamepare pena wai alenu kana mandaayalo ara pida waru na-ma-punyaoma opala ei manda lisaya. Pena para Godena angele pangalo arare raname komelemepare koae au puaeme wenaalinumi Godena epe angele giala ara nimu para rendaapi einu go gole lopeleme ei manda lisaya. 22Reke reke ayale opea suri, Godena angele pangoma ma-maida wenaali mandayapare onge eisinda aomare wala go suna alenu para wee pambao-aeme repaa manda. Gupuma olemole waru siawe kone suaeme eimi Godena angele rongaya. Go angele rongaya eimi kili waru na-maida ei manda lisaya. 23Mo epe suri wenaali mendapare nimuna pu manda lisaya. Epe wai ale opea ei manda lisaya. Nimumi Godena angele waru pangoma go au kone waru wimi. Go wenaalimi epe kili maidame ei manda. Mendane wenaalinumi Godena wenaali ali ria komea mendane ki laapo rupa meademe ei pange mendane wenaalinumi ali ria repo rupa meademe ei pange mendane wenaalinumi ali ria ki komea rupa meademe ei mandana, lisaya.
Yesumi noma kilina siapi angele lisaya ei
24Siapi angele menda Yesumi wenaali para la alisaya. Godena Yaa Nane Wia Ki Rambuao-aya Einare gurupa manda lisaya. Ali mendame nipuna e wamopu wia lena komba wainu randoloma anda ipisaya ei lisaya. 25Rimba wenaali palia pea alena nipuna yanda runguli ali menda ipuma monde wai alenu randaloma poayande alena wala noma kilinu epa randalaya lisaya. 26Monde komba wai alenu paara lisaya dinare ande noma kilinu pange mendaa rupa paara lisaya. 27Go alina e po-ao-aeme alinumi go au andoma monde ali pua lalalo arare gupi lisimiya. Andaa alio, lisimiya. Wala mo nena wai alenu randalaende alere noma kilinu opeale ake paepae, lisimiya. 28Go lameyapare monde andaa alimi nimuna angele yangi liada ara lalore gupi lisaya. Yanda runguli alimi pilia lisaya. Go ei pangomare monde nipuna e po-ao-ae alinumi gupi lisimiya. Ambia gole yoko mu rumbula pomonapae lisimiya. Diale pa ainyalomare werepe yoko kiraminya lisaya. 29-30Werepe mo napenu maidala ara go menda dina yokala paliminya walepa lisaya. Ambiare pa ainya dapa lisaya. Mo rilipu ralalo paleme wala no wai alenu yokelemeya lalo lisaya. Werepe aoma puma monde e mapu nape lisaya dinare monde alimi nipuna pupudengi nao-aeme alinu para gupi lisaya. Ririnare monde rilipunu pange ande neme na-poawa alenuri yokoma rongo menda pipape lisaya. Rongo pumare gore repana para mu kidapape lisaya. Gupumare nape alenu mombema mendane sialepape lisaya.
Masidadi repana kilina siapi angele lea ei
(Maka 4:30-32; Luka 13:18-19)
31Yesumi ande wenaali siapi angele menda wala lisaya. Godena Yaa Nane Wia Ki Rambuao-aya Ei gurupa manda. Ali mendame masidadi repanana kili ongesi muma nipuna mapu runane ma-poaya. 32Go repanana kilisiri ora onge kilisi. Ora onge repanana kili nipu rapu manda meape-na-aya. Go peapare wala go repana kili ora repana auda popea dinare gore andaai auda popea. Go repana ora andaai aya dinare yaanumi nimuna anda epa waru aeme.
Palawa ma-poyao-ae dangana siapi angele lea ei
(Luka 13:20-21)
33Yesumi wenaali para siapi angele menda lalo ara gurupa mandana lisaya. Wena mendame palawa ma-poyao-ae danga pange ipa pange andaa palawanu muma kopona koyoma lekeyoma kiru aemenda poya eiri pupula ei mandana go Godena Yaa Nane Wia Ki Rambuao-aya Eiri gurupa mandana, lisaya.
Yesumi siapi angelenu lo aisaya eina ree
(Maka 4:33-34)
34Yesumi wenaali raayosi para angele doamere siapi angeleme kama loaisaya. Nipumi angele menda doamere siapi angeleme kama loaisaya. 35Nipumi go au pisaya eiri ande poropedi alimi lisaya angele ora minyaya pisaya. Go poropedi alimiri gupi lisaya.
Neme angele menda doamere siapimi komea
lala pulua lisaya.
Neme nimu para su yaa kini pulu ara
kundiripu alenu nimu para wadoa lisaya.
Yesumi noma kilina siapi angele lisaya eina ree
36Yesumi monde wenaali raayo kama ainyaloma nipu anda rupara pua kondo pambalainya nipuna kou nane raluaisimiya alinu ipuma angaa mealo ara lalore, Yesuo, ande e mapuna aeme noma kilina siapi angelena ree naa la giae lisimiya.
37Go lisimiyandare nipumi nimuna angele yangi liado ara lalore gupi lisaya. Monde epe wai alenu randala eiri pamuaya aliri Alina Si Naki nipu lisaya. 38Gupuma mo e popa wia ale mandare go su lisaya. Monde epe komba wai alesinuri go Ki Rambuao-aya Eina wenaalinu lisaya. Gupuma monde noma kilinuri Sadanina wenaalinu lisaya. 39Gupuma monde noma kili randalaya yanda rungulu aliri Sadani lisaya. Gupuma olemole napeda pea naarere go su yaa laapo pereda naare. Gupuma monde enda muaeme alinuri eindiolo alinu lisaya. 40Gupuma monde noma kilinu muma ma-kida pea eiri go su yaa laapo peredea dinare mendaa au pilia. 41Mo Alina Si Nakimi nipuna eindiolo alinu rapaoma nipuna Ki Rambuao-aya Eina koae koae aunu pinyaya ma-suri-ao-aeme wenaali pange koae aunu puaeme wenaali mombelenayanda rapalia. 42Gupuma mo eindiolo alinu go wenaali muma repana ralo-ae para ma-mu kidimindare e waru loma anga lengere lao-alimi. 43Go dinare Godena wenaaliri nimuna Apana Ki Rambuao-aya andasu para naare mandana roma lee yaru yaru pu alimi lisaya. Go lalo angelenu nimi kale ayalenu deandare gore pangalepape lisaya.
Amo alenu andawi eina siapi angele lea ei
44Yesumi lalo ara lalore, Go Godena Yaa Nane Wia Ki Rambuao-aya Eiri gurupa manda lisaya. Ali mendame e poaya lena ali menda puma nipumi amo alenu nu rongona anda suma nipumi ma-keapaya lisaya. Gupuma nipumi raname waru komalo ara nipumi nipuna andaa puma nipuna olemolenu raayosi yodo muma muma pisaya. Nipumi puma gonde alenumiri monde amo alenu andawisaya e mapu reali mo e mapu nipu mualemeyanda pua kambisaya.
Kalu sekerena siapi angele lea ei
45Yesumi lalo ara lalore, Go Godena Yaa Name Wia Ki Rambuao-aya Eiri gurupa manda lisaya. Ali mendame epe sekerenu waisa eiri pamuayapare nipumi ora epe kalu sekere menda andawisaya lisaya. 46Go sekere andoma ropula kone wisaya. Nipumi nipuna anda puma mo nipuna olemole raayo rapa rapa puma yodo muma nipumi mo kalu sekere ropisaya lisaya.
Angona nuna siapi angele lea ei
47Go einare Yesu nipumi lalo arare gupi lisaya. Go Godena Yaa Nane Wia Ki Rambuao-aya Eiri gurupa manda lisaya. Ipa lee mendana repali muaisimiya alinumi angona nu kuda paisimiyapare nimumi ora one mone repalinu raayo waru misimiya. 48Mo angona nunu repalimi rumbiaya naarena monde angona ipa reena yolo muma pua piri monde repalinu rumarimiya. Gupuma ora epe einu yarepe muare kopona sumare nape-na-ae einuri yarepere rumbameya lisaya. 49Go eiri go su yaa peredea naarenare nipuna eindiolo alinumi go au pilimi lisaya. Nipuna eindiolo alinumi koae koae aunu puaeme wenaali komea yarepe mumare mo nipuna wenaalinuri pa ainya dea lisaya. 50Nimumi mo koae koae aunu puaeme wenaali yarepe muma repana ora waru roma kaalo-ae para muma kidimi lisaya. Nimumi anga lengere waru ma-laoma e waru loalimi lisaya.
Ora ree angelenu ambalana einu pange ora ree angelenu pena einu lea
51Go einare Yesumi nipuna kou nane rali alinu para angaa mealo ara lalore gupi lisaya. Na siapi angelenu kone waru sialemepae lisaya.
Nimumi lalore E lisimiya.
52Wala Yesumi lalo ara lalore Go eiri gurupa leme, lisaya. Rudule Angele waloaeme repaa menda Godena Yaa Nane Wia Ki Rambuao-aya Ei raluma epeleandare gore nipuri go ei manda. Nipuri andaa ali menda manda. Nipumiri ambalana amo alenu pange pena amo alenu nipuna anda para wida rupa manda, lisaya.
Wenaalinumi Yesu kou walisimiya ei
(Maka 6:1-6; Luka 4:16-30)
53-54Yesumi go siapi angelenu wenaali para la lomare nipu wala nipuna ree anda para paisaya. Go alena pu arare nipu mo Gode repara yainya puaeme anda para puma Godena angele pua walisaya. Mo para aisimiya wenaalimi go angele pangoma rungulu mealo pambisimiya. Gupuma nimumi gupi lisimiya. Go alimi kone waru wia eiri apimi waleanda piapae lisimiya. Go angelere nimuna gole angaa angaa misimiya. Gupuma nipumi mongo wenaalimi pape-nae aunu pinyayandare puri apimi adapae lisimiya. 55Go nakiri ande anda eloae alina si nakimi gole pia ae lisimiya. Meariri nipuna ama pange Dieimusi, Diosopo, Saimono pange Diudasiri nipuna amenu ae lisimiya. 56Gupuma nipuna balinuri go para aeme lisimiya. Go peale go alimi go au pulameyare puri a para meapae lisimiya, 57Go einare mo wenaalimi Yesuna angele na-pangisimiya.
Go pisimiyandare Yesu nipumi nimu para go angele lisaya.
Godena angele lao-aeme alinuri pa mendana andare waru andasiaore waru ando-aemepare nipuna ree anda para pange nipuna repaame pange wenaali raayome kou wale au kama puaeme lisaya.
58Yesumi nipuna ree anda para wenaalimi pape-na-ae aunu andapu na-pisaya.
Akepeare go wenaalimi nipu repara kone na-rulaisimiya.
Currently Selected:
Madiu 13: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
