Madiu 20
20
Waini e mapu para pupudenginu noaisimiya repaana siapi angele lisaya ei
1Godena Yaa Nane Wia Ki Rambuao-aya Eiri ali mendame nipuna waini e mapu para pora lombo sialome ali menda para pua loma nipuna pupudengi mo waini e mapu para puma pua nademe rupa lisaya. 2Nimu rapu angele loma pange nimuna kone mendaa para suma nimumi muni kina komea yapi komeana mealimina loma mo alinu no waini e mapu para pupudengi nenaya rapaisaya. 3-4Palumu mo ali makedina paisayapare alinu mendapare pa pamulopalo-ainya pua andoma nimu pange mo e mapu para pulupa loma rapaisaya. Nimi yangi epe rupa gulale pulupa loma raparipaya. 5Gupuma monde alinu paisimiya. Naare kalu rikana ainya pange gaipame nane mendaa au pisaya. 6Gupuma wenaali anda nane anda nane pimi naarena no makedina wala puma ali mendapare wala pua andisaya. Nimiri alendanu pange na-mi nimina naarele akepea ma-pereyademepae lisaya. 7Nimumi nipu para wala go angele lisimiya. Ali mendame pupudenginu namonoyanda naa na-meanda pamae lisimiya. Go loma nipumi lalore Gore nina ena pua pupudengi nalepa ae lisaya.
8Gaipame nane perelisayandare monde e mapu realimi mo nipuna pupudengi naisimiya alinu para wi loma lalore, Monde mapuna pupudengi naleme alinu pua widapa loma nimuna yangi pua adapa lisaya. Werepe nane epamende alinu ambala ririna alama alama pumare gore ande ririna epamende alinu go rupa adapape lisaya. 9Mo naare pambala-ainya epamende alinuri muni kina komea komea meama meama pisimiya. 10Monde ambala ririna pupudengi rambamu namende alinu kone sialore nimumi yangi andapu milima kone wisimiyapare nimu pange kina komea komea meama meama pisimiya. 11Monde nimuna yangi muma monde e mapu reali para rono waru pangisimiya. 12Go werepe epamende alinuri naare pa ongesi komea epa pupudengi name lisimiya. Naa komea naare luma piri pupudengi andaai namapare naame muni andapu milima kone siamapare naa pange nimumi meamende rupa midama lisimiya.
13Monde realimi nimuna angele yango liado ara ali menda para gupi lisaya. Ame alio lisaya. Neme nee para koae au menda na-pawa pange ambala lalore kone menda para suma pupudengi yapi komea nolandare gore kina komea mula laende lisaya. 14Ambia nena yangi muma anda pu lisaya. Akeare go werepe nane meawande ali pange kina komea adoame lalo lisaya.
15Monde realimi wala gupi ora lisaya. Neme go munimi ale menda pulandare gore nina ei para pi lisaya. Neme epe au pinda neeme ni para rono pangalepae, lisaya.
16Yesumi angele lo pereyado arare gupi lisaya. Kalu alinu aeme wenaaliri bi na-wi repaa alimi pange bi na-wi repaare kalu alinu alimi lisaya.
Yesumi nipuna komola pa eina angele wala rana repo lisaya ei
(Maka 10:32-34; Luka 18:31-34)
17Yesu pange nipuna kou nane rali alinu pange wenaali rapu Diurusaleme anda oposiaisimiya. Yesumi nipuna kou nane rali alinu karu muma kundiripu ara gupi lisaya. 18Pangalepa lisaya. Naare monde Diurusaleme nane oposiala apo pulumanda lisaya. Go andaare ande Alina Si Naki ande alinau puaeme kalu alinu pange ande Rudule Angele waloaeme alinuna ki para ma-alamonedeme lisaya. Gupumare angele yokonali pumare nipu komena angele deme lisaya. 19Gupuma Isaraelimi na-mandu rangala pae wenaali para ademe pange go repaamere giri giri lalimi lisaya. Gupuma nipu lu yambilimi pange ikokome ekeraisa wape pi repanana lu andiaomare wala yapi repomere gore wala rekelea lisaya.
Dieimusi pange Dioni laapome andaa ali alipa lisipiya ei
(Maka 10:35-45)
20Go naarenare Sebedina naki laapo pange niipuna amasi ipuma mo wename Yesu para epa rumu yaruaoma piri lalo ale menda epa konge lisaya.
21Yesumi neere ale rana pea pa loma mo wena lora pisaya. Nee kini ali pidindare nina naki laapo raidipuna ali mendare nena popeke ki nane pirina ali mendare nena koaeya ki nane pirinya lape lisaya. Go au ora pulua loma wili mandaa ora mea-ae lisaya.
22Yesumi lalore gupi lisaya. Nimimi kongeyamende alere kone na-wi ara kongeyamende-ae lisaya. Go neme nolame pi rendaare manda nelepepae, lisaya. Monde naki laapome lalore Anana nelepa angele lisipiya.
23Yesumi lalore, Niipimi ora dape lisaya. Go peapare nina koae nane kina pange popeke ki nane pida pea alinuri neme na-mulae lisaya. Gurupa pirape alinuri nina Apame nipuna milia repaa komea gurupa pidimi lisaya.
24Yesuna kou nane rali alinumi go ei pangomare monde ameaya para rono waru pangisimiya. 25Gupuma Yesumi nimu raayo komea para wi lomare gupi lisaya. Angele na-mi wenaali andere pimi repaamere nimuna andere pimi wenaali parare nimuna angele komea pangoalimi leme. 26Go peapare nimimiri go au na-pilimi. Ali menda nipumi andaa ali alua kone wiliandare gore nipuri nimina pupudengi nao-ae ali alia. 27Gupuma ali menda nipu ririna ali alua kone wiliandare gore nipuri nimina pakama pupudengi nao-ae ali alia. 28Nimi pange Alina Si Nakimi pisaya au pipape. Nipu go suna epe auri wenaali mendame nipuna pupudengi nainyaya na-epea. Nipu epea eiri wenaalina pupudengi naluame pange nimu rambamulame nipu komolameyanda epea pange nimu rambamulameyanda ei, lisaya.
Lee rumbu pi ali laapo ma-epeaisaya ei
(Maka 10:46-52; Luka 18:35-43)
29Dieriko anda minyapalaoma pulu-ainya wenaali andapumi Yesu raluma ipisimiya. 30Lee rumbu pi ali laapo porana pirisipiyapare Yesu pupula lisimiya ei pangisipiya. Go ei pangoma lalore gupi lisipiya. Andaa ali Deipidina Nakio,#20:30 Diu wenaali nimuna kone wimi eiri gore mo nimu wala kambominyaya Godeme ma-aya aliri Deipidina repaa alimi pilia kone sua maisambao-aisimiya. Mo lee rumbupi ali laapome Yesu ipisayandare Deipidina Nakio lisipiya. neeme saa para yarame komala ara epa rambameae lisipiya.
31Wenaali andapumi mo ali laapo para rono pangalo ara angele na-dapape lisimiya. Go lameyapare monde ali laapome ora wi andapu lisipiya. Andaa ali Deipidina Nakio saa para yarame komala ara rambameae lisipiya.
32Yesumi pangoma niipu para lalore, Neme niipi para ake au panoyanda dapepae lisaya.
33Andaa ali neeme saana lee ma-epeainyae, lisipiya.
34Yesumi niipu laapo yarame komoma niipuna lee waraisayanda epelisaya. Gupuma niipumi olemole andisipiya. Go pumare Yesu raluma paisipiya.
Currently Selected:
Madiu 20: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
