Мф 2
2
2 ГЛАВА
1-12 Эрвел гыч толшо ушан еҥ-влак#2:1 Ушан еҥ-влак – волхва-влак, мудреч-влак. Иисуслан вуйым сават. 13-15 Египетыш куржмаш. 16-18 Ирод Вифлеемыште аза-влакым пуштедыкта. 19-23 Египет гыч пӧртылмаш.
1Ирод кугыжаланыме годым Иудейысе Вифлеемеш Иисус шочмеке, эрвел гыч Иерусалимыш ушан еҥ-влак толыныт да йодыныт: 2«Иудей-влакын кызыт гына шочшо Кугыжашт кушто? Ме эрвелне Тудын шӱдыржым#2:2 «Ме эрвелне Тудын шӱдыржым» – грек мут-влакым «Тудын шӱдыр нӧлталтмыжым» манынат кусараш лиеш. ужынна да Тудлан вуйым саваш толынна». 3Тидым колмеке, Ирод кугыжа да уло Иерусалим тургыжланаш тӱҥалыныт. 4Израиль калыкыште чыла архиерей ден закон туныктышо-влакым поген, Ирод нунын деч йодыштын: «Христос кушан шочшаш?» 5Нуно вашештеныт: «Иудейысе Вифлеемыште. Пророк гоч тыге возымо:
6”Тый Вифлеем, Иуда мландысе ола,
Иудан моло кугу олаж-влак деч пырчат изи отыл:
тый дечет Мыйын Израиль калыкемым
вӱден кайыше Вуйлатыше лектеш”».#2:6 Мих 5:2.
7Тунам Ирод эрвел ушан-влакым шкеж деке шолып ӱжын да нунын деч шӱдыр кунам шочмо жапым раш пален налын. 8Нуным Вифлеемыш колтымо годым каласен: «Кайыза да Икшыве нерген чылажымат пален налза. Тудым кычал мумеке, мыламат уверым пуыза, тунам мыят Тудын деке вуем саваш миен кертам». 9Кугыжам колыштмеке, нуно корныш лектыныт. Эрвелне улмо годым ужмо шӱдырышт нунын ончылно каен, а вара, Икшыве тураш шумеке, чарнен шогалын. 10Шӱдырым ужын, ушан еҥ-влак моткоч чот куаненыт. 11Нуно пӧртыш пуреныт, Икшыве ден Мария Аважым ужыныт, кумык возыныт да Йочалан вуйым савеныт. Вара нуно кондымо поянлыкыштым луктыныт, Икшывылан шӧртньӧ, ладын да смирна ӱй пӧлекыштым пуэныт. 12Ирод деке пӧртылаш огыл манын, шижтарымашым нуно омешышт ужыныт, сандене шке элышкышт вес корно дене каеныт.
13Ушан еҥ-влак кайымеке, Иосифын омешыже Господьын Суксыжо кончен да ойлен: «Кынел, Икшыве ден Тудын Аважым пырля нал да Египетыш курж, пӧртылаш кӱштымешкем, туштак лий. Ирод, пушташ шонен, йочам кычалаш тӱҥалеш». 14Иосиф кынелын, йӱдым Икшывым да Тудын Аважым пырля налын да Египетыш каен. 15Иродын колымешкыже, туштак лийын. Тыге Господьын пророк гоч ойлымыжо шукталтын. Пророк ойлен: «Мый Шкемын Эргым Египет гыч ӱжынам».#2:15 Ос 11:1.
16Ушан еҥ-влакын ондалымыштым ужмеке, Ирод моткоч чот шыдешкен, Вифлеемыште да тудын воктенысе илемлаште кок ияш да тылеч изирак чыла эрге азам пушташ шке еҥже-влакым колтен. Ийготым тудо ушан еҥ-влак деч пален улмаш. 17Тыге Иеремий пророк гоч каласыме шукталтын. Тудо ойлен:
18«Рамаште йӱк-йӱан, мӱгырен шортмо,
йӧсын кычкырыме шокта.
Рахиль шке йочаж-влак верч шортеш,
нунышт уке улыт, сандене ынеже лыплане».#2:18 Иер 31:15.
19Ирод колымеке, Египетыште Иосифын омешыже Господьын Суксыжо кончен 20да ойлен: «Кынел, Икшыве ден Тудын Аважым нал да Израиль мландыш кае. Икшывын чонжым налаш шонышо-влак коленыт». 21Иосиф кынелын, Икшыве ден Тудын Аважым пырля налын да Израиль мландыш пӧртылын. 22Иудейыште Ирод олмеш Архелай эргыже кугыжаланыме нерген колмеке, тушко мияш лӱдын, а омыж дене каҥашым налмеке, Галилей кундемыш каен. 23Миен шумеке, Назарет лӱман олаште илаш тӱҥалын. Тыге пророк-влак гоч ойлымо «Назорей маналташ тӱҥалеш» манме шомак шукталтын.
Currently Selected:
Мф 2: УС
Highlight
Share
Copy
Want to have your highlights saved across all your devices? Sign up or sign in
Библийым кусарыше институт, Хельсинки 2007
