Лука 1
1
Ушодкс
1Ламот уш кармасть сёрмалеме ёвтнемат сеть тевтнеде, конат топавтовсть минек ютксо. 2Неть тевтнеде минь карминек содамо сеть ломантнень пельде, конат ушодовомстост ульнесть сынст неицякс ды теде мейле теевсть Пазонь валонь пачтицякс. 3Секс моненьгак сась мель весе тень, ушодкссто саезь, домкасто вешнезь ды чарькодезь, сёрмадомс мельга мельцек тонеть, вечкевикс Теофил. 4Те седеяк пек кемекстасы эйсэть се тонавтомань видечинть, конанень тонавтозят.
Икелев ёвтамось Нававтыця-Лемдиця Иоаннонь чачомадо
5Сеть шкатнестэ, зярдо Иудеянь инязорокс ульнесь Ирод, тосо эрясь Захария попось. Сон ульнесь Авиянь* чиполасто#1:5 чипола – смена. Захария ды сонзэ низэ Елизавета лиссть Арононь буестэ-раськестэ. 6Сынь кавонест эрясть Пазонть икеле видечинь коряс ды топавтсть седейшкава Азоронть весе кармавтовкстнэнь ды меревкстнэнь. 7Сынст арасельть эйкакшост: Елизавета ульнесь а чачтниця, ды иесткак ламольть.
8Ды вана весть, зярдо сась Захариянсетнень чиполаст, Захария, кода поп, важодсь Пазонть икеле. 9Поптнэнь юткова важодемань тевтнень явомсто Захариянень сатотсь совамс Азоронь кудонтень ды теемс ладансо сувтамо#1:9 сувтамс – тесэ: алтарь лангсо ладанонь пултазь нолдамс тантей чине алтарь лангсо. 10Те сувтамо шкастонть ламо ломанть озность ушосо, Пазонь кудонь пирявксонть потсо. 11Апак учо Захариянь икелев лиссь Азоронть ангелэзэ, кона аштесь вить ёно сувтамо алтаренть эйстэ.
12Зярдо Захария неизе ангелэнть, сон абунгадсь ды пек тандадсь. 13Ангелэсь мерсь тензэ: «Иля пеле, Захария, тонь озномат марязь: Елизавета, тонь нись, чачты теть цёра, ды тон путт тензэ Иоанн лем. 14Сон тонь туртов карми улеме кенярксокс ды уцяскакс, ды ламот кармить кецямо сонзэ чачомантень. 15Эдь сон карми улеме ине ломанькс Азоронть икеле, зярдояк а карми симеме винадо ды лия кеме симемапельде. Сон уш аванзо пекесэ пештяви Иневанькс Оймеялтсо. 16Иоанн велявтсынзе ламо Израилень ломантнень Азоронтень, сынст Пазонтень. 17Сон сы Азородонть икеле, пештязь истямо жо оймеялтонь вийсэ, кода Илия. Иоанн велявтсынзе тетятнень седеест эйкакштнэнь ёнов, ды ломантне, конат те шкас эзть кунсоло Пазонть, уставить арсеме, кода видечинь коряс эрицят. Истя сон анокстасы раськенть Азоронь самонтень». 18Захария кевкстизе ангелэнть: «Косто монень содамс: те видечи эли аволь? Мон сырян, ды нинтькак ламо иензэ». 19Ангелэсь ёвтась каршонзо: «Мон – Гавриил, Пазонть икеле аштицятнестэ вейкесь. Мон кучозян тонь марто кортамо ды тонеть те кенярксов кулянть пачтямо. 20Нейке тонь кундаты келеть ды кармат улеме акортыцякс се шкас, зярс весе ёвтазесь а топавтови. Истя лиси тонь марто монь валтнэс акемемат кисэ. Монь валтнэ топавтовить эсь шкастост».
21Те шкастонть ломантне учость Захариянь ды дивсесть, мекс сон истя кувать а лиси Пазонь кудостонть. 22Зярдо Захария лиссь, сонзэ кундатозель келезэ, ды ломантне чарькодсть: сон несь тосо неявкс. Захария пачтизе эсь меленть ломантненень кедьсэ невтнезь ды кадовсь акортыцякс. 23Пазонть икеле Захариянь важодема читне прядовсть, ды сон сась кудов. 24Куроксто Елизавета низэ пекиясь ды вете ковт эзь лисне ломань юткс. 25Сон кортась: «Тень теизе монь туртов Азорось! Монь лангс варштазь, Сон саизе монь лангсто покордамонть, конань кирдинь ломантнень пельде».
Иисусонь чачомадо икелев ёвтамось
26Елизаветань пекиямодонть мейле котоце ковонть ютамсто Пазось кучизе Гавриил ангелэнть Галилеянь Назарет ошов, 27Мария тейтерентень. Мария ульнесь чиявтозь Давидэнь буень Иосифнень. 28Ангелэсь сась Мариянень ды мерсь: «Шумбрачи теть, Пазонь чанстявт-баслававт ава! Азорось мартот, тон весемеде пек чанстязят-баславазят аватнень ютксто!» 29Ангелэнть неемстэ ды сонзэ валтнэде Мария таймаскадсь ды мейле арсизе те шумбракстнеманть смустензэ. 30Ангелэсь поладсь седе тов: «Иля пеле, Мария, Пазось макссь теть ине чансть#1:30 чансть – благодать! 31Вана тон пекият, чачтат Цёра ды путат Тензэ лем – Иисус. 32Сон карми улеме инекс-покшокс, ды Сонензэ кармить мереме Верепазонь Цёра. Ды Паз Азорось макссы Сонензэ Давид покштянть инязоронь тарканть. 33Сон карми улеме пингеде пингес инязорокс весе Яковонь буенть, Израилень раськенть, лангсо, ды Сонзэ Инязорксчинтень зярдояк а ули пе». 34Мария кевкстизе ангелэнть: «Кода те топавтови, бути мон аволь мирде экшсан?» 35Ангелэсь тень каршо кортась: «Иневанькс Оймеялтось валги тонь вельксэс, ды Верепазонь виесь копачатанзат тонь. Секскак Эйкакшонтень, конань чачтсак, кармить мереме Иневанькс ды Пазонь Цёра. 36Содак: тонь патят, Елизавета, кадык сыреяк, ялатеке пекиясь цёрасо. Весе ловсть сонзэ ачачтницякс, ней сон уш котоце ков пешксесэ. 37Эдь Пазонть туртов арась мезеяк атеевикс». 38«Мон Азоронть урезэ#1:38 уре – раб, раба», – мерсь Мария, – «кадык весе лиси монь марто истя, кода тон мерить». Те марто ангелэсь тусь Мариянь эйстэ.
Мария моли Елизаветань варштамо
39Зярыя чинь ютазь, Мария пурнась ды капшазь сыргась ошов, кона аштесь пандов таркань Иудея масторсо. 40Сон совась Захариянь кудос ды шумбракстнесь Елизавета марто. 41Зярдо Елизавета маризе Мариянь шумбракстнеманть, сонзэ потсо эйдесь либоргадсь, ды Елизавета пештявсь Иневанькс Оймеялтсо. 42Елизавета серьгедевсь: «Тон весемеде пек чанстязят-баславазят аватнень ютксто! Чанстязь тонь Эйдеськак, конань кандтнят потсот! 43Монень сась монь Азоронть авазо! Мезень кисэ монень прась истямо уцяска?! 44Теке шкастонть, зярдо тонь шумбракстнемань вайгелесь пачкодсь монь пилес, эйдесь монь потсо кенярдомадонть либоргадсь. 45Тонеть алтазесь топавтови! Секскак уцяскават тон, Азоронь валтнэс кемицясь!» 46Мария тень каршо мерсь:
«Монь седеем шны ды инелгавты Азоронть,
47ды оймем кенярды Паздонть,
монь Идицядонть!
48Пазось велявтызе вановтонзо монь лангс,
асодавикс ды анеявикс урензэ лангс.
Те чистэ саезь весе пингень ломантне
кармить монь ловомо уцяскавкс:
49весемеде Виевесь тейсь монь туртов истят ине тевть!
Сонзэ лемезэ иневанькс весементь велькссэ!
50Сон макссы эсь седеймарямонзо
мелензэ ваныцятненень
пингеде пингес.
51Пазонь виев кедесь теи ине тевть:
Сон сравтни сетнень, кинь оймест пештязь
каштанчинь мельсэ ды превсэ.
52Сон правтни прявтнэнь азорксчинь таркастост,
ды верев кепеди асодавикстнэнь ды
анеявикстнэнь.
53Сон пешти арасьчисэ эрицятнень парочисэ;
сюпавтнэнь пани чавонь кедть.
54Пазось лезды Израилень раськентень,
эсензэ важонтень#1:54 важо – слуга,
мельсэ кирди ды топавты седеймарямонть
55Авраамнень ды сонзэ эйкакштнэнень
пингеде пингес,
кода Сон алтакшнось
минек покштятненень».
56Мария эрясь Елизаветань кедьсэ колмошка ковт ды велявтсь эсензэ кудов.
Нававтыця-Лемдиця Иоаннонь чачомазо
57Елизаветань сась чачтомань шказо, ды сон чачтсь цёра. 58Шабранзо ды раськензэ марясть седе, кодамо ине седеймарямо путсь Азорось Елизаветанень, ды кенярдсть вейсэ сонзэ марто. 59Кавксоце чистэнть сынь пуромсть эйкакшонтень тееме цёрынень киськепень керявтома#1:59 цёрынень киськепень керявтома – обрезание ды арсесть путомс тензэ Захария тетянзо лементь. 60Елизавета, эйкакшонть авазо, тень каршо мерсь: «Арась, истя а ули, путтано сонензэ лем – Иоанн». 61Пурнавозтне кортасть Елизаветанень: «Тонь раськеть ютксо арась Иоанн лем марто ломань!» 62Ды кедьсэ невтнезь, кевкстнесть эйдень тетянть, кодамо лем путоволь сон. 63Захария вешсь лазнэ ды сёрмадсь лангозонзо: «Эйкакшонть лемезэ – Иоанн». Ды весе талакадсть. 64Ды сеске теде мейле Захариянь панжовсть турванзо ды кортазевсь келезэ; сон кармась кортамо ды Пазонть шнамо-чанстямо. 65Весе перькаст эрицятнень копачинзе тандадома ды пелема. Те кулясь срадсь весе пандо лангонь Иудеяванть. 66Весе, кие теде марясь, эсь пачкаст арсесть ды кортнесть: «Кикс карми улеме те эйдесь?» Эдь Азоронть виесь ульнесь мартонзо.
Захария шны Пазонть
67Захария, Иоаннонь тетясь, пештявсь Иневанькс Оймеялтсо ды кортазевсь пазмарицякс:
68«Улезэ шназь-чанстязь Азорось, Израилень Пазось,
конась сы ды олякстомтсы Эсензэ раськенть.
69Сон кучи миненек виевдеяк виев Идиця,
кона лиси Давид важонзо буестэ.
70Теде Сон алтакшнось Эсензэ
пазмарицятнень вельде,
конат эрясть ламо иеть теде икеле.
71Идицясь олякстомтсамизь эсенек яттнэде
ды минек лангс кежень кирдицятнень кедест алдо.
72Сон топавты Эсь седеймарямонзо,
кона алтазель минек покштятненень.
Сон мельсэ кирди Эсь алтавксонзо,
иневанькс вейсэньлувонть
73ды кеме валонть, конань Пазось максызе
минек Авраам покштянтень:
74Пазось олякстомтсамизь вардонок
лепштямонть эйстэ.
75Ней минь карматано апак пеле
Сонзэ мелензэ топавтомо,
прянек-седейнек Пазонтень максозь
ды Сонзэ сельме икеле видечинь коряс эрязь,
весе эсенек эрямонть перть.
76Ды тон, эйдине, кармат кандтлеме
Верепазонь пазмарицянь лем.
Тон кармат молеме Азоронть икеле
ды анокстамо Сонензэ вадря ки.
77Сонзэ ломантненень тон максат
чарькодема идемадо,
конась ашти пежетест нолдамосо.
78Минек Пазось, пештязь вечкемасо ды
седеймарямосо,
кучсь миненек менельстэ Чилисема,
79кона максы валдо чоподасо ды куломань
сулейсэ эрицятненень,
аравтсамизь минек
седейоймамонь ки лангс».
80Эйдесь кассь-кепететсь, ды виевгалесь сонзэ оймезэ. Сон эрясь чаво мода лангсо семс, зярс эзь са шказо лисемс Израилень раськенть икелев.
Currently Selected:
Лука 1: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
