Матвей 24
24
Пазонь кудонь калавтомась
1Зярдо Иисус лиссь Пазонь кудостонть ды туиксэль уш, мольсть Тензэ тонавтницянзо ды тердизь Сонзэ вейсэ ванкшномо Пазонь кудонь весе пирявкс потмонть. 2Иисус мерсь тенст: «Вантадо те мазычинть лангс? Кемеде тень: весе калавтозь ули, а кадови тезэнь натой кев лангс кевгак».
Пингень прядовома тешкстнэ
3Зярдо Иисус озась Ойумарькс пандонть лангс, сестэ мольсть ваксозонзо тонавтницянзо ськамост ды кевкстизь: «Ёвтык тенек, зярдо те тееви? Ды кодамо тешксэнь коряс содави Тонь самот ды пингенть прядовомазо?»
4Иисус мерсь каршост: «Ванодо, кияк аволидизь маня. 5Ламот сыть кекшезь Монь лементь ало, мерить: “Мон – Пазонь кучовт Идицясь”, ды ламотнень ильведстьсызь-манясызь. 6Тынь марятадо маласо войнань гайть ды васоло войнадо кулят. Ванодо, илядо тандале: весе тенень эряви улемс, ансяк те зярс аволь песь. 7Раське кепедеви раськень каршо, мастор – масторонь каршо, улить вачо иеть, куломань ормат ды таркань-таркань модань сорномат. 8Весе неть майсематне ансяк теке чачтомань пиштематнень ушодксост. 9Сестэ тынк кармить макснеменк муцямос ды маштнемас. Весе раськень ломантненень ультядо авечкевиксэкс Монь лементь кисэ. 10Сестэ ламотне потыть кемемастост, вейкест-вейкест эйсэ кармить микшнеме, вейкест-вейкест а вечкеме. 11Сыть ламо кенгелиця пазмарицят ды ламотнень ильведстьсызь. 12Зыянось пек ламолгады, ды секскак ламотнень седейсэ вечкемась лепами-мади. 13Кие жо весе тень цидярдсы педе пес, се ванстови-идеви. 14Зярдо Кенярксов кулясь Пазонть Инязорксчидензэ ёвтнезь ули масторлангонть келес весе раськетнень марямост кисэ, ансяк сестэ сы пингень песь».
Сыця пиштематне
15«Зярдо несынк иневанькс таркасонть путозь аваньксчинь нулгодьксэнть, конадо кортась Даниил пазмарицясь – ловныцясь чарькодезэ! – 16сестэ сеть, конат Иудеясо, оргодест пандо лангов. 17Кие кудо лангсо – илязо валго кудос мезеньгак саеме. 18Кие паксясо, илязо велявто мекев кудов оршамонзо мельга. 19Кодамо стака ули сеть читнестэ пешксесэтненень ды потесэ эйкакшонь андыцятненень! 20Ознодо, илязо уле тынк оргодемась тельня эли оймсема чине. 21Эдь сестэ ули истямо стака пиштема, кодамо арасель пингенть ушодовомсто течис, ды зярдояк а ули. 22Бути авольть уле аламолгавтозь сеть читне, сестэ кияк аволь ванстово. Ансяк кочказтнень кисэ сеть читне аламолгавтовить.
23Се шкастонть кияк мериндеряй тенк: “Вана тесэ Пазонь кучовт Идицясь” эли “Сон тосо”, – илядо кеме. 24Кармить само кенгели христост ды кенгели пазмарицят, конат теить покш дивань тешкст ды тамашат. Сынь снартыть натой Пазонь кочкавтнэньгак ильведстемс-манямс, бути те тееви тенст. 25Кирдинк мельсэнк, весе тень Мон ёвтыя тенк икелев.
26Истя, кияк мериндеряй тенк: “Оно, Сон чаво модасо”, – илядо моле тов, эли: “Оно, Сон кекшни се кудосонть”, – илядо кеме. 27Кода чилисема ёно ёндолонь верьгедемась валдомты чивалгома ёнксонтькак, истямо неявиксэкс ули Ломантнень Цёранть самозояк. 28Эдь кортави: косо кулозь ракшась, тов пуромить раужо варакатнеяк».
Ломантнень Цёранть самозо
29«Курок неть стака пиштемань читнеде мейле чись чополгады, ковоськак а карми максомо валдо, тештетнеяк прыть менельстэ, ды менелень вийтнеяк теить сорк. 30Сестэ менельстэ карми неявомо Ломантнень Цёранть самонь тешксэзэ. Ды весе масторлангонь раськетне кармить авардеме, зярдо несызь Ломантнень Цёранть менелень пель лангсо самонзо покш вийсэнзэ ды иневалдосонзо. 31Покш торамонь виев гайть марто Сон кучсынзе Эсь ангелэнзэ масторонь ниле ёндо Эсензэ кочкавтнэнь пурнамо весе масторлангстонть педе пес».
32«Тонавтнеде чарькодеме инжир чувтонть коряс: зярдо сонзэ тарадонзо чевтемить ды нолдыть лопат, сестэ содави – кизэсь маласо. 33Истя тесэяк, зярдо тынь несынк весемень топавтоманть, сестэ чарькодтядо, – те шкась маласо, кенкш лангсо. 34Видестэ кортан тенк: неень пингень ломантне ёмамо а кенерить, кода весе те топавтови. 35Менелесь ды масторось ёмить, ансяк Монь валон а ёмить».
Чись ды часось а содавить
36«Се чиденть ды частонть кияк а соды: менелень ангелтнэяк, – соды ансяк Монь Тетям ськамонзо. 37Кода ульнесь Ноень читнестэ, истя ули сестэяк, зярдо сы Ломантнень Цёрась. 38Инечадыденть икеле ломантне ярснесть, симнесть, урьвакстнесть ды лиснесть мирденень се чинть самс, зярдо Ной совась иневенчентень. 39Сынь мезеяк эзть чарькоде-нее семс, зярс эзь са инечадысь ды эзинзе ёмавто весень. Истя ули сестэяк, зярдо сы Ломантнень Цёрась. 40Сестэ паксясо важодиця кавто ломантнень эйстэ вейкесь ули саезь Пазонтень, омбоцесь кадозь. 41Ведьгевсэ яжавтыця кавто аватнень эйстэ вейкесь ули саезь Пазонтень, омбоцесь кадозь. 42Секскак уледе анокт, эдь а содасынк, кона шкастонть сы тынк Азорось. 43Тень тынь чарькодьсынк: содавольгак кудазорось, кона шкане веть сы салыця, сон аволь удо ды аволизе нолда сонзэ эцеме кудозонзо. 44Секскак, тыньгак уледе анокт: Ломантнень Цёрась сы се шкастонть, зярдо тынь Сонзэ а учотадояк».
Кемевикс важо ды акемевикс важо
45«Уледе истямокс, кодамо кемевикс ды превей важось, конань кудазорось туемстэ путсы покшокс весе важонзо лангсо ды мери шкастонзо макснемс тенст ярсамопель. 46Уцяскав ули те важось, конань кудазорось, зярдо сы, несы истя теемстэ! 47Кемевтян эйсэнк: сестэ кудазорось путсы сонзэ весе ули-паронзо лангсо покшокс.
48Бути сон апаро важо, сестэ арсезеви: “Монь азором курок а сы”, 49ды карми чавомо лия важотнень, сонсь карми симиця ломань марто симеме-ярсамо. 50Ансяк кудазорозо сы се чистэнть, конастонть важось а учияк, ды се часстонть, конадонть а арсияк. 51Кудазорось сестэ куломс чавсы сонзэ ды ёртсы тов, косо чачонь полавтницятне. Тосо сон карми авардеме ды пейсэнзэ чикордомо».
Currently Selected:
Матвей 24: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
