Марк 10

Иисус корты урьвакстомадо ды явомадо

1Иисус тусь тосто ды сась Иудеянь масторс Иордан леенть омбоце пелев. Таго промсть Тензэ пек ламо ломанть, ды Сон, кода свал, кармась сынст тонавтомо.

2Мольсть ваксозонзо фарисейть, мелест ульнесь Сонзэ снартнемс-варчавтнемс, кевкстизь: «Мереви-арась мирдентень явомс нинзэ эйстэ?» 3Сонгак кевкстинзе сынст: «Кодамо теде кармавтовкс кадсь тенк Моисей?» 4Сынь ёвтасть: «Моисей мерсь сёрмадомс явомадо конёв ды явомс эйстэнзэ». 5Иисус кортась каршост: «Калгодо седеенк кувалма сон сёрмадызе тенк те кармавтовксонть. 6Пазось менельтнень-мастортнэнь теемстэ теинзе цёрантькак ды авантькак. 7Секскак цёрась кадсынзе тетянзо-аванзо, 8сюлмави нинзэ марто, ды сынь кавонест теевить вейке рунгокс. Мейле кармить улеме аволь кавто, а вейке ломанькс. 9Лисни, мезенть Пазось вейс сюлмизе, сень ломанесь илязо явно».

10Кудосо аштемстэ тонавтницянзо таго кевкстизь Сонзэ тень кувалма. 11Сон кортась тенст: «Кие яви нинзэ эйстэ ды урьваксты лия лангс, се ускури эсь нинзэ икеле. 12Истя ниськак, явиндеряй мирдензэ эйстэ ды лисиндеряй лиянень, ускури».

Иисус баслави-чансти эйкакшт

13Кандтнесть-ветнесть Иисуснэнь эйкакшт, конатнень лангс вешсть путомс кедензэ. Тонавтницянзо сынст кардасть. 14Тень неезь, Иисус кежиявтсь ды мерсь тенст: «Мереде эйкакштнэнень сакшномс Монень, илядо карда эйсэст, эдь истятнэнь ули Пазонь Инязорксчист. 15Видестэ кортан тенк: “Кие Пазонь Инязорксчинть а вастсы эйкакш ладсо, се тозонь а совави”». 16Мейле Иисус озавтынзе эйкакштнэнь элезэнзэ, путынзе лангозост кедензэ ды чанстинзе-баславинзе.

Сюпав ломань

17Иисусонь ки лангов сыргамстонзо мольсь ваксозонзо ве ломань, прась икелензэ кумажа лангс, кевкстизе Сонзэ: «Паро тонавтыця! Мезе монень теемс пингеде пингень эрямонтень совамга?» 18Иисус мерсь тензэ: «Мейс тон Монень “паро” мерят? Паздо башка кияк парокс а эрси. 19Тон, нама, кармавтовкстнэнь содасыть: иля ускуря, иля маштне, иля сала, иля кенгеле, иля манче, ловт ломанькс тетять-авать».

20Сон ёвтась каршозонзо: «Тонавтыця, весе тень мон топавтан од пингестэ саезь». 21Иисус вечкезь варштась лангозонзо ды мерсь тензэ: «Тонеть вейке ансяк а саты: азё, весе, мезеть ули, микшник. Ярмактнень явшить пурныцятнень ланга. Сестэ карми улеме теть сюпавчи менель лангсо. Теде мейле сак, саик эсь крёстот ды мольть Монь мельга». 22Неть валтнэде нусмакадсь ломаненть чамазо, ды сон мелявтозь тусь ве ёнов: эдь вельть ламоль сонзэ ули-парозо.

23Иисус варштась пертьпельга ды мерсь тонавтницянстэнь: «Вай, кодамо стака сюпавтненень совамс Пазонь Инязорксчинтень» 24Тонавтницянзо дивасть Сонзэ валтнэнень. Иисус таго мерсь каршозост: «Эйдень, пек стака сюпавчи лангс кемицятненень максомс пряст Пазонь Инязорксчинтень! 25Сюпав ломанентень пек стака совамс Пазонь Инязорксчинтень, седе шожда верблюдонтень салмукс варява ютамс». 26Сынь седеяк дивасть ды кевкстнесть вейкест-вейкест: «Кинень эно сестэ идеви?» 27Иисус варштась лангозост, мерсь тенст: «Ломанентень те а тееви, тееви Пазонтень, эдь Пазонтень тееви весе».

Тонавтницятненень питнень пандома

28Сестэ Петра кармась Тензэ кортамо: «Вана, минь кадынек весементь ды туинек Тонь мельга». 29Иисус каршонзо мерсь: «Видестэ кортан тенк: кие Монь кисэ ды Евангелиянть кисэ кадызе кудонзо, лелянзо-ялаксонзо, патянзо-сазоронзо, тетянзо-аванзо, нинзэ, эйкакшонзо, паксянзо, 30сенень максови сядонь кирда: ней, теке шкастонть, кудот, лелят-ялакст, патят-сазорт, тетят-ават, эйкакшт, паксят, теке марто майсемат-пансемат ды икелепелень шкастонть пингеде пингень эрямо. 31Ды ламот, конат те эрямосонть васенцеть, теевить меельцекс, а вана меельцетне – васенцекс».

Иисус корты эсензэ куломадо

32Сынь кузсть кинть ланга Ерусалимев, Иисус мольсь сынст икеле, тонавтницятне ульнесть талакадозь ды мольсть Сонзэ мельга пелезь. Сон таго тердинзе кемгавтово тонавтницянзо, кармась тенст ёвтнеме седе, мезе мартонзо карми улеме: 33«Вана минь мольтяно Ерусалимев, тосо Ломантнень Цёрась ули максозь попонь покштнэнь ды Койс тонавтыцятнень кедьс, конат Сонзэ судясызь куломас, макссызь Сонзэ лия раськень ломанень кедьс. 34Сынь кармить Сонзэ нарьгамо, локшосо керямо, сельгенеме, ды маштсызь Сонзэ. Ансяк мейле колмоце чистэ Сон кулозьстэ вельми».

35Яков марто Иоанн, Зеведеень цёратне, састь Иисуснэнь ды мерсть: «Тонавтыця! Минек ули меленек: теевлик тенек сень, мезе кедьстэть вештяно». 36«Мезе меленк теевтемс тенк Монь кедьстэ?» – кевкстинзе Иисус. 37«Мерть озамс вейкенень эйстэнек эсь инексчисэть вить кедь ёнозот, омбоценень – керш кедь ёнозот», – кортасть сынь Тензэ. 38Иисус кортась тенст: «Аздатадо, мезе вештядо. Саты а саты нарденк симемс се пиштемань кеченть, конань Мон симан, ды нававтовомс се пиштемань нававтомасонть, конаньсэ Мон нававтован?» 39Сынь ёвтасть: «Саты нарденек». Сестэ Иисус поладсь тенст: «Кеченть, конань Мон симан, карматадо симеме, ды нававтомасонтькак, конаньсэ Мон нававтован, ультядо нававтозь. 40Ансяк вить ёнов ды керш ёнов озамонь максомась аволь Монь олясо. Неть таркатне максовить сетненень, кинень сынь анокстазь».

41Зярдо тень маризь лия кемень тонавтницятне, сынь пек ацирьгадсть Яков марто Иоанн лангс. 42Иисус тердинзе сынст кемгавтовонест ды мерсь: «Тынь содатадо: неть, конат лововить раськень прявтокс, аштить азорокс эсест раськетнень лангсо, ине ветицятнеяк кирдить эйсэст кедест ало. 43Тынк ютксо вана истя илязо уле: кинь мелезэ улемс тынк ютксо весемеде покшокс, се улезэ лиятненень важокс. 44Кинь мелезэ улемс тынк ютксо васенцекс, се улезэ весенень урекс. 45Ломантнень Цёраськак сась аволь Эстензэ важодевтеме, мекевланк Сонсь сась важодеме ды максомо Эсь эрямонзо весень идемаст-рамамост кисэ».

Иисус шумбралгавтызе сокор Бартимеень

46Иисус эсь тонавтницянзо марто састь Ерихон ошс. Зярдо Сон лисиль Ерихонсто тонавтницянзо ды ламо ломантнень марто, ки чиресэ аштесь озадо Тимеень цёразо, сокор пурныцясь Бартимей. 47Сон марясь, те ютыцясь Назаретэнь Иисус, ды кармась пижнеме: «Давидэнь Цёра, Иисус! Ульть седеймарикс монень!» 48Ламо ломанть кармавтсть эйсэнзэ чатьмонеме, ансяк сон яла седеяк пек пижнесь: «Давидэнь Цёра! Ульть седеймарикс монень!» 49Иисус лоткась ды мерсь: «Тердинк сонзэ». Тердизь сокоронть, мерить тензэ: «Иля пеле, стяк, Сон терди эйсэть». 50Сон каизе-ёртызе ланга оршамонзо, стясь ды мольсь Иисуснэнь. 51Иисус кевкстизе: «Мезе мелеть теевтемс Монь кедьстэ?» Сокорось мерсь Тензэ: «Тонавтыця, теить неицякс сельмень!» 52Иисус мерсь тензэ: «Азё, кемемат шумбралгавтынзеть тонь». Сон сеске кармась нееме ды тусь кияванть Иисус мельга.

Currently Selected:

Марк 10: ОВ

Highlight

Copy