Марк 2
2
Катардыцянь шумбралгавтомась
1Зярыя чинь ютазь, Иисус таго сась Капернаумс. Кулясь кудов Сонзэ велявтомадо куроксто срадсь ошканть. 2Курок пурнавсть истя ламо ломанть, натой кудонть потсояк, ушосояк эзь кадово тарка. Сон кортась тенст Кенярксов кулядонть. 3Те шкастонть ниле ломанть кандсть Тензэ катар ормасо#2:3 катар орма – паралич сэредиця. 4Ламо ломантнень улемадо сынь Иисусонь малав эзть ютаво, секс кузсть кудонть лангс, штавтызь вельтявксонть, тейсть варя Иисусонь аштема тарканть коряс ды мадезь аштиця сэредицянть ацамонек-мезнек верде нолдызь Сонзэ икелев. 5Зярдо Иисус неизе сынст кемемаст, Сон мерсь сэредицянтень: «Эйдем, нолдазь тонь пежететь».
6Сесэ ульнесть озадо зярыя Койс тонавтыцят, конат арсесть эськаст: 7«Мекс Сон истя Пазонть нарьги-покорды? Кинень, Паздонть башка, нолдавить пежетне?» 8Иисус оймесэнзэ марясь, мезде сынь арсить, ды мерсь тенст: «Мекс тынь истя эсь седейсэнк арсетядо? 9Мезесь седе шождыне, меремс катардыцянтень#2:9 катардыця – парализованный: “Нолдавить тонь пежететь”, эли меремс: “Стяк, саик ацамот, ды якак”? 10Истя тынь содадо, масторлангсо Ломантнень Цёранть ули азорксчизэ пежетень нолдамскак». Теде мейле пшкадсь катардыцянтень: 11«Кортан теть: стяк, саить ацамот ды азё кудов». 12Вана цёрась сеске стясь, саинзе ацамонзо, тусь весень сельме икеле. Секс весе пек дивсесть, шнасть Пазонть, кортасть: «Минь пингезэнек истямо эзинек некшне!»
Иисус тердизе Левинь
13Иисус таго лиссь эрьке чирес. Ламо ломанть састь мельганзо, ды Сон тонавтсь эйсэст. 14Ки ланга ютамсто Сон неизе Левинь, Алфеень цёранзо, кона аштесь озадо каявксонь пурнамо кудонть вакссо. Иисус мерсь тензэ: «Мольть Монь мельга». Се стясь ды тусь мельганзо.
15Мейле Иисус ярсась Левинь кудосо. Столь экшсэ Сонзэ ды тонавтницянзо марто аштесть каявксонь ламо пурныцяткак ды пежетев лия ломантькак. Сонзэ свал ульнесть мельганзо ламо молицят. 16Койс тонавтыцятне ды фарисейтне неизь Иисусонь каявксонь пурныця ды пежетев ломань марто ярсамсто. Сестэ сынь мерсть тонавтницянстэнь: «Кода истя Сон ярсы-сими каявксонь пурныця ды лия пежетев ломань марто вейсэ?» 17Тень марязь, Иисус мерсь тенст: «Ормаменстиця эряви сэредицянень, аволь шумбра ломаннень. Мон сынь тердеме велявтомс Пазонтень пежетевтнень, аволь видечисэтнень».
Постонь кирдемадо ды оймсема чиде кевкстематне
18Иоаннонь тонавтницятне ды фарисеенсетнеяк постовасть. Ламот сакшность Иисуснэнь ды кевкстнесть: «Мекс Иоаннонь ды фарисеень тонавтницятне постовить, теке шкастонть Тонь тонавтницят пост а кирдить?» 19Иисус мерсь тенст: «Нать кирдеви пост свадьбань инжетненень, зярс урьвакстыцясь мартост? Зярдо мартост урьвакстыцясь, сестэ сынь а постовавить. 20Сы шка, зярдо урьвакстыцясь ули саезь юткстост, сестэ, сеть читнестэ, сыньгак кармить постовамо.
21Кияк ташто оршамос а панды апак озавто од коцтонь панкс, – истямо панксось сезьсы таштонть, ды тееви седеяк покш варя. 22Од винаяк кияк а кайси ташто кедень кескавс. Бути истя теят, сестэ винась сезьсы кеденть, винаськак, кескавоськак ёмить. Секскак од винась эряви каямс од кедень кескавс».
23Весть савсь Иисуснэнь оймсема чистэ ютамс сюро паксява. Сонзэ тонавтницятне ки ланга молемстэ кармасть сезнеме сюропрят. 24Фарисейтне кевкстизь Сонзэ: «Вант, мекс сынь оймсема чине теить сень, мезе а мереви теемс те чистэнть?» 25Сон кевкстинзе сынст: «Тынь нать зярдояк эзиде ловно седе, мезе тейсь Давид инязорось, зярдо сон ды сонзэ мартонзотнеяк вачомкшность, арасель ярсамопелест? 26Сон Авиатар попонь прявтонть пингестэ совась Пазонь кудос ды ярсась тосо Пазонть икелев путозь кшитнеде ды макссь мартонзотнененьгак, куш сындест, попто башка, киненьгак а меревиль ярсамс». 27Мейле мерсь тенст: «Оймсема чись теезь ломанень кисэ, аволь ломанесь оймсема чинь кисэ. 28Тень кувалма Ломантнень Цёрась оймсема чинть лангсояк азоро».
Currently Selected:
Марк 2: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
