Марк 6

Назаретэнь эрицятне а вастыть Иисусонь

1Иисус тонавтницянзо марто тусь тосто ды велявтсь Эсь тиринь ошозонзо. 2Зярдо сась оймсема чись, Сон кармась синагогасо ломантнень тонавтомо. Ламот Сонзэ кунсолыцятне дивазь кортасть: «Косто Сонзэ эйс те саевсь? Мезень истямо превейчи максозь Тензэ? Кода истят тамашатне тейневить Сонзэ кедьсэ? 3Арази Сон аволь чапиця, Мариянь цёра, Яковонь, Иосиень, Иудань ды Симононь брат? Арази Сонзэ сазоронзо аволь тесэ, минек ютксо?» Истя сынст арасель мелест кемемс Сонензэ.

4Иисус кортась тенст: «Пазмарицясь ловови эрьва косо, ансяк аволь эсь чачома ошсонзо, инеськензэ ютксо ды эсь кудосонзо». 5Тень кувалма Сонензэ эзь тееве тосо ве тамашаяк. Сон шумбралгавтсь ансяк зярыя сэредиця ломанть, путнинзе лангозост кедензэ. 6Иисус дивась сынст акемемаст лангс. Мейле Сон якась перька велетнева ды тонавтсь.

Иисус кучи кемгавтово апостолт

7Иисус тердинзе Эстензэ кемгавтово тонавтницянзо, кармась кучнеме сынст кавтонь-кавтонь ды макссь тенст азорксчи пансемс аванькс оймеялтнэнь. 8Сон эзь мере саемадо тенст ки лангов кедьнежеде башка мезеяк лия: кшияк, кансткак, каркссо ярмакткак. 9Мерсь карсемс сандалят ды оршамс веенст оршамот. 10Сон кортась тенст: «Бути косояк соватадо кудос, туемезэнк кадоводо тоско. 11Кие тынк парсте а вастындерятадызь ды а кунсолындерятадызь, тосто лиседе ды пильгестэнк мик пулентькак чукадинк. Кадык те ули сынст чумост невтемакс. Видестэ кортан тенк: Пазонь судонь чистэнть Содом марто Гоморранень ули седе шождыне се ошонть коряс».

12Тонавтницянзо тусть ды ёвтнесть: весе ломантненень эряви велявтомс Пазонтень. 13Пансесть ламо идемевсть, ламо сэредицят елейсэ ваднезь тейсть сынст шумбракс.

Нававтыця Иоаннонь куломазо

14Ирод инязорось* марясь Иисусто, конань лемесь теевсь парсте содавиксэкс, ды мерсь: «Те Нававтыця Иоанн кулозьстэ вельмесь, секскак сонзэ ули виезэ тейнемс истят тамашат». 15Лиятне кортасть: «Те, келя, Илия». Конат-конат кортасть: «Те вана пазмариця эли вейкешка кезэрень пазмарицятнень кондямо». 16Ирод, Иисусто тень марязь, мерсь: «Те Иоанн, конань прянзо мон керявтыя, сон кулозьстэ вельмесь».

17Ирод икеле кундавтызе ды пекставтызе Иоаннонь пекстамо кудос Филип лелянзо нинзэ Иродиадань кисэ, конань саизе сон никс. 18Тень кувалма Иоанн кортакшнось Ироднэнь: «Тонеть а мереви эрямс эсь лелять ни марто». 19Тень кисэ Иродиада кежиявтсь Иоанн лангс ды ульнесь мелезэ маштомс сонзэ, ансяк сонензэ те эзь тееве. 20Ирод пельсь Иоанндо сень содазь: Иоанн ломанесь Пазонть икеле виде ды иневанькс ойме. Ирод ванстсь эйсэнзэ ды покш мельсэ кунсолыль Иоаннонь тонавтоматнень, конатнень коряс тейсь ламо.

21Вана, окойники, Иродиаданень прась истямо ён чи. Ирод эсь чачома чистэнзэ тейсь каванямо князтненень-чирязтнэнень, ушмодейтненень#6:21 ушмодей – командир, Галилеянь содавикс ломантненень. 22Тозонь совась ды киштсь Иродиадань тейтерезэ, те пек тусь Иродонь ды мартонзо симицятнень-ярсыцятнень мельскак. Инязорось мерсь тейтерентень: «Вешть пельдень, мезе мелеть, – ды максса теть». 23Ды божась-пежетькстась икелензэ: «Мезе илязат веше, весе максса теть, натой пелензэ монсень масторонть». 24Тейтересь лиссь ды кевкстизе аванзо: «Мезе монень вешема?» Се мерсь: «Вешик Нававтыця Иоаннонь прянзо». 25Сон сеске, капшазь, тусь инязоронтень ды вешсь: «Монь мелем, – максык тень нейке ярсамопелень кандтнема лангсо Нававтыця Иоаннонь прянзо».

26Инязорось нусмакадсь, ансяк максозь валонть ды инжетнень кисэ савсь топавтомс сонзэ меленть. 27Ирод сеске кучсь ушман ды кармавтсь кандомс Иоаннонь прянзо. 28Се мольсь пекстамо кудов, керизе тонань прянть, кандызе прянть ярсамопелень кандтнема лангсо ды максызе тейтерентень, тейтересь сонзэ максызе аванстэнь. 29Зярдо теде марясть Иоаннонь тонавтницянзо, мольсть, саизь сонзэ уловонзо ды калмизь.

Вете тёжат ярсавсть вете кшисэ ды кавто калсо

30Апостолтнэ велявтсть Иисуснэнь ды ёвтнесть Тензэ, мезе тейсть, мезес тонавтсть ломантнень. 31Сон мерсь тенст: «Адядо, туйтяно сэтьме таркав ды тосо тынь аламодо оймсетядо». Эдь тесэ ульнесть ламо сыцят ды туицят, сынст натой ярсамс шкасткак арасель. 32Секс сынь ськамост венчсэ тусть сэтьме таркав. 33Ломантне неизь, кода сынь тусть ды ламот содызь сынст. Ломантне чийсть мельгаст весе оштнэстэ эрьке чиреванть, састь тозонь сындест икеле ды пурнавсть Иисусонь перька.

34Зярдо Иисус лиссь чирентень ды несь ламо ломанть, седеезэ марятотсь кисэст: сынь ульнесть ваныцявтомо ревень кондят. Сестэ Сон кармась эйсэст ламос тонавтомо. 35Шкась мольсь чокшне малав, тонавтницянзо шаштсть ваксозонзо, мерсть: «Таркась чаво, шкась талай. 36Нолдыть сынст, кадык молить перька оштнэс ды велетнес ды рамить эстест кши, эдь сынст арась мезесткак ярсамс». 37Сон каршост мерсь: «Тынсь максодо тенст ярсамс». Сынь кевкстсть: «Паряк, тенек молемс, рамамс кавтосядт динаронь питне кши ды максомс сыненст ярсамс?» 38Сон кевкстсь: «Зяро тынк кшинк? Азёдо ванынк». Сынь ваномадо мейле мерсть: «Вете кшинек ды кавто калонок».

39Сестэ Иисус мерсь тенст весень озавтнемс пиже луганар лангс куронь-куронь. 40Сынь ойсесть куросо сядонь-сядо, ведьгеменень-ведьгемень. 41Сон саинзе вете кшитнень ды кавто калтнэнь, варштась менельс, ёвтась сюкпря Пазонтень, синтринзе кшитнень, макснинзе тонавтницянстэнь явшемс ломантнень ланга. Кавто калтнэньгак явшинзе весенень. 42Весе ярсасть пешкедемазост. 43Кадовозь кши сускомотнеде ды калтнэдеяк пурнасть кемгавтово пешксе куйметь. 44Кшиде ярсыця цёратнеде ульнесть ветешка тёжат.

Иисус юты ведь ланга

45Теде мейле сеске Иисус кармавтынзе тонавтницянзо озамо венчес ды мерсь тенст Сондензэ икеле уемс эрькенть тона чирев, Бетсаидав, Сонсь кадовсь ломантнень нолдамо. 46Нолдынзе сынст ды тусь пандо пряс озномо.

47Чополгадсь, тонавтницятнень венчест эрьке куншкасоль, Иисус мода лангсо ськамонзоль. 48Сон неизе, сыненст стака миледемс – пувась каршо варма. Ашолгадома ёнов Сон сась тенст ведь ланга ды ютавсь вакскаст. 49Зярдо сынь неизь Сонзэ ведьга молемстэ, арсесть, те чопача, ды пижакадсть. 50Эдь весе Сонзэ неизь ды пек тандадсть. Иисус сеске кармась мартост кортамо: «Оймадо! Те Мон, илядо пеле». 51Сон озась ваксозост венчентень, ды вармась лоткась. Тонавтницятне пек абунгадсть. 52Зярс сынь кшитнень марто тамашантькак смустензэ эзизь чарькоде, ды седеесткак яла эзть панжовкшно.

53Зярдо сынь печтизь эрькенть, састь Геннисаретэнь модас, лоткасть эрьке чирентень. 54Ансяк сынь лиссть венчстэнть, тосонь ломантне сеске содызь Иисусонь. 55Сынь куроксто чийнизь весе перька таркатнень, ёвтнесть Иисусонь самодо, ды ансяк марильть, косо Сон, ацамонек-мезнек кандылизь Тензэ сэредицятнень. 56Ков Сон аволь са: велес, ошс, велинес – эрьва косо ломантне кандылизь сэредицяст ошонь кужос ды энялдыльть Иисуснэнь, меревель токавомс куш Сонзэ оршамопелень цёкос. Весе, конатне токавильть Эйзэнзэ, пичкильть.

Currently Selected:

Марк 6: ОВ

Highlight

Copy