Iivan 13

Iisus pezöy opastujien jallat

1Äijänpäivän pruazniekku oli tulos, i Iisus tiezi, se aigu oli tulluh, konzu Hänel pidi siirdyö täs muailmaspäi Tuatan luo. Iisus oli ainos suvainnuh niilöi, ket oldih Hänen täs muailmas, i loppuh suate suvaičči heidy.

2Hyö kerävyttih ildazele, i pahalaine jo oli pannuh Juudu Iskariotale, Simonan poijale, sydämeh duuman menettiä Iisussua. 3Iisus tiezi: Tuatto andoi kai Hänen valdah da Häi on tulluh Jumalan luopäi da nygöi menöy Hänen luo. 4Iisus nouzi stolas, jaksoi piällyssovan, otti pelvahahizen käzipaikan i sidoi sen vyöle. 5Sit Häi kuadoi vetty pezoastieh, i rubei pezemäh opastujien jalgoi da pyhkimäh niilöi kuivakse vyöl olijal käzipaikal.

6Konzu Iisus tuli Simon-Pedrin luo, se sanoi: «Ižändy, Sinägo pezet minun jallat?» 7Iisus vastai: «Sidä, midä minä nygöi ruan, sinä et vie ellendä, no myöhembi sinä sen ellendät.» 8Pedri sanoi Hänele: «Sinul igänäh ei sua pestä minun jalgoi!» Iisus vastai: «Minä ku en pesse sinuu, sinul ei ole minunke nimidä yhtehisty.» 9Sit Simon-Pedri sanoi: «Ižändy, älä peze vai yksii jalgoi, peze i käit da piä.» 10Täh Iisus vastai: «Se, ken on pezevynnyh, on jo puhtas. Hänel ei pie pestäkseh paiči jalgoi. I työ oletto puhtahat, vai etto kaikin.» 11Iisus, näit, tiezi, ken heis on Hänen menettäi, i sendäh Häi sanoi: «Työ etto kaikin ole puhtahat.»

12Konzu Iisus oli pessyh heijän jallat, pannuh piäle piällyssovan, da istunuhes uvvessah ildazele, Häi sanoi heile: «Ellendättögo työ, midä minä teile luajiin? 13Työ kučutto minuu Opastajakse da Ižändäkse, hyvin i luajitto: sehäi minä olengi. 14I ku nygoi minä, teijän Ižändy da Opastai, olen pessyh teijän jallat, teilgi pidäy pestä toine toizen jallat. 15Minä luajiin tämän teile, ku ozuttua, kui teil pidäy luadie. 16Toven, toven sanon teile: ei käskyläine ole suurembi omua ižändiä, eigo työtty suurembi työndäjiä. 17Ku tämän tiijättö da sen mugah elättö, oletto ozakkahat.

18Minä en sano tädä kaikkih teih näh: tiijän kedä olen vallinnuh. No täl Pyhän Kirjutuksen sanal pidäy stuaniekseh: ‘Mies, kudai syöy Minunke leibiä, roih Minun vastustajakse.’ 19Enne ku ennustus stuanih, minä sanon tämän teile, ku sen stuanivujes työ uskozitto – minä olen se, ken olen. 20Toven, toven sanon teile: ken ottau sen, kenen minä työnnän, se ottau minun, i ken ottau minun, ottau Hänen, kudai työndi minuu.»

Iisus ozuttau iččeh menettäjän

(Matf. 26:20-25; Mark. 14:17-21; Luk. 22:21-23)

21Nenga pagizi Iisus. Syväintuskis Häi sanoi heile: «Toven, toven sanon teile: yksi teis menettäy minuu.» 22Opastujat kačottih toine toizeh, ei tietty, keh näh Häi pagizi.

23Yksi opastujis, se kudamua Iisus suvaičči, oli ildazel Hänen rinnal. 24Simon-Pedri vihjai sille opastujale, anna kyzyy Iisusal, keh näh Häi pagizou. 25Opastui painui Iisusan ryndähii vaste, i kyzyi: «Ižändy, kenbo se on?» 26Iisus vastai: «Se on se, kelle painahuu annan tämän leibypalazen.» Leibypalazen painahuu Häi andoi sen Juudale, Simon-Iskariotan poijale. 27Hedi ku Juudu oli sen suannuh, sattan meni häneh. Iisus sanoi Juudale: «Midä tahtot ruadua, rua teriämbi!» 28No niken ildazel olijois ei ellendännyh, mikse Iisus nenga sanoi hänele. 29Ku Juudan käzis oli yhtehine kukkaro, erähät duumaittih, Iisus käski hänele ostua midätahto pruazniekakse libo andua köyhile.

30Leibypalan ottahuu Juudu kerras lähti pihale. Oli yö.

Uuzi käsky

(Matf. 26:31-35; Mark. 14:27-31; Luk. 22:31-34)

31Konzu Juudu lähti, Iisus sanoi: «Nygöi Ristikanzan Poigu on ylendetty, i Jumal on ylendetty Hänes. 32I ku kerran Jumal on ylendetty Hänes, sit i Jumal ylendäy Händy omas ičes, ylendäy Händy ylen terväh. 33Lapset, minul ei hätkie tule olla teijänke. Työ ečittö minuu, no nygöi minä sanon teile sen, midä minä olen sanonuh jevreilöile: kunne minä menen, sinne työ etto piäze. 34Minä annan teile uvven käskyn: suvaikkua toine tostu. Muga kui minä suvaičin teidy, työ suvaikkua toine tostu. 35Kaikin pietäh teidy minun opastujinnu, ku työ suvainnetto toine tostu.»

36«Ižändy, kunnebo Sinä lähtet?» kyzyi Simon-Pedri. Iisus vastai: «Kunne minä lähten, sinne sinä minunke et voi nygöi lähtie, no myöhembi tulet.» 37Pedri sanoi: «Ižändy, miksebo nygöi en voi lähtie Sinunke? Minä hengengi annan Sinun puoles.» 38Iisus sanoi hänele: «Sinägo annat hengen minun puoles? Toven, toven sanon sinule: kukoi ei laula enne, ku sinä kolmeh kerdah kieldävyt minus.»

Currently Selected:

Iivan 13: LIVVI

Highlight

Copy