Yohana 8
8
1Yesu a mɨna nggɨrə nə Motɨ Kade Zetun. 2Ka haa dung-dung, nda janga a mɨna nggɨrə a pɨrə Kwa-Shafe, nda nza ɓwaare a paya a takadən, nda tiya kəntə kənərənshe. 3Ji-lee kəndə ɓashita Musa kat ka Farise a kɨsa itɨ meti, ite mya kɨsə haa sharawne, a shikarə a hakan. Təna kangdə a humwa ɓwaare kat, 4a sa Yesu atɨ, “Nzə-kəndəshe, mete, a vor sharawne ka ama mya kɨsatɨrə. 5Ɓashita Musa a boyo atɨ a hina kala wule mandyee ka fare a ɓələ. Hɨnggu a shiya hye sa a nə ləngɨn?” 6Təna ɗyanga a ɗiyən sə gə təna ɗɨm mgbaalə ɗɨmgən le.
Shezə Yesu mgban a kupo ɗəng a tiya dorshe a njiya ka gyelsən. 7Ite təna kangə ta kpasən ka ɗi le, nda maɗə a kangə a sarən atɨ, “Ma kat a vorsəwnə, a ma aa ndaga ɗa səhase a nda tiya katə katɨrə ka fara.” 8Nda mɨna kupo a pɨrə humwa ka dorshe a njiya.
9Ite təna kɨl la Yesu a boyo, təna tiya muttə hyeɗə-hyeɗə, mi kpan-kpanye darən nə tiya muttə, təna ɗaka Yesu nda mbiɗi hiɗə ka metɨngɨn kangə humwasən. 10Yesu a maɗə a kangə, nda ɗiyərə le atɨ, “Metə, mingɨn nee a ndo haa? Ama aa lɨbada ka ɓashita?”
11Ngga san atɨ, “Ə'ə, makpane, ama aa lɨbadi.”
Yesu a sarə atɨ, “Hɨn mgban taa lɨbada. Zə muɗi ɓe yə pɨrə humwa ka ɗa səhase.”
Yesu nə ɓɨrtɨ vɨratə
12Yesu a mɨna bwe le ka ɓwaare, nda sarən atɨ, “Hɨnə ɓɨrtɨ vɨratə. Nagi ndo ma mwa kwaɗe, ndaa dɨ woyo vor kulitə, ndi ɓa gə ka ɓɨrte dɨ vədə myentə.”
13Farise a luwa a san atɨ, “Zə niyi ko, ləməgye dəw 'ye hye dɨ boyo kat i humwa nanga nə, la hye boyə nanga kat byelə ɓayə, taa diyalə də.”
14Yesu a sarən, “Nagi na bwe le a na, la na dɨ boyo diyalə gə hɨn lee haa na dɨmaa sə, ka haa hɨn ɓa muɗə də. Hɨnggəwnə hwunaa lee haa na shi sə ka haa na dɨ muɗə də. 15Hɨnggəwnə hwuna dɨ ɓashiyə hwunaawa pyel-ləməgye, taa diyalə də, hɨnggi hɨn taawa ɓashidə ama. 16Kat ka angɨn anda hɨn ɓashiyə, ɓashitɨ de i diyalə, gə aa hɨnə hiɗə dɨ ɓashiyi, hɨnə ka Baagi a lyanari. 17A vor ɓashitɨ dəwnə, mya doro atɨ takale da ɓwaare kpe, ləngɨn diyalə. 18Aa hɨnə hiɗə dɨ byeli takale a na, ama nə də, mangɨn nə lyanari, sɨnə Baagi.”
19Təna ɗiyən, “A ndo haa gə Baagu?”
Yesu a luwa a sarən atɨ, “Hwunaa leeri, gə-angɨn mgban hwunaa lee Baagi. A hwun nda leeri, hwun ɓa nda lee Baagi mgban.” 20Ləməgyee Yesu a dɨ boyo a Kwa-Shafe gbyel ka haa mya dɨ həmə də a ite nda dɨ kənərənshe. Taa ama mgban kɨttən, gəkɨlə fəre dan aa nda kənə.
21Yesu a mɨna sarən atɨ, “Hɨnə ɓa dɨmə a muɗə a haa, hwun ɓa ɨlti baa hwuna mbərə vor səhase dəwnə. Haa na dɨ muɗə də, hwunaa dɨ mba zətə də.”
22Ləngɨn a ɓwa Yawude, təna ɗiyəsə atɨ, “Ndi ɓa wudə a ɓɨl nəngɨn ma, nda ɓə sa atɨ, ‘Haa hɨn ɓa muɗə də, hwunaa ndi mba zətə də’?”
23Yesu a pɨrə humwa ka byele, nda sa atɨ, “Hwunə ganə a vɨratə, hɨn hɨnə dɨ vor pwa. Hwun a vɨratə hwuna gə, hɨn aa dɨ vɨratɨnə gi. 24Gəkɨlə ləngɨn na səwnə atɨ hwun ɓa mbərə vor səhase dəwnə, anda hwunaa mwake a gɨɗi atɨ Hɨnə.”
25Təna ɗiyən atɨ, “Hɨnggu, hye kana atɨ hyenə wonə ɓə?”
Yesu a sarən atɨ, “Səɓo Hɨnə ma na səwnə atɨ Hɨnə. 26Hɨnə ka ləməgye furi-furi ɓa boyə nəngəwnə, ka 'ye ɓa ɓashidəwnə, shezə na dɨ boyownə ləməgye da ma lyanari nə ɓəmbə gə mangɨn nee ka diyale kan.”
27Tənaa leyə atɨ a nə Baatə nda dɨ boyərən le. 28Yesu a sarən atɨ, “Fəra hwuna maddə Nze da Ɓwaara a nə kada, a fərəngɨn hwun ɓa shea leyə atɨ Hɨnə, hɨn taawa ɗa ndəng sə a nə na, ləməgye Baagi a kəni nə mgban na dɨ boyo. 29Ma lyanari, sɨne ɓwaa ke, nda dɨ ɗake dɨsəri, gəkɨlə na dɨ ɗa sa haa a dɨ nɨngən kan.” 30Ite Yesu a kangə a dɨ byelə, furi-furi dɨ vor myee dɨ kɨltən a mwakan a gɨɗən.
Je da Ibɨraim
31Yesu a sa Yawudee mwakan gɨɗən atɨ, “Hwun kana luu shee na kənəwnə a kangə nəngrən, diyalə hwunə lagbe de. 32Də hwun ɓa le diyale, diyaləngɨn mgban ɓa dɨmdəwnə gə kɨsawne.”
33Təna luwa a san atɨ, “Hinə je da Ibɨraim hinaa ndaga ɗa ama kɨsawne, ɓə ya hye dɨ sa atɨ kwe, ‘Hin ɓa dɨmgə kɨsawne’?”
34Yesu a sarən, “Diyalə na dɨ boyownə, ma ɗa səhase kat, səhasə nda dɨ ɗan kɨsawne. 35Kɨsa aa dɨ luu hwoɗye a nza də kaaru-kaaru, shezə nze nə ɓa nza də kaaru-kaaru. 36Gə ləngɨn, Nze da Həmɨnpwa kana parəwnə a dɨmdəwnə gə kɨsawne, hwun piyagə kɨsawnəngɨn. 37Di hɨn leyə atɨ hwunə je da Ibɨraim. Kat ka angɨn hwuna dɨ mwo atɨ hwuna ɓɨlti, gəkɨlə ləməgye de aa nza hubosəwnə. 38Na dɨ boyownə ləməgye a nə shee na naarən a haka Baagi, hɨnggəwnə hwuna dɨ ɗa sa hwuna kɨlə dɨ haka baagəwnə.”
39Təna san, “Hayu Ibɨraim nə baagenə.”
Yesu a sarən atɨ, “Anda hwunə je da Ibɨraim, hwun ɓa nda ɗa wule shee Ibɨraim a ɗa, 40gəkɨlə aa hwunə je dan, səngɨn ɗa hwuna dɨ ɨlə atɨ hwuna ɓɨlti, a hɨn ma she boyownə diyale, a diyala na kɨlə dɨ haka Həmɨnpwa. Ibɨraim aa ɗa wule shee hwuna dɨ ɗa. 41Hwuna dɨ ɗa wule shee baagəwnə a dɨ ɗa.”
Təna mɨna san atɨ, “Myaa mwasarenə a vor sharawne. Baagenə nə hiɗə sɨnə Həmɨnpwa.”
Je da Shetan
42Yesu a sarən, “Anda Baagəwnə nə Həmɨnpwa, hwun ɓa nda mwori, gəkɨlə dɨ haka Həmɨnpwa na shi a nza hakəwnə. Hɨn taa shi nəna, sɨnə lyanari. 43Mɨnə ɗa la na dɨ boyownə aa pɨrə kwakingəwnə ya? Baa ɓəgəng hwunaa takala na dɨ boyo. 44Gəkɨlə hwunə je da Shetan, səngɨn nə ɗa hwuna dɨ mwo ɗa sa baagəwnə a dɨ mwo. Kɨnɨnɨng nzə-ɓəl wogi, ndaawa bwe diyale, gəkɨlə taa diyalə kan. Ndaawa bwe diyale gəkɨlə jeronye a nza sɨsən, gə ndi nzə-byelə ɓayə, sɨnə baagə jeronye. 45Səngɨn nə ɗa na dɨ boyownə diyale, gəkɨlə ləngɨn hwunaa mwake! 46Wonə a vorsəwnə kɨtti ka səhase? Bə mɨnə ɗa na dɨ boyownə diyale hwunaa mwa luwo? 47Ma kat hɨnggə Həmɨnpwa nə, ndi ɓa kɨl la Həmɨnpwa a dɨ boyo. Sa ɗa hwunaa takala hwuna kɨlə gəkɨlə hwunaa hɨnggə Həmɨnpwa nə.”
Hɨnə, Hɨn
48Yawudengɨn a san, “Aa diyalə hina boyə ma atɨ, hye nzə-Samariyati, hyene ka pɨla nzə-dwata?”
49Yesu a sarən, “Hɨn tam ka pɨla nzə-dwatə a sɨshi. Hɨnə dɨ ndukodə Baagi, shezə hwunə dɨ ɨli gə hwuna dɨtti. 50Hɨn taawa ɨl fukatɨ nəna, ama nee də, a ma dɨ ɨl fukatə, sɨnə mgban ɓa ɓashiyə. 51Diyalə na dɨ boyownə, ma kat koddə ləməgye de, mangɨn aa dɨ mbɨrə.”
52Ite Yawude a kɨl la Yesu a boyo, təna san, “Diyalə ɓəgəng hin she leyə atɨ hyene ka pɨla nzə-dwatə a sɨsa! A Ibɨraim kat ka kpalye kaaɗəng tən mbərə, hɨnggu hye sa atɨ, ma kana koɗə le dəw ndaa dɨ ga mbɨrə. 53Hye dɨ niyə hyenə pɨrgə baagenə Ibɨraim ma? Gə Ibɨraim mbɨrə, kpalye kaaɗəng mgban mbərə. Nda hyenə wonə mgban?”
54Yesu a luwa a sarən, “Anda hɨne dɨ ɨl fukatɨ nəna, fukatɨ de i ɓaati. Soɓwo Baagi a hwuna sa atɨ sɨnə Həmɨnpwatɨ dəwnə, sɨnə dɨ fukadi. 55Aɓə hwunaa leerən, hɨn ɓə leerən, hɨn kana sa atɨ taa leerən, hɨn gəə nzə-jeronyi ɓətɨ hwun. Hɨn leerən mbak-mbak, gə-angɨn na dɨ koddə ləməgye dan. 56Baagəwnə Ibɨraim a ɗa hanɨngtə ka naa fəre de, ite nda naa fərəngɨn haa a nɨngən kɨr-kɨr.”
57Təna san atɨ, “A tee nda ɗa kyawatə bəwtə tuf gəngnə, a ndo haa hye naa Ibɨraim?”
58Yesu a sarən, “Diyalə na dɨ boyownə, ite myaa nda liyaa mwasa Ibɨraim, Hɨnə də.” 59Ite Yawudengɨn a kɨl ləngɨn, təna por fare ɓa kalarən a ɓɨltən. Yesu a kipgərən a dɨmgə vorsərən a muggə Kwa-Shafe.
Currently Selected:
Yohana 8: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
