Yohana 9
9
Yesu a gwadə ma mya mwasarən ka weltə
1Ite Yesu nee dɨ woyi, nda naa ama, a mya mwasarən welə. 2Lagbe da Yesu a ɗiyən atɨ, “Nzə-kəndəshe, səhase da wonə ɗɨki mya ɓə mwasa manə ka welta, sɨnə ka səhase ma, naasə mgban yə sɨnggən na?”
3Yesu a sarən, “Aa mangɨn nə ɗa səhase, aa yə sɨnggən nə mgban. Həmɨnpwa nə ɗaasə gə nda bɨldə gətɨ dan a sɨtɨ mangɨn. 4Gəngnə fəre nə də, mbak-mbak hɨm mgban mya ɗam lyenta ma lyanari gə haa kana tukwa ama aa diyə mba ɗa lyentə. 5Nagi goɗi na gə vɨratə, hɨnə ɓɨrtɨ vɨratə.”
6Ite Yesu a bwe le yang a mbəə, nda təfdə nawye a njiya, nda kɨɗa soɓwe ka nawyingɨn, nda təkoyən a diingɨn. 7Nda san atɨ, “Muɗi, wudə suɓwa diinga a gaɓaktɨ Silowam” (naarə kwakɨngɨn nə lyenha). Mangɨn a muɗə a wudə a suɓwa diingɨn, nda mɨna a hwoɗye ndi ta naa haa.
8Ji-vɨnəgən kat ka myee leerən kɨnɨnɨng atɨ ndi nzə-nyitshi a ɗiyəsə, “Ɓətɨ ma ɓwaa, a sɨnə ma dɨ nza ganə nyitshea?” 9Imi a sa atɨ sɨnə.
Imi mgban a sa atɨ, “Ə'ə! Aa sɨnə, pasa nda pasarən.”
Mangɨn a sa atɨ, “Hɨnə mangɨn.”
10Mingɨn a ɗiyən, “Ɓə ya diinga a ɗa ta ɓə wona?”
11Nda sarən atɨ, “Ma mya dɨ wa atɨ Yesu nə kɨɗa soɓwe təkoyi a dii. Nda se atɨ a na wudə gaɓaktɨ Silowam a suɓwa dii. Na wudə mgban a suɓwa, dii a wonə na naa haa.”
12Təna ɗiyən, “A ndo haa gə mangɨn?”
Nda sarən atɨ, “Taa leyi.”
13Təna zəkan ndi ma mya wana diingɨn a haka Farise. 14Fəra Yesu a kɨɗa soɓwe a wana dii mangɨn də, fərə piyatɨ da Yawude. 15Də Farise mgban a pɨra ɗiyə mangɨn lə ɗate nda ɗa diingɨn aɓə wonə, nda dɨ naa haa. Nda mɨna sarən, “Nda təkoyi soɓwe a dii, na suɓwa na ɓə naa haa.”
16Imi dɨ vor Farise a sa, “Ma, aa dɨ haka Həmɨnpwa gən, gə ndaawa gwon fərə piyatɨ dam.”
Imi mgban a ɗiyə, “Ɓə ya nzə-ɗa səhase ɓa mba wule zərgi səkushipa a ɗarən?” Hubosərən aa yə shi hiɗə, təna təkə.
17A kpawtə təna mɨna virwa a haka mangɨn a ɗiyən, “A shiya hye sa ka mangɨn a wana diinga? Giɓə hyenə nda wana diinga.”
Mangɨn a luwa a sarən atɨ, “Ndi kpalə.”
18Baa ɓəgəng Yawude aa mwa atɨ mangɨn welə mya ɓə wana diingɨn, gə ləngɨn təna mɨna lyenshe a wa yə sɨnggən. 19Təna ɗiyərən, “Nzəngəwnə nə ana? A hwuna sa atɨ hwuna mwasarən wela? Ɓə ya diingɨn a ɗa a wonə, nda dɨ naa haa?”
20Yə sɨnggən a luwa a sa, “Hin leyə atɨ nzəngenə nə, hin leyə mgban atɨ hina mwasarən ndi welə. 21Ɗate nda ɗa nda ɓə dɨ naa haa ɓəgəng, anda wonə wana diingɨn, hinaa leyə. Ɓə tɨl ɓwaara ɗiyəmən ndi ɓa boyownə ka nənəngɨn.” 22Yə sɨnggən a boyo sə gəkɨlə kala Yawude, gə la Yawude a ga boyo atɨ ma mbak sa atɨ Yesu nə Ma Həmɨnpwa a Yaɓwarən, tən ɓa kərə mangɨn pɨratə a vor vɨnə kəndəshe darən. 23Səngɨn nə ɗa yə sɨnggən a sa atɨ, “Ɓə tɨl ɓwaara ɗiyəmən.”
24Təna mɨna warən, ndi ma mya wana diingɨn, təna san atɨ, “Bwe diyale a humwa Həmɨnpwa. Hin leyə atɨ mangɨn a wana diinga nzə-ɗa səhasə.”
25Nda sarən atɨ, “Nagi ndi nzə-ɗa səhasə taa leyi, se hiɗə na leyə. Kɨnɨnɨng hɨn welə, ɓəgəng hɨnə ndi naa haa!”
26Təna mɨna ɗiyən, “Mɨnə nda ɗəw a diinga ya? Ya nda ɗa nda ɓə wana diinga?”
27Mangɨn a sarən, “Di hɨn boyownə ləngɨn dinəng, hwunaa sardə kwakingəwnə. Ɓə lə mɨnə hwuna mɨna dɨ mwo atɨ hwuna kɨlə ɓə? Hwuna dɨ mwa hwuna koɗə mangɨn a gəə lagbe dan nə ma?”
28Təna ɗaarən a san atɨ, “Hɨnggu hyenə lagba da mangɨn! Hɨnggenə hinə lagbe da Musa! 29Hin leyə atɨ Həmɨnpwa bwe le ka Musa kaaɗəng, hɨnggən ndi ma, hinaa lee haa nda shi sə.”
30Mangɨn a luwa a sarən, “Ɓə di la dəwnə ɓwaha, atɨ hwunaa lee haa nda dɨmaa sə, hɨnə ko ɓə wana dii. 31Hɨm leyəm kat atɨ Həmɨnpwa aa dɨ kɨl le da ji-ɗa səhase. Həmɨnpwa a dɨ kɨl le da myee dɨ wegən dɨ koddən. 32A sɨratɨ vɨratə myaa ndaga kɨlə atɨ mya wana dii ama, a mya mwasarən ka weltə. 33Anda ma aa dɨ haka Həmɨnpwa nda shi, ndaa dɨ nda mba ɗa asə.”
34Təna luwa a san atɨ, “A hye ma mya mwasara a vor səhase ɓɨlɨm-ɓɨlɨm, hye mwamdiya ɓa kənenə shee?” Təna omrən a dɨmdən a haa bwange a kərən pɨratə a vor vɨnə kəndəshe darən.
Weltɨ ɗongə lee Yesu
35Yesu a kɨlə atɨ tən omrən dɨmdən, ite nda pan a haa bwange, nda ɗiyən, “Hye nee dɨ mwaka Nze da Ɓwaara?”
36Mangɨn a sa Yesu atɨ, “Həmɨ-hwoɗye, wonə mangɨn? Zə boyi gə na mwakan.”
37Yesu a san atɨ, “Mangɨn a hye nan gətɨnə, sɨnə a dɨ byeli kəw mgban.”
38Mangɨn a sa, “Həmɨmiye, hɨn mwadiyale kəw.” Nda kupo a kalan-gbəətə.
39Yesu a san, “Gə takalə diyale na shi vor vɨratə, gə myee weli a naa haa, myee mgban dɨ naa haa ɓa welə.”
40Imi dɨ vor Farise 'ye kangə hangɨn dɨ kɨltən a ɗiyən atɨ, “Bweti hye dɨ boyo atɨ hin mgban hin weli ma?”
41Yesu a sarən atɨ, “Na hwun weli, hwunaa dɨ nda ɗa səhase. Gəkɨlə hwuna sa atɨ hwune dɨ naa haa, gə ləngɨn səhase dəwnə nza.”
Currently Selected:
Yohana 9: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
