Luka 15
15
Byelə səɗe a nə mbagate kipi
(Matta 18.12-14)
1Ji-luu taa shemtə ka tataryi ɓwaare#15.1 Tataryi ɓwaare nə ji-woyo ɓaye ka ji-hawe. a peyə a takadə Yesu ta kɨltən. 2Də Farise ka ji-lee kəndə ɓashita Musa a nggwonshe ta sa atɨ, “Zə namə manə peyi ka tataryi ɓwaare dɨ zɨmshe.”
3Yesu a ɗarən byelə səɗe nda sa atɨ, 4“Wonə a vorsəwnə ka mbage haru, hiɗə dɨ vorsərən a kipə. Ndaa dɨ ɗaka irə bəwtə dombiɗə a mbiɗi-dombiɗə a haa zəmtə a wudə a ɨl itɨrə kipi a ɗɨmatɨra? 5Hye kana naarə mgban, hye ɓa nggura ka hanɨngtə a wuranga, 6a muɗa a hwoɗye. Hye payaa yə ndewegu ka ji-vɨnəgu kat, hye sarən atɨ, ‘Mya ɗam hanɨngtə gə hɨn naa mbagatɨ de ite kipi.’ 7Sə mgban mya ɗa hanɨngtə gaarə a vor pwa a nə ɓwaara hiɗə a por-njiya ka səhase dan, a pɨrgə mirə bəwtə dombiɗə a mbiɗi dombiɗə a mi fyemye 'ye aa por-njiya.
Byelə səɗe a nə taa nggɨrngɨma kipi
8“Ɓə mgban wonə mete taa nggɨrngɨme#15.8 Taa nggɨrngɨme nə azurfa. hiɗə dɨ vor bəw kana kipgərə, nggaa dɨ fin ɗiye a kɨsadə tikɨle, a fegə vor hwoɗye pepe a ɨl taangɨn a nan? 9Na nggi nan, nggi ɓa waga yə gyenəgərə ka ji-vɨnəgərə təna paya kat. Nggi ɓa sarən atɨ, ‘Gwamdi ɗa hanɨngtə gə taa de a kipi hɨn nan.’ 10Sə mgban Həmɨnpwa ka malyenye dan irə gaarə a vor pwa a dɨ ɗa hanɨngtə gələ ma hiɗə a por-njiya ka səhase dan.”
Byelə səɗe a nə nza kipi
11Yesu a pɨrə humwa ka byele, nda sa atɨ, “Ama nə də ka ji-morye kpe. 12Ma swaɗe a sa baagən atɨ, ‘Baa, gɨnəte hye gə kaarə, zə vi basa de ɓəgəng.’ Baagən a takarən a gɨnətə. 13Aa ɗɨm bətə, nzə-ma swaɗe a luu gɨnətɨ dan kat, a pedə taangɨn a dɨmə a muɗə itɨ vɨrati ɓong-ɓong, a kɨɗa gɨnətɨ dan kat, a woyo ɓaye ka nzaa tukuttə. 14Ndi ɓe kɨɗa gɨnətɨ dan kat mbəə, myatə a shea fuka a bətɨ hangɨn kɨr-kɨr. Myatə ta gən, nda tiya tənətə. 15Nda maɗə a wudə ɨl lyentə a haka ama a vɨratɨngɨn. Nda vən jin gusune gə ndi ta vərən sɨzɨmtə. 16Myatə ɓə gən yang, nda mwo atɨ nda zɨm sɨzɨmta gusune, a ɓə taa ndəng ma də ɓa vən sɨzɨmtə.
17“Nda nza a səɗə ka yedingɨn a mɨna a nəngɨn pepe, nda sa, ‘Zə niyəm, a baagi nə ka mi somye dɨ ɗan lyentə hananang, dɨ zɨmshe ɓaa a mbiɗarən, she hɨnə ganə dɨ mbɨri ka myatə! 18Ndɨka na maɗə a muɗə hwoɗye a haka baagi. Na san atɨ, baa, hɨn ɗa Həmɨnpwa səhase, hɨn ɗəwnə səhase mgban. 19Ɓe myaa yə wari atɨ hɨnə nzəngəwnə gəkɨlə taa kəni. Ndɨka hwuna mɨndi ɓətɨ hiɗə dɨ vor mi somyee dɨ ɗəwnə lyentə.’ 20Nda maɗə a nggur tɨfə hwoɗye ɓa mɨnə haka baagən.
“A haa ɓongətə, baagən a niyə a nan dɨ shi, lə nzəngɨn a orən kɨr-kɨr, nda giɓə a jiprən a kpɨriprən ka mwoha ka hɨmne.
21“Nzəngɨn a san, ‘Baa, hɨn ɗa Həmɨnpwa səhase, hɨn ɗəwnə səhase mgban. Ɓe myaa yə wari atɨ hɨnə nzəngəwnə gəkɨlə taa kəni.’
22“Də baagən a mgbɨmrən, a sa kɨse dan 'ye dɨ dan lyentə a vor hwoɗye atɨ, ‘Maɗəm tan-tan. Ngguram rukute kamən, hwuna ɗɨkən sɨgyeltə a gyelsən, hwuna dəmən hwanye a mbwayingɨn. 23Kɨsam gbinda naaka a vor hwoɗye hwuna ɓɨlə, mya zɨməm a ɗam hanɨngtə, 24gəkɨlə nze de a na kana atɨ ɓə mbɨrə, sɨnə ka myentə, hɨn kana atɨ ɓə kipə, sɨnə ɓə mɨna.’ Də təna tiya ɗa hanɨngtə.
25“Mye nee a vor hanɨngtə, ɓə ndi nzə-gbakaye sɨndə a gaashe, ndi ɓe maɗa dɨ muɗa a hwoɗye, nda kɨla kormi sɨtəwtə ka dyemshe a hwodarən. 26Ite nda tɨla gbyel ka hwoɗye, nda wa hiɗə dɨ vor kɨse da baagən a ɗiyən lə sa mya dɨ ɗa a vor hwoɗye. 27Mya san, ‘Mufanga a kipi, sɨnə mɨna, baagu a bɨlən gbinda naake, gə mɨnate nda mɨna ka myentə ka sɨtɨ dwattə.’
28“Jibiye a ɗa muune, a kwo pɨrtə a hwoɗye. Baagən a dɨmə a dɨ pan, a nyisən gə nda pɨrə hwoɗye. 29Nda sa baagən atɨ, ‘Zə niyi kyawatə ka kyawatə, hɨnə dɨ ɗəwnə kɨsawne. Taa ndaga kwownə lyentə, kat ka itɨngɨn nagi nzə-bogərə kpamləmənti, hwunaa ndaga vi gə hina zɨmə a ɗa hanɨngtə ka yə ndewegi. 30She nzəngəwnə, a dɨɗə ɓaya woyi byengdə gɨnətɨ dəwnə a nə kadawe nda ɓə mɨna, shee sɨnə a hwuna ɓɨlən naake!’
31“Baagən a san, ‘Hii nzə-twaye de! Aa myenə kəw ga a vor hwoɗye fərə-fərə ma? Dii sa na gə kan kat hɨngguna. 32Kat ka angɨn ɓə kana mya ɗa hanɨngtə gəkɨlə mufanga a mbɨri, mɨna ka myentə supo, nda kipə, ɓə dɨma.’ ”
Currently Selected:
Luka 15: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
