Markus 14
14
Mya yaɓwa Yesu ka maarə ɨhɨng-ɨhɨnge a Betani
(Matta 26.1-16; Luka 22.1-6; Yohana 11.45-53; 12.1-8)
1Ite kwalə Lawuttə ɓwaa ka sɨlangsətɨ Zɨm Burodite taa maɗə də mbiɗi bətə kpe, kɨsehəmi kpan-kpanye kat ka ji-lee kəndə ɓashita darən a dɨ ɨl kwatɨfa ta koɗən ka kuta gə təna babɨra Yesu a kɨsa ɓɨlə. 2Shezə təna boyəsə atɨ, “Ɓe myaa ɗam shingɨn a kwalə Lawuttə naasə mwanate ɓa maɗə waka ɓwaare.”
3Ite Yesu nee a vɨra Betani a vor hwoda Siman a ka dagde kɨnɨnɨng, nda dɨ nza a ɓɨdɨmə a dɨ zɨmshe. Itɨ meti a pɨra a hwoɗingɨn ka nzɨ-hubo maara ka pome ɨhɨng-ɨhɨng mya ɗa ka kada mya dɨ wa atɨ nad, sɨne kung ka taa kɨr-kɨr. Ngga wungə kwaamɨ hubo maarəngɨn a bwaɗagən a nə Yesu. 4Imi dɨ vor myee nza hangɨn a tiya byele ka sə ta ɗa yedi-kɨttə tən ta sa atɨ, “Gəkɨlə mɨnə mya kɨɗa wule maarə ɨhɨng-ɨhɨnga ka taa kɨr-kɨr? 5Ɓa ndawula mya ɗərdən ka taa ɓa pɨrgə taa lyentɨ kiwatə hiɗə, a ɓyana ji-poritə taangɨn.” Təna dɨkarə hashi-hashi.
6Yesu a sarən atɨ, “Ɗakamərə ɗəng, ɓə gə mɨnə hwuna dɨ kɨɗa yedingrə? Sə pepeyə ngga ɗe. 7Hwunə ka ji-poritə nagi ndo fərə a hakəwnə, nagi goɗi mgban hwuna mwo, hwun ɓa mba ɗatə ɗarən səfeme. Hɨnggi hɨn tam kəwnə fərə-fərə. 8Ngga ɗa sa nggi ɓa mban a ɗa ngga ɓə yaɓwari ɓəgəng, gəkɨlə ngga ɗadə sɨshi gə we de nə dɨ shi gbyel, aa dɨ ɓongə hɨn ɓa mbɨrə mya ɗɨkri. 9Diyalə na dɨ boyownə, nagi a ndo haa mye ɓa hiwa ka ləmə feməngɨn a vor vɨratə kat, sə mgban mye ɓawa bwelə sa ngga ɗa gə mye ta ɗyanga kaarə.”
10Yawuda dɨ Iskariyoti hiɗə dɨ vor lagbengɨn bəw a mbiɗi-kpe a zə haka kɨsehəmi kpan-kpanye da Yawude gə nda ɗərdə Yesu a vədən a tɨfəngrən. 11Ite təna kɨl ləngɨn hanɨngərən təna mwan atɨ tən ɓa vən taa. Də mgban ndi Yawuda a tiya ɨl kwatəfəgi ɗate ndi ɓa ɗa gə nda vədə Yesu.
Yesu a zɨmshi kwalə Lawuttə ka lagbe dan
(Matta 26.17-25; Luka 22.7-14,21-23; Yohana 13.21-30)
12A fərə kwamətɨ sɨlangsətɨ Zɨm Burodite taa maɗə də, a fəra mya duwa hama ka Nzə-mbaga də, lagbe da Yesu a ɗiyən, “A ndo haa hye dɨ mwo atɨ hina zə a ɗəwdə haa gəkɨlə zɨm sɨlangsətɨ Lawutta?”
13Nda lyen kpe dɨ vor lagbe dan a sarən atɨ, “Pɨrəmə vor vɨratə hwun ɓa peyə ka ama ka kyeɗəwtɨ haɓye a nəngɨn. Koɗəmən a vor hwoɗye. 14Hwun kana pɨrədə, hwuna ɗiyə Həmɨ-hwoɗingɨn atɨ, ‘Nzə-kəndəshe a dɨ ɗi le atɨ: A ndo haa vɨnə omye a gə, hɨn ɓa zɨmshi sɨlangsətɨ Lawuttə ka lagbe de?’ 15Ndi ɓa bɨləwnə kaɓa vɨne a vɨnə pwatə, mye ɗadə haa nzatə ka haa-zɨmshe. Ɗam sɨzɨmtə a hangɨn.”
16Lagbengɨn a muɗə mgban a pɨrə vor vɨratɨngɨn a dɨ pa nagi ndo sə ɓətɨ Yesu a boyərən. Təna ɗa sɨzɨmtɨ kwaləngɨn də.
17Ka kaade Yesu a tɨla ka lagbe dan kat bəw a mbiɗi-kpe. 18Ite tən nza ɓɨdɨmə tiya zɨmshe, nda sarən atɨ, “Diyalə na dɨ boyownə, ɓwaara hiɗə dɨ vorsəwnə a na nza kan a dɨ zɨmshe ɓa vədi a ɗərdi.”
19Təna ɗa yedi-kɨttə ka ləngɨn, nagi ndo ma a vorsərən ta ɗiyən atɨ, “Hɨnə ma?”
20Nda sarən atɨ, “Hiɗə a vorsəwnə hwun minə bəw a mbiɗi-kpetɨnə nza, mangɨn a ɓa ɗərdi nə na dɨ shipdə tɨfe kan a kpaa zɨmtə. 21Hɨn Nze da Ɓwaara ɓa mbɨrə ɓətɨ mya doro nəngɨn a vor Malɨmtɨ Ɗəmɗəmtə a na. Shezə sə oti ka ma ɓa ɗərdi! Ɓa pɨrən ɓe myaa nda mwasarən a vɨratə.”
22Təne a vor zɨm shingɨn Yesu a nggur buroditə nda ɗa hiwtə ka usəkətə a takarə, nda ɓyana lagbe dan a sarən atɨ, “Luwom zɨməm, sɨshi nə.”
23Nda mɨna nggur kpaa, nda ɗa usəkətə, nda vərən, təna soɓwo kat.
24Nda sarən atɨ, “Zaamba nə anə gəkɨlə kɨləsətə, a mya pukadən gə le da ɓwaare hananang. 25Diyalə na dɨ boyownə, taa diyə ga sop haɓi mbwotɨ kada inabitɨnə a vɨratə, zə fəra na sop a hwele kan a vor həmne da Həmɨnpwa.”
26Tən ta ga dimse, təna dɨmə a muɗə nə Motɨ Kade Zetun.
Yesu a kpalə nə məntəməta Bitrus a nəngɨn
(Matta 26.31-35; Luka 22.31-34; Yohana 13.36-38)
27Yesu a sarən atɨ, “Hwun kat ɓa pawo a fokə, gə mye doro atɨ,
“Həmɨnpwa a saa,
‘Hɨn ɓa ɓɨl majine,
mbage kat ɓa gyeɓə
a gbərə hyeɗə-hyeɗə.’#14.27 Naasə: Zakariya 3.7. ”
28“Shezə beetɨ ite hɨn maggə taane, hɨn ɓa pɨrgəwnə a tɨlə vor njiya Galili.”
29Bitrus a san, “Nagi ɓwaare kat ɓa pawo a fokə, hɨn taa dɨ ɗakəw.”
30Yesu a luwa a san, “Diyalə na dɨ boyu, supo ka tukongnə ɗeke ta wa a laka kpe, hye ɓa məntəmə lee shi a laka mwaakɨn.”
31Bitrus a mgbəngə a sa atɨ, “Nagi ɓə nza mbak-mbak na mbɨrə ɓwaa kəw, taa dɨ ga məntəmə sa.” Mbiɗitɨ lagbe dan kat a boyo sə mgban.
Yesu a hiwo Gesamani
(Matta 26.36-46; Luka 22.39-46)
32Təna muɗə a haa mya dɨ wa atɨ Gesamani, kade zetuntə nə də hananang. Yesu a sa lagbe dan atɨ, “Nzam ganə a na dɨ ɗa hiwtə.” 33Nda wa Bitrus ka Yakubu ka Yohana təna koɗən a hangɨn, nda tiya ɗa yedi-kɨttə ka tənətə kɨr-kɨr a vor hubosən. 34Nda sarən, “Vor huboshi nə naa ka tənətə kɨr-kɨr ɓətɨ na mbɨrə. Nzam ganə ɓe hwunaa shenə.”
35Nda ɗaka yə Bitrus ka Yakubu ka Yohana a gɨsə humwa ɓyeləng a gyerə njiya, a ɗa hiwtə atɨ a mwotənə ɗɨmtə, tənətɨngɨn a pɨrə ɓe ndaa soɓwo. 36Nda ɗa hiwtə a waha atɨ, “Baa, nagi ndo sə sɨne pupuluk a hakəw hye ɓa mban a ɗa. A hye mwa nggurigə kpaa tənətɨnə nda pɨrgi. Kat ka angɨn myaa dɨ koɗə kanatɨ de a pɨrgə sa hye kana.”
37Nda mɨna a haka lagbengɨn dɨ mwaakɨnə a dɨ parən təne dɨ sheni, nda sa Bitrus atɨ, “Siman, hyene dɨ shini? Nagi ɓyeləng mgban tee dɨ kula a ɗa hiwta? 38Zə kangəm dwat ɗam hiwtə gəkɨlə ɓe hwunaa fokə vor kadawe ka kanaha da Shetan. Pitə mwa, sɨtə nə taa gəti kaarə.”
39Nda mɨna ɗakarən a mɨnə a dɨ ɗa wule hiwtɨngɨn. 40Ite nda mɨna a hakarən, nda parən baa ɓəgəng təne dɨ sheni gəkɨlə shintə naa pas a diingrən. Tənaa yə lee la tən ɓa boyən. 41Ite nda mɨna a hakarən mɨna mwaakɨnətə dɨ ɗa hiwtə, nda sarən atɨ, “Hwunə puki dɨ sheni dɨ piya baa? Ɓə kənə shee! Fəre kənə. Niyəm, mye vədi hɨn Nze da Ɓwaara a tɨfə ji-ɗa səhase. 42Maɗəm mya muɗəm! Niyəm ma ɗərdi vədi tɨla!”
Mya kɨt Yesu
(Matta 26.47-56; Luka 22.47-53; Yohana 18.3-12)
43Sɨne a vor byele, Yawuda hiɗə dɨ vor lagbe dan bəw a mbiɗi-kpe a dɨma. Nda shi ka ɓwaare furi-furi ka sungwe ka gbɨlasakye dɨ haka kɨsehəmi kpan-kpanye ka ji-lee kəndə ɓashita Musa kat ka mi kpan-kpanye.
44Ndi Yawuda ma ɓa vədə Yesu, liya kɨləsə kaarən atɨ, “Səɓo ma na shawa bwakangɨn sɨnə mangɨn. Kɨsəmrən muɗəm kan.” 45Yawuda a gɨsə tan-tan a zə haka Yesu a san atɨ, “Rabi,” nda shawa bwaka Yesu. 46Mingɨn asɨ takadə Yesu a kɨsə. 47Hiɗə dɨ vor myee kangə hangɨn a dɨr sungwa dan a viriwdən dɨ haka kɨsa da Kɨsahəmə kpane a saggə kwakɨngɨn a dɨmdən vat.
48Yesu a ɗiyərən, “Ɓə ya hwuna ɓə shi ɓa kɨtti ka sungwe ka gbɨlasakye ɓətɨ hɨn makpanə da ji-ɗa sɨkpaki? 49A fərə-fərə, hɨne nza Kwa-Shafe dɨ kəndəshe, hwunaa kɨtti. Ɓəgəng la mya boyə vor Malɨmtɨ Ɗəmɗəmta Həmɨnpwa ɓa naa.” 50Də a hangɨn lagbe dan kat a gyeɓə a ɗakan.
51A nzə-lagba nee də a hangɨn ndaa ɗɨkdə asə a sɨsən pɨrgə sɨ basa nda shapwa, sɨne dɨ koɗə beetɨ Yesu. Ite mingɨn a ɓərə ɓa kɨt nzə-lagbangɨn, 52nda ɗakarən asɨ basa nda shapwa a giɓə a muɗə dɨ fuwa.
Yesu a humwaa peta ji-shalale da Yawude
(Matta 26.57-68; Luka 22.54-55,63-71; Yohana 18.13-14,19-24)
53Təna muɗə ka Yesu a haka Kɨsahəmə kpane, kɨsehəmi kpan-kpanye ka mi kpan-kpanye darən kat ka ji-lee kəndə ɓashita Musa a paya. 54Bitrus mgban a koɗə beetɨ Yesu a haa ɓongətə ta kəsərən kaake baa nda tɨlə a pɨrə voti ta Kɨsahəmə kpane. Nda dɨ nza waka ji-gɨra Shafe a 'ye shi ka Yesu, ta yin ɗiye.
55Kɨsehəmi kpan-kpanye ka mbiɗitɨ ji-shalale a paya kat, tən ta ɨl tɨfa tən ɓa koɗən gə təna ɗɨmgə Yesu le a ɗan ɓashitɨ we a ɓɨlə, kat ka angɨn tənaa ɗɨmə. 56Imi hananang a dɨma ta takale a kəsən jeronye ɓaa, shezə ləməgye darən aa koɗəsə.
57Dɨ bee imi a dɨma a kangə a kəsən i jeronye. Təna sa atɨ, 58“Hin kɨlan sɨne dɨ boyi atɨ, ‘Hɨn ɓa fala Shafanə ɓwaare a nwo, a mɨna nwogən a vor bətə mwaakɨn, wule angɨn aa ɓwaara dɨ nwi.’ ” 59Kat ka angɨn baa ɓəgəng takale da mingɨn aa koɗəsə.
60Beetɨ ləməgingɨn kat, Kɨsahəmə kpane a maɗə a kangə humwaasərən kat, nda ɗiyə Yesu le atɨ, “Tee dɨ luwa le ma? A shiya hye sa ka ləməgyee myee kang kanga a dɨ boyə nanga?” 61Kat ka angɨn Yesu a nza ɗəng ndaa bwe alə.
Kɨsahəmə kpanəngɨn a mɨna ɗiyə Yesu le a san, “Hyenə Ma Həmɨnpwa a Yaɓwarən, Nze da Həmɨnpwa ma ka fukatə kat ma?”
62Yesu a san atɨ, “Hɨnə. Hwun ɓa ne hɨn Nze da Ɓwaara nee nza tɨfə zɨməngə Həmɨnpwa ma ka gətə kat, sə mgban hwun ɓa ne dɨ janga dɨ pwa a vor pərɓye.”
63Kɨsahəmə kpanəngɨn a sara sɨɓwetɨ dan gə yedi-kɨttə a sa atɨ, “Hwun kat hwun kɨlə ka kwakingəwnə. Ɓə lə mɨnə mbiɗi ɓwaare ɓa takale a nəngɨn ɓə? 64Hwun kɨla kɨɗate nda kɨɗa kwakɨ Həmɨnpwa a shartən. A shiya hwuna sa?”
Tən kat təna sa atɨ ɓə wula mya ɓɨltən. 65Imi a tiya ta təfən nawye, təna tak diingɨn ka sɨbaashe, təna mow tefingrən ta dolo nəngɨn, a san atɨ, “Zə kpali! Boyenə ma dolta.” Nggɨree kanyi dɨ gɨra mgban a kɨt lyebsən.
Bitrus a məntəmə lee Yesu
(Matta 26.69-75; Luka 22.56-62; Yohana 18.15-18,25-27)
66Ite Bitrus nee a voti, itɨ nji-kɨsati dɨ vor kɨsee mandye da Kɨsahəmə kpane a shi ɓa pɨrə. 67Ngga naa Bitrus nee kanyi dɨ yin ɗiye, ngga nidən kpəkəkə a san atɨ, “Hye, hwune ɓwaa ka Yesu, nzə-Nazaratɨrə.”
68Bitrus a məntəmətə a sa atɨ, “Taa lee la hye dɨ boyo,” nda dɨmgə vor voti a kangə kwatɨfe. A hangɨn ɗeke a wa.
69Ite nji-kɨsatɨngɨn a mɨna nan kangə kwatɨfe, ngga mɨna sa myee kangə hangɨn atɨ, “Manə sɨne hiɗə dɨ vorsərən.” 70Bitrus a mɨna məntəmətə.
Aa ɓongə myee kangə hangɨn a sa Bitrus atɨ, “Diyalə sə gən, hyenə hiɗə dɨ vorsərən, gəkɨlə hye nzə-Galiliti.”
71A hangɨn Bitrus a kwo le a mɨna məntəmətə a tiya gbətə atɨ, “Taa lee mangɨn a hwuna dɨ bwe le a nəngɨn.”
72Də a hangɨn ɗeke a mɨna wa, wa kpeyətə. Bitrus a ɗyanga ka la Yesu a boyən atɨ, “Ɗeke ta wa a laka kpe, hye ɓa məntəmə lee shi a laka mwaakɨn.” Bitrus a fɨlə ka kawatə.
Currently Selected:
Markus 14: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
