Markus 15
15
Yesu a humwa Bilatus
(Matta 27.1-2,11-26; Luka 23.1-5,13-25; Yohana 18.28–19.16)
1Ka haa kpit-kpite kɨsehəmi kpan-kpanye, ka ji-lee kəndə ɓashita Musa, ka mi kpanye a peyə ka ji-shalale darən a shalasə le a nzadən. Təna ɓwe Yesu a ləkədən a zəkan a haka Bilatus ndi ma sɨnə nggwamnatɨ Yawudiya.
2Bilatus a ɗiyən, “Hyenə həme da Yawude ma?”
Yesu a luwa a san atɨ, “Hye boyo ka nənanga.”
3Kɨsehəmi kpan-kpanye a maɗə ta ɗəmgən ləməgye som-som. 4Bilatus ɓe kɨl ləməgyee mya dɨ boyə nə Yesu, nda mɨna sa Yesu atɨ, “Hye sa ka ləməgyee a shiya? Tee dɨ bwe le ma?”
5Yesu aa wuna a bwe alə. Bilatus a ndələ ka ləngɨn.
6Təne ka kwale a təna dɨ ɗarən, a fərə kwalə Lawuttə, ɓwaare a dɨ nyisə yə həmi njiya gə mya pararəngə ɓwaara hiɗə a ma mya ɗɨkə gbərəwe. 7Ama nə də mya wa atɨ Barabas mya gbən a gbərəwe gəkɨlə sɨne hiɗə dɨ vor myee maddə mwanatə, mya peyə a nya a ɓɨl we. 8Ite ɓwaare hananang a paya təna nyisə Bilatus atɨ nda koɗə kwala nda duwa ɗarən a fərə kwalə Lawuttə.
9Bilatus a ɗiyərən, “Hwuna dɨ mwo atɨ na parəwnə Həme da Yawude ma?” 10Bilatus a ɗiyərən sə gə ɓə leyə atɨ jiwnə ɗɨkdə kɨsehəmi kpan-kpanye təna ɓə kɨsa Yesu a shikan gə mya ɓɨlə. 11Shezə kɨsehəmingɨn nə ngama le, ɗɨkdə ɓwaare təna sa atɨ mya pararəngə Barabas.
12Bilatus a mɨna ɗiyərən atɨ, “Ɓə ya na ɗa ka manə hwuna dɨ wa atɨ Həme da Yawude?”
13Tən kat təna maɗə ta gəəshe atɨ, “A mya ɓɨdɨmdən a gbaltən! A mya ɓɨdɨmdən a gbaltən!”
14Bilatus a ɗiyərən atɨ, “Ɓə gəkɨlə mɨnə mya ɓɨltən? Ndawula səhasə nda ɗa?”
Tənaa yə sardə kwakingrən, təna pɨrə humwa ka gəəshe ka kormingrən a pwa atɨ, “A mya ɓɨdɨmdən a gbaltən!”
15Gəkɨlə Bilatus a dɨ mwo atɨ haa nɨngə ɓwaare, nda pararəngə Barabas a dɨmdən gə gbərəwe, nda vədə Yesu mya byengrən, nda shea vədən gə mya ɓɨdɨmdən a gbaltən a ɓɨlə.
Ji-gyelmbutə shar Yesu
(Matta 27.27-31; Yohana 19.2-3)
16Ji-gyelmbutə a ləkədə Yesu a pɨrə kan a vor voti ta Bilatus, mbiɗitɨ ji-pakawatɨ Roma a paya kat. 17Təna kan wule rukute da həmye wule a ka ɗuwo gaaɗətə, təna tak mbulo hwole a ɗɨkən a nəngɨn. 18Gə təna shartən, təna shea kalan-gbəətə ta san atɨ, “Naa həmne a gɨrə kwe Həme da Yawude!” 19Tən ta lyebrən ka kada a nəngɨn, tən ta təfən nawye anəsə, anəsə. Təna gyerə njiya ta kalan-gbəətə. 20Ite təna shartən kat a mbəə, təna sɨɗan gə rukutəngɨn a kalan sɨɓwetɨ dan. Təna ləkədən a zəkan a haa tən ɓa ɓɨdɨmdən a gbaltən də.
Mya ɓɨdɨmdə Yesu
(Matta 27.32-44; Luka 23.26-43; Yohana 19.17-27)
21Ite tən dɨmə dɨ muɗi, təna peyə ka ama mya dɨ wa atɨ Siman a dɨ Sireni sɨnə baagə yə Alezanda ka Rufus, sɨne dɨ mɨnagə itɨ vɨrati, təna bɨlən mbamtə a ɗɨkdən nda nggur kada ɓɨdɨmta Yesu. 22Təna ləkədə Yesu a zəkan a haa mgbənga mya wa atɨ Golgota. Naarə kwakɨngɨn nə Haa Kpəəkəne. 23A hangɨn təna vən vwo gbaanga mya pedən ka nggumo kwata mya dɨ wa atɨ mərtə, Yesu a kwo soptə. 24A haa mgbəngəngɨn təna ɓɨdɨmdə Yesu a gbaltən. A shea pa-bara gə təna lee sa nagi ndo ma ɓa ɗɨmə nə sɨɓwetɨ dan.
25Ite mya gbal Yesu, fəre nggɨra bai ka mbwayi fəre dombiɗətɨ hawure. 26Təna dorshe a galingə nə kada ɓɨdɨmta Yesu gəkɨlə ɓwaare a lee sa ɗa mya ɓə ɓɨltən. Shee mya doro a sa atɨ, həme da yawude. 27Təna gbal i ji-ɓodəkha kpe a haka Yesu, hiɗə a tɨfə zɨməngən, hiɗə mgban a tɨfə lyekɗəngən.#15.27 I dorshi kada 28 a sa atɨ, “Ka ɗatɨngɨn la mya doro vor Malɨmtɨ Ɗəmɗəmtə a nəngɨn ɓa naa atɨ, ‘Sɨnə mye bəltən a vor ji-ɗa sɨkpakye.’ ” Naasə: Ishaya 53.12. 29Myee dɨ pɨri dɨ tɨfəngɨn a haa mya gbal Yesu də, a nidən a rikiyə a tiya ɗaasən, tən ta sa atɨ, “Ləngɨn nee! Ama sa atɨ ndi ɓa fala Shafe a mɨna nwogən a vor bətə mwaakɨn, 30zə mbədə nanga janga gə nə kada ɓɨdɨmtə!”
31Sə mgban, kɨsehəmi kpan-kpanye kat ka ji-lee kəndə ɓashita Musa a shartən tən ta boyəsə atɨ, “Nda mbədə imi, ɓə ya ndaa mbədə nəngɨn? 32Ɓə ndi ma sa atɨ sɨnə Ma Həmɨnpwa a Yaɓwarən a ndi Həme da mi Israila a janga ɓəgəng dɨ nə kada ɓɨdɨmtə gə hina nan a mwakan.” Tən ji-ɓodəkhangɨn 'ye mya gbaltɨrən ka Yesu mgban a ɗaasə kan.
Mbɨrta Yesu
(Matta 27.45-56; Luka 23.44-49; Yohana 19.28-30)
33Itɨngɨn fəre nee bai, kulitə a nzaa kɨsə a gbəə haa kat baa a tɨlə mbwayi fəre mwaakɨn. 34Ka mbwayi fəre mwaakɨn, Yesu a waha ka korme kaɓa kpan ka kwaame darən, “Eloi, Eloi, lama sabaktani.” Naarə ləngɨn nə atɨ, “Həmɨnpwa de, Həmɨnpwa de, mɨnə ɗa hye ɓə ɗake dɨsəri?”#15.34 Naasə: Dyemshe 22.1.
35Ite myee kangə hangɨn gbyel a kɨl ləngɨn, təna sa atɨ, “Kɨləm, sɨndə dɨ wa Iliya.” 36Ama a giɓa a nggur sɨbaashe a shipə vwa gbaanyi-gbaanyi a zuɓo kada a ɗifə Yesu gə nda soɓwo. Mangɨn a sa atɨ, “Ɗakamən ɗəng. Mya niyə anda Iliya ɓa shi asɨ jangadən.”
37Ite Yesu a maddə kormɨngɨn kaɓa kpan a waha, nda fuwa pitɨ kpawtɨ dan a shea mbɨrə. 38Də ɗəng səpate a vor Shafe a sɨra dɨ pwa a zə njiya, a təkə kpe. 39Ite gyana nyate kangə hangɨn gbyel a humwa Yesu ɓe naa sa ɗa a wule mbɨrte nda mbɨrə, nda sa atɨ, “Diyalə manə Nze da Həmɨnpwa nə!”
40I mandi a kangə ɓong-ɓong ta naa sa dɨ ɗa. A vor mandingɨn, Maryamu dɨ Magdala nə də, ka Maryamu nuwogə Yakubu nzə-swaɗe ka Yusufu, ɗɨkənə Salomi. 41Dɨ vor njiya Galili mandingɨn a kwaɗa Yesu ta gwadən. I mandinə də hananang 'ye kwaɗan shi Urshelima.
Ɗɨk wo Yesu
(Matta 27.57-61; Luka 23.50-56; Yohana 19.38-42)
42Itɨngɨn myenə dɨ ran-sɨkwale, haa ɓa kɨɗa fərə piyatɨ da Yawude. 43Ama nə də kwakɨngɨn nə Yusufu, dɨ vɨra Aramatiya, sɨne hiɗə dɨ vor mi kpan-kpani peta ji-shalale, ndi ma ka nənəngɨn sɨne dɨ kula shita həmne da Həmɨnpwa. Ka kaadə fərəngɨn, nda mwamdiya a dɨmə bwang a zə haka Bilatus a nyisən gə nda ɗakan nda nggur wo Yesu a ɗɨkə. 44Ite Bilatus a kɨlə, le a ɓwan ka ite atɨ Yesu mbɨrə she gbyel. Nda wa gyana nyatə a ɗi le gə nda leyə anda Yesu mbɨrə. 45Ndi ta kɨli gyanangɨn san atɨ Yesu mbɨrə, Bilatus a ɗaka Yusufu atɨ nda nggur wongɨn a dɨ ɗɨkə. 46Də Yusufu a dɨ ɗara foowe asɨ jangadə wo Yesu gə nə kada ɓɨdɨmtə. Nda vut we ka foo-wongɨn, nda nggur wongɨn a ɗɨkə taana mya ɗa a gonggoro faratə. Nda mgbəngtəngdə farate mya ɗa pinglɨn gə gbəə kwaamɨ gwongɨn a gbən. 47Maryamu dɨ Magdala, ka Maryamu nuwogə Yusufu, a dɨ niyə kpəkəkə a dɨ naa haa mya bədə wo Yesu də.
Currently Selected:
Markus 15: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
