Gimpuunan 22
22
Sinugu Diyus si Abraham kuntay Handugan si Isaak
1Pagka sa usa ka sirang, sinubukan Diyus si Abraham. Tinawagan niya si Abraham ag sinmagut siya sa kanya. 2Bag-u magkun ti Diyus, “Daran-a kanmu bugtung#22:2 bugtung: ngatay, palangga. ag pagmahalun pag anak si Isaak bag-u pag-atag kamu sa daga Muriya. Pagdayik kamu sa itudlu niku pag bantud sa kanmu bag-u ati nimu pag ihandug sa kangku kanmu anak si Isaak, bilang handug pagsunugun.”
3Nakan igu sa sunud pag sirang, surip waya gid si Abraham nantaris-ak manga kayu pamagba sa handug, bag-u ikinarga niya inda sa kay asnu. Linmakaw siya kaibahan si Isaak hanggan kay duwa ka suruguun lalaki atabug sa rugar sinabi Diyus sa kanya. 4Pagka sa ikatlu pag sirang sa kanda maglakaw, nakitan ni Abraham balaw arayu ti rugar sinabi Diyus sa kanya. 5Nakan magkun si Abraham sa duwa niya ka suruguun, “Sitay lang dap kamu, bantayi niyu ti asnu, dahil mantukad kami hampay ati mansamba sa Diyus. Ataytag di kami.” 6Ipinapas-an ni Abraham sa kan Isaak ti manga kayu pamagba sa handug, bag-u siya ti nandara utak hanggan apuy.
7Habang maglakaw sida, magkun si Isaak, “Amang!” Sinmagut si Abraham, “Hayga anak?” Nagpaingana si Isaak, “May dara duy kita apuy hanggan manga kayu pamagba dapat naan duy pag karanidu kanta ihandug?”
8Sinmagut si Abraham, “Anak, ti Diyus di ti manpakaun kanta handug karanidu.” Ag naparargu sida sa kanda maglakaw.
9Pagka rinmas-ug sida sa rugar sinabi Diyus, namuwat si Abraham harandugan, bag-u itinungbaw niya ti manga kayu pamagba sa kay babaw inda. Bag-u ginapus niya si Isaak ag itinungbaw sa babaw harandugan. 10Bin-ul niya kay utak, ag pagka matyun yi mana niya si Isaak, 11tinawag siya anghil Panginuun ginan sa langit, “Abraham! Abraham!” Sinmagut si Abraham, “Hayga duy!” 12Magkun ti anghil, “Danga duy pagmatya kanmu anak! Taynguna, napatutuuhanan yi niku may dala kawu sa Diyus dahil balaw nimu inirangan kanmu bugtung pag anak.” 13Igu nan-aliwliw si Abraham, nakitan niya ti usa ka lalaki karanidu kay sungay masangitan sa rikut, ag unman yi inda makakalpas. Nakan bin-ul inda ni Abraham ag ihinandug bilang handug pagsunugun sa halip kay anak. 14Iningarnan ni Abraham tunda pag rugar “May inalistu ti Panginuun.” Nakan tugka taynguna may kabagawan magkun, “Sa Bantud Panginuun may inalistu siya.”
15Tinawag maan anghil Panginuun si Abraham ginan sa langit. 16-17Magkun siya, “Inda kay pagsabihun Panginuun: Magsumpa aku sa kang sadili papaladan gid niku kawu lubus dahil balaw nimu inirangan aku sa kanmu bugtung pag anak. Pakan-an gid niku kawu manga linahi ga manga pamgasan kay kayamu sa langit ag ga baras sa baybay dagat. Sakupun nida ti manga banwa nida manga kalaban. 18Ag sa panab-anan nimu linahi, papaladan niku ti tanan nasyun sa kalibutan, dahil nagsunud kawu sa kangku.”
19Siyun ginan, binalikan nida ni Abraham ni Isaak kanda manga suruguun. Bag-u nuli sida sa Biirsiba ag ati yi pag nangulian.
Kay manga Linahi ni Nahur
20Pagka sa usa ka sirang, nabaritaan ni Abraham kay patar-ari niya si Nahur may manga anak yi sa kan Milka: 21Si Us kay panganay, kay sunud si Bus, si Kimwil (kay ama ni Aram), 22si Kisid, si Hasus, si Pildas, si Hidlap ag si Bitwil. 23Sida walu kay manga anak ni Nahur sa kan Milka. Si Bitwil kay ama ni Ribika. 24May manga anak diman si Nahur sa usa waya niya ka asawa si Riyuma. Sida ni Tiba, ni Gaham, ni Tahas ag ni Maaka.
Currently Selected:
Gimpuunan 22: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
